Kisah 18

Paulus Korintus Yone

1Paulus Atena yora kulun uke Korintus yore eke. 2Nebei yone Pontus kanina Yahudi ro mbai hubayeikoke na ro Akwila. Akwila na miyae Periskilale manemfa fere Italia kanira Korintusre mekete, rabuhine ban Kaisar Klaudius yae Yahudi ro miyae Roma kanira enaibalendere hukewoumine. Paulus hokolo bee hubayeikoise ewole. 3Hokolo bee rone miyaene naei kalia fale neyei naei malo ruka-rukara hawote, Paulus haweke wanen mbai. Nebeinye Paulus hokolo bee naei imaene nekewate nane merau hakoumiboke hawate. 4Sabat ya na yane baei Paulus ei moloi-moloi imaene eyewole Yahudi ro miyae bele Yunani ro miyae belere moi hurewoumi Yesusre hila rabo halenainyelere.

5Silasle Timotiusle Makedonia kanira meketene, Paulus nebei malo ruka-ruka hawolera heunguke, na yane baei Yahudi ro miyaere kelewoumi weumi, “Yesus Niyae Allah oro umaufe heraungeboke Wali Ondofolo.” 6Nebeibe Yahudi ro miyae Paulusre oboroi benen aukaka bele kowainyene, nebei ro miyae u mekai beko mokowate naei iwau kelemmile naeise na malona mande mo heraeyeubokera weumi, “Mai u mekai wa mekai mokowaube walora menaeijae u mekai beko bele ro miyae yae me baenembe. Yesusle wali nibi a kelerembe naeise raei baka randa hayeubokale. Reyae nda heera Yahudi ban ro miyaere keleremilere.”

7Paulus na hibi nebei Yahudi ei mom-mom imaera meukuke ei mom-mom imae kelaeunge hebele imaene eweufike. Nebei imae Yahudi na role imae ban nebeibe Allahre eise moloyeunge role, na ro Titus Yustus. 8Krispus nebei ei moloi-moloi imae yunde hebewole kiyae bele na imae obena yo bele Yesusre hila rabo halewainye. Nebei sului mbai Korintus yona ro miyae helen Paulus a huwoumi borowate yo Yesusre hila rabo halewainye, nebeisa bu kaimikoke.

9Reniai mbai ijoko raneungeboke yae Tuhan Paulusre weunge, “Buhae ohokoijae! Na hibi-hibi huweumile, waei ei mali ahuneijae. 10Reyae kayaa hebawalene, hi yae ha yae ware beko omokoiboi. Rabuhine ban, nda Korintus yo einya Raei holona ro miyae helen nekate.” 11Nebei aerene Paulus Korintus yone ralo yakama mbai bohi bele nekeukoke, Allahle ako faeuko kelewoumi.

12Galio Akhaya kani naei Gubernurre yeuboke hee, Yahudi ro miyae mbainye arileufike Paulusre ikilaiboke, yawainyehoke are kolainye ijende ekate. 13Nda a yae nebei yo waimi, “Nda ro yae keleumi Allahre eise molomandere isohi hele aei era hena Musalena kelewoumi bele. Ro miyae mokoumi naeinya huluinye hakonaikondere!”

14Paulus are elengkondere mo, Galio yae a bere neufake Yahudi ro miyaere weumi, “Ei, Yahudi ro miyae! Nda a mekaweleyaube ro beko mokouboube, rabuhi asasi koukoubere, reyae mare boromele. 15Nebeibe nda mewaube ro kenane, a faeu kenane, mai wali heere foloukoke era hena kenabe releyaunge. Menaeijae mo kolonneko. Reyae ahi elale nebei wanen a koloi-koloise!” 16Galio nebei yore moise yae hukeumihike aibaleke. 17Nebei aerene nebei Yahudi yo ei moloi-moloi imae yunde hebele kiyae Sostenesre fainyekileukoke are kolainye ijen bene rahuae bowate. Nebeibe Galio nebei wanen yeuboke katere ijoko erei.

Paulus Antiokhia Yore Beufoke Ewole

18Paulus Korintus yone heki holo nekeukoke wa, nebeisa Yesusle einya aka baekere “nauwa bele” a weumiyeke, Akilale Periskilale hakoinyekoke bele Kengkrea yone bu kaisa naisike Siria kanire ewate. Paulus Allahle a holo koukokene, nebei yone na umaa folainyekoke (yun kombaelu yeuboke). 19Efesus yone ekate mo, Priskilale Akwilale nukeumiboke, eke nebeinya ei moloi-moloi imaene eweufike, Yahudi ro miyae bele Yesusre hila rabo halenainyele ane elewate. 20Nebei yona yo Paulusre riyewainye heki wanen nebeinye nekengkondere. Nebeibe Paulus ahi yae elewole. 21Kulunde wende hee yae wa weumi, “Allah be hinembondena, reyae ndare benen merele.” Nebei ara ukeumi, Efesus yora kulun uke bu waka kabande ewole.

22Kaisarea yone akouboke mo, Paulus nebei jemaatna ro miyae ro melaeyaeibokera, Antiokhia yore eke. 23Nebei yone heki ban nekeukoke mo, Paulus kulun uke Galatia bele Frigia bele kanine yaneweke. Nebeinya Yesusre hakowainye ro miyae na hila rabo halewatere hara roroumiyeke.

Apolos Efesus Yone Bele Korintus Yone Bele Nekeukoke

24Na heki ban mo, ro mbai na ro Apolos Efesus yore meke. Neyae Yahudina ro, Aleksandria yone hongkate. Neyae a elei-eleise hiyei yae raneiboyole nane merau Allahle homofae nare huba man sele isaeyeungekoke, 25nane merau Tuhan Yesusle wali nibi einye kelaeinyekoke. Naendae wanen horo Yohaneslena bu kowaimire mo naeisaei yeubokebe, Apolos na kenara roweungehike kowolene Yesusle naeise a na ijen sele yae kelewoumi. 26Apolos huba raweuboke ei moloi-moloi imaene eke buhae hokoiboi ban mae huwoumi. Nane merau Priskilale Akwilale neyae elewoke a boroinyokera, Apolosre yaweinyehoke naei imaere ekete. Hokolo bee Apolosre Allahlena wali nibi na foi sele yae keleinyekoke.

27-28Nebeisa Apolos kena kowole Akhaya kanire endere. Efesus yona Yesusle einye aka baeke be hinaiboke nane merau homo mbai molaikoke ukaimi, Akhaya kanina Yesusre hakainye ro miyae Apolosre na foi yae yaungainyehondere. Akhaya kanine eke hee, ro miyae naei bene Yahudi a elewatere horowoumi nane merau na yaka hele Allahle homofaena a kelewoumi Yesus Allah yae oro umaufe heraungeboke Wali Ondofolo Niyae. Neyae kelewoumi a yae, nebeinya ro miyae Allah kena buhae aere ban mae hewoumi walora Yesusre hila rabo halewainye yore, Apolos helen sele hakowoumi.

Currently Selected:

Kisah 18: setDBL

Highlight

Copy

Compare