HEBRAI 10
10
1Dân thu chuan thil ṭha, lo awm tûrte anpui tak nei lovin, a thla chauh a neih avângin, kum tina inthawina pângngai an hlan fote chuanin, a rawn hnaihte chu eng tikah mah an tifamkim thei dâwn si lo. 2Chuti ni suh sela, a betute chu vawi khata tihthianghlim nghâla awmin, sual inhriatnate an neih loh avângin hlan an bâng tawh daih dâwn lâwm ni? 3Nimahsela, chûng inthawinaah chuan kum tinin sualte hriat lehna a lo awm fo zâwk ṭhîn. 4Bâwngpate leh kêlte thisen chuan sualte tibo thei rual a ni si lo. 5Chutichuan, khawvêla a luh laiin,
“Inthawina leh thilhlan
i duh lo va,
Ka tân taksa mi buatsaihsak
zâwk a: #Sam 40.6-8
6Hâlrala pumpêknaahte leh,
Sual tâna inthawinaahte chuan
Lâwmna rêng i nei lo.
7Chu veleh chuan keiin,
‘Aw Pathian, ngai teh,
(Lehkhabu zialah chuan ka thu
ziak a ni a)
I duh zâwng ti tûrin ka lo kal e,’
ka ti a,”
a ti a.
8A chhakah hian, “Inthawina te, thilhlan te, hâlrala pumpêkna te, sual tâna inthawina te i duh lo va, chûngah chuan lâwmna i nei hek lo,” a ti a (chûngte chu Dân thu anga hlan a ni a), 9chu veleh chuan, “Ngai teh, i duh zâwng ti tûrin ka lo kal e,” a lo ti ta a. A pahnihna hi a tundin theihna tûrin a hmasa chu a la bo ta a ni. 10Chumi duh zâwng chuan, Isua Krista taksa vawi khata hlan nghâl vâng khân tihthianghlimin kan awm ta.
11Tin, puithiam tinrêng chu kâwla ni chhuak chhiara rawngbâwlin, sualte eng tik maha tibo thei lo inthawina pângngai hlân fovin an ding ṭhîn; #Ex 29.38 12ani erawh hi chu chatuan atân sualte tâna inthawina pakhat chauh a hlan hnuin, Pathian ding lamah a han ṭhu ta zâwk a;#Sam 110.1 13chuta chin chu a hmêlmate a kephah nghahchhana siam an nih hma loh zawng a nghâk reng a. 14Thilhlan pakhat chauhvin tihthianghlim tawhte chu chatuan atân a tifamkim tawh si a.
15,16Tin, Thlarau Thianghlim pawh chuan min hriattîr bawk a:
“Chûng ni hnuah chuan
An hnêna thu ka thlun tûr chu
hêng hi a ni,”
Lalpan a ti;
“An thinlungah ka thupêkte
ka dah ang a,
An rilruah ka ziak bawk ang,”
tia a sawi hnu khân, #Jer 31.33
17“An sualte leh
an bawhchhiatnate,
Ka hre reng tawh lo vang,”
a ti si a. #Jer 31.34 18Tichuan, chutiangte ngaihdamna apiangah chuan sual tân thilhlan a awm tawh lo a ni.
Pathian i hnaih ang u
19,20Chutichuan, unaute u, kawng min ruatsak, kawng thar leh nungah chuan, puanzâr chu (chu chu a taksa tihna a ni) kal tlangin, Isua thisen avâng chuan Hmun Thianghlimah khân luh kan huam avâng leh, 21Pathian chhûngte chunga Puithiam ropui tak kan neih avângin, 22kan thinlunga chhia leh ṭha hriatna ṭha lo chu theh faisaka awma, kan taksa pawh tui fîma buala awmin, rinna famkim neia thinlung tak zet puin i hnaih ang u. #Lev 8.30; Ezek 36.25 23Kan beisei thurin hi nghîng lovin i pawm tlat ang u, thutiamtu chu a rinawm si a. 24Tin, hmangaih leh thil ṭha tiha inchawk tho tûrin i inngaihtuah tawn ang u; 25ṭhenkhat tih dân anga kan inkhâwm te bânsan lovin, i infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u.
26Thutak hriatna famkim chu kan chan hnua thil kan tihsual luih si chuan, sualte tâna inthawina a awm tawh hauh lo vang a, 27rorêlna hlauhawm tak lo thleng tûr leh dotute kâng ral tûr thinurna mei kan hmabâk a ni mai. #Is 26.11 28Mosia Dân thu pawisa lo mi chu hretu pahnih pathum emaw thuin, lainatna tel lovin an thi ṭhîn. #Deut 17.6; 19.15 29Pathian Fapa rap beta, thuthlung thisen, amah tihthianghlimna chu thil narâna ruata, khawngaihna Thlarau tivuitu chu, chu mi ai chuan engtia hremna nasa zâwk nge tuar tlâka ruat tûr nia in ngaih? #Ex 24.8 30“Phuba rêng rêng keima lâk tûr a ni, keimân ka thungrûl ang,” tih leh, “Lalpa chuan a mite a ngaihtuah ang,” ti lehtu chu kan hre si a. #Deut 32.35,36 31Pathian nung kuta tlûk chu thil râpthlâk tak a ni.
32Nimahsela, hmâna tihêna in awm hnua, tuarna buai nasa tak in tuar lai nite kha hre leh rawh u; 33kawng khatah chuan hmuhsit leh hrehawmte pawh tuarin ennawma siamin in awm a, kawng dangah chuan chutianga hmâna awmte chu tuarpuitute in lo ni a. 34Kawl bunte chu in lainat a, sum ṭha zâwk, awm hlen bawk tûr chu mahniin in nei tih hriain, in sum an lâksakte pawh lâwm takin in lo tuar ta bawk si a.
35Chutichuan, in rinna lâwmman chu paih bo suh u, lâwmman ropui tak a nei dâwn si a. 36Pathian duh zâwng in tih hnuin thil tiam chu in hmuh theih nân chhelna in ngai asin.
37Rei lo tê achinah
Lo kal tûra chu
a lo kal dâwn si a,
Rei a rial tawh lo vang. #Hab 2.3-4
38Nimahsela, ka mi fel chu
Rinnain a nung ang;
A hnungtawlh erawh chuan,
Ka rilruin amahah chuan
lâwmna rêng a nei lo vang.
39Nimahsela, keini zawng boral tûra hnungtawlh pâwla mi kan ni lo va; nunna humhim tûra rinna nei pâwla mi kan ni zâwk.
Currently Selected:
HEBRAI 10: MIZOVBSI
Highlight
Copy
Compare
Share
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
