HEBRAI 8
8
Isua - kan Puithiam Lalber
1,2Tichuan, kan thusawite zîngah hian a pawimawh ber chu hei hi a ni: chutiang Puithiam Lalber, vânahte khian Ropuibera lalṭhutphah ding lama han ṭhua, Hmun Thianghlim leh biak bûk tak tak, mihring sak ni lo, Lalpa sak zâwka rawngbâwltu chu kan nei, tih hi. #Sam 110.1
3Puithiam lalber apiang chu thilpêk leh inthawinate hlân tûrin ruat an ni si a; chutichuan, he Puithiam Lalber pawh hian eng emaw tal hlan tûr a neih a ngai a ni. 4Leiah hian lo awm sela chuan puithiam rêng a ni lo vang, Dân thu ang zêla thilpêk hlântute lo awm sa an awm avângin. 5Chûngte chuan vân thilte chu a lem leh a hlim rawng an bâwl ṭhîn a, Mosian biak bûk a sak dâwn laia Pathian hrilha a awm ang khân: “Tlânga entawn tûr chu an entîr che ang khân engkim siam tûrin fîmkhur rawh,” a tih kha. #Ex 25.40
6Tûnah erawh chuan thuthlung ṭha lehzual palai a nih angzia zêlin, rawngbâwl hna ṭha zâwk a lo chang ta, chu thuthlung chu thutiam ṭha zâwk chungahte siam a ni.
7Thuthlung hmasa chu sawisêl bo ni se, thlun nawn a ngai lo tûr. 8Anmahni demin hêng hi a sawi si a:
“Ngai teh, nîte a lo thleng dâwn e,
Lalpan a ti,
Chûng nîahte chuan
Israela chhûngte leh,
Juda chhûngte hnênah chuan
thuthlung thar ka siam ang; #Jer 31.31-34
9An thlahtute Aigupta ram
aṭanga hruai chhuak tûra,
An kuta ka chelh nîa
an hnêna ka thlun ang kha
ni lovin;
Ka thuthlungah chuan
an awm reng si lo va,
Tichuan, anni chu
ka ngaihsak ta lo a ni,
Lalpan a ti.
10Chûng ni hnuah chuan
Israela chhûngte hnêna
Thu ka thlun tûr chu
hêng hi a ni,
Lalpan a ti:
An rilruah ka thupêkte
ka dah ang a,
An thinlungah ka ziak bawk
ang a;
Tin, an tân Pathian ka ni ang a,
Keia tân anni chu
ka mite an ni bawk ang;
11Tin, mi tinin,
‘Lalpa chu hre rawh,’ tiin,
Mahni tualkhatpui leh,
Mahni unau an zirtîr dâwn
tawh lo va;
A tê ber aṭangin a lian ber thlengin,
An zain mi hre ṭheuh tawh
dâwn a ni.
12An bawhchhiatnaahte
zah ka ngai ang a,
An sualte pawh ka hre reng
dâwn tawh si lo,”
tiin.
13“Thuthlung thar” tiin a sawi avâng khân a hmasa chu a tihlui ta a ni. Tichuan, lo hluia lo upa tawh chu a ral dâwn dâwn a ni.
Currently Selected:
HEBRAI 8: MIZOVBSI
Highlight
Copy
Compare
Share
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
