खानिःत् 32
32
यर्दन नाङ्गे़न् पिसाङ्बा थाःक्हाॽ
(साम्यो इङ् ३:१२-२२)
1रुबेन नु गादरे़ खुन्छिॽ मुॽइदाङ्साहाॽरे़ खुनिॽ यरिक् कुलुप् कुलुप् पित्थक्साहाॽ मे़वये़॥ खे़ङ्हाॽरे़ याजेर नु गिला द लाजेन् पित्थक्सा चाराम्मादे़न्ले़ लागि नुबा के़बोङ्बा मे़निसु॥ 2कल्ले़चोगुल्ले़ गाद नु रुबेनरे़ खुन्छिॽ मुॽइदाङ्सा मोसा, निङ्वाॽफुसाम्बा एलाजार हे़क्क्याङ् सङ्जुम्भोबा लाम्लोबाहाॽओ मे़द्ये़आङ् अक्खे मे़बाःत्तु, 3“अतारोत, दिबोन, याजेर, निम्रा, हेस्बोन, एलाले़, सबाम, नेबो नु बओन— 4खे़न् के़रे़क् लाजेॽहाॽ यहवे दाङ्बे़ल्ले़ इस्राइलि सङ्जुम्भोःल्ले़ खुन्छिॽ तगि नाःन्दुआङ् ने़स्से़, कन् लाजेॽहाॽ पित्थक्सा चाराम्मादे़न्ले़ लागि नुबा चोक्॥ आनिगे पित् थक्साआङ् कत्तुम्सिम्बे़॥ 5आनिगे याप्मि लुङ्माॽ के़दुक्तिने़भग्र कन् लाजेन् आनिगे युक्को आबिरे़ॽ॥ यर्दन नाधाःम्बिग आनिगे आन्देॽरे़न्ने़ॽ॥”
6मोसाःल्ले़ गाद नु रुबेनरे़ खुन्छिॽ मुॽइदाङ्हाॽ मे़त्तुसि, “खिनिॽ फुॽनुसाॽहाॽ ना ते़न्धङ्ङो मे़बेःक्किल्ले़ खिनिॽ चाए निङ्वाॽ याःन्दिक् ताआङ् हाबा के़युङिबि? 7यहवे दाङ्बे़ल्ले़ पिरुसिबा नाधाःम्बिबा लाजेॽओ पेःक्मा के़इःप्पा इस्राइलिहाॽरे़ खुन्छिॽ निङ्वाॽ थेआङ् पङ्ल के़याःन्दुम् के़बिरुम्सिम्बाबे? 8कादेस-बर्नेलाम् आङ्गाॽ खिनिॽ सुधे़बा थाःक्थे़बाहाॽ कन् लाजेन् थोःम्से़ पाङ्घुङ्सिङ्ङिल्ले़ खिनिॽ सुधे़बा थाःक्थे़बाहाॽ हाबा अक्खेए मे़जोगुआङ् मे़वये़॥ 9आल्ल खे़ङ्हाॽ एस्कोलबा ने़ने़बादे़न्नो मे़बेआङ् कन् लाजेन् मे़निसु, खे़ब्याङ् यहवे दाङ्बे़ल्ले़ इस्राइलिहाॽ पिरुसिबा लाजेॽओ खे़ङ्हाॽ मे़म्बेःक्ने़न्ल फाॽआङ् खुन्छिॽ निङ्वाॽ पङे़र मे़याःन्दु मे़बिरुसिआङ् वये़॥#खानिःत् १३:१७-३३ 10खे़ल्ले़ याःन्दिक् यहवे दाङ्बे़न् साॽरिक् हाङ्गे़न् सिक्चा लोरे़, हे़क्क्याङ् अक्खे पाःत्तुआङ् माङ्हे़क्सिङ्ङाङ् वये़— 11‘आङ्गाॽ अब्राहाम, इसहाक हे़क्क्याङ् याकुबे़न्नु माङ्हे़क्सिङ्ङाआङ् माङ्हुप् चोगुङ्बा लाजेॽओ मिस्रलाम् के़भे़म्बा निबोङ् तङ्बे नु खे़न्नुःल्ले़ थोबा आत्तिन्हाॽआङ् लाःप्मा मे़ङ्घोने़न्, थेआङ्भे़ल्ले़ खे़ङ्हाॽरे़ कुलिङ्दो के़रे़र आङ्गाॽ मे़न्दिम्दाङ्ङिन्॥ 12कनज्जि यपुन्नेरे़ कुस्सा कालेब नु नुनरे़ कुस्सा यहोसुन् लक् लाःप्मा खोसि, थेआङ्भे़ल्ले़ कन् ने़प्फुरे़ग कुलिङ्दो के़रे़र यहवे दाङ्बे़न् तिम्दे़सु॥’ 13इस्राइलिहाॽनु यहवे दाङ्बे़न् साॽरिक् कुसिक् पोगे़, हे़क्क्याङ् यहवे दाङ्बे़ल्ले़ कुमिक्साओ फे़न्याःम्बक् के़जोःक्पा थाःक्कोबाहाॽ के़रे़क् मे़न्छे़ने़ल्ल थारिक् लिबोङ् तङ्बे थारिक् खुने़ॽ खे़ङ्हाॽ मुरे़क् खारे़क् थेआङ् के़होप्पादे़न्नो ना नु कत्ना ताक्कन्दु कत्तुसि॥#खानिःत् १४:२६-३५
14“लायोबाहाॽरे़ खुन्छिॽ थिन्दाङ्सायोबोरासे! यहवे दाङ्बे़ल्ले़ किप्मा के़घुबा कुसाक्के़न्निन् आल्लसाङ् यरिक् इस्राइलिहाॽ ले़प्माङ् फोङ्मारे़ लागि खिनिॽ सुधे़बा ताक्थे़बाहाॽरे़ खुन्छिॽ ते़न्नो के़बोगिआङ् के़वयिॽ॥ 15खिनिॽ खुने़ॽ तिम्मा के़न्दे़न्दिन्ने़भग्र, खुने़ॽ कन् के़रे़क् मनाहाॽ याम्मो मुरे़क् खारे़क् थेआङ् के़होःप्पादे़न्नोए पजेःक् पक्थसिॽ हे़क्क्याङ् खे़ङ्हाॽरे़ खुनिॽ मे़क्मासिमे़न् खिनिॽए के़जोगुम्बा पोङ्ॽ॥”
16खे़ब्याङ् खे़ङ्हाॽ मोसाःल्ले़ कुबेसाङ् मे़द्ये़आङ् मे़बाःत्तु, “आनिगे मे़ल्लुक्हाॽरे़ लागि मे़ल्लुक्खर नु आनिगे मेःत्साहाॽरे़ खुन्छिॽ लागि कॽयो ये़क्यक्हाॽ चोःक्मा निङ्वाॽ चोगुम्बे़, 17कर आनिगे आप्फेक् चाए इस्राइलिहाॽ खुन्छिॽ ते़न्नो मे़ङ्गे़त्छे थारिक् फे़जुम्भे़या खजुम्घया काप्सिङ्माआङ् खे़ङ्हाॽरे़ खुन्छिॽ तगि तगि थासिङ्मा यारिप् वयिगे़॥ कन् ये़म्मो कन् लाजेॽबा मनाहाॽरे़ आनिगे मे़ःत्साहाॽ थे़माआङ् मे़म्मे़त्छे खे़न् ये़क्यक्हाॽओबा लुङ्धाक्को ताप्थेक् याम्धेक् मे़बोङ्ङाङ् मे़याक्॥ 18इस्राइलबा के़रे़क् मनाहाॽरे़ खुन्छिॽ युक्कोबा लक्हाॽ मे़ङ्घोसुन्ल थारिक् हिम्मो आनिगे मे़नुःक्खिगे़न्ॽ॥ 19यर्दन नाधाःम्बि नु खे़न्नुःल्ले़आङ् ना खे़ङ्हाॽलाम् आनिगे खोमा लक् मे़जोगुम्बे़न्ॽ, थेआङ्भे़ल्ले़ आनिगे युक्कोबा खोमा लक्किन् यर्दन कत्नाहाङ्दाङ्ङे चुक्ते़आङ् ने़रो॥”
20खे़ब्याङ् मोसाःल्ले़ खे़ङ्हाॽ मे़त्तुसि, “ल पोङ्ॽ॥ यहवे दाङ्बे़ल्ले़ कुदगि खिनिॽ फे़जुम्भे़या खजुम्घयानु थङ्ङो के़बेगिॽ, 21हे़क्क्याङ् यहवे दाङ्बे़ल्ले़ कुनिङ्मिहाॽ नाःत्तुदेसुसिआङ् मे़नाःन्दुसिन्ल थारिक् यहवे दाङ्बे़ल्ले़ कुदगि खिनिॽ फे़जुम्भे़या खजुम्घयानु यर्दन नाधाःम्बि के़बेगिॽ, 22हे़क्क्याङ् यहवे दाङ्बे़ल्ले़ कुदगि खे़न् लाजेन् हुक्को थाने़भग्र खिनिॽ नुःङ्मा फे़म्मा के़सुक्तिॽ॥ खे़म्ब्याङ् यहवे दाङ्बान् नु इस्राइल ले़प्माङ् खिनिॽ चोःक्मा के़बोङ्बा याःम्बक्लाम् चोःक्युम्भो के़घोसुम्ॽ॥ खे़ब्याङ् कन् लाजेन् यहवे दाङ्बे़ल्ले़ कुदगि खिनिॽ युक्को थारो॥
23“कर खिनिॽ अक्खे के़न्जोगुम्मिन्ने़भग्र, यहवे दाङ्बे़ल्ले़ कुदगि खिनिॽ लायो के़जोगुम्ॽ, हे़क्क्याङ् खिनिॽ लायोल्ले़ से़क्खाए खिनिॽ के़दे़म्सिॽ॥ 24खिनिॽ मेःत्हाॽ नु साहाॽरे़ खुन्छिॽ लागि ये़क्यक्हाॽ नु मे़ल्लुक् मे़ःन्दाहाॽरे़ लागि खरहाॽ चोगे़म्मे़ॽ, कर खिनिॽ के़जोगुम्बा माङ्हुप्हाॽआङ् के़त्ते़म्मे़ॽ॥”
25खे़ब्याङ् गाद नु रुबेनरे़ खुन्छिॽ मुॽइदाङ्साहाॽरे़ मोसान् मे़मे़त्तु, “आदाङ्बारे़ के़बाःत्तुबा हे़क्के आनिगे चोगुम्बे़॥ 26आनिगे अङे़ःक्वा साहाॽ, मेःत्हाॽ, मे़ल्लुक् मे़ःन्दाहाॽ नु पित्मा पित्हाॽ के़रे़क् आम्भा कन् गिलादबा ये़क्यक्कोए मे़याःक्॥ 27कर आदाङ्बारे़ के़से़वारोबाहाॽ खे़ने़ॽ के़इङ्जाङ् कुइसिक् यहवे दाङ्बे़ल्ले़ कुदगि आनिगे फे़जुम्भे़या खजुम्घयानु नाधाःम्बि पेगिगे़ॽ॥”
28खे़ब्याङ् मोसाःल्ले़ खे़ङ्हाॽरे़ खुन्छिॽ याःम्बेओ निङ्वाॽफुसाम्बा एलाजार, नुनरे़ कुस्सा यहोसुन् नु इस्राइलिहाॽरे़ खुन्छिॽ थाःक् हिम्सयङ्बा लाम्लोबाहाॽ इङ्जाङ् पिरुसि॥ 29मोसाःल्ले़ खे़ङ्हाॽ अक्खे मे़त्तुसि, “गाद नु रुबेनरे़ खुन्छिॽ मुॽइदाङ्साहाॽ खिनिॽनु सोरिक् यहवे दाङ्बे़ल्ले़ कुदगि थङ्ङो फे़जुम्भे़या खजुम्घया मे़याङ्सिङ्ङाङ् यर्दन नाधाःम्बि मे़बेःक्, हे़क्क्याङ् लाजेन् खिनिॽ हुक्को थाने़भग्र, गिलाद लाजेन् खिनिॽ खे़ङ्हाॽरे़ खुन्छिॽ युक्को पिरे़म्सिम्मे़ॽ॥ 30कर खे़ङ्हाॽ फे़जुम्भे़या खजुम्घया याङ्सिङ्माआङ् खिनिॽनु सोरिक् यर्दन नाधाःम्बि पेःक्मा मे़न्दे़न्ने़न्ने़भग्र, खे़ङ्हाॽरे़ खिनिॽनु सोरिक् कनान लाजेॽओए युक्कोबा खोमा लक्किन् मे़घोसुॽ॥”
31गाद र रुबेनरे़ खुन्छिॽ मुॽइदाङ्साहाॽरे़ अक्खे मे़बाःत्तु, “यहवे दाङ्बे़ल्ले़ आनिगे थे़मा चोगे़म्मे़ॽ मे़त्तिगे़आङ् वाॽ आनिगे हाबा खे़न् चोगुम्बे़॥ 32आनिगे फे़जुम्भे़या खजुम्घया हेॽआसिगे़आङ् यहवे दाङ्बे़ल्ले़ कुदगि नाधाःम्बि कनान लाजेॽओ पेगिगे़ॽ, कर आनिगे युक्कोबा खोमा लक्किन् यर्दन कत्नाहाङ्दाङ्ङे चुक्ल॥”#यहो १:१२-१५
33खे़ब्याङ् गाद नु रुबेनरे़ खुन्छिॽ मुॽइदाङ्सा हे़क्क्याङ् योसेफरे़ कुस्सा मनस्सेरे़ कुभ्रे़ःक् कुधाःक्हाॽ एमोरिहाॽरे़ खुन्छिॽ हाङ् सिहोनरे़ कुहाङ्जुम्मिन् नु बासानबा हाङ् ओगरे़ कुहाङ्जुम्मिन्, खुन्छिॽ इःन्दोओ के़ने़बा के़रे़क् ये़क्यक्हाॽआङ् खक्पे़त् मोसाःल्ले़ पिरुसि॥
34खे़ब्याङ् गादरे़ कुमुॽइदाङ्साहाॽरे़ दिबोन, अतारोत, अरोएर, 35अत्रोत-सोपान, याजेर, योगबहा, 36बेथ-निम्रा नु बेथ-हाराने़न्—कन्हाॽ लुङ्धाक्किल्ले़ कबुबा येक्येक्हाॽ मे़जोगु, खे़ब्याङ् मे़ल्लुक् मे़ःन्दा साक्मा खरहाॽ मे़जोगु॥ 37रुबेनरे़ कुमुॽइदाङ्साहाॽरे़ हेस्बोन, एलाले़, किर्यातैम, 38नेबो, बाल-मोन (कन् ते़न्हाॽरे़ कुमिङ् ले़क्खे़आङ् ने़रो) नु सिब्मा मे़जोगु, हे़क्क्याङ् खे़ङ्हाॽरे़ मे़जोगुबा ये़क्यक्हाॽरे़ कुमिङ् मे़युक्खु॥
39मनस्सेरे़ कुस्सा माकिरे़ कुधाःक्हाॽ गिलाद लाजेॽओ मे़बे, हे़क्क्याङ् खे़न् हुक्काप् चोगुआङ् खे़प्मो के़युङ्बा एमोरिहाॽ मे़नाःत्तुमे़देसुसि॥ 40कल्ले़चोगुल्ले़ मोसाःल्ले़ मनस्सेरे़ कुस्सा माकिररे़ कुमुॽइदाङ्साहाॽ गिलाद लाजेन् पिरुदेसुसि, खे़ब्याङ् खे़ङ्हाॽ हाबा खे़प्मो मे़युङे़॥ 41मनस्सेरे़ कुमुॽइदाङ्सा याइरे़न् पेआङ् खे़प्मोबा पाङ्जुम्हाॽ हुक्काप् चोगु, हे़क्क्याङ् खे़न् के़रे़क् पाङ्जुम्हाॽरे़ कुमिङ् हब्बात-याइर#३२:४१ याइररे़ कुबाङ्भेॽहाॽ॥ युक्खु॥ 42हे़क्क्याङ् नोबहःन् पेआङ् केनात नु खे़प्मोबा पाङ्जुम्हाॽ हुक्काप् चोगु, खे़ब्याङ् आप्फेक् कुमिङ्ङोलाम् खे़ङ्हाॽ के़रे़क् नोबह मिङ् वाःत्तुरो॥
© 2009, 2023, Wycliffe Bible Translators, Inc. All rights reserved.