खानिःत् 36
36
मे़न्छुमासाहाॽरे़ लक्खोमा
1योसेफरे़ कुजक्मे़न्छाॽ, मनस्सेरे़ कुम्मे़न्छाॽ, माकिररे़ कुस्सा गिलादरे़ कुधाःक्कोबा लाम्लोबाहाॽ मे़द्ये़, हे़क्क्याङ् मोसान् नु इस्राइलि लाम्लोबाहाॽ खुन्छिॽ हिम्सयङ्बा कुधे़गेःक्हाॽरे़ खुन्छिॽ तगि मे़ये़म्सिङ्ङाङ् मे़मे़त्तुसि, 2“तॽयाःन्सोन् के़माआङ् लाजेन् इस्राइलिहाॽ हुक्सुप्मासि फाॽआङ् यहवे दाङ्बे़ल्ले़ आदाङ्बा इङ्जाङ् के़बिरे़आङ् वये़, हे़क्क्याङ् आनिगे नुसाॽ सलोफादरे़ कुयुक्किन् खुने़ॽ कुस्सा मे़न्छुमाहाॽ के़बिरुसिर फाॽआङ् यहवे दाङ्बे़ल्ले़ आदाङ्बा इङ्जाङ् के़बिरे़आङ् वये़॥#खानिःत् २७:२ 3आल्ल इस्राइलिहाॽरे़ खुन्छिॽ वेॽ थाःक्कोबा ये़म्बित्छाहाॽनु खे़ङ्हाॽ ते़न्धाम् मेःक्खिम् मे़जोक्ने़भग्र, खे़न् मे़न्छुमाहाॽरे़ खुन्छिॽ युक्किन् वेॽ थाःक्कोबा ये़म्बित्छाहाॽरे़ खुन्छिॽ युक्को योॽसिङ्ॽ॥ कम्भलॽरिक् आनिॽ पालाम्बाबा याङ्साकुन्धेन् माआङ् पेक्॥ 4इस्राइलिहाॽरे़ खुन्छिॽ याम्मो कुसङ् पोङ्मा तङ्बेःन्#ले़बि २५:८-५५ ताःल्ले़ खे़न् मे़न्छुमाहाॽरे़ खुन्छिॽ पालाम्बाबा याङ्साकुन्धेःन्नाङ् ते़न्धाम् मेःक्खिम् मे़जोगे़आङ् मे़बेबा थाःक्कोबा याङ्साकुन्धेओ योॽसिङ्ॽ॥ कम्भलॽरिक् आनिगे पाधे़बा थाःक्कोबा पालाम्बाबा याङ्साकुन्धेहाॽ मासुम्बे़ॽ॥”
5खे़ब्याङ् यहवे दाङ्बे़ल्ले़ कुइङ्जाङ् कुइसिक् मोसाःल्ले़ इस्राइलिहाॽ अक्खे मे़त्तुसिआङ् इङ्जाङ् पिरुसि—“योसेफरे़ कुमुॽइदाङ्साहाॽरे़ खुन्छिॽ थाःक्हाॽरे़ मे़बाःत्तुबा पाःन्निन् कुदोःप्माए चोक्॥ 6सलोफादरे़ कुस्सा मे़न्छुमाहाॽरे़ खुन्छिॽ याःम्बेओ यहवे दाङ्बे़ल्ले़ कन् इङ्जाङ्ङिन् याप्मि पिरे़आङ् वाॽ—‘आप्फेक् खुन्छिॽ पाले़प्माङ्बा थाःक्कोबा हिम्सयङ्ङिन् हाःत्ले़ कुसिराॽथाङ्, खे़न्नुरक् खे़ङ्हाॽरे़ मेःक्खिम् मे़जोगुर॥’ 7अक्खे चोःक्मे़ल्ले़ इस्राइलिहाॽरे़ खुन्छिॽ पालाम्बाबा आत्तिन् याङ्साकुन्धेःन्नाङ् लत्छा थाःक्कोलाम् वेॽसमा थाःक्को पेःक्मा मे़घोने़न्॥ इस्राइलि थाःक्थक्मा इस्राइलिहाॽरे़ खुन्छिॽ पालाम्बाबा याङ्साकुन्धेन् आप्फेक् थाःक्कोए चुक्ल॥ 8इस्राइलिहाॽरे़ खुन्छिॽ थाःक्कोबा पालाम्बाबा याङ्साकुन्धे के़घोमा सिसागे़न् मे़न्छ्याःल्ले़ खुने़ॽ कुम्बा पिसाङ्बा थाःक्को मेःक्खिम् चोगुर, हे़क्केलॽरिक् के़रे़क् इस्राइलिहाॽरे़ खुन्छिॽ आप्फेक् पालाम्बाबा याङ्साकुन्धे लक्किन् मे़घोसुर॥ 9पालाम्बाबा आत्तिन् याङ्साकुन्धेःन्नाङ् लत्छा थाःक्कोलाम् वेॽसमा थाःक्को मे़न्जत्तुन्ल, कर आत्तिन् इस्राइलिःल्ले़साङ् आप्फेक् पाधे़बा थाःक्कोबा पालाम्बाबा याङ्साकुन्धेन् कत्तुर॥”
10यहवे दाङ्बे़ल्ले़ मोसान् इङ्जाङ् पिरुबा हे़क्केए सलोफादरे़ कुस्सा मे़न्छुमाहाॽरे़ मे़जोगु॥ 11सलोफादरे़ कुस्सा मे़न्छुमा महला, तिर्सा, होग्ला, मिल्का नु नोआहरे़ आप्फेक् खुन्छिॽ पाःल्ले़ कुम्भुॽ कुन्साॽहाॽरे़ खुनिॽ साहाॽनु मेःक्खिम् मे़जोगु॥ 12खे़ङ्हाॽरे़ खुन्छिॽ ते़न्धाम् मेःक्खिम् योसेफरे़ कुस्सा मनस्सेरे़ कुमुॽइदाङ्साहाॽरे़ खुनिॽ थाःक्हाॽओबा हिम्सयङ्ङोए पोःक्खे़॥#खानिःत् २७:१-११
13यरिहो कुदोःप्मा नाङ्गे़न् पिसाङ् यर्दन वहःङ्ङिल्ले़ कुयाओ मोआबबा ने़ने़बादे़न्नो यहवे दाङ्बे़ल्ले़ मोसाःन्लाम् इस्राइलिहाॽ पिरुसिबा इङ्जाङ् नु थिम्हाॽ आम्भा कन्हाॽरो॥
© 2009, 2023, Wycliffe Bible Translators, Inc. All rights reserved.