SAM 144
144
Davida Fakna Hla.
Hmêlma hneh vânga Lal lâwm thu
1 Lalpa, ka lungpui chu fakin awm rawh se,
Ani chuan ka kutte hi râl kah
a zirtîr ṭhîn a,
Ka kut zungṭangte hi bei tûrin
a zirtîr bawk ṭhîn.
2Ka ngilneihna leh ka kulhpui,
Ka kulhbîng sâng leh
mi chhanhimtu,
Ka phaw leh ka rinna nghahna,
Ka hnuaia ka mite
tudawl ṭhîntu chu a ni.
3 Lalpa, mihring hi eng nge maw
a niha, i hriat ṭhin ni?
Mihring fapa pawh hi
eng nge maw a niha,
i ngaihtuah ṭhin ni?#Job 7.17-18; Sam 8.4
4Mihring hi eng mah lo mai ang
a ni a;
A dam chhûng nite chu
hlim ral ṭhîn ang hi a ni.
5Aw Lalpa,
i vânte tikûnin lo chhuk la;
Tlângte chu khawih ang che;
tichuan, a khu chhuak ang.
6Kâwl phêttîr la, anniho chu
tidarh ang che;
I thalte chu kâp chhuak la,
tibuai nuaih ang che.
7Chung lam aṭangin
i kut rawn ban la;
Mi chhan chhuak la, tui lian
atate hi mi chhan him ang che,
Mikhualte kut ata hi;
8An kâ chuan dâwt a sawi a,
Chhechham chung pawhin
dâwt an sawi.
9Aw Pathian, nangmah chawimawiin
hla thar ka sa ang a;
Perhkhuang hrui sâwm nei mi
nên nangmah fakin ka zai ang.
10Amah chu a ni lalho hnêna
chhandamna pea,
Khandaih mi tikhawlo thei laka
a chhiahhlawh Davida
chhan chhuaktu chu ni.
11Mi chhan chhuak la,
mikhualte kut ata hi
mi chhan him ang che,
An kâ chuan thu eng mah lo
mai mai an sawi ṭhîn a,
An kut ding lam chu
bumnain a khat a ni.
12Thlai ṭhang duang ang maiin
kan fapate ṭhang duang sela;
Kan fanute pawh lal in kil
lung chher mawi ang lo ni se;
13Kan buhzêmte lo khatin
thil tinrêng awm rei ruiin,
Kan berâmte pawhin no sâng
tam tak,
Sîng tam tak kan phûlahte
hring sela;
14Kan bâwngpaten
phur thûr thûr sela,
Kan ran rualte rawktu leh
hruai botu awm lovin;
Kan kawtthlêrahte mangang
au thâwm awm lo sela.
15Chutiang mite chu lâwm takin
an awm ṭhîn a;
A ni, Lalpa Pathiana neih mite
chu lâwm takin an awm ṭhîn.
Currently Selected:
SAM 144: MIZOVBSI
Highlight
Copy
Compare
Share
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
