NUMBERS 24
24
1Chutichuan, Israel-ho malsâwmsak chu Lalpa duh zâwng a ni tih Balaaman a hriatin, ni danga a tih ang khân dawi âtna lam ti tûra kal lovin thlalêr lam a pan ta zâwk a. 2Tin, Balaama chu a vanvadâk a, Israel mite chu an hnam dân zir zêla awm a hmu a; tin, Pathian thlarau a chungah a lo thleng a. 3Tin, thu chu a sawi ta a:
“Beora fapa Balaama, Mit vâra,
4Pathian thûte hriaa,
Engkimtitheia inlârna hmua,
Tlu bawkkhupa
mit lo vâr ta chuan,
5‘Aw Jakob-ho, in puan inte chu
a va ṭha êm!
Aw Israel-ho, in biak bûkte chu!
6Ruam angin a pharh duai a,
Lui kama huan ang,
Lalpa phun sasua ang,
Lui kama sidar thingte ang an ni.
7Ruahtui tam tak a dawng ang a,
Tui tamna hmunah thlai chîte
a chîng ang.
A lal chu Agaga aiin
a ropui ang a;
A ram chu chawimawiin
a awm ang.
8Aigupta ata Pathianin
a hruai chhuak a,
Sele tha ang mai an pu a,
An hmêlma, hnam dangte chu
an ei zo vang a,
An thalin an kâp tlang ang.
9An kûn a, sakeibaknei angin
an bawk a,
Sakeibakneipui ang maiin;
tu nge titho ngam ang?
Malsâwmtu apiang che u chu
malsâwmin awm sela,
Anchhe lawhtu apiang che u chu
ânchhe lawhin
awm rawh se,’ a ti,”
a ti a.#Gen 12.3; 49.9
10Tichuan, Balaama chungah chuan Balaka thin chu a alh a; Balaka chuan Balaama hnênah, “Ka hmêlmate ânchhe lawh tûrin ka ko chia, hei, vawi thum zet mal i sâwm ta a. 11Chuvângin, i awmnaah kal bo daih rawh; ropui taka chawisân che ka rilrûk a ni a; nimahsela, ngai teh, Lalpan chawisân che a dâl ta a nih hi,” a ti a. 12-13Tin, Balaama chuan Balaka hnênah, “Balaka hian a in chu tangkarua leh rangkachaka khatin min pe dâwn mah sela, a ṭha lam emaw, a chhe lam emaw, keima rilru puakchhuak chuan Lalpa thu piah lam chu eng mah ka ti thei lo; ‘Lalpan a sawi apiang chu ka sawi ang,’ tiin i mi tirhte hnênah pawh ka sawi rêng a ni lâwm ni?
Balaama hrilh lâwkna hnuhnûng ber
14Ngai teh, ka mite hnênah ka kal tawh ang a, hawh teh, hêng mite hian tûn hnua i mite chunga an tih dân tûr ka hrilh teh ang che,” a ti a. 15Tin, ani chuan thu chu a sawi ta a:
“Beora fapa Balaama, Mit vâra,
16Pathian thûte hriaa,
Chungnungbera hriatna hriaa,
Engkimtitheia inlârna hmua,
Tlu bawkkhupa
mit lo vâr ta chuan,
17Nakin hnua a awm dân tûr
ka hmu a,
Tûn mai piah lam ka hmuhsak a:
‘Jakoba aṭangin arsi
a lo chhuak ang a,
Israela aṭangin lal tiang
a lo chhuak ang a,
Moab ram tluanin
a chhun tlang ang a,
Setha thlahte a titlâwm ang.
18A hmêlma ṭhîn
Edom leh Seir-te chu
a chang ang,
Israel-te chan a ṭhat chhûng zawng.
19Jakoba aṭangin tu emaw
a lal ang a,
Khuaa la awm chhunte chu
a tiboral ang,’ a ti,” a ti a
20Tin, Amalek lam a hawi a,
thu chu a sawi a,
“Amalek chu hnam bul ber
a ni na a,
A lêr lam chu boralna a ni,”
a ti a.
21Tin, Ken lam a hawi a,
thu chu a sawi a,
“I awmna hmun chu a nghet a,
I bu chu lungpuia chheh a ni.
22Mahse, Ken chu a ṭiau vang a,
Assur-hovin sala
an hruai bo che thlengin,” a ti.
23Tin, thu chu a sawi leh a,
“Pathianin hetianga a tihin
tu nge nung thei ang le?
24Mahse, Kittim ram aṭangin
lawngte a lo thleng ang a,
Assur an tihrehawm ang a,
Eber an tihrehawm ang a,
Ani pawh a boral ang,” a ti a.
25Tichuan, Balaama chu a tho va, a khaw lamah a haw ta a; Balaka pawh chu a haw ve ta a.
Currently Selected:
NUMBERS 24: MIZOVBSI
Highlight
Copy
Compare
Share
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
