AMOSA 1

1Juda lal Uzia lal lai leh Israel lal Joasa fapa Jeroboama lal laiin, lîrnghîn hma kum hnihah khânin, Tekoa-ah ran rual vêngtute zînga mi Amosa thu, Israel chungchâng a hmuh chu.#2 Lal 14.23-29; 15.1-7; 2 Chr 26.1-23.

2Tin, ani chuan, “Lalpa chu Zion tlâng aṭangin a rûm hum hum ang a, Jerusalem khua aṭangin a aw a chhuah ang a; berâm vêngtute ran tlatna hmunte chu an lungngai ang a, Karmel tlâng chhîp chu a vuai ang,” a ti a.#Joel 3.16

Israel ṭhenawmte chunga Pathian rorêlna

Suria

3 Lalpan heti hian a ti: “Damaska khaw bawhchhiatna pathum avângin, a ni, pali avângin, a hremna chu ka tireh lo vang; Gilead ram chu buh râwtna thîrte chuan an râwt avângin.#Is 17.1-3; Jer 49.23-27; Zak 9.1 4Nimahsela, Hazaela inah mei ka tîr ang a, Benhadada lal inte a kâng zo vang. 5Tin, Damaska khaw kawngkhâr thîr chu ka titliak ang a, Aven ruam ata a luahtute leh Eden in ata lal tiang kengtu chu ka tibo vang a; tin, Suria ram mite chu Kir ramah salah an awm ang,” Lalpan a ti a.

Philistia

6 Lalpa chuan heti hian a ti: “Gaza khaw bawhchhiatna pathum avângin, a ni, pali avângin, a hremna chu ka tireh lo vang; Edom hnêna pêk tûrin mi zawng zawng sala an hruai avângin.#Is 14.29-31; Jer 47.1-7; Ezek 25.15-17; Joel 3.4-8; Zep 2.4-7; Zak 9.5-7 7Nimahsela, Gaza khaw kulh chungah mei ka tîr ang a, a lal inte chu a kâng zo vang. 8Tin, Asdod khua ata a luahtu leh Askelon khua ata lal tiang kengtu ka tiboral ang a; tin, Ekron khaw chungah ka kut ka lek ang a; tin, Philistia mi la awmte chu an boral ang,” Lalpa Pathian chuan a ti.

Tura

9 Lalpan heti hian a ti: “Tura khaw bawhchhiatna pathum avângin, a ni, pali avângin, a hremna chu ka tireh lo vang; Edom hnênah mi zawng zawng chu an pêka, inunauna thu an thlun chu an hriat reng loh avângin.#Is 23.1-18; Ezek 26.1—28.19; Joel 3.4-8; Zak 9.1-4; Mt 11.21-22; Lk 10.13-14 10Nimahsela, Tura khaw kulh chungah mei ka tîr ang a, a lal inte chu a kâng zo vang,” a ti a.

Edom

11 Lalpan heti hian a ti: “Edom bawhchhiatna pathum avângin, a ni, pali avângin, a hremna chu ka tireh lo vang; a unau chu khandaihin a ûma, a khawngaihna zawng zawng a paih bova, a thinurna chuan a pawh thlêr fo ṭhina, kumkhuain a thinrimna chu a vawn reng avângin.#Is 34.5-17; 63.1-6; Jer 49.7-22; Ezek 25.12-14; 35.1-15; Obad 1-14; Mal 1.2-5 12Nimahsela, Teman hmun chungah mei ka tîr ang a, Bozra khaw lal inte chu a kâng zo vang,” a ti a.

Amon

13 Lalpan heti hian a ti: “Amon fate bawhchhiatna pathum avângin, a ni, pali avângin, a hremna chu ka tireh lo vang; an ram an tihzau theih nân Gilead khaw hmeichhe nau paite an tai thlêr avângin.#Jer 49.1-6; Ezek 21.28-32; 25.1-7; Zep 2.8-11 14Nimahsela, Raba khaw kulh chungah mei ka chhêm alh ang a; tin, indo nia au nên, ṭhâwngaleivir nia thlipui nên, a lal inte chu a kâng zo vang; 15an lal chu salah an man ang a, a mi liante nên a rualin,” Lalpa chuan a ti.

Currently Selected:

AMOSA 1: MIZOVBSI

Highlight

Copy

Compare