मत्ति 11
11
ये़सुन् नु बप्तिस्मा के़बिबा युहुन्नान्
(लुका ७:१८-२३)
1ये़सुरे़ थिक्-ने़त् कुहुॽसाम्बाहाॽ हे़क्केलॽरिक् इङ्जाङ् पिरु सुरुसिआङ् खे़प्मोलाम् खुने़ॽ गालिल खिरिबा पाङ्जुम् हे़ङ्घात्ति निसाम् हुॽसे़ नु सुनाइङ् से़से़ थासिङ्लो॥
2खे़न् ये़म्मो पुङ्लाहिम्मो साक्ते़आङ् यागे़बा बप्तिस्मा के़बिबा युहुन्नाःल्ले़ निङ्वाॽफुमाङ्ङिल्ले़ सेःन्दुबा ख्रिस्तरे़ चोगुबा याःम्बक्हाॽ खे़प्सुआङ् कुहुॽसाम्बाहाॽ ये़सुरो पाङ्घुसि॥ 3खे़ङ्हाॽ मे़बेआङ् ये़सुन् सेःन्मे़दोसु, “के़दाबार के़बप्पा ख्रिस्ते़न् बा खे़ने़ॽएने़बि, इ वेॽसमा हाङ्घुम्बे़बाबि?”
4ये़सुरे़ नोगप् पिरुसि, “नुःक्खे़म् पेगे़म्मे़ॽआङ् के़निसुम्बा नु के़घे़प्सुम्बा पाःन्हाॽ युहुन्नान् मे़त्ते़म्मे़ॽओ— 5मिक्फःम्बाहाॽरे़ निमा मे़सुक्तुॽ, लाङ्सक्पाहाॽ लाङ्मे़घेःक्, लोगेॽ तुक्माल्ले़ तरुसिबाहाॽ मे़नुॽ, नाधाक्पाहाॽरे़ खे़म्मा मे़सुक्तुॽ, के़सिबाहाॽ कुहिङ्वे़त् मे़बोङ्, हे़क्क्याङ् याङ्गे़साॽबाहाॽरे़ सुनाइङ् मे़घे़प्सुॽरो॥#यसै ३५:५-६, ६१:१ 6इङ्गाॽ याप्मि चप्चि मे़न्जोःक्मना मनान् मुॽइसाबारो॥”
7बप्तिस्मा के़बिबा युहुन्नाःल्ले़ कुहुॽसाम्बाहाॽ मे़बेर मे़बत्छे़ल्ले़ ये़सुरे़ खे़प्मो के़वाॽबा मनाहाॽ युहुन्नारे़ कुयाःम्बेओ अक्खे मे़त्तुसि, “ये़ःङ्घादे़न्नो थेःन् ओमत्छे़ के़बेगिबाबे? सुरित् केजङ्ङिल्ले़ वाःन्जो-वाःन्जो लॽरिक् वाःन्दुबा थिङ्ने़त् हे़क्तङ्बा मनाःन्बि? 8मेःन्ने फाॽग्र थेःन् ओमत्छे़ के़बेगिबाबे? नुःब्नुबा चाङ्देःत् के़जाङ्बा मनाःन्बि? मेःन्, हे़क्तङ्बा मनाःङ्ग हाङ्हिम्मोरक् वाॽरो॥ 9हे़क्केःल्ले़ थेःन् ओमत्छे़ खिनिॽ के़बेगि? माङ्निङ्वाॽपान् के़बाःप्पान्बि? ओरो, से़क्खाए इङ्गाॽ मे़त्निङ्, खुने़ॽग माङ्निङ्वाॽपान् के़बाःप्पानुःल्ले़आङ् यम्बारो॥ 10साम्योसाप्लाओ युहुन्नारे़ कुयाःम्बेओ निङ्वाॽफुमाङ्ङिल्ले़ अक्खेलॽरिक् पाःत्तुआङ् पत्,
“‘इङ्गाॽ आइङ्साबान् के़लाम्मिन् यारिप् चोःक्से़ खे़ने़ॽनुःल्ले़ तगि पाङ्घुङ्लो॥’#मला ३:१
11“इङ्गाॽ से़क्खाए मे़त्निङ्, बप्तिस्मा के़बिबा युहुन्नाःन्नुःल्ले़ वेॽ यम्बा हाःत्ताङ् सामे़न्वाःन्छिङ्ङे वाॽरो॥ हे़क्केसाङ् साङ्ग्राम्पेदाङ्बा हाङ्जुम्मो चुबे़त्छिक्लक् के़ये़क्पा मनान् खुने़ॽनुःल्ले़ यम्बारो॥ 12युहुन्नारे़ इङ्भन् चोःक्मा हेःक्तुआङ्धो आइन् थारिक् साङ्ग्राम्पेदाङ्बा हाङ्जुम्मिन् लुबुबुना तगि पोर पत्, हे़क्क्याङ् कुदक्ले़ङ्वाओ के़बोःक्पाहाॽरे़ साके़ल्ले़क्काङ् अप्मा तम्सिङ् मे़जोगुर मे़बत्॥ 13युहुन्नारे़ कुये़म्मो थारिक् मोसारे़ साप्तुबा साम्योथिम्मिल्ले़ हे़क्क्याङ् के़रे़क् माङ्निङ्वाॽपान् के़बाःप्पाहाॽरे़ ताःन्दि के़दाबार के़बप्पा निङ्वाॽफुहाङ्जुम्मिल्ले़ कुयाःम्बेओए मे़बाःत्तुआङ् वये़रो॥ 14हे़क्क्याङ् खिनिॽ नसान् चोःक्मा के़दे़न्दिॽने़ फाॽग्र खे़ङ्हाॽरे़ ता लॽरिक् मे़बाःत्तुबा एलियाःङ्ग युहुन्नाःन्नेरो॥#मला ४:५ 15नुःरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ!#११:१५ ग्रिक पाःन्दाङ्ङो “हाःत्ले़ खे़म्मा ने़क्खोॽ कत्तुॽ खे़ल्ले़ हाराॽ खे़प्सुनिरो॥”
16“कोये़म्बा कन् मनाहाॽ थेःन्नु तङ्घुङ्सिङ्बाबे? कन् मनाहाॽग पाङ्जुम्मो के़वाॽबा हिन्जाॽहाॽ कुइसिक् मे़जोक्, हे़क्क्याङ् खे़ङ्हाॽरे़ वेॽ हिन्जाॽहाॽ अक्खे मे़मे़त्तुसिॽ,
17“‘खिनिॽ लागि आनिगे के हिप्मना, कर खिनिॽ के़न्लाःक्खिन्,
हे़क्क्याङ् आनिगे मे़रिङ् थक्मना, कर खिनिॽ के़न्हाबिन्॥’
18“हे़क्केलॽरिक् बप्तिस्मा के़बिबा युहुन्नाःङ्ग मे़न्जा मे़न्धुङ्ङे त्ये़साङ् खिनिॽ खे़ङ्ग फे़न्साम्मिल्ले़ युक्तुआङ् वाॽ लॽरिक् के़मे़त्तुम्॥ 19इङ्गाॽ मे़न्छाम्साःङ्ग चाङ्ल थुङुङ्ल त्याङ्, हे़क्क्याङ् खे़ङ्हाॽरे़ अक्खे मे़बाःत्तु, ‘खे़ङ्ग तःक्थे़ःक्के नु थिःमसाङ्लो, एःङ्याङ् के़भोङ्बाहाॽ नु लायोबाहाॽरे़ खुनिॽ चुम्लो॥’ कर निङ्वाॽफु सिक्कुम्दिङ् निङ्वाॽइङ्ग कुयाःम्बक्कोलाम् खे़न् निस्से चोक् फाॽआङ् निदे़त्लो॥”
लायोलाम् मे़न्नुःङ्मनाबा ये़क्यक्
(लुका १०:१३-१५)
20हे़क्क्याङ् ये़सुरे़ तगि यरिक्तङ्बा निङ्वाॽ के़माबा याःम्बक्हाॽ चोगुबा ये़क्यक्हाॽ फे़ःक्मा हेःक्तुसि, थेआङ्भे़ल्ले़ खे़प्मोबा मनाहाॽ खुनिॽ लायोलाम् मे़न्हिन्दे़न्लो॥ 21“खोराजिन नु बे़थसेदा पाङ्जुम्मोबा मनासे, चिःत्ते़आङ्लक् स्ये़रो! खिनिॽ पाङ्जुम्मो पोःक्खे़बा निङ्वाॽ के़माबा याःम्बक्हाॽ थिम्मे़न्दङ् सुवाङ्हाॽरे़ खुनिॽ ये़क्यक् तायर नु सिदोन्नो#११:२१ ताएर नु सिदोन्नो—उनाहुरिओ कन् ये़क्यक्हाॽ यहुदिहाॽरे़न् निङ्मि वये़ (योए ३:४-८) पोःक्खे़आङ् वये़ल्ले़ग उन्छोःन्छा खे़प्मोबा मनाहाॽ लायोलाम् मे़हिन्दे़बारो फाॽआङ् सगितेत् #११:२१ सगितेत्—मनाहाॽरे़ आबाङे खुनिॽ लायोलाम् मे़हिन्दे़बा हे़क्क्याङ् मे़रिङ् मे़धक्ते़बा ओसेःन्धाक्से़ सगितेत् मे़जाक्खुर खाप्पु मे़जुःत्छिङ्॥ मे़जाक्सिङ्ङाङ् खाप्पु मे़जुःत्छिङ्बामे़न्॥ 22कर इङ्गाॽ से़क्खाए मे़त्निङ्, खासे़न् ये़न्नोग खिनिॽ तुक्खेन्नुःल्ले़ तायर नु सिदोनबा मनाहाॽरे़ खुनिॽ तुक्खेन् थम्मा सुक्के़दे़प्पा पोङ्लो॥ 23हे़क्क्याङ् खिनिॽ कपर्नहुम पाङ्जुम्मोबा मनासे, साङ्ग्राम्पेदाङ् थारिक् पेगिगे़ॽ के़लॽरिबि? मेःन्लो! खिनिॽग खे़मायङ्सङ् थारिक् के़ध्ये़ॽइरो॥ थेआङ्भे़ल्ले़ खिनिॽ पाङ्जुम्मो चोगे़बा हे़क्तङ्बा निङ्वाॽ के़माबा याःम्बक्हाॽ सदोम ये़क्यक्को चोगे़आङ् वये़ल्ले़ग खे़न् ये़क्यक्किङ्ग आइन् थारिक् ने़स्से़बामे़न्! 24कर इङ्गाॽ मे़त्निङ्, खासे़न्निल्ले़ ये़न्नोग खे़ने़ॽनुःल्ले़ सादोमरे़ कुदुक्खेःन् थम्मा सुक्के़दे़प्पा पोङ्लो॥”
ये़सुरे़ के़नाबाहाॽ नाःम्सिङ् पिरुसिॽ
(लुका १०:२१-२२)
25खे़न् ये़म्मो ये़सुरे़ तुवा चोगु, “आम्बे, साङ्ग्राम्पेदाङ् नु इक्सादिङ् खाम्बेःक्माल्ले़ दाङ्बाए, इङ्गाॽ नोगे़न् पिने़, थेआङ्भे़ल्ले़ खे़ने़ॽग सिक्कुम्साबाहाॽ हे़क्क्याङ् चाःप्पाहाॽनु के़माॽरुबा पाःन्निन् हिन्जाॽ हे़क्तङ्बाहाॽ ओसेःन्गे़धाक्तुसिरो॥ 26आम्बे, बा अक्खे चोःक्माए खे़ने़ॽ के़सिराॽ थाङे़रो॥”
27हे़क्क्याङ् ये़सुरे़ मनाहाॽ मे़त्तुसि, “आम्बारे़ के़रे़क् पाःन्हाॽ पिराङ्ङाङ् वाॽरो॥ कुस्सान् कुम्बारे़रक् कुसिङ्निःत्तुॽ, वेॽहाॽरे़ कुसिङ् मे़न्निःत्तुन्लो॥ हे़क्क्याङ् पानुदिङ् पान् कुसिङ् मे़निःत्तुर फाॽआङ् कुस्साःल्ले़ ओसेःन्धाक्तुसिबा मनाहाॽरे़रक् कुसिङ् मे़निःत्तुॽरो॥
28“के़रे़क् के़लिःप्पा कक्किल्ले़#११:२८ के़लिःप्पा कक् फाॽइन् यहुदि साम्योथिम् इङ्जाङ् नु फरिसिहाॽरे़ आबाङे मे़जोगुबा के़साक्पा साम्योथिम्हाॽरो॥ के़गे़ःप्तिबा नु के़नाबासे, इङ्गाॽओ त्ये़म्मे़ॽओ, इङ्गाॽ नाःम्सिङ्मा पिनिङ्लो॥ 29इङ्गाॽ आजिघे़ःप्पिन् कुये़म्मे़ॽआङ् इङ्गाॽनु हुॽआसिम्मे़ॽओ॥ थेआङ्भे़ल्ले़ इङ्गाॽग लुम्लुम्बा नु चुङ्जिगे़म्बा चोःक्कारो, हे़क्क्याङ् खिनिॽ याम्साम्मिल्ले़ नाःम्सिङ्मा खोसुॽरो॥ 30थेआङ्भे़ल्ले़ इङ्गाॽ आजिघे़ःप्पिन् उसुरुबा नु कुमा पाङ्निङ्बा आगक्किन् याङ्याङ्बा चोक्लो॥”
Currently Selected:
मत्ति 11: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
