Nyɛ̀nɛ̀ŋ 10

Wo Pììlɛ yèè wo Kɔ̀nilìɔ̀

1Wo felaa bà yaà wa ko Sesèlià àŋ nyaaŋ wo Kɔ̀nilìɔ̀. Wuŋ nàŋ yaà wa wo nyuùŋ gbeeɔ̀ wèè ke gbòò aŋ kààlòòɗùà Luùm nyaŋ àŋ nyaaŋ nyààŋ “Ètaliɛ̀ŋ Jɔ̀àa.” 2Wo Kɔ̀nilìɔ̀ yaà anyunùuŋ nyàŋ ko gboounoo kuwa wa e hààwe yèè àŋ duɔŋ wa wo Dayà. Wò hewa kpùùmàŋ anyuùŋ pɔ̀ɔ nyàŋ zimgbe, yèè wò hewa zòòlò Dayà e teengaà diɛŋ. 3Ke ɗɔ̀ɔ̀ guùŋ bà e gɔɛɛ gbòà taaà e koya gɔɛɛ, wo Kɔ̀nilìɔ̀ naŋ gò e gɔa, yèè wò naŋ yɛ̀mɛ̀ wo màìkà Dayà wò naŋ hnè ko nɛ̀ɛ̀uŋ niìŋ wò nauŋ woò wààŋ, “Kɔ̀nilìɔ̀!”

4E jùùɛ naŋ wa nyɛ̀nɛ̀ŋ wo Kɔ̀nilìɔ̀ yèè wò naŋ yɛ̀mɛ̀ wo màikàa sɛiiŋ yèè wò nauŋ woò wààŋ, “Kiìŋ nàŋ yaà e fàsàì tɛɛ̀, Dàa?”

Wo màikàa nauŋ fasàì wààŋ, “Wo Dayà jàà e zòòlo mɔ̀ɛ̀ yèè manɛ̀ŋ kìɛum màŋ kùàŋ dìì koɓɛ̀ anyuùŋ pɔ̀ɔ nyàŋ, yèè wò naàŋ wèè woum fasàì. 5Weètii tuàŋ anyùùŋ ko Jɔpà, wèè wo felaa bà àŋ nyaaŋ wo Saimɔ̀ŋ Piilɛ̀. 6Wò yaà wo nyùùnèènyɛiŋ ko gbòò wo kenàŋ bà àŋ nyaaŋ wo Saimɔ̀ŋ, wo nyuùŋ tòòmò maŋ fɛ̀ì yilì wèè manɛ̀ŋ bàne, wo yèɔ joà wɔŋ juwoɔ̀ kɔɔ wɔ̀.” 7Yèè wo màikàa naŋ kɔ̀ nààŋ wò nauŋ kpɛ̀ɛ̀yɛ̀ kɔɔ gbòa. Wo Kɔ̀nilìɔ̀ naŋ nyààŋ aŋ ɓɔìjɔ̀à tòmouŋ nyàŋ àŋ tìyèe yèè wo kààlòòɗùàuŋ nɔɔ̀ŋ bà guùŋ, wo yèɔ hewa zòòlò Dayà wɔ. 8Wò naŋ nyiŋ wòò e keìɛ naŋ kaaìŋ lɛ yèè wò naŋ nyiŋ tùɔ̀ŋ ko Jɔpà.

9Wɔŋ niìsìaà bàa, nààŋ anyùùŋ nyɛɛ̀ŋ yaà wa dòmaŋ àŋ yaà hinie yèè àŋ naŋ gbɛ̀ɛ̀ ko Jɔpà, wo Pììlɛ naŋ jòwò ke saaàŋ dìmɛ̀ e gɔɛɛ gɛ̀ɛ̀ ɗìò tɛɛɛ̀ wèè wo zoolò. 10E jìèɛ nauŋ kùwò sɛmɛ yèè e wànàŋ nɛ̀ŋje nauŋ nyɛ̀nɛ̀ŋ. Kɛɛ nààŋ àŋ yaà wa bàànè e nɛ̀ŋjeɛ̀, wò naŋ sɛ̀ɛ̀ maŋ jàwè yèè wò naŋ gò e gɔa. 11Wò naŋ yɛ̀mɛ̀ ko àìjɛnɛ̀ŋ naŋ yilè, yèè e nɛ̀ŋ bà yaà dèyà sùà mààŋ wɔŋ deè fàà gbee, e teenè mààŋ anyùùŋ bà kùwà wuùŋ maŋ gènè tiinàŋ maŋ àŋ yaà wuùŋ dèèyè sùà e ɗuunyaàŋ diɛŋ. 12Maŋ ɗolònɛ̀ŋ kàntinàŋ gbiŋ, aŋ yilì gɔ̀ɛ̀ɛ̀ dìì e dììɛ diɛŋ, yèè aŋ wòì e yìwìà ke nyiliɛ̀ yaà wa wɔŋ dèè bi sùà. 13Wò naŋ kòmò ke mìè gbòà nyùùŋ kè nauŋ woò wààŋ, “Pììlɛ, yewà dìì, jiwà yèè muŋ gbìlà!”

14Kɛɛ wo Pììlɛ naŋ woò wààŋ, “Kpele Kanaà, kòò mìŋ gbìlè wa è nɛ̀ŋ gò zɛ̀nɛ̀ŋ e yèɛ fè tɛ̀ɛ̀ lɛ.”

15Ke mìèɛ naŋ ɓɛìŋ gbòò ko nɛ̀ɛ̀uŋ niìŋ wààŋ, “Sèè wo Dayà wo woò wààŋ e nɛ̀ŋ yaà tɛ̀ɛ̀ wèè e nɛ̀ŋjè, ɓɔ̀ mùŋ woò mààŋ e fè zɛ̀nɛŋ niŋ yèè e fè tɛ̀ɛ̀ wèè jèe.” 16Tɛɛ̀ naŋ kaaìŋ sùà taai, pangàà wɔŋ dèyèɔ naŋ ɓɛìŋ jòwò ko àìjɛnɛ̀ŋ fiò.

17Nààŋ wo Pììlɛ yaà wa goongo kɛ̀ kiìŋ e gɔa gòo lɛɛ̀ naŋ fasàì, aŋ felaa nyàŋ wo Kɔ̀nilìɔ̀ naŋ wa tùɔ̀ŋ nyaŋ naŋ nɔ̀ɔ̀ŋ daawe kpoloo, yèè àŋ naŋ hàì wɔŋ gbàngiɔ̀ yɛmgbɛ̀ ko gbooì wo Saimɔ̀ŋ Piilɛ̀ yaà wa lɛ̀. 18Àŋ naŋ kpùlò kpɔkpɔ, yèè àŋ naŋ dawè sèè mààŋ kuii wo Saimɔ̀ŋ Piilɛ̀ joà.

19Nààŋ wo Pììlɛ yaà wa nɔŋ gòòngò e kèè e fàsàì e gɔaà, wo Jìnàŋ Nɛɛmaàŋ nauŋ woò wààŋ, “Aŋ felaa bà kòò àŋ yaà kià ko kaameum. 20Weètii yewà dìì muŋ dèyà, yèè ɓɔ̀ mùŋ gè màŋhɛɛ wèè nyɛ̀iŋ nyiŋ naŋ ka, esaɓù kɛ̀ miàŋ naŋ nyiŋ tùɔ̀ŋ.” 21Yèè wo Pììlɛ naŋ dèyè koɓɛ̀ aŋ felaa nyàŋ yèè wò naŋ nyiŋ woò wààŋ, “Miàŋ nàŋ yaà wo nyùnɔ̀ɔŋ nìŋ yaà kaame wɔ̀. Wèè kiìŋ nìŋ naŋ hnè?”

22Aŋ felaa nyàŋ naŋ fasàì yèè àŋ naŋ kìɛ̀ŋ mìè seì nyààŋ, “Wo nyùùŋ gbèè aŋ kààlòòɗùà nyaŋ, wo Kɔ̀nilìɔ̀ naŋ wi tùɔ̀ŋ. Wò yaà wo nyùùŋ tɔ̀ɔ̀nyaàŋ yèè wò duɔŋ Dayà. Anyùùŋ nyaŋ gbiŋ wɔŋ fùɔ̀ŋ aŋ Juùù nyaŋ sùà mànaùŋ yèè àŋ kuwa ɓɛ̀ɛ̀jàa weèuŋ. Wo màìkà Dayàa nauŋ woò kɛ̀ wo tùàŋ weèum muŋ ka ko gboouŋ noo wèè wo kòmàŋ e yèɛ mùŋ kuwa mauŋ woò lɛ.” 23Wo Pììlɛ naŋ jɔ̀ɔ̀yɛ̀ aŋ wùìya nyɛɛ̀ŋ ko saaìŋ, yèè wò naŋ nyiŋ woò wààŋ aŋ jàwà wèè wɔŋ dùmɔ̀ɔŋ.

Wɔŋ niìsìaà ke ɗɔɔɛ̀ bàa, wo Pììlɛ yèè anyùùŋ màŋjɛ̀wɛ̀ wo Kanaà Jisɛ̀ nyaŋ bà ko Jɔpà naŋ dè aŋ felaa nyàŋ naŋ yèwè ko gbòò Kɔ̀nilìɔ̀ nyaŋ maŋjɛ̀wɛ yèè àŋ naŋ kɔ̀. 24Wɔŋ niìsìaà bàa àŋ naŋ hàì ko Sesèlià. Wo Kɔ̀nilìɔ̀ naŋ wa nyààŋ aŋ wùìyauŋ nyàŋ yèè aŋ dàwi mɔ̀ɔ̀nɔuŋ nyàŋ bà, esaɓù kɛ̀ àŋ yaà nyiŋ wa yɛ̀ɛ̀mɛ̀ dòmaŋ. 25Kɛɛ nààŋ wo Pììlɛ nao haì, wo Kɔ̀nilìɔ̀ nauŋ ɓeeè, yèè wò naŋ dè maŋ gɛ̀ɛ̀ŋ nùuŋ màŋ dìì, Kpeiŋ wò naŋ gbùwò wo Pììlɛ fɛɛ̀feìŋ e ɓɛ̀ɛ̀jàa sùà. 26Kɛɛ wo Pììlɛ nauŋ gè dìì wo sie, yèè wò nauŋ woò wààŋ, “Sìè. Miàŋ pɛɛ mìŋ yaà nɔŋ wo nyuùŋkpùuŋ.” 27Wo Pììlɛ naŋ nɔ̀ŋ gbùùyè wo Kɔ̀nilìɔ̀ kɔɔ e jèèsùà aŋ jɔ̀à ko saaìŋ, ko yèi anyuùŋ zimgbe naŋ wa deenè lɛ. 28Wo Pììlɛ naŋ nyiŋ woò wààŋ, “Nàŋ nyìmàŋ kɛ̀ è yaà ke sàwà kɛ̀ yàwi nààŋ Juùù nyaŋ e yìwìà wɔŋ fùɔ̀ŋ Jùdiàa yaà anyùùŋ nyaŋ fè àŋ Juùù nyaŋ ɓɔ̀ àŋ kpulià kè nyɛ̀nɛŋ ɔ̀ɔ̀ eiŋ nyiŋ jaamè. Kɛɛ wo Dayà wòim tɔɔ̀ kɛ̀ wo gò gongò kɛ̀ wò nyùùŋ gbiŋ fè zɛ̀nɛuŋ ɔ̀ɔ̀ wo fè tɛ̀ɛ̀. 29Weètii mìŋ naŋ nyimèè mìŋ naŋ kià hnè. Kɛɛ tɔ̀ miŋ dawè, wèè kiìŋ mùŋ naŋ tùɔ̀ŋ weèim?”

30Wo Kɔ̀nilìɔ̀ naŋ fasàì wààŋ, “Maŋ ɗɔ̀ɔ̀ tiinàŋ naàŋ mààŋ, nààŋ mìŋ yaà mɛ̀iŋ zoolo e gɔɛɛ gbòà taaà e koya gɔɛɛ ko saaŋ mio. Ko fɛɛ̀feìŋ, wo felaa gɔ̀àì maŋ deè fùà naim sìè ko fɛɛ̀feìŋ 31yèè wò naim woò wààŋ, ‘Kɔ̀nilìɔ̀! Wo Dayà jàà e zòòlo mɔ̀ɛ̀ yèè manɛ̀ŋ kìɛŋ zimgbeum màŋ kùàŋ dèè koɓɛ̀ anyuùŋ pɔ̀ɔ nyàŋ. 32Weètii tuàŋ wo nyùùŋ ko Jɔpà ko gbòò wo kenàŋ bà àŋ nyaaŋ Saimɔ̀ŋ Piilɛ̀. Wò yaà wo nyùùnèènyɛiŋ ko gbòò kenàŋ bà àŋ nyaaŋ Saimɔ̀ŋ, wo nyuùŋ tòòmò maŋ fɛ̀ì yilì wèè manɛ̀ŋ bàneɔ̀, wo yèɔ joà wɔŋ juwoɔ̀ kɔɔ wɔ̀.’ 33Mìŋ naŋ tùɔ̀ŋ weèum fiò, yèè mùŋ naŋ niŋ jàà kùàŋ dìì mùŋ naŋ hnè. Yàwi nààŋ gbiŋ kòò è yààìŋ kià wo Kànà Dayàa fɛɛ̀feìŋ, wèè eiŋ kòmàŋ e yèɛ wo Kanaà naum woò lɛ.”

Ke mìè gbòà Pììlɛɛ̀

34Wo Pììlɛ naŋ tɔ̀ɔ̀tù gbòa wààŋ, “Kà naàŋ nyìmàŋ kɛ̀ è yaà tɔ̀ɔ̀nyaàŋ kɛ̀ wo Dayà kuwà wò nyuùŋ mànaŋ titi, kɛɛ wò manaŋ anyùùŋ nyaŋ gbiŋ e seenè kpaŋ. 35Anyùùŋ nyaŋ zoolà Dayà yèè àŋ nyɛnɛŋ e yèɛ yaà tɔ̀ɔ̀nyaàŋ lɛ, wo Dayà do nyiŋ nàŋ jàà kùàŋ dìì, wo gò kpɛɛ̀ŋ kɛ̀ kiìŋ wɔŋ fuɔŋ àŋ yewe. 36Nàŋ nyìmàŋ ke mìè gbìaàŋ wò naŋ wa tùɔ̀ŋ koɓɛ̀ anyùùŋ Ezɔ̀ɛ̀ nyaŋ lɛ̀, nààŋ wò naŋ wa wòò Ebò Siaàŋ e nyaàiŋ dè ke jii fàa esàɓù wo Jisɛ̀ Kulaì sùà, wo Kanaà wèè anyùùŋ nyaŋ gbiŋ. 37Nàŋ nyìmàŋ kɛ̀ kiìŋ naŋ kaaìŋ wɔŋ fùɔ̀ŋ Ezɔ̀ɛ̀ɔ gbiŋ sùà. E gbiŋ naŋ wa tɔ̀ɔ̀tù ko Galaliì wɔŋ fùɔ̀ŋ Jùdiàa sùà, e teengaà wo Jɔ̀ɔŋ naŋ wa gbòò ke mìè Dayàa e kìlà wò naŋ woò wààŋ kɛ̀ sɔɔ̀ wo nyùùŋ gbiŋ wo nɔ̀ŋ gùauŋ. 38Nàŋ nyìmàŋ e kèè wo Jisɛ̀ e yìwìà ko Naazɔ̀ɛ̀, wo yèɔ wo Dayà naŋ wa tàeɗùù yèè wò nauŋ kìɛ̀ŋ wo Jìnàŋ Nɛɛmaàŋ yaà e gààŋ. Wò naŋ wa kìlìè maŋ tàta màŋ gbiŋ sùà, wò yaà nyìnìè maŋ keì sìàŋ yèè wò yaà jòèye sùà anyùùŋ nyaŋ yaà wa e gààŋ Dɛwìɔ dìì nyaŋ, esaɓù kɛ̀ wo Dayà yàaùŋ wa kpuumo. 39Yàwi nààŋ gbiŋ è yààìŋ aŋ sèì e nyaàiŋ dè maŋ keì maŋ gbiŋ wo Jisɛ̀ naŋ nyɛ̀nɛ̀ŋ maŋ ko Ezɔ̀ɛ̀ wɔŋ fùɔ̀ŋ aŋ Juùù nyaŋ sùà yèè ko Jùlusɛ̀làm. Àŋ nauŋ wa jìwìè wɔŋ vànèkpaaà diɛŋ. 40Kɛɛ wo Dayà nauŋ gè e fàaà dìì wɔŋ nyiiŋ gèeo sùà ke ɗɔ̀ɔ̀ taaà diɛŋ, yèè wò naŋ nyɛ̀nɛ̀ŋ anyùùŋ auŋ yɛmɛ̀ janyai. 41Anyùùŋ nyaŋ gbiŋ nààŋ gòuŋ wa yɛmɛ̀. Yàwi nɔŋ nauŋ wa yɛmɛ̀, yàwi yè nyaŋ yèè wuŋ naiŋ wa jììyè nɛ̀ŋje yèè è naiŋ tììyè koɓɛ̀ guùŋ nyaŋ nààŋ wò naŋ wa yèwè e fàaà dìì. Yàwi nàŋ yaà aŋ sèì nyaŋ wo Dayà naŋ wa tàeɗùù wèè e wòò ebòuŋ nɛ̀ koɓɛ̀ anyùùŋ. 42Yèè wo Dayà naŋ wi woò wààŋ e woòiŋ ebò siaŋ lɛɛ̀ koɓɛ̀ anyùùŋ nyaŋ gbiŋ, yèè e gbòàiŋ ke mìè seì kɛ̀ wo Jisɛ̀ nàŋ yaà wo nyùnɔ̀ɔŋ wò naŋ tàeɗùù wɔ wèè wo nɔ̀ŋ wo nyuùŋ gbàiɔ̀ wèè anyuùŋ gè nyiiŋ nyàŋ yèè anyuùŋ fàa nyàŋ. 43Wèè wuŋ aŋ wɛ̀ijì nyaŋ gbiŋ naŋ wa gbòò ke mìè seì, kɛ̀ wo nyùnɔ̀ɔŋ gbiŋ haawàuŋ wɔ, maŋ jùumùuŋ màŋ do nàŋ nɔ̀ŋ hakɛ̀ jùùya miŋ esàɓù e deèuŋ nɛ̀ sùà.”

Anyùùŋ nyaŋ fè àŋ Juùù nyaŋ yɛ̀mɛ̀ Jìnàŋ Nɛɛmaàŋ

44E teengaà wo Pììlɛ yaà wa nɔŋ gbuuye lɛ̀, wo Jìnàŋ Nɛɛmaàŋ naŋ dèyè anyùùŋ nyaŋ gbiŋ yàaùŋ wa kùmìàŋ sùà nyaŋ diɛŋ. 45È naŋ wa fòònò anyuùŋ hààwe nyàŋ aŋ Juùù nyaŋ sùà aŋ yè nyaŋ naŋ wa dè wo Pììlɛ maŋjɛ̀wɛ nyàŋ e yìwìà ko Jɔpà, esaɓù kɛ̀ wo Jìnàŋ Nɛɛmaàŋ naŋ wa nɔ̀ŋ kìɛuŋ koɓɛ̀ anyùùŋ nyaŋ fè àŋ Juùù nyaŋ, aŋ yè nyaŋ fè kpùà jàa nyiŋ nyàŋ. 46Esaɓù kɛ̀ aŋ naŋ wa kùmìè anyùùŋ nyɛɛ̀ŋ àŋ yaà gbùùyè maŋ kaìŋ joo yèè àŋ yaà jòòwò Dayà wèè e gbeeuŋ nɛ̀. Kpeiŋ wo Pììlɛ naŋ woò wààŋ, 47“Wo nyùùŋ gbiŋ ɓɛ̀nɛ̀ŋ kèèwè anyùùŋ nyɛɛ̀ŋ naŋ yaà yɛ̀mɛ̀ wo Jìnàŋ Nɛɛmaàŋ nyaŋ kùàŋ feìŋ wèè aŋ go nàŋ nɔ̀ŋ gùùya nyiŋ e wùìyè? Tiŋ zà yàwì bi pɛɛ èiŋ wa yɛ̀mɛ̀ wo Jìnàŋ Nɛɛmaàŋ.” 48Kpeiŋ wo Pììlɛ naŋ woò wààŋ aŋ nɔ̀ŋ gùa nyiŋ e dèè Jisɛ̀ Kulaìɛ sùà. Eɓìèmàŋjɛ̀wɛ̀ tii, anyùùŋ nyaŋ nauŋ dawè wèè wo nɔ̀ŋ nyiŋ nee gòlò wèè maŋ ɗɔɔ kpàa bà.

Currently Selected:

Nyɛ̀nɛ̀ŋ 10: WFESD

Highlight

Copy