Matthaia 1
MIZ

Matthaia 1

1
Isua Krista thlahtute
(Lk 3.23-38)
1Abrahama thlah, Davida thlah, Isua Krista thlahtute inthlah dân chanchin chu:
2Abrahaman Isaaka a hring a; Isaakan Jakoba a hring a; Jakoban Juda leh a unaute a hring a; 3Judan Tamari lakah Pharesa leh Zera a hring a; Pharesan Eroma a hring a; Eroman Arama a hring a; 4Araman Aminadaba a hring a; Aminadaban Nasona a hring a; Nasonan Salmona a hring a; 5Salmonan Rahabi lakah Boaza a hring a; Boazan Ruthi lakah Obeda a hring a; Obedan Jesaia a hring a; 6Jesaian Lal Davida a hring a.
Tin, Davidan Uria nupui lakah Solomona a hring a; 7Solomonan Rehoboama a hring a; Rehoboaman Abia a hring a; Abian Asa a hring a; 8Asan Jehosaphata a hring a; Jehosaphatan Jehorama a hring a; Jehoraman Uzia a hring a; 9Uzian Jothama a hring a; Jothaman Ahaza a hring a; Ahazan Hezekia a hring a; 10Hezekian Manasea a hring a; Manasean Amona a hring a; Amonan Josia a hring a; 11Babulon lama sala an hruai lai vêl khân Josian Jekonia leh a unaute a hring a. #2 Lal 24.14-15; 2 Chr 36.10; Jer 27.20
12Tin, Babulon lama sala an hruai hnuin Jekonian Salathiela a hring a; Sealtielan Zerubabela a hring a; 13Zerubabelan Abiuda a hring a; Abiudan Eliakima a hring a; Eliakiman Azora a hring a; 14Azoran Zadoka a hring a; Zadokan Akima a hring a; Akiman Eliuda a hring a; 15Eliudan Eleazara a hring a; Eleazaran Matthana a hring a; Matthanan Jakoba a hring a; 16Jakoban Josefa, Mari pasal chu a hring a; chu mi Mari lakah chuan Isua, Krista an tih hi a lo piang ta a.
17Chutichuan, chhuan zawng zawng chu, Abrahama aṭangin Davida thlengin chhuan sâwm leh chhuan li a ni a; Davida aṭangin Babulon lama sala an hruai thlengin chhuan sâwm leh chhuan li a ni a; Babulon lama sala an hruai aṭangin Krista thlengin chhuan sâwm leh chhuan li a ni a.
Isua Krista pian thu
(Lk 2.1-7)
18Tin, Isua Krista lo pian dân chu hetiang a ni: A nu Mari chu Josefa nên an inhual laiin, an inpâwl hmain Thlarau Thianghlimin a raitîr tih an lo hre ta a. #Lk 1.27 19Tichuan, a pasal tûr Josefa chu mi fel tak a ni a, tlângthantîr a duh lo va, a rûkin bânsan a tum a. 20Nimahsela, chûng thu chu a ngaihtuah laiin ngai teh, a mangah Lalpa vântirhkoh a hnênah a lo inlâr a, “Josef, nang Davida fapa, i nupui hual Mari chu neih hlau suh; a nau pai chu Thlarau Thianghlim laka mi a ni asin. 21Fapa a hring ang a, a hmingah Isua i sa ang; ani chuan a mite an thil tihsual lakah a chhandam dâwn si a,” a ti a. #Lk 1.31 22-23Tin, Lalpan zâwlnei kaah,
“Ngai teh, nula thianghlim chu a rai ang a,
Fapa a hring ang a.
A hmingah Emmanuela an sa ang,”
tia a sawi kha a lo thlen theihna tûrin chûng zawng zawng chu a lo awm a ni. (Emmanuela chu “Kan hnêna Pathian awm” tihna a ni.) #Is 7.14
24Tichuan, Josefa chu a muhîl a tho va, Lalpa vântirhkohvin a hnêna thu a pêk ang chuan a ti a, a nupui hual chu a nei ta a; 25nimahsela, fapa a hrin hma loh zawng a pâwl lo; tin, a hmingah Isua a sa ta a. #Lk 2.21

© Bible Society of India


Learn More About Old Version Bible

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.