मत्ति 4
4
माफे़न्साम्लाम् ये़सुन् हङ्साॽ
(मर्कु १:१२-१३; लुका ४:१-१३)
1हे़क्क्याङ् सेसेमाङ्ङिल्ले़ ये़सुन् माफे़न्साम्लाम्#४:१ माफे़न्साम्—कन् फाॽइन् सैतानलो॥ कुनिङ्वाॽ साॽसे़ एःक्सादे़न्नो तेॽरुरो॥ 2खे़प्मो खुने़ॽ लिबोङ् (४०) से़न्दिक् नु ले़न्दिक् थारिक् थेआङ् मे़जने़न्नाङ् साॽरिक् कुसे़त्लाःक्ते़रो॥ 3हे़क्क्याङ् माफे़न्साम्मिन् खे़प्मो त्ये़आङ् खुने़ॽ अक्खे मे़त्तुर कुनिङ्वाॽ साॽरु, “खे़ने़ॽ निङ्वाॽफुसाने़ फाॽग्र कन् लुङ्हाॽ खरे़ःङ् पोःक्खे़ॽ फाॽआङ् मे़त्ते़ॽ॥”
4कर ये़सुरे़ नोगप् पिरु, “हे़क्के मे़जोक्कान्, थेआङ्भे़ल्ले़ साम्योसाप्लाओ मोसारे़ अक्खेलॽरिक् साप्तुआङ् पत्, ‘मे़न्छाम् याप्मिःङ्ग कुजाःल्ले़रक् मे़हिङ्ने़न्, कर निङ्वाॽफुमाङ्ङिल्ले़ पाःत्तुबा के़रे़क् पाःन्निल्ले़ हिङ्॥’”#साम्यो इङ् ८:३
5हे़क्क्याङ् माफे़न्साम्मिल्ले़ खुने़ॽ यरुसले़म्मो तेॽरुआङ् माङ्हिम्मोबा के़रे़क्नुःल्ले़ केःम्बा चम्जम्बा ते़न्नो ये़प्सुआङ् मे़त्तु 6“खे़ने़ॽ से़क्खाए निङ्वाॽफुसाने़ फाॽग्र पिन्दे़ थ्ये़ॽ, थेआङ्भे़ल्ले़ साम्योसाप्लाओ अक्खेलॽरिक् साप्ते़आङ् पत्, ‘निङ्वाॽफुमाङ्ङिल्ले़ कुमाङ्लाइङ्बाहाॽ खे़ने़ॽ के़लागि इङ्जाङ् पिरुसिआङ् खे़ने़ॽ थाःङ्धाःङ्ङे खुनिॽ हुक्को के़म्दाःक्काङ् के़लाङ्ङिन् लुङ्ङो मे़धाम्सिङ्ङिन्लो॥’”#निङ् सुम् ९१:११-१२
7ये़सुरे़ नोगप् पिरु, “कर साम्योसाप्लाओ याम्मो अक्खेलॽरिक्काङ् साप्ते़आङ् पत्, ‘दाङ्बा के़निङ्वाॽफुमाङ्ङिल्ले़ कुनिङ्वाॽ मे़साॽरे़न्ने़ॽ॥’”#साम्यो इङ् ६:१६
8हे़क्क्याङ् माफे़न्साम्मिल्ले़ खुने़ॽ साॽरिक् चम्जम्बा कोःक्माओ तेॽरुआङ् इक्सादिङ् खाम्बेःक्मोबा के़रे़क् हाङ्जुम्हाॽ हे़क्क्याङ् खे़प्मोबा पयम् यम्बा नु नुःब्नुबा पाःन्हाॽ ओसेःन्धाक्तुआङ् 9मे़त्तु, “खे़ने़ॽ साम्बोन् के़भन्छिङ्ङाङ् इङ्गाॽ से़वा के़मे़त्ताने़ फाॽग्र कङ्हाॽ के़रे़क् पिने़ॽ॥”
10ये़सुरे़ खे़न् मे़त्तु, “सैताने, कप्मोलाम् पेगे़ॽ, थेआङ्भे़ल्ले़ साम्योसाप्लाओ अक्खेलॽरिक् साप्ते़आङ् पत्, ‘खे़ने़ॽ दाङ्बा के़निङ्वाॽफुमाङ्ङिन्लक् से़वा मे़त्ते़ॽ हे़क्क्याङ् खुने़ॽइन्लक् कुसे़वा चोगे़ॽओ॥’”#साम्यो इङ् ६:१३ 11हे़क्क्याङ् माफे़न्साम्मिल्ले़ ये़सुन् ले़रुधआङ् माङ्लाइङ्बाहाॽ मे़द्ये़ हे़क्क्याङ् खुने़ॽ कम्ब्राङ् मे़मे़त्तु॥
ये़सुरे़ माङ्से़वा याःम्बक् चोःक्मा हेःक्तु
(मर्कु १:१४-१५; लुका ४:१४-१५)
12आल्ल ये़सुरे़ युहुन्नान् पुङ्लाहिम्मो मे़साक्तुआङ् याक् के़लॽबा खे़प्सुआङ् खुने़ॽ गालिल थुम्मो नुःक्खे़ पे॥ 13खुने़ॽ नासरत पाङ्जुम्मिन् ले़रुआङ् कपर्नहुम पाङ्जुम्मो वाॽसे़ पेरो॥ खे़ङ्ग गालिल वरक्किल्ले़ कुबेसाङ् नाप्तालि नु जबुलुन थुम्मो ने़रो॥ 14माङ्निङ्वाॽपान् के़बाःप्पा यसैयाःल्ले़ अक्खेलॽरिक् पाःत्तुबा पाःन्निन् के़रे़बारो—
15“यर्दन यङ्घङ्ङिल्ले़ नाधाःम्बिबा गालिल वरक्किल्ले़ कुबेसाङ्बा नाप्तालि नु जबुलुन के़युङ्बा याप्मिसे,
गालिल थुम्मो के़वाॽबा थिम्मे़न्दङ् सुवाङ्से,
16खादाम्मो के़वाॽबा मनाहाॽरे़ पयम् यम्बा ओःत्तिन् मे़निसुरो॥
सिमे़ल्ले़न् खामाक्माओ के़वाॽबाहाॽरे़ खुनिॽ लुम्मो ओःत्तिधिक् ओःत्लो॥”#यसै ९:१-२
17खे़न् ये़म्माङ्धो ये़सुरे़ अक्खे पाःत्तुर इङ्भोमा हेःक्तु, “लायोलाम् हिन्दे़म्मे़ॽओ, थेआङ्भे़ल्ले़ साङ्ग्राम्पेदाङ्बा हाङ्जुम्मिन् निःत्ताङ्ङे त्ये़आङ् वाॽरो॥”
ये़सुरे़ थिक्सिगेक्पा हुॽसाम्बाहाॽ सेगुसि
(मर्कु १:१६-२०; लुका ५:१-११)
18थिक्ये़न् ये़सुन् गालिल वरक्किल्ले़ कुयाओ लाङ्घेगे़र वये़ल्ले़ पत्रुस मे़प्मनाबा सिमोने़न् नु कुन्साॽ आन्द्रियासे़न् निसुसि॥ खे़ङ्हाॽ वरक्को योःङ् ले़प्ते़त्छुर यागे़त्छि, थेआङ्भे़ल्ले़ खे़ङ्हाॽ योःङ् के़ले़प्पा वये़त्छिरो॥ 19ये़सुरे़ खे़ङ्हाॽ मे़त्तुसि, “इङ्गाॽ आएगाङ् थाने़त्छे़ॽओ, खिन्छिॽ ङा के़दे़म्सु के़दाःत्छुबा कुइसिक् इङ्गाॽओ मना के़दाःप्पा चोःक्ने़त्छिङ्लो॥” 20खिमो खे़ङ्हाॽरे़ खुन्छिॽ योःङ्ङिन् ने़स्से़त्छु थ्ये़से़त्छुआङ् खुने़ॽनु पेसि॥ 21खे़प्मोलाम् मिसाक् नानाक् पेःल्ले़ ये़सुरे़ जब्दियारे़ कुस्सा याकुब नु खे़ल्ले़ कुन्साॽ युहुन्नान् निसुसि॥ खे़ङ्हाॽ खुन्छिॽ पाःन्नु खःङ्बेओ योःङ् ले़म्दे़त्छुर यागे़त्छि॥ ये़सुरे़ खे़ङ्हाॽ उःत्तुसिनुमे़ःन्ने 22खःङ्बेन् नु खुन्छिॽ पान् ले़रे़त्छु थ्ये़से़त्छुआङ् ये़सुन् नु पेसिरो॥
गालिलओ ये़सुरे़ कुमाङ्सेवा याःम्बक्किन्
(लुका ६:१७-१९)
23ये़सुरे़ यहुदि चुम्लुङ्हिम्हाॽओ निसाम् हुॽरुसिर निङ्वाॽफुहाङ्जुम्मिल्ले़ कुयाःम्बेओ सुनाइङ् से़सु, हे़क्क्याङ् के़रे़क् परिक्ले़न् तुक्मा यॽमालाम् के़दुक्पाहाॽ वेःन्दुसिर गालिल थुम्मो खाराक् ताक्कन्दे़रो॥ 24ये़सुरे़ कुयाःम्बेओ इङ्घङ्ङिन् सिरिया लाजेॽ खाराक् से़रे़, हे़क्क्याङ् यरिक् परिक्ले़न् तुक्माल्ले़ तरुसिबा मनाहाॽ, के़दुक्पाहाॽ, फे़न्साम्मिल्ले़ याङ्घुसिबाहाॽ, हे़क्क्याङ् थप्मा के़मबाहाॽ नु के़दुक्पा के़यॽबाहाॽ खुने़ॽओ मे़दारुसिआङ् खे़ङ्हाॽ के़रे़क् नुसुसिरो॥ 25हे़क्क्याङ् गालिल थुम्, देकापोलिस थुम्, यरुसले़म, यहुदिया नु यर्दन यङ्घङ् नाधाःम्बिबा थुम्मोलाम् के़दाबा यरिक् मनाहाॽरे़ खुने़ॽ मे़दिम्दुरो॥
Currently Selected:
मत्ति 4: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
