खाहुन् 22
22
1यरिक् याङ्साकुन्धेनुःल्ले़ नुबा मिङ् सेःक्मा नुबारो,
मिङ्सो थाङ्सो खोमा साम्म्याङ् युप्पानुःल्ले़आङ् पनुनुबारो॥
2याङ्साकुन्धेसाबा नु याङ्गे़साॽबे़न् ने़प्माङ्
कन् पाःन्नो कुदङ्बा चोःक्सिरो,
खे़ङ्हाॽ के़रे़क् के़जोःक्पाङ्ग यहवे दाङ्बे़न्नेरो॥
3खासिङ्गे़निःप्पे़ल्ले़ ये़त्तुक्खे तार पप्पा निसुरो
हे़क्क्याङ् कुभा ते़न्नो से़ःप्सिङ्लो,
कर कुनिङ्वाॽ के़बाःक्पा मनान् खे़न् ले़प्माङ्ङे पेःक्लो
हे़क्क्याङ् खे़ल्ले़ खुम्दिङ् खोसुरो॥
4नःम्नःम् लॽमा हे़क्क्याङ् यहवे दाङ्बे़न्नु किमे़ल्ले़,
याङ्साकुन्धे, मिङ्सो इङ्धाङ् नु हिङ्मे़न् तारुरो॥
5ताक्के़भे़ॽबाहाॽरे़ खुन्छिॽ लाम्हाॽओ
तिङ्हाॽ नु इजोहाॽ मे़गे़सुआङ् ने़रो,
कर आत्तिल्ले़ कुहिङ्मे़न् से़ःप्तुॽ खुने़ॽ
हे़क्तङ्बा पाःन्हाॽलाम् लाःत्लाःत् वाॽरो॥
6लाङ्घेःक्मा के़बोङ्बा लाम्मो अङे़ःक्वान् लाङ्घेःक्से़ॽओ,
खे़ब्याङ् काप्पोबा तुम्ल थारिक् खे़न् लाम्मिन् मे़ले़रुन्लो॥
7याङ्साकुन्धेसाबे़ल्ले़ याङ्गे़साबे़न् युक्तुरो,
सिङ्नात् के़देॽबे़न्, सिङ्नात् के़बिबे़ल्ले़ कुयोक् पोङ्लो॥
8मे़न्वाॽमना खासे़न् के़हेॽबाल्ले़ मे़क्मासिमान् सुप्सुरो,
हे़क्क्याङ् खे़ल्ले़ कुसिक्सम्मे़ल्ले़ तक्काःत्ते़न् ए़क्लो॥
9के़नुॽबा मनाःल्ले़ आप्फेक्काङ् मुॽइसाम् खोसुरो,
थेआङ्भे़ल्ले़ खुने़ॽ कुदःक्के़न् याङ्गे़साॽबे़न् फःक्खु पिरुरो॥
10कुनामे़न्छाॽ के़बाःप्पे़न् लाःक्कात् लःत्ते़ॽओ,
खम्भ्याङ् खे़जे़क् पाःन्निन् माबेःक्लो,
पाःन्धङ् नु कुनामे़न्छाॽ पाःन्निन् नुप्लो॥
11आत्तिल्ले़ सिक्लुङ्मे़न् सुत्थोबा पोङ्मा निङ्वाॽ चोगुॽ
हे़क्क्याङ् आत्तिल्ले़ कुबाःन्निन् लुङ्गुम्बा चोक्,
खुने़ॽ कुलागि हाङ्ङिन्नाङ् कुन्देःङ्बा पोङ्लो॥
12यहवे दाङ्बे़ल्ले़ नसान् के़ले़ङ्बाहाॽरे़ खुन्छिॽ पाःन्हाॽरे़ कुदक्ले़ङ्वाओ याःम्बक् चोक्लो,
हे़क्क्याङ् से़क्खाबा पाःन्जाक्किन् से़ःप्तुरो॥
13ले़म्सुवाबे़ल्ले़ पाःत्तुॽ, “लाःक्कात् खिरिङ्बाधिक् वाॽरो!
माराम्हाॽओ पेःक्काने़भग्र आङ्गाॽ से़त्तारो॥”
14चागे़लाम्मे़ल्ले़ कुम्ब्रान् लत्छा कुदिःम्बेॽ केःम्बा लुम्बाःत्लाे,
यहवे दाङ्बे़ल्ले़ कुसाक्के़न्नो के़धाबाहाॽ खे़प्मो मे़धारो॥
15अङे़ःक्वाःल्ले़ कुनिङ्वान् अदङ्पान् इसेःङ्बा चोक्लो,
कर हे़न्थिम् तक्कात् लाम्बा खे़न् तोःन्छिङ्लो॥
16याङ्साकुन्धे फोमारे़ लागि याङ्गे़साॽबे़न् के़युक्पा,
हे़क्क्याङ् याङ्साकुन्धेसाबे़न् मिक्तोःक्हाॽ के़बिबा
ने़प्माङ् मनाहाॽ याङ्गे़साॽबा पोङ्सिरो॥
सिक्कुम्साबे़ल्ले़ सुम्बोङ् कुघाहुन् पाःन्हाॽ—खाहुन् १
17सिक्कुम्साबे़ल्ले़ कुघाहुन्हाॽ ये़क्ये़क्काङ् खे़प्से़ॽओ,
हे़क्क्याङ् हुॽने़बा पाःन्हाॽओ निङ्वाॽ पिरे़ॽओ,
18थेआङ्भे़ल्ले़ खे़न् पाःन्हाॽ के़सिक्लुङ्मो के़युक्खुने़भग्र,
हे़क्क्याङ् खे़ङ्हाॽ के़रे़क् के़म्ब्राओ वाॽने़भग्र सःप्मा पोङ्लो॥
19खे़ने़ॽ यहवे दाङ्बे़न् नागे़साॽरुर फाॽआङ्
खे़न् पाःन्हाॽ आङ्गाॽ आइन् खे़ने़ॽ हुॽने़रो,
ओरो, आङ्गाॽ खे़ने़ॽए हुॽने़रो॥
20थे के़लागि सुम्बोङ् खाहुन् पाःन्हाॽ, सुजाहाॽ नु
सिक्कुम्दिङ् निङ्वाॽ पाःन्जाःक्हाॽ साप्तुङ्बा मेःन्नाङ्बि?
21खे़ने़ॽ के़बाङ्बे़ल्ले़ कुबेसाङ् कुदोःप्मा नुगप्हाॽ
पिमा के़सुक्तुर फाॽआङ् आङ्गाॽ से़क्खा नु
नसाःन्साबा पाःन्जाःक्हाॽ हुॽने़बा मेःन्नाङ्बि?
खाहुन् २
22याङ्गे़साॽबाहाॽरे़ खुन्छिॽ फाॽबाङ् मे़होप् फाॽआङ्
खे़ङ्हाॽ मे़युक्ते़से़न्ने़ॽ तुक्खे मे़जाःत्ते़से़न्ने़ॽओ,
थेआङ् मे़ङ्गप्मनाबाहाॽ खासे़न्हिम्मो युक्मासि याःम्बक् मे़जोगे़न्ने़ॽओ,
23थेआङ्भे़ल्ले़ यहवे दाङ्बे़ल्ले़ खे़ङ्हाॽरे़
खुन्छिॽ तुःन्देःन् खुने़ॽ कुहुक्को याङ्सिङ्लो,
हे़क्क्याङ् खे़ङ्हाॽ के़नाप्पाहाॽ खुने़ॽ नाप्तुसिरो॥
खाहुन् ३
24कुसिक् के़जम्बा मनाहाॽ तेःङ् मे़जोगे़से़न्ने़ॽओ,
हने़ कुयाःक् के़ले़ॽबा याप्मिहाॽनु चुम् मे़मे़त्छिङ्ङिन्ने़ॽओ,
25मेःन्ने़भग्र खे़ल्ले़ कुये़प्ले़क्किन् के़हुॽसिङ्लो,
हे़क्क्याङ् इजोओ आबाङे के़धारो॥
खाहुन् ४
26याङ्ङो युङ्मा के़बोङ्बा पाःन्नो हुक्मे़याक्ते़न्ने़ॽओ,
इग्र एयाङ्बे़ल्ले़ कुसिङ्नात्तो मे़युङे़न्ने़ॽओ॥
27खे़ने़ॽ सिङ्नात्तिन् हुङ्मा के़न्छुक्तुन्ने़भग्र,
के़ने़त्नाःन्नाङ् खे़ने़ॽलाम् के़म्नाप्लो॥
खाहुन् ५
28उनाहुरिबा लुङ् इःन्दोन् मे़घे़त्ते़न्ने़ॽओ,
खे़ङ्ग के़म्बा के़न्धबासिरे़ मे़हाक्तुबारो॥
खाहुन् ६
29कुयाःम्बक्को कुभा कुहुक्वा के़नुॽबा मना के़निसुबि?
खुने़ॽ हाङ्हाॽरे़ खुन्छिॽ तगि याःम्बक् चोगुरो,
मे़न्जोसे़न्जोबा मनाहाॽरे़ खुन्छिॽ याःम्बक् मे़जोगुन्लो॥
© 2009, 2023, Wycliffe Bible Translators, Inc. All rights reserved.