Me Hapackre Xà 31
31
Me hirôa pê me pahprõ pejti ita
Me Hapackre Xà 31.10-31
10Ỹhỹ ikra, ita caxuw wa ha aprõ na ato ihimpej, ne amã to hahkre. Pyjê jàhtôa to hàhtô, ne jũ wỳr ca ha uu ne me catàtkre na aprõ nõ impejti ata mã acator pyrentu. Nãmri ca ha ate me catàtkre na cumã acator na, ca ha amji mã huwahi to impeaj ne, nãmri ihpore jakôtti ita jirôa pê impej. He me pahprõ pejti te hajỹr, pom quê ite me amã ampo jarẽn itajê he.
11Mã ramã impjên te hĩxi pejti ita pupun pejtu ihcunea na, na ri nee jũ caxuw cupê ampo hamreare nare.
12Mã amcro cunea kam, cute amji kam hapac xà cunea kam to impejti to ipa, rỳ jũ caxuw cute apu amji pê to kên nare.
13Ne hõtpê ampo cunea to hàpên to catia to ipa, ne mehkra mã cupẽhkà te mehkà ton to ipa.
14Ne cupê, pom hãn ne pàr kre hũwry catia pĩn ampo to ipa atajê pyràac, ne hũwry catia pĩn hãn ne hũrkwa wỳr amji mã hõ to hapôj, mehkra wỳr.
15Ne hãn ne awcahti xà wỳr ihkrĩ, ne mehkra mã apu hõ ton to ipa. Ne ma cumã hàpên catê pupu, ne hamãr to ipa, ne ma cumã harkwa jirê, ne to ihhimpej to ipa.
16Ne por hàpên to ipa ita jõ porea to, me cupê amji mã hõ pjê jũhkà, ne kam amji mã pĩxô pejti kre to ipa.
17Ne hàpên xà cunea caxuw ihcuhtỳjre.
18Ne cumã hàmjixur pejti na hahkre pej. Na ri ihtỳj to hĩ to ahwỳa to ahwỳ. Ne ampo pej pit japrôr to ipa, ne hãn ne hàpên to caxwa rytu.
19Ne taa amji mã to cupẽhkà hy, ne amji mã to ihkà.
20Ne hãn ne me cupê ampo jamreare atajê tehcajpa, ne me cumã ampo jõr to ipa, ne ame hàhwỳr to ipa atajê mã ampo jõr to ipa.
21Quê ha krya to kry, quê ha nee apu amji mã hũpa nare. Ampo na? Ihtỳj mehkra mã mehkà.
22Ne ihtỳj amji mã me hàhpro xà to, na ri ihtỳj taa amji mã ihkà hẽrhẽtre tỳjre ata to, ne to ihkà.
23Mã mehcunea amji mã mempjên pejti na harẽ, ne ihtỳj amji mã me hũpa to me ipa. Ne ampeaj kam me cumã cati, hõ krĩ ata kam.
24Ne ihtỳj ahhy, ne cute me hũhkàr catêjê mã ihpore na to ahpa.
25Ne catyt kam ipa. Ne nee cumã cute amji to ipijapar cupa nare, ne cumã ahna mehpahàmti xà.
26Mã ihcakôc xà te amji jahkre pejti, jàhcaprĩhti to ihcakôc to ipa.
27Ne jũ caxuw apu xuwcaca nare, ne ihtỳj mehkra jamãr to ipa.
28Mã mehkra amji mã me harẽn pejti to me ipa. Mã impjên ihtỳj amji mã hĩxia jarẽ, ne amji mã harẽn to:
29— Mehprõ kwỳ kên nare cakrô, ca me hirôa pê apê iprõ impejti — hane.
30Ỹhỹ, ikra, pyjê jĩ cunea na impeaj to mempej cakrô, quê ha impejti ita ihtỳj jũ caxuw ihwej, ne ihcunea na impejti ita hamre.
Ne por pyjê kwỳ quêt amji mã Pahpãm tĩar cupahti atajê, quê ha ihtỳj quêt amji mã mempejti na me harẽn rohnỳtti mã.
31Ỹhỹ ikra, ca ha ate amji mã aprõ te hajỹr nõ mã acator na, ca ha amji mã to impeaj ne, ne hãn ne cumã garkwa to:
— Ihcunea na imã akênre nare gàpên xà me, acakôc xà cunea kam. Mã mehcunea amji mã me garẽn to impejti to me ipa — hane. Hamre.
Currently Selected:
Me Hapackre Xà 31: ram
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
