SAM 36
36
Hla Hruaitu tân. Lalpa chhiahhlawh Davida Fakna Hla.
Mihring suahsualzia
1Mi suaksual bawhchhiatna
chuan ka thinlung chhûngah
hian thu a sawi a,
“A mit hmuhah Pathian hlauhna
rêng rêng a awm lo,” tiin.#Rom 3.18
2“Ka khawlohna an hmu chhuak
lo vang, an haw hlei
lo vang e,” tiin,
Mahni mit hmuhah mahni vêk
a infak chawp si ṭhîn a.
3A kâa thuchhuakte chu sualna leh
bumna thu hlîr a ni ṭhîn a;
Finvâr leh thil ṭha tih a bâng ta a.
4A khumlaizâwlah chuan
thil sual a suangtuah ṭhîn a;
Kawng ṭha lovah chuan
a kal lui a,
sualna chu a ten lo.
Pathian ṭhatzia
5Aw Lalpa, i ngilneihna chu
vânahte khian a awm a;
I rinawmna chuan vân dumte
khi a tawng a ni.
6I felna chu Pathian tlângte ang
a ni a;
I rorêlte chu tui thûk zau tak
ang a ni;
Aw Lalpa, mihring leh sa
i humhim ṭhîn.
7Aw Pathian, i ngilneihna chu
a va hlu êm!
Mihring fate chuan i thla hnuai
an chuh ṭhîn.
8Anni chu i in chhûng thil ṭhain
an tlai êm êm ang a;
I lâwmna luia mi chu
i intîr bawk ang.
9Nunna tuikhur chu i hnênah
a awm si a;
I êngah chuan êng
kan la hmu ang.
10Aw, nangmah hretute chungah
chuan i ngilneihna chu
lantîr zêl la;
Thinlung dik tak
pute chungah pawh
i felna chu lantîr zêl ang che.
11Chapo ke chu mi bei tûrin
ka lamah pên suh sela,
Mi suaksual kut pawhin
mi hnawt bo suh se.
12Sawtah sâwn thil tisualtute chu
an tlu reng a;
Nam thlûk an ni a,
an tho thei tawh lo vang.
Currently Selected:
SAM 36: MIZOVBSI
Highlight
Copy
Compare
Share
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
