खाहुन् 7
7
1आस्साए, आङ्गाॽ आबाःन्हाॽओ निङ्वाॽ पिरे़ॽओ,
हे़क्क्याङ् आङ्गाॽ आइङ्जाङ्हाॽ याङ्घोत्ते़ कत्ते़ॽओ॥
2आङ्गाॽ आइङ्जाङ्हाॽ नाःत्ते़ तिम्दे़ॽओ,
हे़क्क्याङ् खे़ने़ॽ कुहिङ्वे़त् के़वाॽ के़गन्लो,
पिने़बा खाहुन्हाॽ के़मिक्हाङ्मा हे़क्के से़ःप्ते़ के़त्ते़ॽओ॥
3खे़ने़ॽ के़हुक्चोओ स्वागेप् हे़क्के खे़न् वारे़गत्ते़ॽओ,
खे़ने़ॽ के़सिक्लुङ्मो खे़न् साप्ते़ फत्छे़ॽओ॥
4सिक्कुम्दिङ् निङ्वान् अक्खे मे़त्ते़ॽओ,
“खे़ने़ॽग आङ्गाॽ आन्जेःल्लिमाने़रो,”
हे़क्क्याङ् खासिङ्निःप्मान्
“आङ्गाॽ आन्देङ् आन्जुम्ने़” मे़त्ते़ॽओ॥
5खे़ब्याङ् खे़न् पाःन्हाॽरे़ खे़ने़ॽ ये़म्बा कोःत्नालाम् नु
फे़क्के़लाॽमा मे़न्छुमाहाॽरे़ खुन्छिॽ मुर्ले़ःम्बा पाःन्हाॽलाम्
खे़ने़ॽ लाःत्लाःत् ताङ्गे़से़ःप् के़गत्लो॥
चागे़राम्मा मे़न्छुमान्नु सिङ्सिङ् मे़त्छिङ्मा
6थिक्ले़ङ् आङ्गाॽ आहिम्मोबा पेधाःप्पो युङाङ्लो,
हे़क्क्याङ् हङ्हङ्दाङ्बा कुहङ्हाॽओलाम् ओमे़त्तुङ्लो,
7कुदोःप्माहाॽरे़ खुन्छिॽ लुम्मो, थाङ्बे़न्हाॽओ
लत्छा कुऩेहि के़होप्पा थिक् आङ्गाॽ निसुङ्लो॥
8मे़न्छुमा के़युङ्बा माराम्मो खे़न् लाङ्घेगे़आङ् वये़बा नु
खे़ल्ले़ कुहिम्मो ले़प्माङ् तगि थासिङ्ल पत्छे़बा निसुङ्लो—
9युःन्छिक्, ये़न्निन् ले़क्ल पेःक्किल्ले़
से़न्दिक् खामाक्ल पेःक्लो॥
10खे़ब्याङ् लत्छा मे़न्छुमाधिक् खे़ल्ले़ कुदुम्से़ लःन्दे़भे़रे़रो,
खे़न् ये़म्बा के़गोःप्मा हे़क्के चाङ् के़जाङ्मा नु
चाःत्चाःप्मा निङ्वाॽ के़गप्मा चोगे़रो॥
11चे़ल्ले़क्ले़क्मा नु हादिङ् के़धक्मा चोगे़रो,
खे़न् आभे़ल्ले़आङ् कुहिम्मो मे़न्युङ्मनामा वये़रो,
12कुभा ये़म्मो, कुभा ये़म्मो लक्खुम्हाॽओ,
के़रे़क् कुसुक्पा थक्मा खे़न् चिङ्सिङ्ङाङ् युङे़रो॥
13खे़न् मे़न्छुमाःल्ले़ खुने़ॽ ते़म्सुआङ् चुप् मे़त्तुरो,
हे़क्क्याङ् कुनाराओ मे़न्नुःन्ने अक्खे मे़त्तुरो,
14“आङ्गाॽ आमाङ्ह़ेक्किन् के़त्तुङ्लो,
आइन् आहिम्मो तङ्जुम् सिदुङ्जभा तोःन्दुङ्ङाङ् वाॽरो॥
15खे़ल्ले़चोगुल्ले़ आङ्गाॽ के़दुम्से़ लाःक्कात् लःन्दाङ्बारो,
आङ्गाॽ खे़ने़ॽ कोःत्ने़, आल्लो तुम्ने़आङ् वाॽरो!
16आङ्गाॽ आइप्नादे़न्नो, मिस्र लाजेॽबा परिक् परिक्ले़
चाःम्मनाबा लोःम्भेःत्तिन् फे़सुङ्ङाङ् ने़रो॥
17आङ्गाॽ आने़त्नान् मारुक्, खाम्दोलि नु
नाम्सिङ् से़सुङ्ङाङ् कुनाम्गे़नुॽबा चोगुङ्ङाङ् ने़रो॥
18फे़रे़ॽओ, तानाम् थारिक् आन्छिॽ नानुॽने़सिरो,
आन्छिॽ लुङ्माॽ हिःप्ने़सिर ये़ये़ लॽसिरो!
19आङ्गाॽ आये़म्बान् हिम्मो होप्लो,
खुने़ॽग माःङ्घाबा लाम्दिःक्को पेआङ् वाॽरो॥
20खुने़ॽ के़योबा यरिक् याङ् तेॽरुआङ् वाॽरो,
हे़क्क्याङ् लाभुन् थारिक् खुने़ॽ हिम्मो मे़नुःङ्ने़न्लो॥”
21ले़मु सुःन्दुआङ् खुने़ॽ खे़न् थाङ्बे़न्निन् मुदोखाम्दो चोगुरो,
मुर्ले़ःम्बा पाःन्हाॽ मे़त्तुआङ् खुने़ॽ कुबाःन्नो खे़न् थासुरो॥
22सासे़प्मादे़न्नो के़धासिङ् के़बेःक्पा पित् हे़क्के,
चे़न् पिसाङ् तगि के़बेःक्पा पे़ःङ्वा कुइसिक्
खिमोवमो खुने़ॽ खे़न् तिम्दुआङ् कुएगाङ् पेरो॥
23खे़ब्याङ् तोःङ्ङिल्ले़ खे़ल्ले़ कुने़रे़त्तिन् फ्याक् लस्सुरो,
इओ ले़प्माङ् के़सुक्पा के़बेःक्पा पु कुसिङ्,
खे़ल्ले़ सिआ फाॽआङ् निङ्वाॽए मे़घोसुन्लो॥
24आल्ल आबुगे़न् आस्सासे, आङ्गाॽ आबाःन्निन् खे़प्से़म्मे़ॽओ,
आङ्गाॽ मे़त्निङ्बा आबाःन्नो निङ्वाॽ पिरे़म्मे़ॽओ॥
25खिनिॽ सिक्लुङ्मान् खे़ल्ले़ कुये़प्ले़क् ले़प्माङ् थामा मे़भाःक्ते़म्मिन्ने़ॽओ,
खे़ल्ले़ कुलाम्मो ले़प्माङ् ताप्मे़बे़ॽरे़म्मिन्ने़ मे़बेगिन्ने़ओ॥
26खे़ल्ले़ यरिक् मनाहाॽ थ्यःङ् मे़क्खुसिआङ् वाॽरो,
खे़ल्ले़ कुसानाःत् के़बोङ्बाहाॽ साॽरिक् यरिक् मे़वाॽरो॥
27खे़ल्ले़ कुहिम्मिन् खे़मादिङ् यङ्सङ् पेःक्मा लाम्लो,
खे़ल्ले़ सिमे़ल्ले़न् याक्फाङ्हाॽ ले़प्माङ् आगे़त्लो॥
Currently Selected:
खाहुन् 7: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.