2 TIMOTHEA 4
4
1Pathian mit hmuh leh, mi nung leh mitthi ngaihtuahtu tûr Krista Isua mit hmuhah chuan, a inlârna leh a ram chhâlin, ṭhahnemngai takin ka hriattîr a che. 2Thu chu hril rawh; a hunah te, a hun lovah te pawh bei zêl rawh; dawh thei taka zirtîr chungin an thiam loh hriattîr la, zilh la, fuih rawh. 3Zirtîrna dik an ngaih peih loh hun a la thleng dâwn si; an bengte a zat avângin, anmahni duh zâwng angin zirtîrtute an hnênah an khâwm zâwk ang a, 4an bengte chu thutak lamah an chhu ngawng ang a, thawnthu lam panin an pêng tawh ang. 5Nang erawh chu engkimah fîmkhur la, hrehawm tuar la, Chanchin Ṭha hriltu lam hna thawk la, i rawngbâwlna kha hlen rawh.
6Kei zawng tûnah pawh hlanin ka awm mêk a ni si a, ka chhuah hun a thleng tawh e. 7Intihsiakna ṭha chu ka bei zo tawh a, ka tlânsiakna kawng ka hlen tawh a, rinna chu ka vawng reng tawh a ni; 8tûnah chuan felna lallukhum chu ka tân dahin a awm tawh a, chu chu Lalpa, ngaihtuahtu fel tak chuan chumi nîah chuan mi pe ang; ka hnênah chauh ni lovin, a inlârna ngai apiangte hnênah pawh.
Mi mal chungchânga thuchah
9Rang takin ka hnênah lo kal hrâm rawh; 10Dema chuan tûnlai khawvêl hi a ngainat avângin mi kalsan a, Thessalonika khuaah a kal ta si a; Kreska chu Galatia ramah a kal ta a, Tita chu Dalmatia ramah a kal ta bawk a. #Kol 4.14; Philm 24; 2 Kor 8.23; Gal 2.3; Tit 1.4 11Luka chauh ka hnênah a awm ta a. Marka kha sâwm la, han hruai ve rawh, ani chu rawngbâwl lamah ka tân a ṭangkai si a. #Kol 4.14; Philm 24; Tirh 12.12,25; 13.13; 15.37-39; Kol 4.10 12Tukika zawng Ephesi khuaah ka tîr ta. #Tirh 20.4; Eph 6.21-22; Kol 4.7-8 13I lo kal hunah Troas khuaah Karpa hnêna kawrfual ka hnutchhiah kha, lehkhabute nên khân rawn keng la, savun lehkha mawlh kha rawn keng ang che. #Tirh 20.6
14Aleksandra, dâr chhûn thiam kha, ka chungah a sual êm êm ṭhîn a ni; Lalpa chuan a thiltih ang zêlin a thungrûl ang; #1 Tim 1.20; Sam 62.12; Rom 2.6 15a lakah khân nang pawh fîmkhur rawh, kan thu a dodâl nasa êm si a.
16Ka thiamna thu ka sawi hmasak ṭum chuan tu mah rêngin mi ṭanpui lo va, mi thlahthlam ta vek zâwk a ni; a mawh chu phurin awm hlawm suh se. 17Chanchin Ṭha chu keimah avânga hrilh kimin a awm theih nân leh, Jentail-te zawng zawng chuan an hriat theih nân Lalpa chuan mi ṭan a, mi tichak ta zâwk a ni; tin, sakeibaknei kâa mi kha chhan chhuahin ka lo awm ta a ni. 18Lalpa chuan sualna zawng zawng lakah mi chhan chhuak ang a, a vânramah chuan him takin mi thlen ang; amah chu chatuana ropuiin awm rawh se. Amen.
Inthlahna chibai bûkna
19Priskilli leh Akuila, Onesiphora chhûngte nên khan chibai mi bûksak ang che. #Tirh 18.2; 2 Tim 1.16-17 20Erasta chu Korinth khuaah chuan a awm ta reng a, Trophima erawh chu Mileti khuaah dam lovin ka kalsan ta a.#Tirh 19.22; 20.4; 21.29; Rom 16.23 21Thlasik hmain lo kal hrâm hrâm ang che.
Eubula te, Pudea te, Lina te, Klaudi te, unau zawng zawngte nên chibai an bûk a che.
22Lalpa chu i thlarau hnênah awm rawh se. Khawngaihna in hnênah awm rawh se.
Currently Selected:
2 TIMOTHEA 4: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.