मत्ति 9
9
ये़सुरे़ लङ्ले़ःङ् तुक्माल्ले़ तरुबान् वेःन्दुॽ
(मर्कु २:१-१२; लुका ५:१७-२६)
1हे़क्क्याङ् ये़सुन् खःङ्बेओ लासे़आङ् नाहाङ्दाङ्बा आबाङे कुबाङ्भेॽओ के़रे़रो॥ 2खे़प्मो कुभा मनाहाॽरे़ लङ्ले़ःङ्वा मनाधिक् कुने़त्नाओए खुने़ॽओ मे़दारुरो॥ हे़क्क्याङ् खे़ङ्हाॽरे़ खे़न् लङ्ले़ःङ्वान् वेःप्मा सुक् के़लॽबा नसान् मे़गत्तुबा ये़सुरे़ निसुआङ् मे़त्तु, “आस्साए, हाङ्हाङ् लॽरे़ॽओ, खे़ने़ॽ के़लायोहाॽ ले़प्मि पोःक्खे़रो॥”
3हे़क्केःल्ले़ खे़प्मो के़वाॽबा कुभा साम्योथिम्साम्बाहाॽ अक्खे मे़मे़त्छिङ्, “कन् मनाःल्ले़ग निङ्वाॽफुमाङ् कुइसिक् लायो ले़प्मि के़बिबा ले़ङ्सिङ्ङाङ् माङ्चे़ॽया पाःन्निन्ने़ पाःत्तुर पत्लो!”
4ये़सुरे़ खे़ङ्हाॽरे़ खुनिॽ निङ्वाॽइन् निसुआङ् अक्खे मे़त्तुसि, “थेआङ् हे़क्केलॽरिक् फे़न्निङ्वाॽ के़इःत्तुम्बाबे? 5‘के़लायोहाॽ ले़प्मि पोःक्खे़’, मे़प्मा उसुरु चोःक्पि, इ ‘पोगे़ॽआङ् थासिङ्ङे़ॽ’ मे़प्मा उसुरु चोःक्पि? 6इङ्गाॽ मे़न्छाम्साःल्ले़ इक्सादिङ् खाम्बेःक्मो लायोहाॽ ले़प्मि पिमा युक् कत्तुङ् लॽरिक् ओसेःन्धाक्निङ्लो॥” हे़क्केःल्ले़ ये़सुरे़ खे़न् लङ्ले़ःङ्वान् मे़त्तु, “पोगे़ॽ, के़ने़त्नान् याङ्सिङ्ङे़ॽआङ् के़हिम्मो थासिङ्ङे़ॽ॥” 7हे़क्क्याङ् खे़न् पोगे़आङ् कुहिम्मो थासिङ्लो॥
8मनाहाॽरे़ कन् मे़निसुआङ् साॽरिक् खुनिॽ निङ्वाॽ मये़रो॥ हे़क्क्याङ् मे़न्छाम् याप्मिन् अक्तङ्बा मुक्साम् के़बिबा निङ्वाॽफुमाङ्ङिल्ले़ कुनारा मे़भोसुरो॥
ये़सुरे़ मत्तिन् उःत्तुॽ
(मर्कु २:१३-१७; लुका ५:२७-३२)
9ये़सुन् खे़प्मोलाम् पेर पत्छे़ल्ले़ मत्ति मे़प्मनाबा मनान् एःङ्याङ् फोङ्मा ते़न्नो युङे़बा निसुआङ् मे़त्तु, “इङ्गाॽ तिम्दाङ्ङे़ॽओ॥” खे़न् मुत्थ्रिक् पोगे़आङ् खुने़ॽनु थासिङ्लो॥
10खे़न् युःन्छिक् ये़सुन् नु कुहुॽसाम्बाहाॽ मत्तिरे़ कुहिम्मो चाजासे़ मे़युङ्सिङ्ङिल्ले़ एःङ्याङ् के़भोङ्बा यरिक् मनाहाॽ नु वेॽ “लायोबाहाॽ” मे़द्ये़आङ् खे़ङ्हाॽनु सोरिक् चाजासे़ मे़युङ्सिङ्॥ 11हे़क्केःल्ले़ कुभा फरिसिहाॽरे़ खे़न् मे़निसुआङ् कुहुॽसाम्बाहाॽ मे़मे़त्तुसि, “थेआङ् खिनिॽ सिक्साम्बान् एःङ्याङ् के़भोङ्बाहाॽ हे़क्क्याङ् वेॽ लायोबाहाॽनु सोरिक् चाजाबाबे?”
12ये़सुरे़ कन् खे़प्सुआङ् मे़त्तुसि, “सिदाॽसाम्बे़ङ्ग मे़न्दुक्मनाहाॽरे़ लागि मेःन्, कर के़दुक्पाहाॽरे़ लागिरो॥ 13साम्योसाप्लाओ यहवे दाङ्बाल्ले़ इङ्गाॽग सिदुङ्जभा चाहाबा मे़जोक्कान्, कर वेॽहाॽ लुङ्माॽ तुक्ते़म्सिम्मे़ॽ के़लॽबा निङ्वाॽ कत्तुङ्लो,#होसे ६:६ लॽरिक् पाःत्तुबा कन् पाःन्निल्ले़ कुबेन् हुॽआसिम्मे़ॽओ॥ इङ्गाॽग साम्योबाहाॽरे़ लागि मेःन्, कर लायोबाहाॽ लायोलाम् मे़नुःङ्ङाङ् ताङ्मे़से़ःप्ल फाॽआङ् त्याङ्बारो॥”
चाने़त्ले़ कुयाःम्बेओ सेःन्लाप्
(मर्कु २:१८-२२; लुका ५:३३-३९)
14हे़क्क्याङ् थिक्ले़ङ् बप्तिस्मा के़बिबा युहुन्नारे़ कुहुॽसाम्बाहाॽ मे़द्ये़आङ् ये़सुन् सेःन्मे़दोसु, “आनिगे नु फरिसिहाॽ चाने़त्तो ए़त्ले़ङ् युङिगे़ॽ कर थेआङ् के़हुॽसाम्बाहाॽ चाने़त्तो मे़न्युङ्ने़न्बाबे?”
15ये़सुरे़ खे़ङ्हाॽ नोगप् पिरुसि, “मेःक्खिम्साबे़न् कुन्जुम्हाॽनु वाॽर थारिक् खुने़ॽ कुन्जुम्हाॽ चाने़त्तो मे़युङ्ङाङ् मे़रिङ् मे़धक्पि? कर खे़ङ्हाॽलाम् मेःक्खिम्साबे़न् साक्के़ल्ले़क् मे़दे़म्सुआङ् मे़देॽरुल्ले़रक् खे़ङ्हाॽ चाने़त्तो मे़युङ्लो॥ 16आत्तिल्ले़आङ् कुसङ् चिरिक्किल्ले़ कुद्रे़क् चाङ्ङिन् मे़ले़म्दुन्लो, ले़म्दुने़ फाॽग्र खे़न् किङ्ङाङ् आल्लसाङ् यम्बा थे़ःक्खुदेसुॽरो॥ 17आत्तिल्ले़आङ् कुसङ् चे़ल्ले़क्सेॽ थिन् कुद्रे़क् से़होबा सुःक्वाओ मे़युक्खुन्, कर युक्खुने़ फाॽग्र कुसङ् चे़ल्ले़क्सेॽ थिःल्ले़ कुद्रे़क् से़होबा सुक्वान् थे़ःक्खुदेसुॽरो, हे़क्क्याङ् थिन् वे़त् पेःक्काङ् चासोक्लो॥ कर कुसङ् चे़ल्ले़क्सेॽ थिन् कुसङ् से़होबा सुःक्वाओ याक्मा पोङ्, हे़क्केःल्ले़ चे़ल्ले़क्सेॽ थिन् नु से़होबा सुक्वान् ने़प्माङ् ताङ्लो॥”
याइरसरे़ कुस्सा मे़न्छुमाॽइन्
(मर्कु ५:२१-४३; लुका ८:४०-५६)
18ये़सुरे़ हे़क्के पाःत्तुर पत्छे़ल्ले़ सुहाङ्युक्पाधिक् कुदगि थुङ्बोहजॽ युङ्सिङ्ल अक्खे पाःत्तु, “आदाङ्बे, आस्सा चुक्मे़न् खारक् स्ये़रो, कर खे़ने़ॽ फे़रे़ॽआङ् कुसम्दाङ् के़हुक्किन् ने़स्से़ पिरे़ॽ, हे़क्क्याङ् खे़न् हिङ्लो॥” 19ये़सुन् पोगे़आङ् खे़न्नु थासिङ्, हे़क्क्याङ् कुहुॽसाम्बाहाॽआङ् खुने़ॽ कुएगाङ् मे़धासिङ्लो॥ 20बा खे़न् ये़म्मो तङ्बे थिक्-ने़त्ताङ्धो (१२) माक्खिॽ वयुःमाल्ले़ तरुमा मे़न्छुमाॽधिक् ये़सुरे़ कुएगाङ् त्ये़आङ् कुदेःत्तिल्ले़ कुयान् सुसु॥ 21थेआङ्भे़ल्ले़ खे़ल्ले़ कुनिङ्वाॽओ खुने़ॽ कुदेःत्तिल्ले़ कुयाःन्लक् सुसुङ्साङ् इङ्गाॽ वेःत्तारो के़लॽबा इतुआङ् वये़॥ 22ये़सुन् हिल्लिक् हिसिङ्ङिल्ले़ खे़न् मे़न्छुमाॽइन् निसुआङ् मे़त्तु, “मामुए, हाङ्हाङ् लॽरे़ॽओ, नसान् के़जोगुबाल्ले़ चोगुल्ले़ खे़ने़ॽ के़वेःत्ते़रो॥” हे़क्क्याङ् खे़न् मे़न्छुमाॽइन् हाबा खे़न् ये़म्मो वेःत्ते़रो॥ 23हे़क्क्याङ् ये़सुन् खे़न् लाम्लोबाल्ले़ कुहिम्मो के़रे़ल्ले़ खे़प्मो चे लुप्मा ये़म्मो मे़प्फ्रामा के़मुःप्पाहाॽ नु मे़रिङ् के़धक्पा यरिक् मनाहाॽ निसुसि॥ 24ये़सुरे़ खे़ङ्हाॽ मे़त्तुसि, “पेगे़म्मे़ॽओ, कन् चुक्मे़ङ्ग मे़न्छिए वाॽ इप्से़आङ्लक् ने़रो”, कर खे़ङ्हाॽरे़ खुने़ॽ मे़एःत्तुरो॥ 25खे़न् मनाहाॽ खे़प्मोनु मे़लःत्तुसिआङ् ये़सुन् सिगाङ् लासे़ हे़क्क्याङ् खे़न् चुक्मे़ल्ले़ कुहुक्किन् ते़म्सुल्ले़ खे़न् चुक्मे़न् मुत्थ्रिक् पोगे़रो॥ 26कन् इङ्घङ्ङिन् खे़न् थुम्मो के़रे़क् पिसाङ् से़रे़रो॥
ने़त्छि मिक्फःम्बाहाॽ
27ये़सुन् खे़प्मोलाम् पेर पत्छे़ल्ले़ ने़प्फु मिक्फःम्बाहाॽरे़ खुने़ॽ कुएगाङ् कुएगाङ् तिम्दे़त्छुर अक्खेलॽरिक् अःक्ते़त्छि, “दाउदरे़ कुस्साए,#९:२७ यहुदिहाॽरे़ लागि “दाउदरे़ कुस्सा” फाॽइन् दाउद हाङ्ङिल्ले़ कुधाःक्लाम् के़दाबा निङ्वाॽफुमाङ्ङिल्ले़ थुक्तुबा ख्रिस्त फाॽआङ् कुसिङ् मे़निःत्तुरो॥ आन्छिगे लुङ्माॽ आदुक्ते़ॽओ॥” 28हे़क्क्याङ् ये़सुन् लासे़बा हिम्मो पेसिल्ले़ ये़सुरे़ खे़ङ्हाॽ सेःन्दोसुसि, “खिन्छिॽ मिक् निमा के़सुक्सुर चोःक्मा सुक्तुङ् फाॽआङ् नसान् के़जोःक्सुबि?”
चोःक्सुगे़ॽरो, आदाङ्बे फाॽआङ् नोगप् पिरे़त्छु॥
29हे़क्क्याङ् ये़सुरे़ खे़ङ्हाॽरे़ खुन्छिॽ मिक्हाॽ सुसु पिरुसिर मे़त्तुसि, “खिन्छिॽ नसान् के़जोगे़त्छुबा कुइसिःक्के पोङ्लरो॥” 30खे़ङ्हाॽ मिक् निमा के़सुक्पा पोःक्खे़त्छि॥ ये़सुरे़ खे़ङ्हाॽ “कन् पाःन्निल्ले़ कुयाःम्बेओ आत्तिल्ले़आङ् निङ्वाॽ मे़घोःसुन्लरो” मे़त्तुसि॥ 31कर खे़ङ्हाॽ पेसिआङ् खे़न् थुम्मो के़रे़क् पिसाङ् खुने़ॽ कुयाःम्बेओ इङ्घङ् से़से़त्छुरो॥
माफे़न्साम्मिल्ले़ युक्तुबा मनान्
32हे़क्क्याङ् खे़ङ्हाॽ लःन्दे़त्छिर पत्छे़त्छिल्ले़ कुभा मनाहाॽरे़ फे़न्साम्मिल्ले़ याङ्घुबाल्ले़ चोगुल्ले़ पाःप्मा मे़न्छुक्मनाबा मनाधिक् ये़सुरो मे़दारु॥ 33हे़क्क्याङ् खे़न् फे़न्साम्मिन् ये़सुरे़ नाःत्तु लःत्तु हे़क्क्याङ् खे़न् मनान् पाःप्मा हेःक्ते़रो॥ खे़न् मे़निसुआङ् खे़न् मनाहाॽरे़ साॽरिक् खुनिॽ निङ्वाॽ मये़र अक्खे मे़बाःत्तु, “इस्राइल लाजेॽ खाराक् अक्तङ्बा निङ्वाॽ के़माबा पाःङ्ग आप्फाल्ले़आङ् मे़न्निए वयिगे़रो॥”
34कर फरिसिहाॽरे़ मे़बाःत्तु, “कन् मनाःल्ले़ग फे़न्साम्हाॽरे़ खुनिॽ हाङ्ङिल्ले़ कुमुक्साम्लाम् फे़न्साम्हाॽ नाःत्तु लःत्तुसिॽरो॥”
चागे़सुम्बा याःलिक्हाॽ
(मर्कु ६:३४; लुका १०:२)
35ये़सुन् यहुदि चुम्लुङ्हिम्हाॽओ हुॽरुसिर निङ्वाॽफुहाङ्जुम्मिल्ले़ कुयाःम्बेओ सुनाइङ् से़सुर के़रे़क् परिक्ले़न् के़दुक्पा के़यॽबाहाॽ वेःन्दुसिर ये़क्यक् नु पाङ्भेॽहाॽओ लाम्दिक् चोगे़रो॥ 36ये़सुरे़ यरिक् मनाहाॽ निसुसिल्ले़ कुलुङ्माॽ स्याःत् लॽरे़, थेआङ्भे़ल्ले़ खे़ङ्हाॽग मे़ल्लुक्कम्बा मेःन्नेबा मे़ल्लुक् हे़क्के लाम् के़बोःप्पाआङ् तुक्खे के़जाबा कुइसिक् मे़जोगे़रो॥ 37हे़क्क्याङ् ये़सुरे़ कुहुॽसाम्बाहाॽ मे़त्तुसि, “सुम्मा के़बोङ्बा चाःन् यरिक् ने़ःॽ, कर चा के़सुम्बा याःलिक्हाॽ मे़सुःन्लो॥ 38हे़क्केःल्ले़ सुम्मा के़बोङ्बा चाःल्ले़ कुन्दाङ्बान् यरिक् याःलिक्हाॽ चा सुम्से़ पाङ्घुसिर फाॽआङ् खिनिॽ तुवा चोगे़म्मे़ॽओ॥”
Currently Selected:
मत्ति 9: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
