मत्ति 22
22
पयम् साभाङ्जारे़न् खे़दाॽ
(लुका १४:१५-२४)
1ये़सुरे़ खे़न् यहुदि लाम्लोबाहाॽ याम्मो खे़दाॽहाॽओ अक्खे मे़त्तुसि 2“साङ्ग्राम्पेदाङ्बा हाङ्जुम्मिङ्ग लत्छा हाङ्धिक्ले़ कुस्साःल्ले़ कुमेःक्खिम्मिल्ले़न् साभाङ्जा से़सुबा खे़दाॽ कुइसिक् चोक्लो॥ 3मेःक्खिम् साभाङ्जारे़न् चामुक् थिमुक्किन् यारिप् पोःक्खे़आङ् खे़न् हाङ्ङिल्ले़ उःत्छिङ् के़घोबाहाॽ साभाङ्जाओ ताःप्मासि कुसे़वारोबाहाॽ पाङ्घुसि, कर खे़ङ्हाॽ तामा मे़न्दे़न्दे़न्लो॥ 4हे़क्केःल्ले़ खे़न् हाङ्ङिल्ले़ कुभा कुसे़वारोबाहाॽ अक्खे मे़त्तुसिर पाङ्घुसि, ‘खे़न् उःत्छिङ् के़घोबाहाॽ अक्खे मे़त्ते़म्सिम्मे़ॽ, इङ्गाॽ मेःक्खिम् साभःङ्जान् यारिप् चोगुङ्ङाङ् वाॽआ॥ लुप्मनाबा थक्साहाॽ से़रुङ्सिङ्ङाङ् के़रे़क् चामा थुङ्मान् यारिप् पोःक्खे़आङ् वाॽ, मेःक्खिम् साभाङ्जाओ त्ये़म्मे़ॽओ॥’ 5कर खे़ङ्हाॽरे़ खे़म्घे़म् मे़न्लाप्तुन्नाङ् कुभाग प्याङ्सिगे़न् इक्ताप्पो याःम्बक् चोःक्से़ मे़बे, कुभा ले़ङ्हङ् चोःक्से़ मे़बे, 6कुभारे़ग कुसे़वारोबाहाॽ मे़दे़म्सुसिआङ् ताप्फे़ःल्लिक् मे़मे़त्तुसिआङ् मे़से़रुसिरो॥
7“खे़न् हाङ्ङिल्ले़ साॽरिक् कुसिक् पोगे़॥ खुने़ॽ थक्सुबाहाॽ पाङ्घुसिआङ् खे़न् मना के़से़प्पाहाॽ के़रे़क् से़प्मा पाङ्घुसि, हे़क्क्याङ् खुनिॽ ये़क्यक्किन् फुत्लुम् हाःन्दुदेःसु पिरुसिरो॥ 8हे़क्क्याङ् हाङ्ङिल्ले़ कुसे़वारोबाहाॽ मे़त्तुसि, ‘मेःक्खिम् साभःङ्जान् यारिप् पोःक्खे़आङ् वाॽ, कर खे़प्मो उःत्छिङ् के़घोबाहाॽ तामा सुम्बोधाबा मे़न्जोःक्ने़न्लो॥ 9हे़क्केःल्ले़ ये़क्यक्कोबा लाम्लाम्मो पेगे़म्मे़ॽआङ् के़दुमुम्सिम्बा के़रे़क् मनाहाॽ उःत्ते़म् तारे़म्सिम्मे़ॽओ॥’
10“खे़ल्ले़चोगुल्ले़ से़वारोबाहाॽ ये़क्यक्को मे़बेआङ् लाम्लाम्मो मे़दुमुसिबा के़रे़क् नुबा नु ताप्फे़ःम्बा मनाहाॽ मेःक्खिम् साभाङ्जाओ मे़उःत्तु मे़दारुसिआङ् खे़प्मोबा युक्नाहाॽ मे़धिम्सुरो॥ 11कर हाङ्ङिन् तरे तुम्से़ सिगाङ् लासे़ल्ले़ खे़प्मो नुबा तेत् मे़न्जाङ्मनाबा मनाधिक् निसुआङ् 12सेःन्दोसु, ‘चुम्मे, खे़ने़ॽ आक्खेलॽरिक् मेःक्खिम् साभाङ्जाओ, मेःक्खिम्मो चाङ्मनाबा नुबा तेत् मेःन्ने के़लासे़बे?’ खे़न् मनाःल्ले़ थेआङ् पाःप्मा मे़सुक्तुन्लो॥
13“हे़क्क्याङ् हाङ्ङिल्ले़ से़वारोबाहाॽ मे़त्तुसि, ‘कन् मनान् ते़म्से़म्मे़ॽआङ् कुलाङ् कुहुक्हाॽ इघेःक्खे़म्मे़ॽ हे़क्क्याङ् लाःक्कात् खादाम्मो लाप्फुःसे़म्मे़ॽओ॥ खे़प्मो हाःप्मान् नु साॽरिक् तुक्खेःल्ले़ हाबोॽ ये़ःङ्मान् पोङ्लो॥’ 14थेआङ्भे़ल्ले़ उःत्छिङ्मा के़घोबाहाॽ यरिक् मे़वाॽ, कर सेःक्सिङ्मा के़घोबाहाॽ कुभारक् मे़वाॽरो॥”
एःङ्याङ् हुङ्माबि मेःम्बि
(मर्कु १२:१३-१७; लुका २०:२०-२६)
15हे़क्क्याङ् फरिसिहाॽ सोरिक् मे़जुप्से़आङ् ये़सुन् आक्खेलॽरिक् पाःन्नो थाःमाबे फाॽआङ् सुक्मा मे़हेःक्तुरो॥ 16फरिसिहाॽरे़ खुनिॽ हुॽसाम्बाहाॽ हे़रोद हाङ्ङिल्ले़ कुमनाहाॽनु ये़सुरो मे़बाङ्घुसि॥ खे़ङ्हाॽरे़ ये़सुन् सेःन्मे़दोसु, “सिक्साम्बे, खे़ने़ॽग से़क्खा पाःन्लक् के़बाःप्पे़न् आनिगे निसुम्बे़रो॥ हे़क्क्याङ् निङ्वाॽफुमाङ्ङिल्ले़ कुलाम्मिन् से़क्खाए के़हुॽरुसिरो॥ खे़ने़ॽ मनाहाॽरे़ खुनिॽ पाःन्नो के़म्बत्ने़न्, हे़क्क्याङ् मनाआङ् के़न्छे़न्दुन्छिन्॥ 17हे़क्केःल्ले़ कन् पाःन्निन् आमे़त्ते़ॽरोमि पयम् हाङ् सिजरे़न् एःङ्याङ् हुङ्मा आनिॽ साम्योथिम्मिल्ले़ आबिॽबि आम्बिने़न्बि?”#२२:१७ खे़ङ्हाॽरे़ ये़सुन् के़साक्पा पाःन्नो थाःमा मे़गोःत्तुर मे़वये़॥ तङ्बे थप्मा के़रे़क् मनाहाॽरे़ रोमि पयम् हाङ् सिजरे़न् एःङ्याङ् हुङ्मा के़बोङ्बा वये़, कर यहुदि साम्योथिम्मो वेॽ लाजेॽओबा मनाहाॽ एःङ्याङ् हुङ्मा मे़न्नुॽमनाबा वये़॥
18कर ये़सुरे़ खे़ङ्हाॽरे़ खुनिॽ फे़न् निङ्वाॽइन् निङ्वाॽ खोसुआङ् मे़त्तुसि, “खिनिॽ निङ्वाॽ के़जिःप्पासे, थेआङ् अक्खेलॽरिक् इङ्गाॽ पाःन्नो ते़म्मा निङ्वाॽ के़इःत्तुम्बाबे? 19एःङ्याङ् हुङ्मा के़बोङ्बा रोमि याङ्इत्छिन् कत्ना फे़त्ते़म्मे़ॽ॥” खे़ङ्हाॽरे़ खुने़ॽओ याङ्इत्छिन् मे़दारुआङ् 20ये़सुरे़ खे़ङ्हाॽ सेःन्दोसुसि, “कप्मो हाःत्ले़ कुइत्छाप् नु कुबाःन्साप् पप्पे?” 21खे़ङ्हाॽरे़ नोगप् मे़बिरु, “सिजरे़ल्ले़न् पत्लो॥”
हे़क्क्याङ् ये़सुरे़ खे़ङ्हाॽ मे़त्तुसि, “सिजरले़ कुबाःन्हाॽ सिजरे़न् पिरे़म्मे़ॽ, हे़क्क्याङ् निङ्वाॽफुमाङ्ङिल्ले़ कुबाःन्हाॽ निङ्वाॽफुमाङ्ङिन्ने पिरे़म्मे़ॽओ॥” 22खे़ङ्हाॽरे़ कन् नोगप्पिन् मे़घे़प्सुआङ् खुनिॽ निङ्वाॽ मये़रो॥ खे़ल्ले़चोगुल्ले़ खे़ङ्हाॽरे़ खुने़ॽ खे़प्मोए मे़ले़रुमे़धआङ् मे़बेरो॥
सिमे़न्लाम् याम्मो हिङ्मा
(मर्कु १२:१८-२७; लुका २०:२७-४०)
23बा खे़न् ये़न्नो सिमे़न्लाम् याम्मो हिङ्मन् होप् लॽरिक् नसान् के़जोःक्पा सदुकिहाॽ ये़सुरो मे़द्ये़आङ् सेःन्मे़दोसु, 24“सिक्साम्बे, मोसारे़ साम्योथिम्मो अक्खेलॽरिक् साप्तुआङ् पत्, ‘आत्तिल्ले़ कुम्भुॽइन् कुस्साकुए मे़न्वाॽए सिःॽ, खे़ल्ले़ कुन्साॽरे़ मेमेदुमा कुन्ने़ॽद्रेःन्नु मेःक्खिम् चोःक्माए पोङ्॥ हे़क्क्याङ् कुम्भुॽरे़ कुलागि सागप्मा पोङ्लो॥’#साम्यो इङ् २५:५-६ 25आल्ल नुसि फुॽनुसाॽहाॽ मे़वये़॥ तुम्बाल्ले़ मेःक्खिम् चोगुआङ् कुस्साकुए मे़न्वाॽए स्ये़, हे़क्क्याङ् कुमेःत्तिन्नु कुन्साॽरे़ मेःक्खिम् चोगु॥ 26हे़क्केलॽरिक् सरुम्बा, याङ्सरुम्बा नु फोॽबा थारिक्ले़ खे़न् मेमेदुमान्नु मेःक्खिम् मे़जोगु, कर तुम्बान् हे़क्केए खुनिॽ सा-ए मे़न्वाॽए मे़स्ये़रो॥ 27आल्ल कुनुप्मो खे़न् मे़न्छुमाॽइन्नाङ् स्ये़रो॥ 28आल्ल खे़ङ्हाॽ सिमे़न्लाम् याम्मो मे़हिङ्ङिल्ले़ खे़न् आत्तिल्ले़ कुमेत् पोङ्बाबे? थेआङ्भे़ल्ले़ खे़न् मे़न्छुमाॽइन्नु नुसि फुॽनुसाॽ के़रे़क्ले़ मेःक्खिम् मे़जोगुआङ् मे़वये़रो॥”
29ये़सुरे़ नोगप् पिरुसि, “खिनिॽग पिर्बेःम्बो के़ध्ये़ॽइआङ् के़वयिॽरो, थेआङ्भे़ल्ले़ साम्योसाप्लान् कुसिङ् मे़न्निःत्ते के़वयि, हे़क्क्याङ् निङ्वाॽफुमाङ्ङिल्ले़ कुमुक्साम्मिन्नाङ् कुसिङ् मे़न्निःत्ते के़वयिॽरो॥ 30थेआङ्भे़ल्ले़ सिमे़न्लाम् याम्मो मे़हिङ्ङिल्ले़ग मनाहाॽ मेःक्खिम् मे़न्जोःक्ने़न्लो, कर खे़ङ्हाॽग साङ्ग्राम्पेदाङ्ङोबा माङ्लाइङ्बा कुइसिःक्ने़ मे़बोङ्लो॥ 31कर सिमे़न्लाम् याम्मो हिङ्माल्ले़ कुयाःम्बेओग निङ्वाॽफुमाङ्ङिल्ले़ साम्योसाप्लाओ अक्खेलॽरिक् पाःत्तुबान् मे़न्निःत्ते के़वयिॽबि? 32‘इङ्गाॽग अब्राहाम, इसहाक नु याकुबरे़ खुनिॽ निङ्वाॽफुमाङ्आरो॥’#ला ३:६ खे़ल्ले़चोगुल्ले़ खुने़ॽग कुसिवे़त्हाॽरे़न् मेःन्, कर कुहिङ्वे़त्हाॽरे़ खुनिॽ निङ्वाॽफुमाङ्लो॥”
33खे़न् के़जुम्बा मनाहाॽरे़ कन् पाःन्निन् मे़घे़प्सुल्ले़ कुनिसाम्मो खुनिॽ निङ्वाॽ मये़रो॥
के़रे़क्नुःल्ले़ के़ये़क्पा इङ्जाङ्
(मर्कु १२:२८-३४; लुका १०:२५-२८)
34ये़सुरे़ सदुकिहाॽरे़ खुनिॽ मुरान् सुबु पिरुसि के़लॽबा पाःन्निन् फरिसिहाॽरे़ मे़घे़प्सु हे़क्क्याङ् इङ्मे़दङ्सिङ्ङाङ् ये़सुरो मे़द्ये़रो॥ 35खे़ङ्हाॽओ साम्योसाप्ला साॽरिक् के़ले़बाधिक्ले़ ये़सुन् अक्खेलॽरिक् कुनिङ्वाॽ साॽरुर सेःन्लाप्तु, 36“सिक्साम्बे, साम्योथिम्मो इःप्मा नाःप्माए के़बोङ्बा के़रे़क्नुःल्ले़ यम्बा इङ्जाङ्ङिन् आत्तिङ्ग?”
37ये़सुरे़ नोगप् पिरु, “‘के़न्दाङ्बा निङ्वाॽफुमाङ्ङिन् के़रे़क् के़सिक्लुङ्माल्ले़, के़रे़क् के़सक्मा साम्मिल्ले़, हे़क्क्याङ् के़रे़क् के़निङ्वाॽइल्ले़ मिःम्जि मे़त्ते़ॽओ॥’#साम्यो इङ् ६:५ 38कङ्ग थिक्सिगेक्पा नु के़रे़क्नुःल्ले़ के़ये़क्पा इङ्जाङ्लो॥ 39हे़क्केलॽरिक् निसिगेक्पा के़ये़क्पा इङ्जाङ्ङिङ्ग बा कन्लो, ‘आप्फेक् लुङ्माॽ के़दुक्सिङ्बा कुइसिःक्के के़बाङ्भेॽसाबाहाॽआङ् लुङ्माॽ तुक्ते़से़ॽओ॥’#ले़बि १९:१८
40“के़रे़क् साम्योथिम् नु माङ्निङ्वाॽपान् के़बाःप्पाहाॽरे़ खुनिॽ निसाम्मिन् कन् ने़त्छि इङ्जाङ्लाम् त्ये़बारो॥”
ख्रिस्ते़न् हाःत्ले़ कुस्साबे?
(मर्कु १२:३५-३७; लुका २०:४१-४४)
41हे़क्क्याङ् फरिसिहाॽ थिक्दे़न्नो सोरिक् मे़जुप्से़आङ् मे़वये़ल्ले़ ये़सुरे़ खे़ङ्हाॽ सेःन्दोसुसि, 42“निङ्वाॽफुमाङ्ङिल्ले़ सेःन्दुबा ख्रिस्तरे़ कुयाःम्बेओ खिनिॽ थे के़इःत्तुम्बे? खुने़ॽ हाःत्ले़ कुस्सा फाॽआङ् खिनिॽ निङ्वाॽ के़इःत्तुम्बे?”
खे़ङ्हाॽरे़ नोगप् मे़बिरु, “खुने़ॽग दाउद हाङ्ङिल्ले़ कुस्सारो॥”
43ये़सुरे़ खे़ङ्हाॽ याम्मो सेःन्दोसुसि, “हे़क्केने़ फाॽग्र सेसेमाङ्लाम् दाउदरे़ आक्खेलॽरिक् आदाङ्बे फाॽआङ् मे़त्तुबाबे? थेआङ्भे़ल्ले़ दाउद हाङ्ङिल्ले़ निङ्वाॽफु साम्लोसुम्मो पाःत्तु,
44“‘यहवे दाङ्बाल्ले़ इङ्गाॽ आन्दाङ्बान् अक्खे मे़त्तु,
के़निङ्मिहाॽ के़युक्को इङ्गाॽ मे़न्दाःत्छिङ्ङे थारिक्
आजुप्साङ् ले़प्माङ् खे़ने़ॽ युङे़ॽओ॥’#निङ् सुम् ११०:१
45“दाउद हाङ्ङिल्ले़ए खुने़ॽ आदाङ्बे लॽरिक् मे़त्तुने़ फाॽग्र आक्खेलॽरिक् ख्रिस्ते़न् दाउदरे़ कुस्सा पोङ्बाबे?” 46आत्तिन्हाॽरे़आङ् पाःन्सुत्लाधिक् नोगप् पिमा मे़न्छुक्तुन्, हे़क्क्याङ् खे़न् ये़न्नाङ्धो आत्तिन्हाॽरे़आङ् खुने़ॽ पान् सेःन्दोमा आःन्छिङ्माआङ् मे़न्छुक्तुन्लो॥
Currently Selected:
मत्ति 22: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
