खाहुन् 26
26
1हाङ्वामा ये़म्मो नाःङ् थासुबा कुइसिक्
इग्र कुजा सुम्मा ये़म्मो वहित् थासुबा कुइसिक्
अदङ् मनान् मिङ्सो इङ्धाङ् पिमा मे़लाॽरुन्लो॥
2हुरुरु के़बे़बा माक्चे़रे़ःन् नु आप्लोःक्लोःक् के़जाबा
कःङ्धे़ङ्नान् हे़क्के थेनाधेबा माङ्देःल्ले़आङ् मे़याङ्घुन्लो॥
3अन्निल्ले़ लागि ते़ःम्भुक्, अदङ्ङिल्ले़ लागि करेलि,
हे़क्क्याङ् याक्तुप्पाहाॽरे़ खुन्छिॽ मिगक्मे़ल्ले़ लागि तक्कात्!
4अदङ् मनान् खे़ल्ले़ कुअदङ् पान् हे़क्के नुगप् मे़बिरे़न्ने़ॽओ,
मेःन्ने़भग्र खे़ने़ॽ आप्फेक्काङ् खे़न् हे़क्तङ्बा के़बोङ्लो॥
5अदङ् मनान् खे़ल्ले़ कुअदङ् पान् हे़क्केए नुगप् पिरे़ॽओ,
मेःन्ने़भग्र खुने़ॽ आप्फेक् कुनिमो सिक्कुम्साबा पोङ्लो॥
6अदङ्ङिल्ले़ कुहुक्को इङ्घङ् हाङ्माग आप्फेक् लाङ्ङो
तःन्दिल्ले़ अःक्मा नु निङ्ङिन् थुङ्मा कुइसिक् पोङ्लो॥
7लाङ्सक्पे़ल्ले़ मे़न्धुम्मनाबा कुलाङ्हाॽ पप्पा हे़क्के
अदङ् मनाःल्ले़ कुम्ब्राओबा खाहुःन्निन् पोङ्लो॥
8अदङ् मनान् मिङ्सो इङ्धाङ् पिमा फाॽइङ्ग
अर्दोओ लुङ्ङिन् इघेःङ्माआङ् लाप्फेःम्नाबा हे़क्केरो॥
9थिःल्ले़ के़मबे़ल्ले़ कुहुक्कोबा तिङ्ग्रेक् पुङ् हे़क्के
अदङ् मनाःल्ले़ कुम्ब्राओबा खाहुन्निन् पोङ्लो॥
10अदङ्ङिन् इग्र कुसिङ् मे़न्निःप्नाबा मनान् नाम्याक्को
याःम्बक् चोक् पाङ्माग इमे़न्नि खामे़न्नि तोङ् के़आप्पा मनान्
कुइसिःक्लो॥
11ख्याबे़न् आप्फेक् कुबे़ॽमात् चासे़ नुःङ्बा हे़क्के,
अदङ् मनाःल्ले़ कुअदङ् चोःक्मा पाःन्निन् ये़त्ले़ङ् चोगुरो॥
12आप्फेक् कुनिमो खुने़ॽ आप्फेक् सिक्कुम्साबा
के़लेःत्छिङ्बा मनान् थे के़निसुआङ् वाॽबि?
खे़न्नुःल्ले़ग परुमाल्ले़ अदङ्ङिल्ले़ कुलागि
यरिक् निङ्साङ् चोःक्मा सुक्ते़त्लो॥
13ले़म्सुवाबाल्ले़ पाःत्तु, “माराम्मो खिरिङ्बान् हुःक्लवाॽरो वाॽरो,
किप्मा के़घुबा खिरिङ्बान् लाम्मो ताक्कन्नु वाॽरो॥”
14कुए़प्माहाॽओ लाम्धेःत्तिन् ना नु कत्ना इबा कुइसिक्
ले़म्सुवाबा मनान् कुने़त्नाओ ले़ङ्सिङ्ल ने़रो॥
15ले़म्सुवाबाल्ले़ कुहुक्किन् कुदःक् च्ये़त्थ्याओ फत्छुरो,
खे़ब्याङ् कुम्ब्राओ थारिक् थाक्माआङ् पले़म् ले़म्लो॥
16कुइःत्तार के़दङ्बाआङ् नुगप् के़बिबा नुसि मनाहाॽनुःल्ले़
ले़म्सुवाबे़न् आप्फेक् खुने़ॽ सिक्कुम्निबा इःत्छिङ्लो॥
17खुने़ॽ आप्फेक्नुःल्ले़ वेॽ याप्मिःल्ले़ कुघे़माॽओ हुक्
के़याक्पा मनान् नु ताप्स्वाबा ख्याबे़ल्ले़
कुने़क्खोॽबान् के़दे़म्बाआङ् के़उःङ्बा मनाःङ्ग लत्छारो॥
18खे़ङ्ग के़नाङ्बा हे़क्तङ्बारो
खे़ल्ले़ मिधक्पु लाप्के़भुबा नु आसे़त्से़प्पा तोङ् के़आप्पा कुइसिःक्लो,
19खे़ल्ले़ कुहिम्बेसाङ्बान् इङ्ले़क्तु सुरुआङ् अक्खे पाःत्तुरो,
“आङ्गाॽग वरे़ॽरक् चोगुङ्ङाङ् वयाङ्लो!”
20सिङ् मे़ःन्नेग मिन् सिरो,
चे़ॽया के़बङ्बा होःप्पिल्ले़ खे़माॽइन् चिप्लो॥
21मिघाक्लाम् मिसेःक् फे़क्लो, सिङ्लाम् मि तिःत्लो,
हे़क्केलॽरिक्के खे़जे़क् के़जोःक्पा मनाःल्ले़ खे़माॽ फोःक्खुरो॥
22पान् के़बङ्बा मनाःल्ले़ कुबाःन्छेःक्वाहाॽ
कुजागे़नुॽबा कुजा उम् हे़क्के लॽरो,
खे़ङ्हाॽ मनाःल्ले़ कुसिक्लुङ्मो थारिक् के़त्लो॥
23खाम् खप्प्याओ युप्पा पत्तु फम्मनाबा कुइसिक्
कुॽइगे़भे़म्बाल्ले़ सिक्लुङ्मे़न् के़ले़ःम्बा पाःन्निल्ले़ थिम्सुरो॥
24कुनिङ्वाॽ के़जिःप्पा मनान् कुबाःन्निल्ले़ थेःक्सिङ्लो,
कर कुसिक्लुङ्मोग खे़ल्ले़ इङ्ले़क् पाःन्निन् युक्खुरो॥
25खे़ल्ले़ पाःत्तुबा पाःन्निन् नुबा चोःक्साङ् नसान् मे़जोगे़न्ने़ॽओ,
थेआङ्भे़ल्ले़ खे़ल्ले़ कुसिक्लुङ्मान् नुसि याम्गे़सिङ्बा
पाःन्हाॽरे़ सधे़क् के़दिम्बा चोक्लो॥
26खे़ल्ले़ वेॽहाॽ खाःम्मासि कुनिङ्वान् चिङ्मा सुक्तुरो,
कर खे़ल्ले़ ताप्फे़ःम्बा कुयाःम्बक्हाॽ के़रे़क्लो ओसेःन्दाङ् पोङ्लो॥
27मनाःल्ले़ लुम्बात् तयुने़भग्र खाॽयो खुने़ॽ आप्फेक् थारो,
मनाःल्ले़ लुङ्ङिन् के़ङ्घुने़भग्र खे़न् लुङ्ङिन्
के़ङ्ङाङ् खुने़ॽ आप्फेक् के़प्तुरो॥
28इङ्ले़क् के़बाःप्पाल्ले़ कुइङ्ले़क्किल्ले़
आत्तिन् कुनिङ्वाॽ तुक्ल चोगु, हाबा खे़न्ने चिःत्तुरो,
मुर्ले़ःम्बा पान् के़बाःप्पा मुराःल्ले़ आमे़ङ्लो॥
Currently Selected:
खाहुन् 26: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.