Səɓəlari 13

Hamta Maɗa' Shili Na Yarakəma Aka Hyel

1Antə MTHLAKU pəla aka Musa, 2“Ka gə hamta ali shanga maɗashili na yarakəma ka da ndzi kula biku. Kəlara ɓzər sal ar mjir Israila natə tsa an baɗitə kəlar kuta mama'ni, tsa ata ndzi arna, wala ar mda wala ar mwaɓi.”

Vir Kucalər Buradi Na Kula Yist

3Antə Musa pəla aka mji abbər, “Ka giri ɗangtə vir ngəni tədəku, vir tə giri ku səɓəla akwa tsəɗi Masar, vir tə giri səɓəla akwa mafakur. Kamnyar MTHLAKU an fwaɓəla giri akwa vəi ngəni ni ka dunari. Antə vir nda giri aɗiya kwasə buradi tə mdə ɓwa ka yist wa. 4Ashina akwa thliyar Abib ni antə giri akwa ləɓəla akwa Masar.”

5“Antə ma sakatə MTHLAKU ku mwantə nga akwa tsəɗiyir mjir Kanana, ka mjir Hitti, ka mjir Amor, ka mjir Hivi, ka mjir Yebusi, tsəɗi natə MTHLAKU ku kətə alkawalər hamtari aka kəkayeri ar nga, tsəɗi na ɓɗaku, na ata ya su, antə kara hara sur vəngkər səli ngəni akwa thliya ngəni. 6Ga ata ləkəma ka kwasə buradi har vir murfa, antə akwa vir na murfəkur ka gə hara sur vəngkər səli aka MTHLAKU. 7Ga ata ləkəma ka kwasə buradi na kula yist ni har vir murfa. Antə akwa virayeri ngəni, mda aɗi akwa bara ka mdə wutə buradi tə mdə ɓwa ka yist wa, wala kəlara su na ka yist wa, wala wutə yist ata vəi tə ga ata wa. 8Akwa vir ngəni ka waskəi pəla aka ɓzərni abbər, ‘I akwa hara vir kucali ngəni an kamnyar ɗangtə su tə MTHLAKU hara ali sakatə I akwa səɓəla akwa Masar.’ 9Antə vir kucali ngəni ata ndzi apa seɗa laga ata tsiya ga, ka apa sur ɗangtə ata murkəma ga, kamnyar ka surthlipər MTHLAKU ndzi akwa mnya ga, kamnyar MTHLAKU an kəɓəla nga akwa Masar ka dunari. 10Antə kamnyar ngəni ka gə ɓəlatə tsawur vəngkər səli ni tədək məva, tsuwa akwa sakari.”

Hamta Yarakəma Aka Hyel

11“Antə ma sakatə MTHLAKU ku mwantə nga akwa tsəɗiyir mjir Kanana, apatə tsa ku kətə alkawalari ala gə kəga kəkayeri ar nga, tsuwa tsa ku hamta ala ga, 12to kara hamta kəlara ɓzər sal na baɗitə kəlar kuta mama'ni aka MTHLAKU. Shanga yarakəmayeri na ɓzər sal ar mwaɓi, ka gə hamta ɗa aka MTHLAKU. 13Kəlara yarakəmar kwara na salari, ga ata pəli mpikari akəla MTHLAKU atar hamta ɓzər gam ata vəyari. Amma ma ga aɗi ata hir pəli ni wa, ka gə ɓələmta wulyari. Amma kəlara ɓzər sal na yarakəmar nga ata ndzi dwali ka gə pəli ni. 14Antə akəmazi, ma ɓzər nga ku yu nga abbər, ‘Man karapur su ngəni ri?’ Ka gə pəla alari abbər ‘Atar dunar kuthlikur tə MTHLAKU kəgari antə tsa ku fwaɓəla yeru akwa Masar, watau akwa tsəɗiyir mafakur. 15Sakatə kuthli ku namtə ɗəffari ɓəɓal, ka nggəlar ta psi yeru ka yeru təra, antə MTHLAKU ku tsəgəi shanga maɗashili na yarakəma akwa tsəɗi Masar, yarakəmar mda japu ka na ar mwaɓi. An su na hara tə I ana hamta shanga yarakəmar mwaɓi na salari saɗaka aka MTHLAKU ni. Amma I ana pəli shanga maɗashili na yarakəmarna.’ 16Antə tsawu ngəni ata ndzi apa seɗa ata tsiya ga, ka sur ɗangtə ata murkəma ga abbər MTHLAKU an fwaɓəla yeru akwa Masar atar dunar kuthlikur arni.”

Mjir Israila Akwa Ləɓəla Kazhar Masar

17Sakatə kuthli ku zhar mji ni ka da təra akwa tsikərari, Hyel aɗi hir ka da nu laku na təramta akwa tsəɗi Filistiya wa, wala tə tsa an laku na kwadangari. Kamnyar Hyel pəla, “Ta ma mji ni sə kəɓa ka mpa ka da sə pali dzamər ɗa, ka jaktə ngka ahar Masar.” 18Amma Hyel təra ka da akwa lakur kwarta akwa mtaku atar Manda Duwathlu. Antə mjir Israila ku ləɓəla kazhar Masar apa sojayeri na ɗəmhəɗəmhari kamnyar mpa.

19Antə Musa ku fatə ɗethlər Yusuf ka təra kəgari, kamnyar tə Yusuf ku kurtə vu mjir Israila tə da kahyel abbər, “Jiri, MTHLAKU ata si adzə giri kamnyar ka tsa fwaɓəla giri kazhar vəi ngəni. Antə akwa saka ndaga ka giri kətə ɗethlərna ka giri təra kəgari.”

20Antə mjir Israila ku thlatə kazhar Sukkoth, ka mwari ka fəli ahar Etam na ata mnya mtaku. 21Təpci MTHLAKU ku təramta akəma ɗa akwa dlamba na kəkəsu kamnyar pwar ɗa ata laku, antə viri tsuwa tsa ku mwa akəma ɗa akwa kyanggyara u'u, kamnyar hamta ala ɗa parakəu, kamnyar ka da mzhi mwa təpci ka aviri. 22Dlamba na kəkəsu təpci ni wala u'u na aviri ni aɗi ana ndəkə ka mji ni wa.

Currently Selected:

Səɓəlari 13: KNB

Highlight

Copy

Compare