TITA 2
2
Zirtîrna hrisêl
1Nang erawh chuan zirtîrna dik tak nêna inhmeh thu sawi rawh. 2Putarte chu insûmthei, zahawm, rilru fel tak, rinna leh hmangaihna leh chhelnaah dik tak ni tûrin fuih rawh. 3-5Pitarte pawhin Pathian Thu chu sawichhiatin a awm loh nân - la nula deuhte chu an pasalte hmangaih tûr te, an fate hmangaih tûr te, rilru fel taka awm tûr te, thianghlim taka awm tûr te, mahni ina thawktua awm tûr te, ngilneia awm tûr te, mahni pasalte thû thûa awm tûr tea an thunun theihna tûrin, an awm dân rênga Pathian zah mite niin, hêktute leh uain heh mite ni lova, ṭha lam zirtîrtute ni tûrin fuih bawk rawh.
6Chutiang bawkin tlangvâlte chu rilru fel tak pu tûrin fuih rawh. 7,8Lehlama ṭangte zînga miin kan chungah thu ṭha lo rêng sawi tûr an neih loh avânga an zah theih nân, engkimah thil ṭha tih kawngah tihhmuhtuah intilang la, i zirtîrnaah chuan i takzia te, i zahawmzia te, i thusawi dikzia sawisêl rual loh te chu tilang rawh.
9,10Bâwihte chu, Pathian kan Chhandamtu zirtîrna thu hi engkima an chei mawi theih nân, hnial lovin, kutkem hmang lovin, rinawmna ṭha zawng zawng tilang zâwkin, an pute thû thûa awm tûr leh, engkima an lâwm zâwnga awm tûrin fuih rawh. 11Mi zawng zawng hnênah chhandamna rawn thlenin Pathian khawngaihna a lo lang ta si a; 12-13beiseina lâwmawm - kan Pathian ropui tak, Chhandamtu Isua Krista ropuina inlârna chu - nghâkin, Pathian ngaihsak lohna leh khawvêl châknate bânsanin, tûnlai khawvêlah hian insûm leh fel tak leh Pathian ngaihsakin kan awm tûr a ni tih min zirtîr a. 14Ani chuan bawhchhiatna zawng zawng lak ata min tlan theihna tûr leh, chi thlan bîk, thil ṭha tiha ṭhahnemngai, ama tâna a tihthianghlim theihna tûrin kan aiin a inpêk kha. #Ex 19.5; Deut 4.20; 7.6; 14.2; Sam 130.3; 1 Pet 2.9
15Thunei takin chûng thu chu hrilh la, fuih la, zilh rawh. Tu mân hmusit che suh se.
Currently Selected:
TITA 2: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.