Matthaia 2
2
Khawchhak mi fingte
1Tin, Lal Heroda a lal laia, Judai rama Bethlehem khuaa Isua a lo pianin, ngai teh, khawchhak lam ata mi fingte Jerusalem khuaah an lo kal a, 2“Khawiah nge Juda-te lal lo piang chu? Khawchhak lamah a arsi kan hmu a, amah chibai bûk tûrin kan lo kal a ni,” an ti a.
3Tin, Lal Heroda chuan chu chu a hriat veleh a mangang ta a, Jerusalem-a mi zawng zawng pawh an mangang ve a. 4Tichuan, puithiam lalte leh lehkhaziaktute zawng zawng a ko khâwm a, Krista pianna tûr chu a zâwt a.
5Tin, anni chuan a hnênah, “Judai rama Bethlehem khuaah; heti hian zâwlneiin a ziak kha:
6‘Nang, Bethlehem,
Judai rama mi,
Judai khawpuite zîngah
i tê ber tawp lo!
I chhûng aṭangin awptu
a lo chhuak dâwn si a,
Ka mi Israel-hote
vêngtu tûr chu,’
tih hi,” an ti a. #Mik 5.2
7Chumi hnuah chuan Herodan a rûkin mi fingte chu a ko va, dîlchhût takin arsi lan lai chu a zâwt chhuak a. 8Tin, anni chu Bethlehem khuaah a kaltîr a, “Kal ta ula, naute thu chu dîlchhût takin zâwt chhuak rawh u; tin, kei pawhin amah chu chibai ka rawn bûk ve theih nân, in hmuh veleh mi rawn hrilh ang che u,” a ti a.
9Tin, lal thu chu an hria a, an kal ta a; tin, ngai teh, khawchhak lama arsi an hmuh kha, naute awmna chung zâwn a thlena a din hma loh zawng an hmaah a kal zêl a. 10Tin, arsi chu an hmuhin an hlim nasa êm êm a. 11Tin, in chhûngah an va lût a, a nu Mari hnêna nautê chu an hmu a, an bawkkhup a, chibai an bûk a; tin, an ro bâwmte an hawng a, a hnênah chuan lawmna rangkachak te, beraw te, murra te an pe a. 12Tin, Heroda hnênah kîr leh lo tûrin an manga hrilha an awm avângin, anmahni khaw lamah kawng dangah an haw ta a.
Aigupta rama tlân thu
13Tin, an hâwn hnuin ngai teh, Lalpa vântirhkoh Josefa hnênah a mangah a inlâr a, “Tho la, nautê leh a nu hruai la, Aigupta ramah tlân bo rawh, ka hrilh leh hma loh che zawng chutah chuan awm reng ang che; Herodan nautê tiboral tûrin a zawng dâwn a ni,” a ti a. 14Tichuan, a tho va, a zân a zânin nautê leh a nu chu a hruai a, Aigupta ramah a kal ta a; 15tin, Heroda thih hma loh zawng chutah chuan a awm reng a: Lalpan zâwlnei kaah, “Ka fapa chu Aigupta ram ata ka ko chhuak a,” tia a sawi kha a lo thlen theih nân. #Hos 11.1
Nausên suat thu
16Chutih lai chuan mi fingte tihder a nih a inhriat veleh Heroda chu a thinur êm êm a, mi a tîr a, a hun lai tak thu dîlchhût taka mi fingte a zawh chhuah ang khân, Bethlehem khua leh a vêl zawng zawnga mipa naupang kum hnih achin hnuai lam chu an zain a that ta vek a.
17,18Chutih lai chuan zâwlnei Jeremian,
“Rama khuaah thâwm an hria,
Ṭap te, mitthi ngaia chiau
vawng vawng te;
Rakili chuan a fate a ṭah a,
An awm tawh loh avângin
a thlamuan theih loh,”
tia a sawi kha a lo thleng ta. #Jer 31.15
Aigupta ram ata kîr leh thu
19Nimahsela, Heroda chu a thih hnuin ngai teh, Lalpa vântirhkoh chu Aigupta ramah Josefa hnênah a mangah a inlâr a, 20“Tho la, nautê leh a nu hruai la, Israel ramah kal rawh: naute thah tumte kha an thi tawh e,” a ti a. 21Tichuan, a tho va, nautê leh a nu chu a hruai a, Israel ramah a lût ta a. 22Nimahsela, Arkelausa chu a pa Heroda aiawhin Judai ramah a lal tih a hriatin chuta kal chu a hlau ta a; tin, a manga hrilha a awm avângin Galili lamah a kal ta daih a, 23khaw pakhat Nazareth an tihah chuan a va awm ta a: “Ani chu ‘Nazareth mi’ an ti ang,” tia zâwlneite kâa an sawi kha a lo thlen theih nân. #Mk 1.24; Lk 2.39; Joh 1.45
Currently Selected:
Matthaia 2: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.