रोमि 4
4
अब्राहामरे़ कुनसान्
1हे़क्केने़ फाॽग्र आनिॽ यहुदिहाॽरे़ पाधे़बा अब्राहामरे़ निसु थासुबा पाःन्निल्ले़ कुयाःम्बेओ थे पाःप्माबे? 2से़क्खाए अब्राहाम्मिङ्ग खुने़ॽ चोगुबा नुबा याःम्बक्लाम् आप्तिक् मेःन्नेबा चोगे़आङ् वये़ल्ले़ग आङ्दिङ् लॽमा सुक्तुबामे़न्, कर निङ्वाॽफुमाङ्ङिल्ले़ कुनिमाओग मेःन्लो, 3थेआङ्भे़ल्ले़ साम्योसाप्लाःल्ले़ग अक्खेने़ पाःत्तुॽरो, “अब्राहामरे़ निङ्वाॽफुमाङ्ङिन् नसान् चोगुबाल्ले़ चोगुल्ले़ निङ्वाॽफुमाङ्ङिल्ले़ खुने़ॽ साम्योबा लेःत्तुरो॥”#तोलिङ् १५:६
4आल्ल याःम्बक् के़जोःक्पा मनाःल्ले़ कुनाम्याक्किन् लुङ्माॽ तुक्मालाम् खोसुबा मेःन्, कर खे़ङ्ग खुने़ॽ खोमा के़बोङ्बा कुलक्लो॥ 5आत्तिन् मनाःल्ले़आङ् आबाङे याःम्बक् चोगुबाल्ले़ मेःन्, कर लायोबा मनान् आप्तिक् मेःन्नेबा के़जोःक्पा निङ्वाॽफुमाङ्ङिन् खे़ल्ले़ नसान् चोगुबाल्ले़ निङ्वाॽफुमाङ्ङिल्ले़ खुने़ॽ साम्योबा लेःत्तुरो॥ 6दाउद हाङ्ङिल्ले़ निङ्वाॽफुमाङ्ङिल्ले़ खे़न् याःम्बक् मे़न्जोःक्के साम्योबा लेःत्तुबा मनान् आक्खे़न् मुॽइसाबाबे फाॽआङ् अक्खे पाःत्तुआङ् पत्,
7“लायोलाम् ले़प्मि के़घोबाहाॽ,
खुनिॽ लायोन् ते़प्ते़आङ् के़वाॽबाहाॽग,
मुॽइसाबासिरो॥
8आत्तिल्ले़ कुलायोन् यहवे दाङ्बाल्ले़ कुघारोःत्तोलाम् तुगुदेसुआङ् वाॽ,
खे़न् मनान् मुॽइसाबारो॥”#निङ् सुम् ३२:१-२
9कन् मुॽइसाम्मिङ्ग हर्दो के़हे़क्पा यहुदिहाॽरे़ लागिरक् मेःन्, कर हर्दो मे़न्हे़क्मनाबा थिम्मे़न्दङ् सुवाहाॽरे़ लागिआङ्लो॥ अब्राहामरे़ चोगुबा नसाःन्लाम्बाए निङ्वाॽफुमाङ्ङिल्ले़ खुने़ॽ साम्योबा लेःत्तुआङ् वये़ लॽरिक् आनिगे़ग पाःत्तुम्बे़र वयिगे़रो॥ 10कर आप्फाल्ले़ खुने़ॽ साम्योबा लॽरिक् लेःत्ते़बे? कन् पाःन्निन् खुने़ॽ हर्दो हे़क्मानुःल्ले़ तगिबि इ याङ्सि पोःक्खे़बाबि? से़क्खाए साम्योबा लेःत्ते़बाग तगिएरो॥ 11अब्राहामरे़ खोसुबा कन् हर्दो हे़क्मा थिम्मिङ्ग निङ्वाॽफुमाङ्ङिन् नसान् चोगुआङ् वये़ल्ले़ हर्दो मे़न्हे़क्केए निङ्वाॽफुमाङ्ङिल्ले़ खुने़ॽ साम्योबा लेःत्तुबा पाःन्निल्ले़न् मिक्सेःन्लो॥ हे़क्केलॽरिक् अब्राहाम्मिन् हर्दो मे़न्हे़क्केसाङ् निङ्वाॽफुमाङ्ङिन् नसान् के़जोःक्पाहाॽरे़ खुनिॽ पारो॥ खे़ङ्हाॽरे़ नसान् मे़जोगुबाल्ले़ चोगुल्ले़ निङ्वाॽफुमाङ्ङिल्ले़ खे़ङ्हाॽ साम्योबा लेःत्तुसिॽरो॥ 12अब्राहाम्मिङ्ग हर्दो के़हे़क्पाहाॽरे़न्नाङ् खुनिॽ पारो, कर हर्दो के़हे़क्पाआङ् अब्राहामरे़ हर्दो हे़क्मानुःल्ले़ तगि कत्तुबा कुइसिक् नसान् के़गप्पाहाॽरे़न्लक् खुनिॽ पारो॥
नसाःन्लाम्बा निङ्वाॽफु माङ्हे़क्किन् खोमा
13अब्राहाम्मिल्ले़ साम्योथिम्मिन् इःत्तु नाःत्तुआङ्ग मेःन्, कर निङ्वाॽफुमाङ्ङिन् नसान् चोगुबालाम् आप्तिक् मेःन्नेबा पोःक्खे़बाल्ले़ए निङ्वाॽफुमाङ्ङिल्ले़ खुने़ॽ नु कुमुॽइदाङ्साहाॽरे़ इक्सादिङ् खाम्बेःक्माल्ले़न् लक् के़घोसुम् के़लॽबा माङ्हे़क्किन् अब्राहाम्मिन्नु चोगुबारो॥ 14साम्योबा पोङ्मा फाॽआङ् साम्योथिम् के़इःप्पा के़नाःप्पाहाॽरे़ लक् मे़घोसुॽने़ फाॽग्र नसाःन्निन् हने़बा पोङ् हे़क्क्याङ् खे़न् माङ्हे़क्किन्नाङ् हने़बा पोङ्लो॥ 15थेआङ्भे़ल्ले़ साम्योथिम्मिन् के़भेःम्बाहाॽ निङ्वाॽफुमाङ्ङिल्ले़ खुम्दिङ् पिरुसिॽरो, (साम्योथिम् होःप्पिल्ले़रक् लायोन् होप्लो)॥
16खे़ल्ले़चोगुल्ले़ कन् माङ्हे़क्किङ्ग नसाःन्लाम् तारो॥ निङ्वाॽफुमाङ्ङिल्ले़ कुलुङ्गुम्लाम्बा आम्भा आबिॽरो॥ हे़क्क्याङ् साम्योथिम् आइःत्तुम् आनाःत्तुम्माङ् मेःन्, कर अब्राहाम्मिल्ले़ चोगुबा कुइसिक् नसान् आजोगुम्ने़ फाॽग्र कन् माङ्हे़क्किन् आघोसुम् के़लॽबा निःन्धो पोङ्लो॥ थेआङ्भे़ल्ले़ अब्राहाम्मिङ्ग आनिॽ नसान् के़जोःक्पा के़रे़क्ले़न् पारो॥ 17साम्योसाप्लाओ अब्राहाम्मिल्ले़ कुयाःम्बेओ अक्खेलॽरिक् साप्ते़आङ् पत्, “खे़ने़ॽग यरिक् मे़न्छाम् सुवाङ्हाॽरे़ खुनिॽ पानुदिङ् पा चोःक्ने़आङ् वाॽ॥”#तोलिङ् १७:५ अब्राहामरे़ निङ्वाॽफुमाङ्ङिन् नसान् चोगुआङ् खुने़ॽ निङ्वाॽफुमाङ्ङिल्ले़ कुनिमाओ आनिॽ के़रे़क्ले़न् पा पोःक्खे़, के़सिबाहाॽ ने़त्तिगे़न् हिङ्मन् के़बिबा नु के़होप्पा पाःन्हाॽओलाम् चइःत् के़जोःक्पा निङ्वाॽफुमाङ्ङिन् अब्राहामरे़ नसान् चोगुरो॥
18निङ्साङ् चोःक्मा सुक्मे़न्दे़प्मना वये़साङ् अब्राहामरे़ “के़मुॽइदाङ्साहाॽ खेःम्सिक्पा कुइसिक् यरिक् मे़बोङ्लो”#तोलिङ् १५:५ लॽरिक् निङ्वाॽफुमाङ्ङिल्ले़ मे़त्तुबा पाःन्निल्ले़न् निङ्साङ् चोगुआङ् नसान् चोगुबाल्ले़ चोगुल्ले़ खुने़ॽ यरिक् मे़न्छाम् सुवाङ्हाॽरे़न् पानुदिङ् पा पोःक्खे़रो॥ 19खुने़ॽ तङ्बे किप्थिक् (१००) यारिक् के़रे़आङ् यरे़बेआङ् वये़, हे़क्क्याङ् कुमेत् सारान्नाङ् सामुॽइ खक्ते़आङ् चप्ते़बेआङ् वये़साङ् खुने़ॽ कुनसाःन्निन् अयाक् मे़लॽरे़न्नाङ् 20निङ्वाॽफुमाङ्ङिल्ले़ कुमाङ्हे़क्किल्ले़ कुयाःम्बेओ खुने़ॽ चप्चि मे़जोगुन्, कर नसाःन्नो के़धुम्बा पोःक्खे़आङ् निङ्वाॽफुमाङ्ङिल्ले़ कुनारा फोसुरो॥ 21हे़क्क्याङ् निङ्वाॽफुमाङ्ङिल्ले़ चोगुबा माङ्हे़क्किन् के़प्मा सुक्तुॽ के़लॽबा पाःन्नो अब्राहाम्मिन् निःन्धो वये़॥ 22खे़ल्ले़चोगुल्ले़ए अब्राहामरे़ कुनसाःन्निल्ले़ चोगुल्ले़ “निङ्वाॽफुमाङ्ङिल्ले़ खुने़ॽ साम्योबा लेःत्तुरो॥”#तोलिङ् १५:६ 23आल्ल निङ्वाॽफुमाङ्ङिल्ले़ खुने़ॽ साम्योबा लेःत्तु के़लॽबा पाःन्निन् अब्राहामरे़ कुलागिरक् मेःन्, 24कर आनिॽ लागिआङ् साप्ते़बारो॥ ये़सु आनिॽ दाङ्बान् सिमे़न्लाम् कुहिङ्वे़त् के़जोःक्पा निङ्वाॽफुमाङ्ङिन् नसान् आजोगुम्ने़ फाॽग्र आनिॽआङ् साम्योबा आलेःत्लो॥ 25खुने़ॽग आनिॽ लायोल्ले़ चोगुल्ले़ से़प्मा फाॽआङ् हुक्सुप्ते़, हे़क्क्याङ् आनिॽ आप्तिक् मेःन्नेबा चोःक्से़ निङ्वाॽफुमाङ्ङिल्ले़ याम्मो खुने़ॽ कुहिङ्वे़त् चोगुरो॥
Currently Selected:
रोमि 4: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
