Luùm Ke jii gbài e nyaàiŋ dè wɔŋ fɛi wɛɛ̀ŋ
Ke jii gbài e nyaàiŋ dè wɔŋ fɛi wɛɛ̀ŋ
Wɔŋ fɛ̀ì sìngà Pɔɔ̀ɔ koɓɛ̀ anyùùŋ ko Luùm nyaŋ naŋ wa nɔ̀ŋ sìnga wuŋ wèè wɔŋ banebànè ke dòmaàŋ wèè e kààìŋ jààmeɛ̀ wo Pɔɔ̀ naŋ wa ɗewè wèè wo nyɛ̀nɛ̀ŋ lɛ koɓɛ̀ anyuùŋ hààwe nyàŋ ko jawa gbeeì Luùm. E ɗèweuŋ nɛ̀ nàŋ yaà wa weè wo tòòmò anyuùŋ hààwe nyàŋ e tɛɛ ko Luùm wèè e teenga kpuu, eɓìèmànjɛ̀wɛ̀ tii wèè auŋ wa kpuumàŋ wo kà ko Sipiìŋ. Wò naŋ wa sìngè wèè wo nyɛ̀nɛ̀ŋ ke jii gbài e nyaàiŋ dè e yèɛ wò naŋ nyìmè lɛ e nyaàiŋ dè e hààwè anyùùŋ màŋjɛ̀wɛ̀ Jisɛ̀ nyaŋ yèè e yèɛ wuŋ bi naŋ wa kɔ̀ɛ̀ɛ̀ sùà lɛ e nyaàiŋ dè maŋ nyììŋ gè anyùùŋ màŋjɛ̀wɛ̀ Jisɛ̀ nyaŋ. Maŋ keì wòo màŋ wɔŋ fɛi wɛɛ̀ŋ sùà nàŋ yaà maŋ mìè gbìàŋ Pɔɔ̀ maŋ.
Nààŋ wò naŋ wa kpɛ̀ɛ̀yɛ̀ anyuùŋ hààwe nyàŋ zùùmo ko Luùm yèè wò naŋ nyiŋ wòò e ɗeweɛ̀ wò naŋ wa zoolò weè nyiŋ lɛ̀, wò naŋ nyiŋ wòò koɓɛ̀ è ɗì e gbòaà wèè wɔŋ fɛiɔ̀ wò naŋ sìngè wɔŋ. “Ebò Siaàŋ woà e ɗeweɛ̀ wo Dayà hiàŋ anyùùŋ koɓɛ̀ wuŋ biì wèè aŋ nɔ̀ŋ tɔ̀ɔ̀nyaàŋ sùà, yèè è yaà nɔŋ zà esàɓù ke jii tùliaà yaà e hààweɛ̀ àŋ kùwaùŋ sùà lɛ e yìwìà ko tɔɔtuì yèè ko jee ɗìi” (1.17).
Kpeiŋ wo Pɔɔ̀ naŋ gbìɛ̀ŋ e ɓɛ̀ è ɗì gbòa lɛɛ̀ koɓɛ̀ guùŋ wèè e nɔ̀ŋ tɔ̀ɔ niŋ janjai. Wò naŋ woò wààŋ, anyuùŋ kpùuŋ nyàŋ gbiŋ, e kpùlìà aŋ Juùù yèè anyùùŋ nyaŋ nàŋ fè àŋ Juùù nyaŋ, kuwa wèè aŋ kpɛɛ̀ŋ wèè aŋ nɔ̀ŋ anyùùŋ tɔ̀ɔ̀nyaàŋ koɓɛ̀ Dayài, esaɓù kɛ̀ aŋ gbiŋ àŋ yaà e gààŋ maŋ jùumù dìì. Anyùùŋ àŋ kile aŋ nɔ̀ŋ anyùùŋ tɔ̀ɔ̀nyaàŋ koɓɛ̀ Dayài esàɓù e hààweɛ̀ aŋ kuwa wo Jisɛ̀ Kulaì sùà lɛ. Eɓìèmàŋjɛ̀wɛ̀ tii wo Pɔɔ̀ naŋ tɔ̀ɔ̀ e nɔ̀ŋ kìì wɔŋ nyiiŋ gèe jɛiɔ̀ esàɓù e mìèsùàguùŋ nɛ wo Jisɛ̀ Kulaì sùà e yèɛ naŋ nɔ̀ŋ esaɓù wèè eiŋ nɔ̀ŋ anyuùŋ mɔ̀ɔ̀nɔŋ jɛi koɓɛ̀ Dayài. Wo nyuùŋ hààweɔ̀ kuwa ke jii fàa ko fɛ̀ɛ̀fèìŋ Dayài, yèè wo Jinàŋ Dayàa nauŋ gè e gààŋ jùumù yaà e fàa dii. Ke kàɓanè nɔɔnɔɛ̀ŋ e kà koɓɛ̀ ke kàɓànè nɔɔnɔŋ le taaà (5-8), wo Pɔɔ̀ naŋ ɓɛìŋ wòò e kèè esàɓù maŋ Sàwà Dayà maŋ yèè e gààŋ wo Jinàŋ Dayàa wɔŋ nyììŋ gè wo nyuùŋ kɛ̀ɛ̀nɛ̀ŋ hààweɔ̀ sùà. Kpeiŋ wo Pɔɔ̀ naŋ gòngò koɓɛ̀ wuŋ biì sèè mààŋ kɛ̀ dièsɔa aŋ Juùù yèè anyùùŋ nyaŋ fè àŋ Juùù nyaŋ naŋ ɓɛ̀nɛ̀ŋ ɓɛ̀ɛ̀nɛ̀ŋ e ɗèwè Dayàa sùà wèè anyùùŋ nyaŋ gbiŋ. Ko dìèmè e gbòauŋ nɛ̀ wò naŋ woò wààŋ, maŋ hɛ̀ɛ̀ gè aŋ Juùù nyaŋ wèè kɛ̀ aŋ go wa nàŋ jàà wò Jisɛ̀ kùàŋ dìì, e yaà e ɗèwè Dayàa bà, wèè wo hìàŋ anyùùŋ nyaŋ gbiŋ àŋ yaà aŋ bà nyiŋ bà wèè e tɛ̀ɛ̀tɛ̀ɛ̀ Dayàa nyàŋ wo Jisɛ̀ Kulaì sùà, yèè wò naŋ haawè kɛ̀ aŋ Juùù nyaŋ naàŋ gììyè wò Jisɛ̀ màŋhɛɛ è teenga gbiŋ. Ko dìèmè e gbòà Pɔɔ̀ɛ, wò naŋ sìngè e ɗeweɛ̀ wo nyuùŋ hààwè Dayàa kuwa wo nɔ̀ŋ wɔŋ nyiiŋ gèeuŋ nɔɔ̀ŋ sùà lɛ, ɓɔɔɓɔɔ e nyaàiŋ dè e mànaŋ aŋ dàwi e fèemàŋ. Wò naŋ ɓèmè e ɓɛ̀mànɗì e sìngauŋ nɛ̀ wèè e nɔ̀ŋ e tòmo koɓɛ̀ Dayài, e tòmoɛ̀ wo nyuùŋ hààwè Dayàa kuwa wo nyɛ̀nɛ̀ŋ wèè wɔŋ fuɔuŋ nɔɔ̀ŋ yèè koɓɛ̀ aŋ dàwi lɛ̀, yèè maŋ màaŋdàwè wèè gòngo kɛ̀ɛ̀nɛŋ. Ko jèè ɗì wɔŋ fɛi sìngauŋ nɔɔ̀ŋ, wò naŋ sìngè maŋ mìè gbìàŋ jii tùlia yèè maŋ mìè tɛ̀nɛŋ koɓɛ̀ Dayài.
E ɗewe kiiɛ̀ àŋ naŋ gòònò maŋ keì wòo titi màŋ lɛ
Ke jii gbài yèè koɓɛ̀ì ɗìi (1.1-17)
E kpɛ̀ɛŋ wo nyuùŋkpùuŋ kuwa wèè e jòèyeuŋ nɛ̀ lɛ (1.18–3.20)
Ke dòmàŋ Dayàa wèè e jòèye (3.21–4.25)
Wɔŋ nyiiŋ jɛiɔ̀ wo Jisɛ̀ Kulaì sùà (5.1–8.39)
E ɗèweɛ̀ wo Dayà kuwa wèè anyùùŋ Ezɔ̀ɛ̀ nyaŋ lɛ̀ (9.1–11.36)
Ke kpèè nyuùŋ hààweɔ̀ (12.1–15.13)
Ko dìà sìngaà yèè maŋ zùùmò wuŋ bi màŋ (15.14–16.27)
Currently Selected:
Luùm Ke jii gbài e nyaàiŋ dè wɔŋ fɛi wɛɛ̀ŋ: WFESD
Highlight
Copy
Compare
Share
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.