खाहुन् 9
9
सिक्कुम्दिङ् निङ्वाॽ नु अदङ्पान्
1सिक्कुम्दिङ् निङ्वाःल्ले़ कुहिम् चोगुआङ् युङ्लो,
खे़ल्ले़ खे़ॽयो नुसि सित्लाङ्हाॽ ये़प्सुआङ् ये़प्लो॥
2खे़ल्ले़ कुधक्सान् से़रुआङ् वाॽरो,
चे़ल्ले़क्से थि मारुक् फुत्तुआङ् युङ्ॽ
खे़ल्ले़ कुजप्ते़न्निन् यारिप् चोगुआङ् युङ्लो॥
3खे़ल्ले़ कुसे़वारोमाहाॽ पाङ्घुदेसुसिआङ् वाॽरो,
हे़क्क्याङ् ये़क्यक्कोबा केःम्ब केःम्बा ते़न्नोलाम्बा उःत्तुसिरो,
4“के़रे़क् कुनिङ्वाॽ के़बाःक्पासे! सिगाङ् त्ये़म्मे़ॽओ!”
फाॽआङ् खे़न् नुबा ऩेहि के़होप्पाहाॽ खे़ल्ले़ मे़त्तुसिरो॥
5“त्ये़म्मे़ॽओ, आङ्गाॽनु साभःङ्जान् चे़म्मे़ॽओ,
खे़ब्याङ् मारुक् फुत्तुङ्बा चे़ल्ले़क्से थिन् थुङे़म्मे़ॽओ॥
6खिनिॽ ने़हिनिङ्वाॽ मेःन्नेबा ये़प्ले़क्हाॽ ले़रे़म्मे़ॽओ,
हे़क्क्याङ् खिनिॽ हिङ्मन्नो के़हिङिरो
खासिङ्निःप्मा लाम्मो लाङ्घेगे़म्मे़ॽओ॥”
7आत्तिल्ले़ खिसात् आबिबिबा मनान् तोःन्दुॽ,
खे़ल्ले़ कुनामे़न्छाॽ पोङ्मान् तारुरो,
आत्तिल्ले़ ताक्के़भे़ॽबा मनान् फे़ःक्तुॽ,
खे़ल्ले़ आबाङे निङ्वाॽ तुक्मे़न् तुमुरो॥
8किनाःन्दि आबिबिबाहाॽ मे़भे़ःक्ते़से़न्ने़ॽओ,
मेःन्ने़भग्र खे़ङ्हाॽरे़ खे़ने़ॽ के़म्जिःत्लो॥
सिक्कुम्निबा मनाहाॽ फे़ःक्ते़से़ॽओ,
हे़क्क्याङ् खे़ङ्हाॽरे़ खे़ने़ॽ लुङ्माॽ के़म्दुक्लो॥
9सिक्कुम्निबाहाॽ खाहुन् पिरे़से़ॽओ,
हे़क्क्याङ् खे़ङ्हाॽ आल्लसाङ् सिक्कुम्साबा मे़बोङ्लो॥
साम्योबा मनाहाॽ निसाम् पिरे़से़ॽओ,
हे़क्क्याङ् खुन्छिॽ ने़हिनिङ्वाॽ आल्लसाङ् मे़भोसुरो॥
10यहवे दाङ्बे़न्नु किमाए सिक्कुम्निङ्वाॽल्ले़ कुहेःक्सिङ्माओ,
हे़क्क्याङ् के़रे़क्नुःल्ले़ सेसेबे़ल्ले़ कुने़हि निङ्वान्ने खासिङ्निःप्मारो॥#अयुब २८:२८; निङ् सुम् १११:१०; खाहुन् १:७
11थेआङ्भे़ल्ले़ आङ्गाॽ लाम्बाए के़हिङ्मन्नोबा ये़न्हाॽ पोरो,
हे़क्क्याङ् खे़ने़ॽ कुधाःक् के़जाॽबा के़बोङ्लो॥
12खे़ने़ॽ सिक्कुम्साबा के़बोङ्ने़भग्र
के़सिक्कुम्निङ्वाःल्ले़ए थुम्घो तारुरो,
खे़ने़ॽ कुनामे़न्छाॽ के़मे़प्पा मना के़बोङ्ने़भग्र
खे़ने़ॽ तुक्खेरक् के़दुमुरो॥
13खासिङ् मे़न्निःप्मान् के़आःप्मा मे़न्छुमारो,
खे़न् कुनिङ्वाॽ क़ेबाःक्मा नु थेआङ् म़ेल्ल़ेःम्नामारो॥
14खे़न् कुहिम्मोबा लाम्धेःप्पो, ये़क्यक्कोबा के़रे़क्नुःल्ले़
चम्जम्बा ते़न्हाॽओ के़ने़बा युक्नाओ युङ्सिङ्लो॥
15खे़ल्ले़ कुबेसाङ्लाम् लाम्मो कुदोःप्मा
लाङ्गे़घेःक्पार के़बप्पा मनाहाॽ खे़ल्ले़ उःत्तुसिरो,
16“के़रे़क् कुनिङ्वाॽ के़बाःक्पाहाॽ कत्ना मे़भे़न्लरो!”
लॽरिक् खे़न् खासिङ् मे़न्निःप्नाबाहाॽ खे़ल्ले़ मे़त्तुसिॽ,
17“खुःप्मनाआङ् थुङ्मनाबा च्वाःत्तिन् कुजा नुॽरो,
चिङ्सिङ्मनाआङ् चामनाबा खरे़ःङ्ङिन् कुजा नुॽरो॥”
18कर के़सिबाहाॽरे़ खुन्छिॽ याङ्धोःक्मादे़न् खे़प्मो पोङ्लो,
हे़क्क्याङ् खे़न् मे़न्छुमाःल्ले़ कुदरेबाहाॽरे़ खे़मादिङ् यङ्सङ्ङोबा
लुम्बाःत्तो मे़गे़रे़आङ् मे़वाॽ के़लॽबा पाःन्निन्
खे़ङ्हाॽरे़ आक्ख्यारिक्काङ् ने़हिनिङ्वाॽ मे़ङ्गत्तुन्लो॥
© 2009, 2023, Wycliffe Bible Translators, Inc. All rights reserved.