Kəth Apos 20

Bulus Ku Ngka Akwa Tsəɗi Makidoniya Ka Gris

1Aghəla tə kurakər mpa ni ku mtathli, antə Bulus thlenta abbər ka mdə kəga alari mjir nu ni. Sakatə tsa ku gari ka dunautə ɗa, antə tsa salamtə ɗa ka təra mwari ahar Makidoniya. 2Sakatə tsa ku dlarhə bwayeri ngəni shang, ka dunautə ɗa swaiswai, antə tsa si akwa tsəɗi Gris. 3Antə tsa hara thliya makər azi. Sakatə tsa akwa ɗəmhədzər ləkwa ka tsa mwari ahar Siriya, təng mjir Yahudi ɗəmhə ɗimikur laga ata kərari. Antə tsa kwamta abbər kuji ka tsa ngka atar Makidoniya. 4Mji na pwar Bulus an Sopaturos na ɓzər Purus na thlata ahar Biriya, ka Aristarkus ka Sekundus na thlata ahar Thlassalonika, ka Gayus na thlata Darbe, ka Timothli, har kəga Tikikus ka Trofimus na thlata akwa tsəɗi Asiya. 5Apani mji nayeri ku təra kəmata yeru, ka ra sək yeru ahar Trowas. 6Antə ar yeru, aghəla virayeri ar kucalər Buradi Na Kula Yist, antə yeru thlata ahar Fəlippi akwa shar ka ra wutə ɗa ahar Trowas, aghəla vir ntəfu. Antə yeru hara vir murfa anda tsuwa.

Bulus Ku Tsikəra Lənggurni Ahar Trowas

7Akwa vir na ntangkəma ar sati, sakatə yeru tsaptədzi ata kəma duku kamnyar səm susəmər hirdzi, antə Bulus gari aka mji, kamnyar tsa akwa bara ka tsa təra kurər virari. Antə tsa ku gari ka fəi har vədza aka kərathlər viri. 8Tsuwa pitəlayeri aɗi hang na akwa hamta parakəu akwa mbwa na amta natə yeru tsaptədzi akwa ni. 9Ɓzərdakwi laga aɗi ka thləmari Yutikus andzəndzi ata windau, na ku heni fitu, sakatə Bulus akwa ləkəma ka gariyirni ni. Sakatə heni ni ku səm ni antə tsa təri kazhar windauwur mbwa na makərkur ni, ka təri ata di, tə mdə kətə ni mtəmtari. 10Amma Bulus ləghəi, ka nggyarghəidzi ata kərari, akwa fəfahə ni, ka pəla, “Giri aɗiya damitədzi wa, tsa tsu ka mpika!”

11Antə Bulus jaktə ngka akwa mbwa na amta ni, ka ɓəli buradi ka kwasa. Antə tsa ləkəma ka gari kəga da har tə vir kura, kambəla tsa təra. 12Antə da kətə ɓzərdakwi ni ka mpika, ka təra akwa kucali ka duna.

Bulus Ku Thlata Ahar Trowas Ka Mwari Ahar Miletus

13Ar yeru tsuwa yeru ləkəma ka mwari adzə shar ni, ka ləkwa ka mwari ahar Assos, abbər yeru ata ra kətə Bulus anda. Kamnyar apani antə ɗəmha, abbər arni tsa ata mwa ka səl. 14Sakatə yeru ku kəɓa ka tsa ahar Assos, antə yeru kətə ni akwa shar, ni, ka təra mwari ahar Mitilene. 15Thlatər yeru anda akwa shar ni, antə yeru mwari aɓəla bwanda ahar Kiyos səɓəla ɗəpari. Səɓəla ɗəpari tsuwa antə yeru mzhitə Samos, səɓəla ɗəpari damwa antə yeru mzhitə Miletus.

16Kamnyar hwatu Bulus thlamta akwa ɗəffari abbər tsa ata təramta Afisa, kamnyar ta tsa asə shamta saka akwa tsəɗi Asiya, kamnyar tsa akwa bara mwari ahar Urushalima taktar, akwa vir Kucalər Pentikost ni, ma ahara.

Bulus Ku Ngkər Gari Ar Salamtə Mji Na Ol'olər Afisa

17Sakatə Bulus ahar Miletus antə tsa thlentə ka mdə kəga alari mji na ol'olər ikələziya na ahar Afisa. 18Sakatə da ku si adzə ni, antə tsa pəla ala ɗa,

“Giri ka kəra giri ku səndə jili laku tə I ndzəndzi akwa nca giri, təng sakatə I vu səli akwa tsəɗi Asiya. 19I akwa hara kəthlər aka Mthlaku ka tərghəikər swaiswai ka shimwi. I ku nggitə shanga ngkərtədzayeri na wutə ra atar kəmanggarkur tə mjir Yahudi kəɗar ɗəmhari ata kəri. 20I aɗi ɗar zhar ngkər ala giri su na ɓɗaku na ata dlar giri wa. Tədəku I akwa thlipa ala giri akwa aɓəla nca mji, ka tsuwa ata kəi ata kəi. 21I ku kəɗar ngkərɓəla aka mjir Yahudi kəga mjir Helleni akwa tsaktə ɗa abbər kuji ka da tubi aka Hyel, ka da hamta jiri aka Mthlakər mburu Yesu Kristi.

22“Nggədza kulini ku ndzi dwali kəi kələngkər aka Mambəl na Ɓɗakkarkara, antə I ata mwari ahar Urushalima, tsuwa I aɗi səndə jili su na ata sə wutə ra anda wa.

23“Su tə I səndə daci an Mambəl na Ɓɗakkarkara ku ncaɓəla ali abbər, akwa kəlara di, mbwi ka bwaniyayeri akwa sək ra. 24Amma I aɗi namtə mpikəi abbər tsa su na daraja laga ali wa, ma har I ata mzhi kuri su na akəmi, ka kəthlər tə I dlu akəla Mthlaku Yesu, abbər kəi ngkər labar na msəra ar ɓɗakkur tə Hyel hara ala mburu. #2 Tim 4:7

25“Tsuwa kulini I ku sənda abbər shanga giri natə I ku ngkər kuthlikur Hyel akwa nca giri ni, mda akwa nca giri na ata jaktə wutə ra kəra wa. 26Antə I akwa pəla ala giri ashina abbər I ku pəla ala giri jirkur, antə mda aɗi na ata nu ra watsəɓər bikərni wa. 27Kamnyar I ku pəla ala giri shanga su tə Hyel akwa bara ka giri sənda. 28Ka giri wulwul kəra giri, ka shanga ciɓa natə Mambəl na Ɓɗakkarkara ku vu akwa tsiya giri abbər ka giri wula. Ka giri wulwul ikələziyar Hyel natə tsa ku wuta aka kərari atar mamshir Ɓzərni.

29“Kamnyar I ku sənda abbər ma sakatə I ku təra, kilamtakayeri aɗi ata sə si akwa nca giri, tsuwa da aɗi sə zhar ciɓa nə wa. 30Har ma akwa nca giri kəga kər giri, mji laga ata sə thlata ka thlandər aka mji, kamnyar ka da ndəkərəmta mjir nu ni abwar ɗa. 31Antə ka giri ndzi ɗəmhəɗəmhari, ka giri ɗangta abbər kulini məva makər pci ka viri I akwa dingngga tsaktə giri, har ka shimwi.

32“Antə kulini I akwa hamta giri akwa tsiya Hyel, ka ndərərni na nghyinghyari ka ɓɗakkur, na ata mzhi kəlantə giri ka na ala giri kifa ata kəma duku ka shanga mji na ɓɗakkarkara. 33I aɗi ɗar ngguktə sur mdə wa, wala an kwaba wala kari hatə wa. 34Giri ka kəra giri ku sənda abbər I ku hara kəthlər ka tsi, kamnyar ka yeru kəga mji na adzə ra, wutə shanga su tə yeru akwa turari. 35Akwa shanga suayeri ngəni I ku ncanta ala giri abbər ku ndzi dwali ka giri hara kəthlər apani, kamnyar ka giri mzhi dlar mji na kula duna. Tsuwa ka giri ɗangtə su tə Mthlaku Yesu pəla, abbər, ‘Barkar hamta su ku təramta na ar dlu su.’ ”

36Sakatə Bulus ku kuri gari ni, antə tsa zuzuri ka hara adduwa ata kəma duku kəga da. 37Antə shanga ɗa putə tuwa, ka bəbartə wulya Bulus akwa vədza kəsəm mnya ɗa alari. 38Na olari da ndzi ka ɗəffə ɓzəɓza kamnyar gari tə tsa pəla ala ɗa abbər da aɗi ata jaktə wutə ni kəra wa ni. Apani antə da pwar ni ka mwantə ni adzə shar ni.

Currently Selected:

Kəth Apos 20: KNB

Highlight

Copy

Compare