खाहुन् 28
28
1हाःत्ले़आङ् मे़नाःन्तुन्छाङ् कुॽइगे़भे़म्बा मनान् खे़त्छिङ्लो,
कर साम्योबा मनान् थे़रिङ्बे़न् हे़क्के तिङ्दिङ् लॽरो॥
2लाजेन् पिफ्युङ्बा पोङ्ङिल्ले़ खे़ॽयो यरिक् युक्साबा मे़बोङ्लो,
कर खासिङ्निःप्मा ने़हिनिङ्वाॽ के़गप्पा युक्साबे़ल्ले़ सनारुङ् पोङ्ल चोगुरो॥
3कुधेआङ् के़होप्पा याङ्गे़साॽबाहाॽ तुक्खे के़जाःप्पा युक्साबे़ङ्ग
कुजान् थ्यःङ् के़जोःक्पा कुबेक् कुलात् के़धाबा वहित् हे़क्तङ्बारो॥
4साम्योथिम् इङ्जाङ् के़ले़प्पाहाॽरे़ ताक्के़भे़ॽबाहाॽ मे़जमुसिरो,
कर साम्योथिम् इङ्जाङ् के़इःप्पाहाॽरे़ खे़ङ्हाॽ मे़अत्तुसिरो॥
5ताक्के़भे़ॽबा मनाहाॽरे़ खासे़न्निन् कुसिङ् मे़न्निःत्तुन्लो,
कर यहवे दाङ्बे़न् से़वा के़मे़प्पाहाॽरे़ कन् नुरिक् कुसिङ् मे़निःत्तुरो॥
6याङ्गे़साॽबा पोङ्मासाङ् आप्तिक् मेःन्नेबा पोङ्माआङ् वाॽमा
फे़क्के़लाॽबा लाम्मो के़वाॽबा याङ्कुन्धेसाबे़न्नुःल्ले़ नुबारो॥
7साम्योथिम् इङ्जाङ् के़इःप्पा के़नाःप्पे़ङ्ग खासिङ् के़निःप्पा सारो,
कर तःक्थे़ःक्क्याःन्नु तेःङ्जुम् के़मे़त्छिङ्बा साःल्ले़
आप्फेक् कुम्बारे़ कुजाःत्थि पेःक्मा पान् तारुरो॥
8आत्तिल्ले़ साॽरिक् खिःक्ल याङ्ङिल्ले़ कुस्सा
ताःक्तुआङ् खुने़ॽ आप्फेक् कुयाङ्साकुन्धेन् फोसुॽ,
खे़ल्ले़ कुयाङ्साकुन्धेन् वेॽइल्ले़न् पोङ्लो,
आत्तिल्ले़ याङ्गे़साॽबाहाॽ लुङ्माॽ तुक्तुसिॽ खे़न् मनाःल्ले़ खोसुरो॥
9कुभारे़ साम्योथिम् इङ्जाङ् ले़प्माङ् कुने़क्खोॽबान् हुॽरुने़भग्र,
खे़न् मनाःल्ले़ पेलि फाक्तुबान्नाङ् याम्गे़सिङ्बा पोङ्लो॥
10हाःत्ले़ इङ्ले़क् चोगुआङ् कुदोःप्मान् फे़न् लाम् ले़प्माङ् तेॽरु,
खे़न् आप्फेक् ने़स्सुबा कुजे़न्नो खुने़ॽ थारो,
कर आप्तिक् मेःन्नेबाल्ले़ वे़त्ते़सरे़ कुघोमा लक् खोसुरो॥
11याङ्साकुन्धेसाबा मनान् कुनिमो सिक्कुम्निबा पोङ्मा सुक्लो,
कर ये़क्ये़क्पा याङ्गे़साॽबा मनाःल्ले़ खे़न् नुरिक् निसुरो॥
12साम्योनिबे़ल्ले़ नाःन्दुल्ले़ यम्बा सःप्मा एःप्मा पोङ्लो,
कर कुॽइगे़भे़म्बे़न् हाङ्युक्को के़त्तिल्ले़ मनाहाॽ मे़जिङ्सिङ्लो॥
13कुलायोहाॽ के़जिङ्बे़ल्ले़न् कुनुॽमा कुदामा मे़बोङ्ने़न्लो,
कर कुलायोहाॽलाम् के़हिःम्बाआङ् के़ले़प्पे़ल्ले़ लुङ्गुम् खोसुरो॥
14यहवे दाङ्बे़न्नु आभे़ल्ले़साङ् के़गिबा मनान् मुॽइसाबारो,
कर सिक्लुङ्मो हादिङ्गे़धक्पा मनान् तुक्खेओ थारो॥
15याङ्गे़साॽबा मनाहाॽओ युक् के़जोःक्पा ताक्के़भे़ॽबा मनान्
के़हुःक्पा थे़रिङ्बे़न् इग्र आभप्फप्पा माःॽयुःन् कुइसिःक्पारो॥
16खासिङ् मे़न्नेबा युक्साबे़ल्ले़ कुमनाहाॽ साॽरिक् युःत्तुसिरो,
कर ताप्फे़ःम्बालाम् याङ्धक्मा के़जिःप्पा मनाःल्ले़ कुधाःक् चाॽरो॥
17मनासे़प्मा आप्तिक्किल्ले़ तुक्खे चाःत्तुबा मनान्
कुसिसि थारिक् खे़त्छिङ्ङाङ् वाॽरो,
खे़न् हाःत्ले़आङ् कुभाॽ पिमा मे़नुने़न्लो॥
18आत्तिन् मनाःल्ले़ नाःत्तुबा लाम्मिन् आप्तिक् मे़न्नेबा चोक्,
खे़न् थेआङ् मे़ल्लॽए थाप्थेःक् याम्धेक्को वाॽरो,
कर आत्तिन्हाॽरे़ मे़नाःत्तुबा लाम्हाॽ फे़क्के़लाॽबा चोक्,
खे़न् मनाहाॽ हक्चघत् कुबाङ् के़बेःक्पा मे़बोङ्लो॥
19कुइक्ताप् के़अःक्पा के़धोःङ्बे़ल्ले़ वे़त्ते़सरे़ कुजा कत्तुरो,
कर मुदोखाम्दोबा पाःन्हाॽ ले़प्माङ् के़लोःक्पाहाॽ याङ्मे़साॽरो॥
20नसाःन्साबा मनाःल्ले़ वे़त्ते़सरे़ हाङ्वागे़न् मुॽइसाम् खोसुरो,
कर याङ्साकुन्धेसाबा पोङ्मा इगेःक् निङ्वाॽ के़इःप्पाहाॽ
खुम्दिङ् मे़ङ्घोए वाॽमा मे़ङ्घोने़न्लो॥
21एःक्पएःक् चोःक्मा नुबा पान् मेःन्लो,
हे़क्केसाङ् कुले़प् थिक् खरे़ःङ्ङिल्ले़ लागि
मनाःल्ले़ ताप्फे़ःम्बा याःम्बक् चोगुरो॥
22के़घिःम्बा मनाहाॽ याङ्साकुन्धेसाबा पोङ्मा निङ्वाॽ मे़जोक्लो,
हे़क्क्याङ् याङ्साॽमे़ल्ले़ खुन्छिॽ हाङ्घुसिर वाॽ के़लॽबे़न्
खे़ङ्हाॽरे़ खुन्छिॽ निङ्वाॽए मे़घोसुन्लो॥
23मुर्ले़ःम्बा पान् पाःप्मा ले़सोत् के़गप्पा मनाःन्नुःल्ले़
के़भे़ःक्पा मनाःल्ले़ कुनुप्मो यरिक् लुङ्दुक् खोसुरो॥
24कुम्बा इग्र कुम्मा के़नाप्पाआङ् “कङ्ग फे़न्पान् मेःन्लो”
के़लॽबा साःङ्ग याप्मि फे़त्के़लाॽबे़ल्ले़ कुन्देःङ्बारो॥
25के़घिःम्बा मनाःल्ले़ खे़माॽ खे़जे़क् फोःक्खुरो,
कर यहवे दाङ्बे़न् नागे़साॽबे़ल्ले़ कुनुॽमा कुदामा पोङ्लो॥
26आप्फेक् नागे़साॽसिङ्बा मनान् अदङ्लो,
कर सिक्कुम्दिङ् निङ्वाॽओ के़वाॽबे़न् से़ःप्सिङ्लो॥
27आत्तिल्ले़ याङ्गे़साॽबान् चामा थुङ्मा पिरुॽ,
खे़ल्ले़ थे़मा पाःन्निन्नाङ् सुःम्बा मे़दुमुन्लो,
कर आत्तिल्ले़ खे़ङ्हाॽ ले़प्माङ् कुमिक्के़न् इम् मे़त्तुॽ,
खे़न् यरिक् साङ्ग्रा माङ्देओ थारो॥
28ताक्के़भे़ॽबा मनान् हाङ्युक्को के़त्तिल्ले़
मनाहाॽ चिङ्सिङ्मा मे़हेःक्लो॥
कर ताक्के़भे़ॽबे़न् मे़क्किल्ले़ साम्योनिबे़न् नुॽदारो॥
© 2009, 2023, Wycliffe Bible Translators, Inc. All rights reserved.