SAM 91
91
Min vêngtu Pathian
1Chungnungbera bihrûkna hmuna awma chu,
Engkimtitheia hlimah chuan
a awm reng ang.
2 Lalpa chung thûah chuan,
“Ani chu ka inhumhimna leh
ka kulhpui a ni a;
Ka Pathian, ka rina chu a ni,”
ka ti ang.
3Ani chuan thangkamtu thang
lakah leh
Hri ṭha lo tak lakah chuan
a chhan him dâwn che a ni.
4A thlain a khuh ang chia,
A thla hnuaiah chuan
i tlu lût ang;
A thutak chu phaw tê leh
phaw lian a ni.
5Zâna thil râpthlâk chu
i hlau lo vang a,
Chhûna thal lo lêng ṭhîn chu
i hlau hek lo vang;
6Thim hnuaia hri lêng ṭhîn chu
i hlau lo vang a,
Chhûn laia thil tichhe ṭhîn
chhiatna chu i hlau hek lo vang.
7I sîrah sâng an tlu ang a,
I ding lamah sîng an tlu
bawk ang;
Nimahsela, nang chu
a hnaih lo vang che.
8I mitin i en ang a,
Mi suaksualte rulhna chu
a hmuhin i hmu chauh vang.
9Aw Lalpa, nang chu
ka inhumhimna i ni si!
Chungnungbera chu
i awm nân i hmang a;
10Thil ṭha lo rêng rêngin a tawk
lo vang chia,
Hri rêng rêng pawhin
i puan in chu
a rawn hnaih hek lo vang.
11I kawng tinrênga humhim
tûr chein,
I chung thûah zawng
a vântirhkohte chu
thu a pe dâwn si a.#Mt 4.6; Lk 4.10,11.
12An kutin an dâwm ang chia;
Chuti lo chuan, i kein lung
i chhuih dah ang e.
13Sakeibaknei leh rûlrial chu
i rap ang a,
Sakeibaknei vânglai leh
rûlpui chu i chîl nek ang.#Lk 10.19.
14Ka chungah a hmangaihna
a nghah tlat avângin
ka chhan him ang a,
Ka hming a hriat avângin
hmun sângah ka hlâng ang.
15Ani chuan mi ko vang a;
tichuan, ka chhâng ang;
Kei chu a mangan lai chuan
a hnênah ka awm ang a;
Amah chu ka chhanhimin
ka chawimawi ang.
16Dam reinain ka tilungawi ang a,
Ka chhandamna chu
ka hmuhtîr bawk ang.
Currently Selected:
SAM 91: MIZOVBSI
Highlight
Copy
Compare
Share
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
