Yohanes 18
18
Yesus Ikilaiboke
(Mat. 26:47-56; Mrk. 14:43-50; Luk. 22:47-53)
1Yesus Naeko Allahre ebeli boungekokera mo, na moisa orowate yo bele eramande anewate imaera maibaleke alainyekoke Kidron wi reufire ekate. Nebeinya o ha zaitun heke mbainye Yesus na moisa orowate yo bele ayeuboke.
2Yudas, kelai rorele nebei anuwau naeisaei, rabuhine ban Yesus na moisa orowate yo bele roko helen nebeinye eyarilesiyate. 3Nebei anuwaufe Yudas yae felayo homo mbai bele imam yun-jun bele Farisi bele yae ukaimile abu ako yo belere yaweumiboke. Nebei homona yo yae kaijeu wa isehe roraiboke bele na fela menda bele yaraikoke ewate.
4Yesus na uwa ranne benate naeise isaeyeubokene, nebei yo naei bokore yae eunakeleufike mo hineumi, “Mayae ndere baeimeyaunge?”
5Nda yo yae wainye, “Yesus, Nazaret yona ro.”
Yesus weumi, “Reyae nda Niyae.” Yudas kelai rorele nebei nolone nangkele hebate. 6Yesus ukeumi, “Nda Reyae Niyae.” Nebei hee nane yo moise yae kewainyele ane balewate.
7Benen Yesus hineumi, “Mayae ndebe baeimeyaunge?”
Nane yo yae wainye, “Yesus, Nazaret yona ro.”
8Yesus yae weumi, “Reyae nda Niyae yae wamale. Mayae nana hesele Rare baeimeyaufena, hiwa yo waemmihi ai.” 9Nebei a ma eleukoke na bere ukeumile a na hului yembonde naeise. Neyae nda a eleukoke, “Arai, Rare kinyewarae yo mbai sambai Reyae ewaeisi Rangkele ewaheikoi.”#18:9 Yohanes 6:3
10Nebeinye Simon Petrus ramiyaeli bele rowewekene na ramiyaelire mo nokeyobouboke imam kaban na yebaei bubaeibe nangkaei meube reufibe neufake ruke. Nebei yebaei bubaei na ro Malkhus.
11Yesus euweke Petrusre weunge, “Wa ramiyaeli na anuwaufe noinyo! Bu faere bele anerehinde wanen mae Maeko yae me u ehee bele ukeufe mokorebonde. Waei u bene nekayete nebei me u Reyae omokoi era?”
12Nebeisa nebei fela yun na keleena yo bele Yahudi yae ukaimile ekate abu ako yo bele Yesusre ikilaibokate ha yae na me rinainyekoke. 13Na bere Yesus yawainyehoke Kayafas na miyae naeko Hanasle bere ekate. Nebei ralo yakama Kayafas imam kabande nekewole. 14Na bere Kayafas mbai Yahudi yun-junde a usaei weumikoke, Na foi bele yo kaban yan kabande hole molombonde naeise karo ro mbai herende.
15Simon Petrus bele reyae Yohanes rangkele nanembaisa Yesusre hakannekoke ewande. Imam kaban rare naeisaeinye, rangkele yae Yesus yawainyehoke ewate, homo mbaisa imam kabanbe obere ayandeboke. 16Nebeibe Petrus mbaibe moinye na romau kelaeunge hebewole. Nebeinye reyae moise eukukale, romau kayaare hebewole maengke fare a elendekoke mo, Petrus yaweungehokale eise endeuboke.
17Nda maengke fa Petrusre weunge, “Naendae wanen, weyae na hi ndi Ro naei moisa oraube kiyae niyae?”
Petrus yae weunge, “Reyae niyae ban!”
18Nebei hee hin manse meungeke hubawainye, Allahle ei mom-mom imae kayaa yo bele nebei imaena yebaei bubaei yo bele italo kolaibokatene akelewate. Petrus nangkele nebei italo mbainye akelewate.
19Imam kaban huba raweuboke na moisa orowate yo naei a bele naei meke a usaei kelewoumi naei a bele Yesusre hinewounge.
20Yesus yae weunge, “Ro miyae nemene naei bene na yaka yae eyelewale. Yahudi ro miyae nanemene arileisiyele anuwau yoni-yonine keleyamaele. Allahle ei mom-mom imaene bele Allahre ei mom-mom imae na kaban sele kiyaene bele keleyamaele, nun-nun wanen mae eleikoi mo. 21Naendae wanenne weyae Rare hinarae? Raei ako faeukore kelewamaele borowate yore hineimi. Neyae naeisaei rahe erabe elewekale.”
22Yesus nebei a wanen eleukokene kayaare hebate nolora ro mbai Yesusre na bera mefae yae uke na a bele weunge, “Ae, mehinin ban sele ya, Weyae nebei wanen a yae imam kabande wanae!”
23Yesus yae weunge, “Raei a faeu na ijen ban eleukokalena, na ijen ban kayeero keleisebo! Nebeibe Reyae na ijen nda a eleukokalena, rahene weyae Rare mefae yae ukarae?” 24Nebeisa Hanas ro miyaere ukeumile, Yesusre yawainyehoke, na me na ha rinaikoke bele yae imam kaban Kayafasle bokore yae ekate.
25Petrus nane italo kelaeunge mo namman hebewole. Nebeinya ro miyae yae wainye, “Weyae nda Ro Na moisa oraube na ro hi niyae era?”
Nebeibe Petrus isian mae eleukoke weumi, “Reyae niyae ban!”
26Imam kaban na yebaei bubaei na angkaeise neufake kiyae yohona yae Petrusre weunge, “Weyae niyaebe ya? Zaitun heke einye ndi ro bele nanembembane erekawale hebewoube!” 27Petrus benen weumi, “Reyae ban ma.” Nebei haei yae ojo mukuu a koukoke.
Yesus Pilatusle Bere Eke
(Mat. 27:1-2, 11-14; Mrk. 15:1-5; Luk. 23:1-5)
28Na rene kaukau hele Kayafasle imaera Yesus yawainyehoke gubernur imae einya are kolainye obere ekate. Yahudi ro miyae agama huluinye nauwa niki bele inyaibonde belene, nebei imae eise ei, rabuhine ban Paskah ya kabanna eraman bulau nangkele anenaikonderene. 29Nebei wanenne Pilatus moise eukuke hineumi, “Naendae wanen me u bekobe mokoubokene mayae nda rore ahunaunge?”
30Nda yo yae wainye, “Arai Gubernur, Neyae beko omokoiboi yae bae rahe londe waei bokore yawannehoube mande?”
31Pilatus yae weumi, “Yawennoho, menaeijae embe hinennele. Mai wali heere foloukoke honole huluinye ehee bukulu yennele.”
Nane Yahudi ro miyae yae wainye, “Nebeibe ro hoi-soise maere ewaeisi tonbe.” 32Nda wanen maere Yesus naei herende ma naei a eleukoke na hului yembonde.
33Pilatus are kolainye obere beufoke eke Yesusre kaeneungekoke mo hineunge, “Weyae na hele Yahudi naei Ondofolo?”
34Yesus yae weunge, “Nda a ma faeu ma hinarae waei kenarabe hinarae, ro miyae hiwa yo yae Raei naeise ukayetene hinarae?”
35Pilatus yae weunge, “Weyae eraerae reyae Yahudi ban ro! Waei ro miyae bele imam yoni-yoni bele yae Ware raei me eise yae kinyaiseboke. Rahe me ube weyae mokoubokaene?”
36Yesus yae weunge, “Raei yo waku nda kani kelana ban ma. Nda kani kelana yae bae, Rare Yahudi naei me eise kinyaiseboube aerene Raei holona yo han fela relaeinyele. Na hele Raei yo waku nda kani kelana ban, anuwau hina.”
37Pilatus yae hineunge, “Nebei wanenna, Weyae Ondofolo era?”
Yesus yae weunge, “Wenaeijae a ijenbe warae Reyae Ondofolo. Nebei aerene hongkaisele nane merau nebei aerene na hele naei are isaeisemibondere nda kani kelare mekale. Ro miyae na hele naei a isaeyaemaelere kena kate yo Raei a boraisele.”
38Pilatus yae hineunge, “Na hele naei a rahe era?” Nebei are mo hineungekoke, Pilatus imae eisa eukuke Yahudi ro miyaere weumi, “Reyae Naeinya beko mbai sambai ehubaikoi sele. 39Nebeibe mai era hena honoyelene huluinye nda wanen: Paskah ya kaban mae kawana hebate ro mbai reyae hayeikoyanale. Mayae kena kaube mai naeise reyae ‘Yahudi naei Ondofolo’ haisengkondere?”
40Nebei yo kali ara nene kaenate wainye, “Neyae ban, maere Barabasbe hayeinyeko!” Barabas fa kangkin kowole ro.
Currently Selected:
Yohanes 18: setDBL
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
