होसे 7
7
इस्राइलरे़ फे़न्याःम्बक् चोःक्मा कुसिराॽथाङ्
1“आङ्गाॽ इस्राइलरे़ कुयाङ्घेःक्किन् वेःन्दुङ्ङिल्ले़,
एफ्राइमरे़ कुलायोहाॽ ओसेःन्धाङ् पोङ्लो
हे़क्क्याङ् सामरियाःल्ले़ कुभे़न्याःम्बक्हाॽ निधाःप्लो॥
खे़ङ्हाॽ इङ्ले़क्स्वाबा याःम्बक् मे़जोक्लो
के़घुःप्पाहाॽ हिम्हाॽओ मे़लाःत्लो,
फाःन्दाहाॽरे़ माराम्हाॽओ मनाहाॽ मे़नाप्तुसिरो॥
2कर खे़ङ्हाॽरे़ खुन्छिॽ के़रे़क् फे़न्याःम्बक्हाॽ इःत्तुङ्ॽ
के़लॽबा पाःन्निन् खे़ङ्हाॽरे़ निङ्वाॽ मे़न्इःत्तुन्लो॥
खुन्छिॽ आप्फेक् लायोहाॽरे़ खे़ङ्हाॽ सुःप्तुसिआङ् वाॽरो
हे़क्क्याङ् खे़न् लायोहाॽ आङ्गाॽ आदगि वाॽरो॥”
हाङ्हिम्मो चे़म्भन्
3“खे़ङ्हाॽरे़ खुन्छिॽ फे़न्याःम्बक्किल्ले़ हाङ्ङिन् कुनिङ्वाॽ मे़दासुरो
खुन्छिॽ इङ्ले़क्किल्ले़ लाम्लोबाहाॽ निङ्वाॽ तासु पिरुसिरो॥
4खे़ङ्हाॽ के़रे़क् याम्बोःप्मा याःम्बक् के़जोःक्पासिरो,
खे़ङ्हाॽ खरे़ःङ् ले़ःङ्मा मिदःत् हे़क्तङ्बा मे़जोक्लो,
खरे़ःङ् के़ले़ःङ्बे़ल्ले़ फेॽरुम् सॽरुल्ले़
खे़न् मिदःत्ते़न् के़ये़म्बा चोःक्मा मेःन्छाङ् पोङ्लो॥
5आनिॽ हाङ्ङिल्ले़ कुससाङ्स्रोत् चोःक्मा ये़न्नो
सुहाङ्युक्पाहाॽ सेजङ्वाःल्ले़ साॽरिक् मयुसिरो,
खे़ब्याङ् हाङ्ङिल्ले़ कुनामे़न्छाॽ के़जोःक्पाहाॽनु हुक् तङ्घुरो॥
6खे़ङ्हाॽरे़ ताप्फे़ःम्बा पान् मे़इःत्तुआङ् हाङ्ङे़ओ मे़बेःक्लो
खे़ङ्हाॽरे़ खुन्छिॽ निङ्वान् मिदःत् हे़क्तङ्बा चोक्लो॥
से़न्दिक् नाम्दाःत्तात् खुन्छिॽ साक्के़न्निल्ले़ ओॽरुसिरो
हे़क्क्याङ् तानाम् मि हे़क्के तिःत्लो॥
7खे़ङ्हाॽ के़रे़क् मिदःत्तोबा मि हे़क्तङ्बा मे़जोक्लो,
खे़ङ्हाॽरे़ खुन्छिॽ युक्साबाहाॽ खाप्पुथ्यःङ् मे़जोगुसिरो॥
खे़ङ्हाॽरे़ खुन्छिॽ के़रे़क् हाङ्हाॽ मे़जोन्लो,
हे़क्क्याङ् आत्तिन् हाङ्हाॽरे़आङ् पेलि मे़म्भाक्कान्लो॥”
इस्राइल नु वेॽ सुवाङ्हाॽ
8“एफ्राइम्मिन् मे़न्छाम् सुवाङ्हाॽनु फःन्छिङ्लो,
एफ्राइम्मिन् थिक् ले़प्माङ्लक् के़सङ्बा खरे़ःङ् हे़क्के लॽरो॥
9वेॽ लाजेॽबाहाॽरे़ खे़ल्ले़ कुमुक्किन् मे़मे़क्खुरो,
कर खे़ल्ले़ कन् पाःन्निन् निङ्वाॽ मे़घोसुन्लो॥
खे़ल्ले़ कुधे़गेक् मुरिक् के़भुप्पे़न् निधाःप्मा हेःक्ते़आङ् पत्लो,
कर खे़न् पाःन्निन् खुने़ॽ निङ्वाॽए मे़घोसुन्लो॥
10इस्राइलबा मनाहाॽरे़ खुन्छिॽ आङ्दिङ्ङिल्ले़
आप्फेक् खुन्छिॽ तक्ले़ङ्वाओ तोःन्दि पिरुसिरो,
कर खे़ङ्हाॽ यहवे दाङ्बा खुन्छिॽ निङ्वाॽफुमाङ् ले़प्माङ् मे़न्नुःङ्ने़न्लो
खे़ङ्हाॽरे़ खुने़ॽ मे़ङ्गोःत्तुन् मे़न्हक्सुन्नाङ्लो॥
11“एफ्राइम्मिन् कुले़म् के़नुॽबा नु कुधना के़होप्पा,
कुने़हि के़होप्पा पुत्तुःक्के हे़क्तङ्बा चोक्लो॥
आल्लो खे़ङ्हाॽरे़ मिस्र लाजेन् मे़उःत्तुरो,
खे़ङ्हाॽ अस्सुरओ मे़बेःक्लो॥
12आल्ल खे़ङ्हाॽ मे़बेःक्किल्ले़, आइदाःक्किन्
आङ्गाॽ खे़ङ्हाॽरे़ खुन्छिॽ सम्धाङ् के़सुङ्लो,
आङ्गाॽ खे़ङ्हाॽ ताङ्साङ्बोबा पुहाॽ हे़क्के यो थासुङ्सिङ्लो॥
आल्ल खे़ङ्हाॽ कुबन्ज्याङ्मो मे़बे़बा खे़प्सुङ्ङिल्ले़,
आङ्गाॽ खे़ङ्हाॽ ते़म्सुङ्सिङ्लो॥
13“खे़ङ्हाॽग मे़जिःत्ते़ मे़स्ये़रो, थेआङ्भे़ल्ले़ खे़ङ्हाॽ
आङ्गाॽलाम् माःङ्घा मे़घे़त्छिङ् मे़बेआङ् मे़वाॽरो!
खे़ङ्हाॽ खाप्पुथ्यःङ् मे़बोङ्लरो,
थेआङ्भे़ल्ले़ आङ्गाॽ आदक्ले़ङ्वाओ
खे़ङ्हाॽ पिफ्युङ्बा मे़बोःक्खे़आङ् मे़वाॽरो॥
कुमे़ल्लुङ् हुङ्माआङ् खे़ङ्हाॽ थे़ॽमासि आनिङ्वाॽ वाॽरो,
कर खे़ङ्हाॽरे़ आङ्गाॽ आदक्ले़ङ्वाओ इङ्ले़क् मे़बाःत्तुरो॥
14खे़ङ्हाॽरे़ खुन्छिॽ सिक्लुङ्मे़ल्ले़ आङ्गाॽ पेलि मे़म्भाक्कान्लो,
कर खुन्छिॽ आप्फेक् ने़त्नाहाॽओ मे़रिङ् मे़धक्लो॥
कुजा नु कुबोक् चे़ल्ले़क्सेॽ सेजङ्वाःल्ले़ लागि खे़ङ्हाॽ मे़जुम्लो,
कर आङ्गाॽनुग खुन्छिॽ नारान् मे़हिसु मे़देसुरो॥
15आङ्गाॽ खे़ङ्हाॽ सधासिङ्मा हुॽरुङ्सिङ्लो
हे़क्क्याङ् खे़ङ्हाॽ के़धुम्बा चोगुङ्सिङ्लो,
कर खे़ङ्हाॽरे़ आङ्गाॽ आदक्ले़ङ्वाओ चे़म्भन् मे़जोगुरो॥
16खे़ङ्हाॽ के़रे़क्नुःल्ले़ यम्बा निङ्वाॽफुमाङ्ङो मे़न्हिसिङ्ङिन्लो,
खे़ङ्हाॽ कुसुम् मे़न्दम्मनाबा लिॽइन् हे़क्तङ्बा मे़जोक्लो॥
खे़ङ्हाॽरे़ खुन्छिॽ लाम्लोबाहाॽ खुन्छिॽ आप्फेक् कुनामे़न्छाॽ
पाःन्जाःक्किल्ले़ चोगुल्ले़ ताभेःल्ले़ मे़सोन्दुसिरो,
कल्ले़ चोगुल्ले़ए मिस्र लाजेॽओ खे़ङ्हाॽ कुनामे़न्छाॽ मे़मे़त्तुसिरो॥”
© 2009, 2023, Wycliffe Bible Translators, Inc. All rights reserved.