खानिःत् 9
9
चोःक्युम्भो तङ्नाम्
1खे़ङ्हाॽ मिस्रलाम् मे़लःन्दे़ मे़भे़रे़बा निसिगेक्पा तङ्बे के़रे़बा थिक्सिगेक्पा लाओ सिनैबा मुरे़क् खारे़क् थेआङ् के़होप्पादे़न्नो यहवे दाङ्बे़ल्ले़ मोसान् अक्खे मे़त्तुआङ् पारे़#ला १२:१-१३ 2“इस्राइलिहाॽरे़ निःन्धो के़बोङ्बा ये़म्मो चोःक्युम्भो खोमा तङ्नाम् मे़दोसुर॥ 3आम्भा कन् लाओबा थिबोङ्ङाङ् लिसि ये़न्नोबा युःन्छिक् निःन्धो के़बोङ्बा ये़म्मो खिनिॽ कन् तोसे़म्मे़ॽ॥ खे़ल्ले़ लागि के़रे़क् थिम् नु मुने़ःत् कुइसिक् खिनिॽ तोसे़म्मे़ॽ॥”
4खे़ब्याङ् खे़ङ्हाॽरे़ चोःक्युम्भो तङ्नाम् मे़दोसुर फाॽआङ् मोसाःल्ले़ इस्राइलिहाॽ मे़त्तुसि॥ 5खे़ङ्हाॽरे़ सिनैबा मुरे़क् खारे़क् थेआङ् के़होप्पादे़न्नो थिक्सिगेक्पा लाओबा थिबोङ्ङाङ् लिसिगेक्पा ये़न्निल्ले़ याःन्दिक् युःन्छिक् चोःक्युम्भो खोमा तङ्नाम् मे़दोसु॥ यहवे दाङ्बे़ल्ले़ मोसान् पिरुबा के़रे़क् इङ्जाङ् कुइसिक् इस्राइलिहाॽरे़ मे़जोगु॥
6कर मना के़सिबा चेःन् मे़सुसुआङ् आसुत्थो के़बोङ्बा यरिक्तङ्बा मनाहाॽ मे़वये़, खे़ङ्हाॽरे़ खे़ल्ले़ याःन्दिक् चोःक्युम्भो तङ्नाम् तोमा मे़न्छुक्तुन्॥ खे़ङ्हाॽ आम्भा खे़ल्ले़ याःन्दिक् मोसान् नु हारुने़ल्ले़ खुन्छिॽ पेसाङ् मे़द्ये़॥ 7खे़न् मनाहाॽरे़ मोसान् मे़मे़त्तु, “के़सिबा मनाःल्ले़ कुजेन् आनिगे सुसुम्बे़आङ् आसुत्थो पोःक्खिगे़आङ् वयिगे़॥ निःन्धो के़बोङ्बा ये़न्नो आनिगे इस्राइलिहाॽनु सोसोरिक् यहवे दाङ्बाओ आनिगे सिदुङ्जभान् थेआङ् तोःम्मा मे़घोसुम्बे़न्बाबे?”
8मोसाःल्ले़ खे़ङ्हाॽ मे़त्तुसि, “सप्फा हाङ्घे़म्मे़ॽ, यहवे दाङ्बे़ल्ले़ खिनिॽ याःम्बेओ थे़मा इङ्जाङ् के़बिरिॽ, आङ्गाॽ निङ्वाॽ खोसुङ्ल॥”
9खे़ब्याङ् यहवे दाङ्बे़ल्ले़ मोसान् मे़त्तु, 10“खे़ने़ॽ इस्राइलिहाॽ अक्खे मे़त्ते़से़ॽ—‘खिनिॽ हिम्सयङ्ङो मना के़सिबा चेःन् कुभा मनाःल्ले़ सुसुआङ् आसुत्थो पोःक्खे़आङ् वाॽ, इग्र माःङ्घा माःङ्घा वेॽ लाजेॽ पेआङ् वाॽसाङ् खे़ल्ले़ यहवे दाङ्बे़ल्ले़ कुजोःक्युम्भो खोमा तङ्नाम्मिन् तोसुर पोङ्ॽ॥ 11निसिगेक्पा लाओबा थिबोङ्ङाङ् लिसि ये़न्निल्ले़ याःन्दिक् युःन्छिक् खे़ङ्हाॽरे़ कन् मे़दोसुर॥ खे़ङ्हाॽरे़ मे़ल्लुक्साःत्, खरे़ःङ् के़भङ्बा सिदाॽ मे़न्याक्मनाबा खरे़ःङ् नु के़घिःक्पा नुधिआङ् मे़जर॥ 12खे़ङ्हाॽरे़ कुदाःन्दिक्मा तानाम् थारिक् खे़न्लाम्बा कुभा थेआङ् मे़न्नन्छुन्ल॥ खे़ल्ले़ आत्तिन् कुये़प्पान्नाङ् मे़न्ए़क्खुन्ल॥ चोॽक्युम्भो खोमा तङ्नाम्बा के़रे़क् थिम् कुइसिक् खे़ङ्हाॽरे़ मे़दोसुर॥#ला १२:४६; युहु १९:३६ 13कर आत्तिन् मनान् सुत्थो चोक्, हे़क्क्याङ् लाम्दिःक्कोआङ् होप्, खे़ल्ले़ चोःक्युम्भो तङ्नाम् मे़दोसुन्ने़भग्र खे़न् मनान् कुमनाहाॽलाम् मे़लःत्तु मे़देसुर, थेआङ्भे़ल्ले़ खे़ल्ले़ निःन्धो के़बोङ्बा ये़म्मो यहवे दाङ्बे़ल्ले़ कुलागि खुने़ॽ सिदुङ्जभा मे़दोन्दुन्॥ खे़न् मनाःल्ले़ खुने़ॽ कुलायोल्ले़ खुम्दिङ् खोसुर॥
14“‘खिनिॽ लुम्मो कुभा वेॽ लाजेॽबा मनान् युङ्, हे़क्क्याङ् खे़ल्ले़ यहवे दाङ्बे़ल्ले़ कुलागि चोःक्युम्भो तङ्नाम् तोमा निङ्वाॽ चोगुने़भग्र, खे़ल्ले़ चोःक्युम्भो तङ्नाम्बा थिम् नु साक्थिम् कुइसिक् खे़ल्ले़ तोसुर॥ वेॽ लाजेॽबा नु आप्फेक् लाजेॽबा मनारे़ लागि खिनिॽ लत्छा थिम् कप्मा पोङ्लो॥’”
सेसे साःङ्गाहिम्मिल्ले़ कुसम्धाङ् के़बप्पा खाॽमित्
(ला ४०:३४-३८)
15माङ्हुप् साप्लुङ् के़याक्पा निङ्वाॽफुमाङ् सन्दोक् के़युङ्बा सेसे साःङ्गाहिम्मिन् मे़भोःक्खुल्ले़ याःन्दिक् खाॽमिःत्तिल्ले़ खे़न् पन्छु॥ सेसे साःङ्गाहिम्मिल्ले़ कुसम्धाङ्बा खे़न् खाॽमिःत्तिन् युःन्छिक् पोःक्खे़आङ्धो तानाम् थारिक्के मिधुङ् मिराःक् हे़क्तङ्बा निधाबे़॥#ला ४०:३४-३८ 16कन् आप्फाल्ले़साङ् अक्तङ्बाए पोःक्खे़र वये़—ले़न्दिक् खाॽमिःत्तिल्ले़ पन्छु, हे़क्क्याङ् से़न्दिक् मिधुङ् मिराःक् हे़क्तङ्बा निधाबे़॥ 17आल्ल साःङ्गाहिम्मिल्ले़ कुसम्धाङ्बा खाॽमिःत्तिन् इःङ्सिङ्ङिल्ले़, इस्राइलिहाॽ लाम् मे़धासिङ्, हे़क्क्याङ् आत्तिन् ते़न्नो खाॽमिःत्तिन् फन्छिङ्, हाबा खे़न् ते़न्नोए इस्राइलिहाॽरे़ साःङ्गाहिम्हाॽ मे़घिङ्घु॥ 18यहवे दाङ्बे़ल्ले़ कुइङ्जाङ्ङो इस्राइलिहाॽ लाम् मे़धासिङ्, हे़क्क्याङ् यहवे दाङ्बे़ल्ले़ए कुइङ्जाङ्ङो खे़ङ्हाॽरे़ साःङ्गाहिम्हाॽ मे़घिङ्घु॥ सेसे साःङ्गाहिम्मिल्ले़ कुसम्धाङ् खाॽमिःत्तिन् पत्छे़र थारिक् खे़ङ्हाॽ साःङ्गाहिम्हाॽओए याङ्मे़धोःक्ते़॥ 19यरिक् ये़न् थारिक् खाॽमिःत्तिन् सेसे साःङ्गाहिम्मिल्ले़ कुसम्धाङ् आम्भा पत्छे़ने़भग्र, इस्राइलिहाॽरे़ यहवे दाङ्बे़ल्ले़ कुइङ्जाङ्ङिन् मे़घे़प्सुआङ् लाम् मे़न्धासिङ्ङिन्॥ 20कुभा ये़म्मो सेसे युङ्दे़न्निल्ले़ कुसम्धाङ् कुभा ये़न् थे़म्बारक् खाॽमिःत्तिन् पत्छे़॥ यहवे दाङ्बे़ल्ले़ कुइङ्जाङ् कुइसिक् खे़ङ्हाॽ याङ्मे़धोःक्ते़, हे़क्क्याङ् यहवे दाङ्बे़ल्ले़ कुइङ्जाङ् कुइसिक् खे़ङ्हाॽ लाम् मे़धासिङ्॥ 21हे़क्क्याङ् कुभा ये़म्मो युःन्छिक्काङ्धो तानाम् थारिक्लक् खाॽमिःत्तिन् पत्छे़, खम्भ्याङ् तानाम् खाॽमिःत्ते़न् इःङ्सिङ्ङाङ् खे़ङ्हाॽ लाम् मे़धासिङ्॥ ले़न्दिक्साङ् इग्र से़न्दिक्साङ्, खाॽमिःत्ते़न् इःङ्सिङ्नुमे़ःन्ने खे़ङ्हाॽ लाम् मे़धासिङ्॥ 22नियान् इग्र लाधिक् किग्र तङ्बेधिक् थारिक्साङ् सेसे साःङ्गाहिम्मिल्ले़ कुसम्धाङ् खाॽमिःत्ते़न् पत्छे़र थारिक् इस्राइलिहाॽ लाम् मे़न्धासिङ्ङिन्, कर खाॽमिःत्ते़न् इःङ्सिङ्नुमे़ःन्ने खे़ङ्हाॽ लाम् मे़धासिङ्॥ 23यहवे दाङ्बे़ल्ले़ कुइङ्जाङ्ङो खे़ङ्हाॽरे़ साःङ्गाहिम्हाॽ मे़घिङ्घु, हे़क्क्याङ् यहवे दाङ्बे़ल्ले़ कुइङ्जाङ्ङोए खे़ङ्हाॽ लाम् मे़धासिङ्॥ यहवे दाङ्बे़ल्ले़ मोसाःन्लाम् आक्तङ्बा इङ्जाङ् चोगुआङ् वये़, खे़ङ्हाॽरे़ हाबा खे़न्ने मे़इःत्तु मे़नाःत्तुरो॥
© 2009, 2023, Wycliffe Bible Translators, Inc. All rights reserved.