SAM 78
78
Asapha Maskil.
Pathian leh a mite
1Aw ka mite u, ka dân thûah hian beng lo chhi ula;
Ka kâa thûahte hian in beng
rawn dawh rawh u.
2Tehkhin thuin ka kâ
ka âng ang a;
Hmasânga thuril sawite kha
ka sawi chhuak ang:#Mt 13.35
3Chûng chu kan bengin kan hria a,
kan rilruin kan hre bawk a,
Min thlahtute pawhin
min hrilh kha.
4Chûng chu an fate lakah
kan zêp lo vang a, ṭhangthar
lo la awm tûr hnênah
Lalpa fakna thu leh,
A chakzia leh a thilmak tak
tihziate chu kan hril zâwk ang.
5Jakob-ho zîngah thuhriattîr
a tinghet a,
Israel-ho zîngah dân a ruat a.
Chûng chu kan thlahtute hnênah
thupêkin a pe a.
Anni chuan chûng thu chu
an fate hnêna an hriattîr tûrin;
6Ṭhangthar lo la awm tûr,
Naupang lo la piang tûrte chuan,
an hriat theih nân;
Chûngte chu an thawha,
an fate an la hrilh chhâwn
zêlna tûrin;
7An beiseina chu Pathianah
an nghah theiha,
Pathian thiltihte chu
an theihnghilh lohva,
A thupêkte chu an zawm
zâwk nân;
8An thlahtute anga chhuan
luhlul leh hel hmang,
Chhuan thinlung siam dik lo,
Pathian laka rilru rinawm lo
pua an awm loh nân.
9Ephraima thlahte chu
râlthuama inthuama,
thal ngul kengin,
Inbeih nîah chuan an
tlânchhia a.
10Pathian thuthlung chu
an zâwm lo va.
A dân an zâwm lo bawk a;
11A thiltihte chu an theihnghilh a,
A thilmak tih a hmuhtîrte
nên khân.
12An thlahtute mit hmuhah
thilmak takte a ti ṭhîn,
Aigupta ramah,
Zoan phûlah chuan.#Ex 7.8—12.32
13Tuifinriat chu a tiṭhen phawk a,
Anni chu a kal kaitîr a;
Tuite chu englo dah khâwm thûr
angin a dintîr luah a.#Ex 14.21-22
14Chhûnah chuan chhûmin a hruai a,
Zankhuain mei êngin a hruai
bawk ṭhîn a.#Ex 13.21-22
15Thlalêrah chuan lungpuite
a tiphel a,
Tui thûk tak ata ang mai
hnianghnâra in tûr a pe a.#Ex 17.1-7; Num 20.2-13
16Lungpui aṭang chuan
luite a tichhuak a,
Tuite chu luipuite angin
a luan thlâktîr a.
17Chuti chung pawhin a chungah
thil an la tisual ta cheu va,
Thlalêrah chuan
Chungnungbera lakah an hel a.
18An châkna tihreh nâna
ei tûr dîlin,
An thinlungin Pathian an fiah a.#Ex 16.2-15; Num 11.4-23,31-35
19A ni, Pathian an sawi hnâwm a:
“Thlalêrah hian Pathianin
dawhkân a buatsaih thei
em maw chu?
20Ngai teh, lungpui chu a vua a,
tuite kha a lo khawh chhuakin,
Luite chu a kuang a liam
dûl dûl ta tak a;
Chaw pawh a pe thei nghâl
em maw chu?
A mite tân hian sa a buatsaih
ang em maw chu?” an ti a.
21Chutichuan, Lalpa chuan
a lo hria a, a thin a rim ta a:
Jakob-ho chungah mei
a lo alh chhuak a,
Israel-ho chungah thinurna
a lo chho ta a;
22Pathian an rin lohva,
A chhandamna pawh an rin
loh avângin.
23Nimahsela, chung lam
vân dumte khi thu a pe a,
Vân kawngkhârte khi a hawnsak a;
24An ei atân manna kha
an chungah a zuk sûrtîr a,
Vân buh chu a pe a ni.#Joh 6.31
25Mihringten mi chakte chhang
chu an ei a;
Puarna khawpin
chaw a rawn pe a.
26Khawchhak thli chu
vânah atlehtîr a;
A thiltihtheihnain
chhim thli chu a hruai a.
27Sa chu vaivut zât laiin
an chungah a sûrtîr a,
Sava thla nei chu tuifinriata
ṭiau vaivut zât laiin;
28An riahhmun laiah a tlâktîr a,
An awmna bûk
kiang vêlahte chuan.
29Chutichuan, an ei a,
an puar hle a;
An châk chu a pe ta a ni.
30An châk a la reh lo va,
An chaw chu an kâah a la awm a.
31Chumi lai tak chuan
Pathian thinurna chu
an chungah a chho va,
An mi nalh nalh ṭhenkhat a that a,
Israel tlangvâlte chu
a vaw thlu hlawm a.
32Chuti chung pawhin
thil an la tisual ta cheu va,
A thilmak tihte chu
an ring chuang lo.
33Chuvângin, an dam chhûng nite
chu eng mah lo ang maiin
a tihralsak a,
An dam chhûng kumte chu
hlauhnain a tihralsak bawk a.
34Anmahni a thah apiangin
amah chu an zawng ṭhîn a.
An kîr leh a, zîng takah
Pathian an zawng ṭhîn a.
35Pathian chu an lungpui
a ni tih leh,
Pathian Chungnungbera chu
an tlantu a ni tih
an hre chhuak ṭhîn.
36Nimahsela, amah chu
an kâin an fak der a,
An leiin a hnênah dâwt thu
an sawi ṭhîn.
37An thinlung chu a lakah
a dik si lo va,
A thuthlungah chuan
an rinawm hek lo.
38Nimahsela, ani chu lainatnaa
a khah avângin
an khawlohna chu a ngaidam a,
anni chu a tiboral lo;
A ni, vawi tam tak
a thinurna chu a la kîr a,
A thinrimna chu a zain
a chawk tho duh ṭhîn lo.
39Tisa chauh an ni tih
a hre reng a;
Thli, lêt leh lo tûra
tleh liam ṭhîn ang hi.
40Thlalêrah khân a chungah
an va hel zingin,
Ram rovah khân amah chu
an va tilungngai zing êm!
41Hawikîr lehin Pathian an fiah a,
Israel-ho Mi Thianghlima chu
an tivui ṭhîn.
42A kut chu an hre reng lo va,
Dotu laka a chhan him ni chu
an hre reng ṭhîn hek lo.
43Aigupta ramah
a chhinchhiahnate a dah a,
Zoan phûlah a thilmakte
a dah bawk a;
44An luipuite leh an luitête chu
thisenah a chantîr a;
Tichuan, an in thei ta lo va.#Ex 7.17-21
45An zîngah tho tam tak a tîr a,
chûng chuan anmahni
a ei zo va;
Chungûte a tîr bawk a,
chûng chuan anmahni
a tiboral ta a.#Ex 8.1-6,20-24
46An thil ṭote pawh chu
pangang a pe a,
An thawh rim rah chu
khaukhuap a pe bawk a.#Ex 10.12-15
47An grêp hruite chu
rialin a tithi a,
An theipui kûngte pawh chu
vûrin a tithi bawk a.#Ex 9.22-25
48An rante pawh chu rial a pe a,
An ran rualte chu ṭêk sa tak
a pe bawk a.
49A thinur nasa tak chu
an chungah a thlâk a,
Thinrimna te, lungnih loh êm
êmna te, manganna te,
Thil ṭha lo tak thlentu tirhkoh
pâwl te chu.
50A thinurna atân chuan kawng
a siamsak a,
An nunna chu thihna lakah
a hum lo va,
An nun chu hri a pe ta zâwk a;
51Aigupta rama fa tîr awm zawng
zawng a tihlum a,
Hama puan intea an chakna
rah hmasa berte chu.#Ex 12.29
52Nimahsela, ama mite chu
berâm angin a hruai chhuak a,
Ran rual angin thlalêrah khân
a hruai a.#Ex 13.17-22
53Him takin a hruai a; chutichuan,
eng mah an hlau lo va;
Nimahsela, tuifinriat chuan
an hmêlmate chu
a khuh zo ta a.#Ex 14.26-28
54Tin, a hmun thianghlim
ramri chu a hruai thleng a,
He tlâng, a kut ding lama a leia hi.#Ex 15.17; Jos 3.14-17
55Hnam tin chu an hmaah
a hnawt chhuak a,
Anni chu hruia tehin ro chan
atân a sem a,
An puan inahte chuan
Israel hnamte chu
a awmtîr ta a.#Jos 11.16-23
56Nimahsela, Pathian Chungnungbera
chu an fiah a, a chungah an hel a,
A thuhriattîrte chu
an zâwm si lo va.#Ro 2.11-15
57Hawi kîrin, an thlahtute angin
vervêk takin an ti ta zâwk a;
Thal ngul rinawm lo angin
an kal kawi a.
58An hmun sângtein amah chu
an tithinur si a,
An milem siamtein
an thîktîr bawk a.
59Pathianin chu chu a lo hriatin
a thin a rim a,
Israel-ho chu a ten ta êm êm a;
60Chutichuan, Silo biak bûk,
Mihring zînga a puan in dah chu
a kalsan a;#Jos 18.1; Jer 7.12-14; 26.6
61A chakna chu salah a mantîr a,
A ropuina chu dotu kutah
a mantîr ta bawk a.#1 Sam 4.4-22
62A mite chu khandaih hnênah
a pe a;
A ro chan chungah chuan
a thin a rim ta a.
63Meiin an tlangvâlte chu a
kâng ral a,
An nulate chuan inneihna hla
rêng rêng an nei ta lo.
64An puithiamte chu khandaiha
tihtlûkin an awm a;
An hmeithaite chu
ṭah rêng rêng an ṭap lo.
65Chutih lai chuan Lalpa chu,
mi an muhîl an harh angin
a harh ta a,
Mi chak uain vânga au ang hian.
66Amah dotute chu a vaw kîr a,
Kumkhaw hmingchhiatna
a hlawhtîr ta a.
67Chu lo pawh chu
Josefa puan in chu a duh lo va,
Ephraim hnam chu
a thlang lo bawk a;
68Juda hnam chu
a thlang ta zâwk a,
A hmangaih Zion tlâng chu.
69A in thianghlim chu
vân sângte ang khian a sa a,
Kumkhua atâna a tihngheh
leilung ang hian.
70A chhiahhlawh Davida chu
a thlang a,
Berâm huang ata te chu
a la chhuak a;#1 Sam 16.11-12; 2 Sam 7.8; 1 Chr 17.7
71Berâmpui no hruaite zuitu
aṭangin a hruai chhuak a,
A mite, Jakob-ho leh a ro chan
Israel-ho châwm tûrin.
72Chutichuan, ani chuan
a thinlung ṭhatna ang zêlin
anniho chu a châwm a;
A kut thiamnain a hruai ta a.
Currently Selected:
SAM 78: MIZOVBSI
Highlight
Copy
Compare
Share
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
