Luùm 7

Ke sàwàa e nyaàiŋ dè ke yɛɛ̀ nɔ̀ɔŋ

1Tɔɔɓaa wùìyaim nyàŋ, nàŋ nyìmàŋ e yèɛ mìŋ yaà hinie wèè ka woò lɛ, esaɓù nyɛ̀iŋ nààŋ gbiŋ nàŋ nyìmàŋ e kèè ke sàwà. Ke sàwàa kuwa nɔŋ e gààŋ anyùùŋ diɛŋ aŋ yè nyaŋ yaà wɔŋ nyiiŋ gèeɔ̀ sùà nyaŋ. 2E tɔ̀ɔ̀màŋsèì e keì lɛɛ̀ nàŋ yaà, ke sàwà yɛɛ̀ gbìaŋ kuwa e gààŋ wo jɔ̀ùnèè yɛ̀ɛ̀ɔ diɛŋ wèè koɓɛ̀ wo fanuuŋ nɔɔ̀ŋ, e teengaà wo felaaà yaà wɔŋ nyiiŋ gèeɔ̀ sùà lɛ. Kɛɛ sèè wo felaaà wò fà, kɛ̀ wo jɔunɔ̀ɔŋ fè ɓɛìŋ kè sàwà dìì kòɓɛ̀ wò felaa wii. 3Weètii, sèè wo jɔùŋ bi wo ɓèmè wo felaa joo bà e teengaà wo fanuuŋ nɔɔ̀ŋ wò yaà wɔŋ nyiiŋ gèeɔ̀ sùà lɛ, àŋ douŋ nàŋ nyààŋ wo jɔ̀ùŋ hmɔŋtu. Kɛɛ sèè wo fanuuŋ nɔɔ̀ŋ wò fà, kɛ̀ wò fòlà ke sàwà ke yɛ̀ɛ̀ɛ dìì koɓɛ̀ wo fanuuŋ nɔɔ̀ŋ. Wò naàŋ ɓɛ̀nɛ̀ŋ ɓèmè wo felaa joo bà wèè wo nɔ̀ŋ wo fanuuŋ, e yèɛ wò gò pɔ̀ɔ̀ kè sàwà mààŋ wò naŋ nyɛ̀nɛ̀ŋ hmɔŋtu. 4Yɛi nɔŋ è yaà ko nɛ̀ɛ̀iŋ niìŋ nyɛ̀iŋ nààŋ wùìyaim nyàŋ. Nyɛ̀iŋ pɛɛ nàŋ fòlà e gààŋ ke sàwàa dìì esaɓù kɛ̀ nìŋ yaà aŋ bàiŋbà wèè ke kpùnàŋ Jisɛ̀ Kulaìɛ naŋ fɔ̀ɔ̀yɛ̀ wɔŋ vànèkpaaà yɛ̀. Wuŋ nàŋ yaà wo yèɔ wo Dayà naŋ wa gè e fàaà dìì wɔ, wuŋ nàŋ kànàìŋ wèè kɛ̀ è naiŋ ɓɛ̀nɛ̀ŋ nɔ̀ŋ anyuùŋ kɛnɛ e tòmò Dayàa sùà. 5Sèè è nɔ̀ìŋ nɔŋ maŋ nyiiŋ gèe wi màŋ sùà màànààŋ yàwi bi manaŋ wèè eiŋ nɔ̀ŋ lɛ, ke sàwàa nyɛ̀nɛ̀ŋ wì eiŋ jɔ̀ɔ̀lɔ̀ e ɗèweɛ̀ è kùwàìŋ lɛ dìì wèè eiŋ nyɛ̀nɛ̀ŋ maŋ kpèè naanààŋ maŋ kpùnaŋ wi màŋ sùà, yèè maŋ kpèè naanààŋ wi bi zà nàŋ do wi nàŋ nyɛ̀nɛ̀ŋ eiŋ fà. 6E ɗewe gbio sùà, wo Dayà wò wi naàŋ gè e gààŋ ke sàwàa diɛŋ, esaɓù kɛ̀ è yààìŋ mààŋ anyùùŋ naŋ fɔ̀, e fèìŋ ɓɛìŋ è gààŋ màŋ kpèè miiŋ naŋ wi yɛi wa kùwò kpaŋ maŋ keì dìì. Kɛɛ e fèiŋ naàŋ ɓɛ̀nɛ̀ŋ zòòlò Dayà e ɗewe gɔuɛ̀ sùà nààŋ è yaà sìnga niŋ ke sàwà sùà lɛ̀, kɛɛ wo Jinàaŋ do nàŋ nyɛ̀nɛ̀ŋ eiŋ niŋ nyɛ̀nɛ̀ŋ e ɗewe kii jɛi sùà.

Ke sàwà yèè jùumù

7Èiŋ ɓɛ̀nɛ̀ŋ wòo wìà, ke sàwàa kiiŋ bi kè kuwa jùumù? Tɔɔɓaa ke sàwàa kuwà jùumù. Kɛɛ ke sàwàa naŋ nyɛ̀nɛ̀ŋ mìŋ naŋ nyìmè kɛ̀ e keì naanààŋ nyɛ̀nɛŋ è yaà e jùumù. Sèè ke sàwàa go weè woò wààŋ, “Ɓɔ̀ mùŋ jàà jii mɔɛ̀ŋ è nɛ̀ŋ kàmè dàwi mɔɔ̀ŋ màŋjɛ̀wɛ,” miŋ naàŋ weè nyìmè è keì mààŋ tii. 8Kɛɛ esàɓù ke miè gbìaŋ yii, e jùumù naŋ yɛ̀mɛ̀ ɗewe wèè e fùlìà e ɗèwe naanààŋ maŋ gbiŋ mìŋ kuwa ke jii miɛ̀ŋ sùà maŋ. Eɓìèmàŋjɛ̀wɛ̀ ke sàwà, e jùumù fè kɛ̀ɛ̀nɛ̀ŋ gààŋ. 9Miàŋ bi mìŋ yaà wa wɔŋ nyiiŋ gèeɔ̀ sùà paŋgàà mìŋ naŋ wa nyìmè e kèè ke sàwàa. Kɛɛ nààŋ ke sàwà naŋ naàŋ nɔ̀ŋ, e jùumù naŋ kɛ̀ɛ̀nɛ̀ŋ gààŋ wɔŋ nyiiŋ gèe diɛŋ, 10yèè wo Dayà naim hèè e kìtì fàa diɛŋ. Kè sàwàa mìŋ yaà wa weè yɛ̀ɛ̀mɛ̀ dòmaŋ wèè keim nyɛ̀nɛ̀ŋ ka nɔ̀ŋ wɔŋ nyiiŋ gèe sùà lɛ, naim hèè e kìtì fàa diɛŋ. 11E jùumù naŋ yɛ̀mɛ̀ ɗewe, yèè esàɓù ke sàwàa, e jùumù naim zuwò yèè è naim jìwè.

12Kpeiŋ kɛ̀, ke sàwàa yaà nɛɛmaŋ esaɓù kɛ̀ kè yewe koɓɛ̀ Dayài, yèè maŋ mìè go nyiŋ màŋ yaà nɛɛmaŋ e fèfoo miiŋ pɛɛ màŋ yewe koɓɛ̀ Dayài, esaɓù kɛ̀ màŋ yaà tɔ̀ɔ̀nyaàŋ, e kìlà màŋ yaà tɛ̀ɛ̀. 13Tɛɛ̀ naŋ tɔɔ̀ kɛ̀ e tɛ̀ɛ̀tɛ̀ɛ̀ nyiŋ nɛ̀ naim nyɛ̀nɛ̀ŋ mìŋ naŋ fɔ̀? Ke sàwàa nààŋ gòim wa nyɛ̀nɛ̀ŋ mìŋ do fà. Kɛɛ e jùumù naŋ tòòmò ke sàwàa, yèè è naim nyɛ̀nɛ̀ŋ mìŋ naŋ fɔ̀, wèè kɛ̀ anyùùŋ naŋ ɓɛ̀nɛ̀ŋ nyìmaŋ janjai kɛ̀ kiìŋ nàŋ yaà e jùumù. E yìwìà esàɓù ke sàwàa, èiŋ naàŋ ɓɛ̀nɛ̀ŋ nyìmaŋ kɛ̀ e jùumù yaà e keì naanààŋ gbee.

E nyaàtàaŋ yàwì sùà lɛ

14Èiŋ nyìmàŋ kɛ̀ maŋ Sàwà maŋ yewe wo Jìnàŋ Dayàa sìwè. Kɛɛ mìŋ yaà nɔŋ wo nyuùŋkpùuŋ, yèè mìŋ yaà wo ɗo koɓɛ̀ maŋ jùumù. 15Miŋ nyimààŋ tɔɔɓaa mànɛ̀ŋ maŋ mìŋ nyɛnɛŋ màŋ. Miŋ fè nyɛ̀nɛ̀ŋ è yèɛ mìŋ naŋ nyìmè kɛ̀ è yaà tɔ̀ɔ̀nyaàŋ lɛ. Mìŋ nyɛnɛŋ maŋ keì maŋ mìŋ naŋ wùɔ̀ŋ maŋ. 16Nààŋ mìŋ nyɛnɛŋ maŋ keì naanààŋ maŋ miŋ manàŋ wèè ka nyɛ̀nɛ̀ŋ maŋ, tɛɛ̀ naŋ tɔɔ̀ kɛ̀ kà nyimèè kɛ̀ ke sàwàa yaà tɔ̀ɔ̀nyaàŋ. 17Weètii, tɔɔɓaa miàŋ bi nàŋ fè nyìnìè màŋ keì mɛɛ̀ŋ. E jùumùɛ yààìm sùà lɛ nàŋ nyɛnɛŋ maŋ keì mɛɛ̀ŋ. 18Kà nyìmàŋ kɛ̀ e gààaŋ wèè ka nyɛ̀nɛ̀ŋ e keì è yèɛ yaà tɛ̀ɛ̀ lɛ e fè kè kpùnaŋ miɛ̀ŋ sùà. Sèè pɛɛ ka kɛ̀ɛ̀nɛ̀ŋ ɗèwe wèè ka nyɛ̀nɛ̀ŋ e tɔ̀ɔ̀nyaàŋ, miŋ fè niŋ ɓɛ̀nɛ̀ŋ nyɛ̀nɛŋ. 19Miŋ fè nyɛ̀nɛ̀ŋ è tɛ̀ɛ̀tɛ̀ɛ̀ɛ mìŋ manaŋ ka nyɛ̀nɛ̀ŋ lɛ. Kɛɛ mìŋ nyɛnɛŋ e kèì jùumùɛ miŋ manàŋ wèè ka nyɛ̀nɛ̀ŋ lɛ. 20Weètii sèè mìŋ nyɛnɛŋ maŋ keì maŋ miŋ manàŋ wèè ka nyɛ̀nɛ̀ŋ maŋ, è naŋ tɔɔ̀ kɛ̀ e fè ɓɛìŋ miàŋ bi wèè ka nɔ̀ŋ nyìnìè màŋ kèì naanààŋ mɛɛ̀ŋ. E jùumùɛ yààìm sùà lɛ nàŋ nyɛnɛŋ maŋ keì bi.

21Mìŋ naŋ yɛmɛ̀ kɛ̀ ke sàwà yɛɛ̀ kè yaà toomo. Sèè mìŋ mɔnɔŋ wèè ka nyɛ̀nɛ̀ŋ e yèɛ yaà tɛ̀ɛ̀ lɛ, e keì naanààŋ nyɛ̀nɛŋ nɔŋ nàŋ dèìm ke jii wèè ka nyɛ̀nɛ̀ŋ. 22Mìŋ naŋ jàà ke Sàwà Dayàa kùàŋ dìì ke jii miɛ̀ŋ gbiŋ sùà. 23Kɛɛ ke kpùnaŋ miɛ̀ŋ gbiŋ sùà, mìŋ naŋ yɛmɛ̀ kɛ̀ e nɛ̀ŋ bà kòò è yaà sùmìàŋ sùà ke sàwàa mìŋ naŋ jàà kùàŋ dìì ke jii miɛ̀ŋ sùà yɛ. È naim nyɛ̀nɛ̀ŋ wo ɗo e jùumù dìì e yèɛ toomàŋ e kenìŋ mɛ̀ sùà wèè manɛ̀ŋ maŋ gbiŋ mìŋ nyɛnɛŋ màŋ. 24E zɔlɔ̀ gbiŋ fè kè jii miɛ̀ŋ sùà! Ɓòò nàŋ doim nàŋ joeyè e yìwìà ke kpùnaŋ yɛɛ̀ ke yèɛ doim nàŋ nyɛ̀nɛ̀ŋ ka fà lɛ? 25Mìŋ naŋ gè wo Dayà ke sɛ̀ e yìwìà wo yèɔ doim nàŋ joeyè wɔ, wo Kana wiɔ̀ Jisɛ̀ Kulaì sùà.

Weètii, yɛi mìŋ yaà, e yìwìà ke jii miɛ̀ŋ sùà mìŋ jɔɔlɔ̀ ke Sàwà Dayàa dìì. Yèè e yìwìà ke kpùnaŋ miɛ̀ŋ sùà mìŋ jɔɔlɔ̀ ke sàwàa dìì ke yèɛ naim nyɛ̀nɛ̀ŋ wo ɗo koɓɛ̀ jùumù lɛ.

Currently Selected:

Luùm 7: WFESD

Highlight

Copy

Compare