Səɓəlari 31

Mji Na Masəkur Nam Tentər Vəngkər Səli

1Antə MTHLAKU pəla aka Musa, 2“Nggədza I ku carɓəla Bezalel na ɓzər Uri na ɓzər Hur na akwa dur Yahuda. 3Antə I nghyantə ni ka mambələrna, ka ɗəɗukur ka masəkukur ka səndərsu akwa kəthlər tsi, 4kamnyar ka tsa mzhi ɗahətə su ɓɗak laga, ka namtə su ka dinar, ka adzərfa, ka əmza, 5ka marəmta pelayeri na ka daraja ka patə ɗa, ka marəmta udzəm, tsuwa ka tsa ndzi masəku akwa shanga kəthlərər tsi 6Nggədza tsuwa I ku carɓəla Oholiyab na ɓzər Ahisamak na akwa nyarmbwar Dan, ka tsa dlar ni. Tsuwa I ku hamta ɗəɗukur aka shanga mji na masəku akwa hara kəthlər tsi, kamnyar ka da mzhi hara shanga suayeri tə I tsawa ala gə ni.”

7“Tentər vəngkər səli, ka Akwati Alkawal, ka sur hartə kərari, ka shanga kariyir kutambwar tent ni,

8Ka tebər ka kariyirni, ka zwalər kəsi pitəlayeri tə mdə nam ka dinar shini ka shanga kariyirni, ka bagaɗiyir mba tulari ɗuza,

9Ka bagaɗi mbamba ka shanga kariyirni, ka tasa na ola ka sur vətə ni,

10Ka ləptər pristkur tə mdə tsatə ɓɗak laga, ka ləptayeri na ɓɗakkarkara aka Haruna na prist, ləptayeri aka maɗashilərni, kamnyar kəthlərər ɗa na ar pristkur,

11Ka mal ar hamta mda aka Hyel, ka tulari ɗuza na kiskisu kamnyar Vəi na Ɓɗakkarkara.”

“Ma sakatə da akwa nam su nayeri ni, ka da namtə ɗa kalkal apatə I tsawa ala ga.”

Vir Ghərəmtaghəra Na Akwa Sati

12Antə MTHLAKU pəla aka Musa, 13“Ka gə pəla aka mjir Israila, ‘Ka giri ɓəla Vir Ghərəmtaghəra, kamnyar ngəni an seɗa na akwa daɓwa mburu kəga giri baɗita ashina har tsikəra zamanayeri ar giri, kamnyar ka giri sənda abbər, I an MTHLAKU na ku namtə giri ɓɗakkarkara. 14Ka giri ɓəlatə Vir Ghərəmtaghəra kamnyar tsa an vir na ɓɗakkarkara ala giri. Kəlara mdə na ku diɓərantə ni mda ata tsi ni. Tsuwa kəlara mdə na ku hara kəthlər akwa vir ngəni, mda ata ndəkəmta ni ka mjirni. 15Giri ka virayeri ngkwa tə giri ata mzhi kəthlər akwa, amma vir na murfəkur an arna, antə tar ka tsa ndzi Vir Ghərəmtaghəra. Antə kəlara mdə na ku hara kəthlər vir nda mda ata tsi ni. 16Antə ka mjir Israila ɓəlatə Vir Ghərəmtaghəra na akwa sati ni ka da ləkəma ka ɓəlari akwa shanga zamanayeri arɗa, kamnyar ngəni an alkawal na ata ndzi ba saka madi. 17Vir ngəni ata ndzi seɗa na ba saka madi akwa daɓwa yeru kəga mjir Israila, kamnyar akwa vir ngkwa antə MTHLAKU ku namtə vəi na amtazi ka duniya, amma akwa vir na murfəkur tsa aɗi hara kəthlər wa, tsa ata ghərəmtaghəra.’ ”

Pelar Allowayeri Suɗa Ar Alkawal

18Sakatə MTHLAKU na Hyel ku kuri gari aka Musa ata Gar Sinai, antə tsa hamta aka Musa pelar allowayeri suɗa ar alkawal, alkawal natə Hyel an rəbutə ka kuleng tsiyari.

Currently Selected:

Səɓəlari 31: KNB

Highlight

Copy

Compare