मत्ति 19
19
मेःक्खिम्ले़न् पान्
(मर्कु १०:१-१२)
1ये़सुरे़ कन् पाःन्हाॽ पाःत्तु सुरुआङ् गालिल थुम्मोलाम् यर्दन यङ्घङ्ङिल्ले़ नाधाःम्बिबा यहुदिया थुम्मो पेरो॥ 2यरिक् मनाहाॽरे़ खुने़ॽ मे़दिम्दु, हे़क्क्याङ् खे़ङ्हाॽ वेःन्दुसिरो॥ 3कुभा फरिसिहाॽ मे़द्ये़आङ् खुने़ॽ कुनिङ्वाॽ साॽमा फाॽआङ् पान् मे़गे़सु, “थेआङ् याःम्बक् मे़म्भेःन्ने मनाःल्ले़ कुमेःत्तिन् नाॽमा साम्योथिम्मिल्ले़ पिरुबि मेःम्बि?”
4ये़सुरे़ मे़त्तुसि, “मे़ःम्बे़! साम्योसाप्लाओ के़बप्पा पाःन्निन् खिनिॽ मे़न्निःत्ते के़वयिॽबि? चइःत्दाङ्बाल्ले़ कुहेःक्सिङ्मोए ‘खे़ङ्हाॽ ये़म्बित्छाॽ नु मे़न्छुमाॽ चोगुसिरो॥’#तोलिङ् १:२७, ५:२ 5हे़क्क्याङ् ‘खे़ल्ले़चोगुल्ले़ ये़म्बित्छाॽइल्ले़ कुम्बा नु कुम्मासि ले़रुसिआङ् कुमेःत्तिन्नु तङ्लो, हे़क्क्याङ् खे़ङ्हाॽ लत्छा थक् पोङ्सिरो॥’#१९:५ तोलिङ् २:२४, ग्रिक पाःन्दाङ्ङो “थिक् थक् पोङ्सिरो॥” 6आल्ल खे़ङ्हाॽग ने़प्फुसि मेःन्, कर लत्छा थक्सिरो॥ खे़ल्ले़चोगुल्ले़ निङ्वाॽफुमाङ्ङिल्ले़ लत्छा थक् चोगुसिबाहाॽ मे़न्छाम् याप्मिरे़ से़म्मासि मे़नुॽने़न्लो॥”
7खे़ङ्हाॽरे़ सेःन्मे़दोसु, “हे़क्केने़ फाॽग्र थेआङ् मोसाःल्ले़ ‘ये़म्बित्छाॽइल्ले़ कुमेःत्तिन् इङ्गाॽ नाॽने़बारो फाॽआङ् साप्ला साप्तुआङ् पाङ्मादेमा सुक्तुॽ’ लॽरिक् साप्तुबाबे?”
8ये़सुरे़ नोगप् पिरुसि, “खिनिॽ पान् मे़ङ्घे़म्मनाबा के़जोगिबाल्ले़ चोगुल्ले़ मोसारे़ खिनिॽ मेःत्हाॽ नाॽमा के़सुक्तुम्सिम् फाॽआङ् साप्तुबारो॥ कर कुहेःक्सिङ्मोग अक्तङ्बा होःप्ते़रो॥ 9इङ्गाॽ मे़त्निङ्, आत्तिन् ये़म्बित्छाॽइल्ले़ कुमेःत्तिन् वेॽहाॽनु मे़न्लाम्मे नाॽरुआङ् वेॽ मे़न्छुमाॽइन्नु मेःक्खिम् चोगु, खे़ल्ले़आङ् चाराम्मा याःम्बक्के चोगुॽरो॥” ((हे़क्क्याङ् आत्तिल्ले़ खे़न् नाॽरुमा मे़न्छुमाॽइन्नु मेःक्खिम् चोगुॽ खे़ल्ले़आङ् याम्बोःप्मा याःम्बक्के चोगुॽरो॥))
10हे़क्केःल्ले़ कुहुॽसाम्बाहाॽरे़ खुने़ॽ मे़मे़त्तु, “मेःत् ये़म्बाॽ लुम्मो बा हे़क्केरक् पोङ्ने़ फाॽग्र मेःक्खिम् मे़न्जोःक्माए नुबारो॥”
11ये़सुरे़ नोगप् पिरुसि, “के़रे़क्ले़ग कन् पाःन्हाॽ ताःक्मा मे़न्छुक्तुन्, कर आत्तिल्ले़ निङ्वाॽफुमाङ्लाम् खोसुॽ, खे़ल्ले़रक् ताःक्मा सुक्तुॽ॥ 12मेःक्खिम् मे़न्जोःक्मना यरिक् पन्ये़म्हाॽ वाॽरो॥ कुभाग सावाःन्छिङ्मानुधोए सिङ्गारु मे़वाॽरो, वेॽहाॽ मनाहाॽरे़ सिङ्गारु मे़जोगुसि, हे़क्क्याङ् कुभाग साङ्ग्राम्पेदाङ्बा हाङ्जुम्मो माङ्से़वा याःम्बक् चोःक्मा फाॽआङ् मेःक्खिम् मे़न्जोःक्ने़न्लो॥ आत्तिल्ले़ ताःक्मा सुक्तुॽ खे़ल्ले़ए ताःक्तुर॥”
ये़सुन् नु हिन्जाॽबित्छाहाॽ
(मर्कु १०:१३-१६; लुका १८:१५-१७)
13थिक्ये़न् ये़सुरे़ हुक् ने़स्सुआङ् तुवा चोगु पिरुसिर फाॽआङ् मनाहाॽरे़ हिन्जाॽबित्छाहाॽ मे़दारुसि॥ कर कुहुॽसाम्बाहाॽरे़ खे़न् हिन्जाॽबित्छा के़दाःप्पाहाॽ मे़भे़ःक्तुसि॥
14कर ये़सुरे़ खे़ङ्हाॽ मे़त्तुसि, “हिन्जाॽबित्छाहाॽ इङ्गाॽओ तामा फाःक्ते़म्सिम्मे़ॽओ, खे़ङ्हाॽ मे़साक्ते़म्सिम्मिन्ने़ॽओ, थेआङ्भे़ल्ले़ साङ्ग्राम्पेदाङ्बा हाङ्जुम्मिङ्ग कन् हिन्जाॽबित्छा हे़क्तङ्बाहाॽरे़न्नेरो॥” 15हे़क्क्याङ् खे़ङ्हाॽ सम्दाङ् हुक् ने़स्सुर मुॽइसाम् पिरुसिआङ् खे़प्मोलाम् थासिङ्लो॥
याङ्साकुन्धेसाबा मना
(मर्कु १०:१७-३१; लुका १८:१८-३०)
16आल्ल मनाधिक् ये़सुरो फे़रे़आङ् सेःन्दोसु, “सिक्साम्बे, आक्तङ्बा नुबा याःम्बक् चोगुङ्ङिल्ले़ मे़न्नुप्मनाबा हिङ्मन् खोसुङ्बे?”
17ये़सुरे़ नोगप् पिरु, “नुबा याःम्बक्किल्ले़ कुयाःम्बेओ थेआङ् सेःन्गे़दोआबाबे? के़नुॽबाग निङ्वाॽफुमाङ्ङिन्लक् वाॽरो॥ कर खे़ने़ॽ मे़न्नुप्मनाबा हिङ्मन् खोमा निङ्वाॽ के़जोगुने़ फाॽग्र साम्योथिम् इङ्जाङ्हाॽ इःत्ते़ नाःत्ते़ॽओ॥”
18खे़न् मनाःल्ले़ सेःन्दोसु, “आत्तिन् साम्योइङ्जाङ्ङिन् इःत्तुङ् नाःत्तुङ्बाबे?”
हे़क्क्याङ् ये़सुरे़ मे़त्तु, “मनासे़प्मा मे़नुॽने़न्, चाराम्मा याःम्बक् चोःक्मा मे़नुॽने़न्, खुःम्मा मे़नुॽने़न्, इङ्ले़क् पाःप्मा मे़नुॽने़न्, 19के़म्बा के़म्मासि इङ्धाङ् पिरे़से़ॽ॥ हे़क्क्याङ् आप्फेक् लुङ्माॽ के़दुक्सिङ्बा कुइसिःक्के के़बाङ्भेॽसाबाहाॽआङ् लुङ्माॽ तुक्ते़से़ॽओ॥”#ला २०:१२-१६; ले़बि १९:१८; साम्यो इङ् ५:१६-२०
20खे़न् थाङ्बे़न्निल्ले़ मे़त्तु, “कन्हाॽ के़रे़क् इःत्तुङ्-नाःत्तुङ्ङाङ्ङे वाॽआरो॥ आल्लसाङ् याम्मो थे चोःक्माओ सुःन्दाङ्बे?”
21ये़सुरे़ मे़त्तु, “खे़ने़ॽ से़क्खाए कुलिङ्दो के़प्मा निङ्वाॽ के़जोगुने़ फाॽग्र पेगे़ॽआङ् के़गत्तुबान् के़रे़क् सङ्घे़देसे़ॽ हे़क्क्याङ् याङ्गे़साॽबाहाॽ पिरे़से़ॽओ॥ हे़क्केलॽरिक् साङ्ग्राम्पेदाङ्ङो याङ्साकुन्धे के़घोसुॽरो॥ हे़क्क्याङ् फे़रे़ॽआङ् इङ्गाॽ तिम्दाङ्ङे़ॽओ॥”
22खे़न् थाङ्बे़न्निल्ले़ कन् पाःन्निन् खे़प्सुआङ् कुनिङ्वाॽ तुगे़र खे़प्मोलाम् पेरो, थेआङ्भे़ल्ले़ खे़ल्ले़ग यरिक् याङ्साकुन्धे कत्तुरो॥
23हे़क्क्याङ् ये़सुरे़ कुहुॽसाम्बाहाॽ मे़त्तुसि, “इङ्गाॽ से़क्खाए मे़त्निङ्, याङ्साकुन्धेसाबाहाॽ साङ्ग्राम्पेदाङ्बा हाङ्जुम्मो लाःप्मा साॽरिक् साक्लो॥ 24याम्मोआङ् खिनिॽ मे़त्निङ्, याङ्साकुन्धेसाबे़न् निङ्वाॽफुहाङ्जुम्मो लाःप्मानुःल्ले़ उमेःन् सम्मेःत्तिल्ले़ कुहङ्ङो लाःप्मा उसुरु पोङ्लो॥”
25हे़क्क्याङ् हुॽसाम्बाहाॽरे़ कन् मे़घे़प्सुआङ् साॽरिक् खुनिॽ निङ्वाॽ मये़र सेःन्मे़दोसु, “हे़क्केःल्ले़ हात् ताङ्से़ःप्मा सुक्पाबे?”
26ये़सुरे़ खे़ङ्हाॽ ओमे़त्तुसिर मे़त्तुसि, “मे़न्छाम् याप्मिरे़ लागि कन् पोङ्मा मे़न्छुक्मनाबा चोःक्साङ् निङ्वाॽफुमाङ्ङिल्ले़ के़रे़क् पाःन्हाॽ चोःक्मा सुक्तुॽरो॥”
27पत्रुसरे़ नोगप् पिरु, “दाङ्बे, आनिगे़ग के़रे़क् पाःन्हाॽ ले़रुम्बे़, हे़क्क्याङ् खे़ने़ॽ तिम्मासिगे़आङ् वयिगे़रो॥ आनिगे़ग थे खोसुम्बे़बाबे?” 28हे़क्केःल्ले़ ये़सुरे़ खे़ङ्हाॽ मे़त्तुसि, “इङ्गाॽ से़क्खाए मे़त्निङ्, इङ्गाॽ मे़न्छाम्सान् के़दाबा कुसङ् हाङ्जुम्मो मिमिदिङ्गे़न् हाङ्युक्नाओ युङ्ङारो॥ खे़न् ये़म्मो खिनिॽ इङ्गाॽ याप्मि के़दिम्बाहाॽआङ् थिक्-ने़त् (१२) हाङ्युक्नाओ के़युङिआङ् इस्राइलबा थिक्-ने़त् सुवाङ्हाॽ सम्दाङ् हाङ् के़जोगिॽरो॥ 29आत्तिल्ले़ आलागि हिम्धाःङ्हाॽ, प्याङ्सिगे़न् इक्ताप्हाॽ, ने़ॽनुसाॽहाॽ, फुॽनुसाॽहाॽ, पाः माहाॽ, इग्र हिन्जाॽबित्छाहाॽ ले़रुसिआङ् वाॽ, खे़ल्ले़ग किप्थिक् ले़ङ्नुःल्ले़आङ् यरिक् खोसुॽ, हे़क्क्याङ् मे़न्नुप्मनाबा हिङ्मन् खोसुॽरो॥ 30कर आल्लो तगि के़वाॽबा यरिक् मनाहाॽ एगाङ् मे़बोङ्लो, हे़क्क्याङ् आल्लो एगाङ् के़वाॽबा यरिक् मनाहाॽ तगाङ् मे़बोङ्लो॥”
Currently Selected:
मत्ति 19: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
