रोमि 14
14
नसानिबा फुॽनुसाॽहाॽ इङ्दो मे़प्मासि मेःन्
1नसाःन्नो निङ्वाॽ के़बाःक्पा नसानिबाहाॽरे़ मे़इःत्तुबा निङ्वाॽ पाःन्निन् इङ्दो मे़म्मे़त्ते खिनिॽ सेसे तङ्जुम्मो खे़ङ्हाॽ ताःक्ते़म्सिम्मे़ॽओ॥ 2कुबिओ, थिक् नसानिबाल्ले़ काक् पाःन्हाॽ चामा थुङ्मा नुॽ लॽरिक् नसान् चोगुॽ, कर नसाःन्नो कुनिङ्वाॽ के़बाःक्पा नसानिबाल्ले़ग नुधि-साक्चिरक् चरो॥ 3हे़क्केःल्ले़ काक् परिक्पा कुजा के़जाबाल्ले़ मे़न्जाःमनाबान् हिनाःम् मे़मे़त्तुन्ल, हे़क्क्याङ् मे़न्जाःम्नाबाल्ले़आङ् काक् परिक्पा कुजा के़जाबान् मे़जिःत्तुन्ल, थेआङ्भे़ल्ले़ निङ्वाॽफुमाङ्ङिल्ले़ खे़न् ताःक्तुआङ् वाॽरो॥ 4वेॽइल्ले़ के़से़वारोबान् खासे़न् के़लोःम्बा खे़ने़ॽ हाःत्ने़बे? कुन्दाङ्बाल्ले़ए कुसे़वारोबे़ल्ले़ नुबा पान् चोगुर वाॽबि मेःम्बि फाॽआङ् खासे़न् चोगुॽरो॥ दाङ्बाल्ले़ए के़से़वारोबान् नुबा याःम्बक् चोःक्मा कुभाॽ पिरुरो, थेआङ्भे़ल्ले़ दाङ्बाल्ले़ खे़न् कुभाॽ पिमा मुक्साम् कत्तुॽरो॥
5थिक् नसानिबाल्ले़ थिक् ये़न्निन् वेॽसमा ये़न्निन्नुःल्ले़आङ् सेसेबा चोक् फाॽआङ् इःत्तुॽ, कर वेॽसमा मनाःल्ले़ काक् ये़न्हाॽ लत्थिक्के़ मे़जोक् फाॽआङ् इःत्तुॽरो॥ हे़क्केःल्ले़ कन् पाःन्नो के़रे़क्ले़ आबाङे निङ्वाॽबो निस्से पोङ्मा पोङ्लो॥ 6थिक् ये़न्निन् वेॽसमा ये़न्नुःल्ले़आङ् के़ये़क्पा चोक् लॽरिक् के़इःप्पाल्ले़ दाङ्बान् इङ्धाङ् पिमारे़ लागि हे़क्के चोगुॽ॥ सा के़जाबाल्ले़ दाङ्बान् इङ्धाङ् पिमारे़ लागि हे़क्के चोगुॽ, थेआङ्भे़ल्ले़ खे़ल्ले़ निङ्वाॽफुमाङ्ङिन् नोगे़न् पिरुॽरो॥ सा मे़न्जाःम्नाबाल्ले़ दाङ्बान् इङ्धाङ् पिमारे़ लागि हे़क्के चोगुॽ, हे़क्क्याङ् खे़ल्ले़आङ् निङ्वाॽफुमाङ्ङिन् नोगे़न् पिरुॽरो॥ 7थेआङ्भे़ल्ले़ आनिॽ आहिङ्साङ् आस्सिसाङ् आनिॽ आबाङे लागि आन्हिङ्ने़न्लो॥ 8खे़ल्ले़चोगुल्ले़ आनिॽ आहिङ्साङ् दाङ्बाल्ले़ कुलागि आहिङ्, आस्सिसाङ् दाङ्बाल्ले़ कुलागि आसिरो॥ हे़क्केःल्ले़ आहिङ्साङ् आस्सिसाङ् आनिॽग दाङ्बाल्ले़न्नेरो॥ 9बा कल्ले़चोगुल्ले़, ख्रिस्ते़न् स्ये़ हे़क्क्याङ् कुसिवे़त् नु कुहिङ्वे़त्हाॽरे़ खुनिॽ दाङ्बा पोङ्से़ खुने़ॽ याम्मो कुहिङ्वे़त् पोःक्खे़रो॥
10हे़क्केःल्ले़ खिनिॽ थेआङ् वेॽ नसानिबाहाॽ खासे़न् के़लोःन्दुम्सिम्बाबे? थेआङ् वेॽ नसानिबाहाॽ हिनाःम् के़मे़त्तुम्सिम्बाबे? आनिॽग के़रे़क् निङ्वाॽफुमाङ्ङिल्ले़ कुघासे़न् युक्नाःल्ले़ कुदगि ये़प्माए पोङ्लो॥ 11साम्योसाप्लाओ अक्खेलॽरिक् साप्ते़आङ् पत्,
“से़क्खाए माङ्हे़क्सिङ्ङा,
काक् मे़न्छाम् याप्मिहाॽ इङ्गाॽ आदगि थुङ्बोहजॽ मे़लेःत्तुआङ् साम्बोन् मे़भन्छिङ्,
हे़क्क्याङ् के़रे़क्ले़ निङ्वाॽफुमाङ्आ फाॽआङ् ते़न्दिङ् मे़जोःक्का
लॽरिक् यहवे दाङ्बाल्ले़ पाःत्तुॽरो॥”#यसै ४५:२३
12हे़क्केःल्ले़ आनिॽ के़रे़क्ले़ आजोगुम्बा याःम्बक्हाॽरे़ कुयाःम्बेओ निङ्वाॽफुमाङ्ङिन् आनिॽ आबाङे चे़क्मा पोङ्लो॥
वेॽहाॽ लायोओ थामासि मेःन्
13खे़ल्ले़चोगुल्ले़ वेॽहाॽ खासे़न् चोःक्मासि ले़रुम्लो॥ खे़ल्ले़ कुले़क्वा वेॽ नसानिबाहाॽरे़ खुनिॽ लाम्मो आघघबा पान् इग्र लायोओ के़धाबा पान् ने़स्सुम् मेःन् के़लॽबा निस्से चोगुम्लो॥ 14दाङ्बा ये़सुरे़ कुयुक्लाम् इङ्गाॽग आत्तिन् कुजाःन्नाङ् आजिःन्जिःम्बा मे़जोक्ने़न् फाॽआङ् आनिङ्वाॽओ निस्से वाॽआ, कर आत्तिन् मनाःल्ले़ कुभा कुजाहाॽ आजिःन्जिःम्बा चोक् फाॽआङ् इःत्तुॽ, खे़ङ्ग खुने़ॽ कुलागि आजिःन्जिःम्बाए पोङ्लो॥ 15खे़ने़ॽ के़जबा कुजाःल्ले़ वेॽ नसानिबान् चप्चि के़जोःक्पा चोगुॽने़ फाॽग्र खे़ने़ॽ वेॽहाॽ लुङ्माॽ के़दुक्तुसिबा मे़बोङ्ने़ल्लो॥ खे़ने़ॽ के़जबा कुजाःल्ले़ वेॽ नसानिबान् फे़त्मे़लाःन्दुन्लरो, थेआङ्भे़ल्ले़ खे़ल्ले़ कुलागि ख्रिस्ते़न् स्ये़आङ् वाॽरो॥ 16खे़ने़ॽ चामा नुॽ फाॽआङ् के़इःत्तुबा पाःन्हाॽरे़ वेॽहाॽरे़ खुनिॽ नसाःन्निन् फे़त्लाःन्दुआङ् ख्रिस्तरे़ कुजाःत्थि मे़बेःक्ने़न्लरो॥ 17थेआङ्भे़ल्ले़ निङ्वाॽफु हाङ्जुम्मिन् चामा नु थुङ्मारे़ कुयाःम्बेओ मेःन्, कर साम्योनिमा, सनारुङ् नु सेसेमाङ्ङिल्ले़ आबिबा सःप्माल्ले़ कुयाःम्बेओने़रो॥ 18अक्खेलॽरिक् ख्रिस्ते़न् से़वा के़जोःक्पाल्ले़ निङ्वाॽफुमाङ्ङिल्ले़ कुनिङ्वाॽ ताःसुॽ, हे़क्क्याङ् मनाहाॽरे़आङ् खे़न् मनान् कुनारा मे़भोसुर ते़न्दिङ् मे़जोगुॽरो॥
19खे़ल्ले़चोगुल्ले़ आत्तिन् पाःन्निल्ले़ सनारुङ् तारुॽ, हे़क्क्याङ् नसानिबा लुम्मो हाङ्हाङ् मे़त्छिङ्मा पान् चोगुॽ, बा खे़न्ने चोःक्मा साॽरिक् तम्सिङ् चोगुम्लो॥ 20चामा थुङ्मारे़लागि निङ्वाॽफुमाङ्ङिल्ले़ कुयाःम्बक्किन् फे़त्मे़लाःन्दे़म्मिन्ने़ॽ॥ काक् कुजा कुधिहाॽ सुत्थो नु सेसे चोक्, कर मना के़घबा कुजा चामाग नुबा मे़बोङ्ने़ल्लो॥ 21वेॽ नसानिबाहाॽ लायोओ के़धाबा कुजा कुधि मे़न्जामा हे़क्क्याङ् लायोओ के़धाबा याःम्बक् मे़न्जोःक्माए नुबा पोङ्लो॥ 22कन् चामा थुङ्मा पाःन्नो आक्तङ्बा नसान् के़गत्तुॽ खे़न् निङ्वाॽफुमाङ् नु खे़ने़ॽ के़लुम्मो वाॽर॥ आत्तिन् मनाःल्ले़ चामा थुङ्मा नुॽ लॽरिक् इःत्तुबा पाःन्निन् चप्चि मे़जोगुन् खे़न्ने मुॽइसाबारो॥ 23कर चप्चि चोःक्कि के़जाबान् आबाङे लायोओ थाःरो, थेआङ्भे़ल्ले़ खे़ल्ले़ फेःन्दुङ् के़लॽबा निङ्वाॽ इतुर चःॽ॥ नसाःन्लाम्बा मे़म्बोङ्मनाबा काक् पाःन्हाॽ लायोरो॥
Currently Selected:
रोमि 14: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
