खानिःत् 34
34
कनान लाजेॽबा इःन्दोहाॽ
1यहवे दाङ्बे़ल्ले़ मोसान् मे़त्तु, 2“खे़ने़ॽ इस्राइलिहाॽ मे़त्ते़से़ॽ—‘आल्ल खिनिॽ कनान लाजेॽओ के़लासिल्ले़ याङ्साकुन्धे हे़क्के खिनिॽ पिनिङ्बा लाजेॽओबा इःन्दोन् अक्तङ्बा चोक्लो—
3“‘लाङ्गे़त् ले़प्माङ्बा इःन्दोन् सिनबा मुरे़क् खारे़क् थेआङ् के़होःप्पादे़न्लाम् एदोमरे़ कुइःन्दोःन्नु सोसोरिक् पेक्॥ खिनिॽ लाङ्गे़त् ले़प्माङ् इःन्दोन् कुसिवे़त् वरःङ्ङिल्ले़#३४:३ हिब्रुओ, युम्लाःक्खाङ् वरःङ्, पाःत्ला १२ओ पत् यो कुनुप्मोलाम् नाङ्गे़न् पिसाङ्लाम् हेःक्सिङ्ॽ॥ 4खे़न् लाङ्गे़त् ले़प्माङ्लाम् अक्रब्बिमबा कुभोसाङ् लःन्नाङ् जिन थारिक् नु कादेस-बर्नेबा लाङ्गे़त् पिसाङ् के़त्ल॥ खे़प्मोलाम् हसर-अद्दर पोङ्ल अज्मोन थारिक् के़त्ल॥ 5खे़ब्याङ् इःन्दोन् अज्मोनलाम् इआङ् मिस्रबा खल्साओ के़त्ताङ् लुम्बा वरःङ् नुप्ल॥
6“‘नाम्धा पिसाङ्बा इःन्दोःन्ग तुङ्गोदिङ् वरःङ् नु खे़ल्ले़ कुयाए कुया पोङ्ल॥ खिनिॽ नाम्धा पिसाङ्बा इःन्दोन् हाबा कन् पोङ्ॽ॥
7“‘खिनिॽ थो थाङ्गे़न् ले़प्माङ्बा इःन्दोन् हाबा कन् पोङ्ल—वरःङ्ङाङ्धो होर कोःक्मा फाङ्जङ् थारिक् खिनिॽ इःन्दो युक्खे़म्मे़ॽ, 8हे़क्क्याङ् होर कोःक्मा फाङ्जङ्लाम् ले़बो-हमात थारिक् इःन्दो युक्खे़म्मे़ॽ॥ खे़ब्याङ् इःन्दोन् सदाद पोङ्ङाङ् 9सिप्रोन थारिक् के़त्ल॥ खे़ल्ले़ कुनुप्मान् चाए हसर-एनाने़न् पोङ्ल॥ खिनिॽ थाङ्गे़त् पिसाङ्बा इःन्दोन् आम्भा कन् पोङ्ॽ॥
10“‘खिनिॽ नाङ्गे़न् ले़प्माङ्बा इःन्दोःन्ग हसर-एनानलाम् सपाम थारिक् युक्खे़म्मे़ॽ॥ 11हे़क्क्याङ् खे़न् इःन्दोन् सपामलाम् यो थासिङ्ङाङ् एेनबा नाङ्गे़न् ले़प्माङ् रिब्ला थारिक् के़त्ल॥ खे़न् इःन्दोन् याम्मो यो थाआङ् गालिल#३४:११ खे़ङ्ग हिब्रुओ किन्नरेत वरःङ्ङिन्लो॥ वरःङ्ङिल्ले़ कुयाकुयाबा याक्केःक्केःक्पा ते़न्हाॽलाम् नाङ्गे़न् पिसाङ् के़त्ल॥ 12खे़ब्याङ् खे़न् इःन्दोन् यर्दन वहःङ्ङिल्ले़ कुयाए कुया पोङ्ङाङ् कुसिवे़त् वरःङ् वरःङ्ङो लःन्ल॥
“‘के़रे़क् पिसाङ्बा इःन्दोहाॽ सोसोरिक् खिनिॽ लाजेन् हाबा कन्लो॥’”
13मोसाःल्ले़ इस्राइलिहाॽ अक्खे मे़त्तुसिआङ् इङ्जाङ् पिरुसि, “यहवे दाङ्बे़ल्ले़ कुइङ्जाङ् कुइसिक् तॽयाःन्सोन् मे़गे़सुआङ् फाङ्सिआङ् कुभ्रे़ःङ् थाःक्हाॽरे़ युक् चोःक्मा के़बोङ्बा लाजेन् हाबा कन्लो, 14थेआङ्भे़ल्ले़ रुबेन नु गादरे़ खुन्छिॽ थाःक्हाॽरे़ खुन्छिॽ हिम्सयङ्हाॽ हे़क्क्याङ् मनस्सेरे़ कुभ्रे़ःङ् कुधाःक्कोबा हिम्सयङ्हाॽरे़ खुन्छिॽ खोमा लक्किन् मे़घोसु मे़सुरुआङ् ने़रो॥ 15खे़न् ने़त्छिआङ् कुभ्रे़ःङ् थाःक्हाॽरे़ यरिहो कुदोःप्मा यर्दन वहःङ्ङिल्ले़ नाङ्गे़न् ले़प्माङ् खुन्छिॽ आप्फेक् आप्फेक् युक्किन् मे़घोसु मे़सुरुआङ् ने़रो॥”#खानिःत् २६:५२-५६; यहो १४:१-५
16यहवे दाङ्बे़ल्ले़ मोसान् मे़त्तु, 17“युक् चोःक्मारे़ लागि खिनिॽ लाजेॽ के़भःङ्बा के़बिबाहाॽरे़ खुन्छिॽ मिङ् हाबा कन्हाॽरो—निङ्वाॽफुसाम्बा एलाजार नु नुनरे़ कुस्सा यहोसु॥ 18युक्ले़ लागि नु लाजेन् फःङ्मारे़ लागि खिनिॽ थाःक्थक्मा लत्छा लत्छा लाम्लोबा सेगे़म्सिम्मे़ॽ॥ 19खे़ङ्हाॽरे़ खुन्छिॽ मिङ्हाॽ कन् परिक्पा वाॽरो—
“यहुदारे़ कुधाःक्कोलाम्
यपुन्नेरे़ कुस्सा कालेब,
20सिमियोनरे़ कुधाःक्कोलाम्
अम्मिहुदरे़ कुस्सा सेमुएल,
21बेन्यामिनरे़ कुधाःक्कोलाम्
किसलोनरे़ कुस्सा एलिदाद,
22दानरे़ कुधाक् लाम्लोबालाम्
योगलिरे़ कुस्सा बुक्कि,
23योसेफरे़ कुस्सा मनस्सेरे़ कुधाःक् लाम्लोबालाम्
एपोदरे़ कुस्सा हन्निएल,
24योसेफरे़ कुस्सा एफ्राइमरे़ कुधाःक् लाम्लोबालाम्
सिप्तानरे़ कुस्सा कमुएल,
25जबलुनरे़ कुधाःक् लाम्लोबालाम्
पर्नाकरे़ कुस्सा एलिजापान,
26इस्साखाररे़ कुधाःक् लाम्लोबालाम्
अजानरे़ कुस्सा पल्तिएल,
27आसेररे़ कुधाःक् लाम्लोबालाम्
सलोमिरे़ कुस्सा अहिहुद,
28नप्तालिरे़ कुधाःक् लाम्लोबालाम्
अम्मिहुदरे़ कुस्सा पदहेल॥”
29कनान लाजेॽओ इस्राइलिहाॽरे़ खुन्छिॽ लुम्मो खे़ङ्हाॽरे़ खुनिॽ खोमा लक्हाॽ हामारे़ लागि यहवे दाङ्बे़ल्ले़ युक्तिङ् चोगुसिबा मनाहाॽ हाबा कन्हाॽरो॥
© 2009, 2023, Wycliffe Bible Translators, Inc. All rights reserved.