2 LALTE 2
2
Elija vânah hruai a ni
1Tin, Lalpan Elija chu vânah ṭhâwngaleivira a hruai chhoh dâwn vêl chuan heti hi a ni a, Elija chu Elisa nên Gilgal aṭangin an chhuak ta a. 2Tin, Elijan Elisa hnênah, “Hetah hian lo awm rawh khai; Lalpan Bethel thlenga kal tûrin mi tîr a ni,” a ti a. Tin, Elisa chuan, “Lalpa nunna leh i nunna chhâlin ka sawi e, ka awmsan tawp lo vang che,” a ti a. Tichuan, Bethel-ah an chhuk dûn ta a. 3Tin, Bethel-a awm zâwlneiho fapate chu Elisa hnênah an kal a, a hnênah, “Vawiinah hian Lalpan i chunga hotu hi a lâk bosak dâwn che tih i hria em?” an ti a. Tin, ani chuan, “Aw, ka hria asin; ngawi mai rawh u!” a ti a. 4Tin, Elija chuan a hnênah, “Elisa, hetah hian lo awm rawh khai; Lalpan Jeriko-a kal tûrin mi tîr a ni,” a ti a. Tin, ani chuan, “Lalpa nunna leh i nunna chhâlin ka sawi e, ka awmsan tawp lo vang che,” a ti a. Tichuan, Jeriko-ah chuan an kal dûn ta a. 5Tin, Jeriko-a awm zâwlneiho fapate chuan Elisa chu an va hnaih a, a hnênah, “Vawiinah hian Lalpan i chunga hotu hi a lâk bosak dâwn che tih i hria em?” an ti a. Tin, ani chuan a chhâng a, “Aw, ka hria asin; ngawi mai rawh u!” a ti a. 6Tin, Elija chuan a hnênah, “Hetah hian lo awm rawh khai; Lalpan Jordan-a kal tûrin mi tîr a ni,” a ti a. Tin, ani chuan, “Lalpa nunna leh i nunna chhâlin ka sawi e, ka awmsan tawp lo vang che,” a ti a. Tichuan, an pahnih chuan an kal dûn ta a. 7Tin, zâwlneiho fapate zînga mi sawmnga chu an va kal a, anmahni epin hla fêah an va ding a; tin, anni pahnih chu Jordan lui kamah an lo ding a. 8Tin, Elija chuan a puan chu a la a, a tumtêl a, tui chu a han vua a, lehlam lehlamah a lo inṭhen ta a; tichuan, an pahnih chuan lei chârah an kal kai ta a.
9Tin, an kai hnu chuan heti hi a ni a, Elija chuan Elisa hnênah, “I hnên ata lâk bova ka awm hma hian eng nge ka tihsak ang che, mi dîl rawh,” a ti a. Tin, Elisa chuan, “I thlarau chan hnih chang ila,” a ti a.#Deut 21.17 10Tin, ani chuan, “Thil khirh tak i dîl a nih hi; khirh mah sela, i hnên ata lâk bova ka awm lai mi hmuh chuan i chang ang a, mi hmuh loh erawh chuan i chang lo vang,” a ti a.
11Tin, an kal dûn zêl a, an tîtî lai chuan heti hi a ni a, ngai teh, meitawlailîr leh meisakawrte a lo lang ta phut a, an kâra tlain a inṭhentîr ta a; tin, Elija chu ṭhâwngaleiviran vânah a chho ta a. 12Tin, chu chu Elisa chuan a hmu a, “Ka pa, ka pa, Israel-te tawlailîr leh sakawr chung chuang mite hentu!” tiin a au va. Tin, Elija chu a hmu ta lo va; tichuan, ama puan chu a chelh a, hmun hnihah a pawt thlêr a.#2 Lal 13.14 13Elija puan lo tla pawh chu a khai a, a lêt leh a, Jordan lui kamah chuan a ding a. 14Tin, Elija puan lo tla chu a la a, tui chu a han vua a, “Lalpa, Elija Pathian chu khawiah nge?” a ti a. Tin, tui a han vuak ve chuan lehlam lehlamah a lo inṭhen ta a, Elisa chu a kal kai ta a. 15Tin, Jeriko khuaa zâwlneiho fapa, amah epa awmten an han hmuh chuan, “Elija thlarau chu Elisa chungah a fu ta ngei mai le,” an ti a. Amah be tûrin an va kal a, a hmaah chuan lei siin chibai an bûk a. 16Tin, anni chuan a hnênah, “Ngai teh hei, i chhiahhlawhte hian mi ngalchak tak tak sawmnga kan awmpui a; i pu zawng tûrin tîr rawh khai; Lalpa thlarauvin a hruai chho ta ang a, khawii lai tlângah emaw, khawii lai ruamah emaw a thlâk ta mai te hi a ni ang e,” an ti a. Tin, ani chuan, “Kaltîr lo vang,” a ti a.
17Tin, a tân zahthlâk khawpa an ngen hnu chuan, “Kaltîr ta che u,” a ti ta a. Chutichuan, mi sawmnga an tîr a, ni thum an zawng a; nimahsela, an hmu zo ta lo va. 18Tin, Jeriko khuaa a la châm lai chuan a hnênah an lo kîr leh a; ani chuan an hnênah, “In hnênah khân, ‘Kal suh u,’ ka ti che u a ni lâwm ni?” a ti a.
Elisa thilmak tihte
19Tin, chumi khuaa mite chuan Elisa hnênah, “En teh, hei, he khaw hmun hi a nuam hle mai a, kan pu pawhin i hmu ve reng a; nimahsela, tui hi a ṭha lo va, a ram pawh hi nau chhiatna ram a ni,” an ti a. 20Tin, ani chuan, “Tuithâwl thar mi han lâk ula, chi han thun teh u,” a ti a. Tichuan, an rawn lâksak a. 21Tin, tuikhurah a va kal a, chu chu a han theh lût a, “Lalpan heti hian a ti, ‘He tui hi ka titui tawh e, tûn achinah chuan thihna leh nau chhiatna a awm tawh lo vang,’ tiin,” a ti a. 22Chutichuan, Elisa sawi angin tûn thlengin tui chu a tui ta a.
23Tin, chuta ṭang chuan Bethel-ah a han chho va; tin, chumi kawnga a kal lai chuan khua ata mipa naupangho an lo chhuak a, an rawn nuihzat a, a hnênah, “Nang lukawlhpa, han chho tawh! Nang lukawlhpa, han chho tawh,” an ti a. 24Tin, a han lehhawi a, anmahni chu a han hmu a. Lalpa hmingin ânchhia a lawh ta a. Tin, ramhnuai ata savawmnu pahnih an lo chhuak a, an zînga naupang sawmli leh pahnih an rawn seh ta a. 25Tin, chuta ṭang chuan Karmel tlângah a kal a, chuta ṭang chuan Samari khuaah a haw leh ta a.
Currently Selected:
2 LALTE 2: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.