होसे 4
4
इस्राइलरे़ कुदक्ले़ङ्ङो आप्तिक्
1इस्राइलिसे, यहवे दाङ्बे़ल्ले़ कुबाःन्जाक्किन् खे़प्से़म्मे़ॽओ,
थेआङ्भे़ल्ले़ कन् लाजेॽओ के़युङ्बाहाॽरे़ खुन्छिॽ सम्धाङ्
यहवे दाङ्बे़ल्ले़ कुआप्तिक् अक्तङ्बा वाॽरो—
“कन् लाजेॽओ कुदोःप्मा नसान् होप्लो,
चक्मे़ल्लॽमनाबा लुङ्माॽ तुक्सिङ्मा होप्लो
हे़क्क्याङ् निङ्वाॽफुमाङ्ङिल्ले़ कुसिक्कुम् निङ्वान् होप्लो॥
2कॽयो माङ्देसिङ्मा साङ्ग्रा पिसिङ्मा, इङ्ले़क् पाःप्मा,
मनासे़प्मा, खुःप्मा नु याम्बोःप्मा पाःन्हाॽ मे़से़सुरो,
हे़क्क्याङ् कुजक्ले़ कुजक् आल्लसाङ् यरिक् मना मे़से़रुसिरो॥
3कल्ले़चोगुल्ले़ कन् लाजेन् मे़रिङ् थक्लो,
हे़क्क्याङ् कप्मो के़युङ्बाहाॽ के़रे़क् मे़मे़क्लो,
खे़ब्याङ् ताम्भुङ्ङोबा थक्साहाॽ, ताङ्साङ्बोबा पुहाॽ नु
वरःङ्ङोबा पाधुङ् ले़क्ङाहाॽआङ् मे़सिरो॥”
4“कर आत्तिन् मनाःल्ले़आङ् आप्तिक् मे़दारुन्लरो,
आत्तिन्नाङ् आप्तिक् मे़न्गुःत्तुन्लरो,
थेआङ्भे़ल्ले़ खिनिॽ मनाहाॽग निङ्वाॽफुसाम्बाहाॽ
आप्तिक् के़गुःप्पा हे़क्तङ्बा मे़जोक्लो॥
5खे़ने़ॽ से़न्दिक् ले़न्दिक् के़दोःक्काङ् के़जोःन्लो,
हे़क्क्याङ् माङ्निङ्वाॽपान् के़बाःप्पाहाॽआङ्
खे़ने़ॽनुए सोरिक् मे़दोःक्काङ् मे़जोन्लो,
कम्भलॽरिक् आङ्गाॽ खे़ने़ॽ के़म्मा मे़क्खुङ्लो॥
6आङ्गाॽ आमनाहाॽ सिक्कुम्दिङ् निङ्वाॽ सुःम्मारे़ चोगुल्ले़ मे़मे़गे़आङ् वाॽरो,
सिक्कुम्दिङ् निङ्वान् खिनिॽ के़नाॽरुम्बाल्ले़ चोगुल्ले़
आङ्गाॽआङ् खिनिॽ निङ्वाॽफुसाम्बा पोङ्मा मे़बाङ्निङ्ङिन्लो॥
खिनिॽ आप्फेक् निङ्वाॽफुमाङ्ङिल्ले़ कुइङ्जाङ्ङिन्
खिनिॽ निनि खे़म्घे़म् के़न्लाप्तुम्मिन्बाल्ले़ चोगुल्ले़,
आङ्गाॽआङ् खिनिॽ साहाॽ निनि मे़लाप्पासिङ्ङिन्लो॥
7आक्ख्यारिक् यरिक् निङ्वाॽफुसाम्बाहाॽ मे़बोरे़र मे़बे,
खे़म्म्याक् यरिक्के खे़ङ्हाॽरे़ आङ्गाॽ आदक्ले़ङ्वाओ लायो मे़जोगुरो,
खे़ङ्हाॽरे़ खुन्छिॽ मिङ्सो थाःङ्सोःन् सिरिङ्ममा पाःन्हाॽनु मे़ले़क्तुरो॥
8“आङ्गाॽ आमनाहाॽरे़ खुन्छिॽ लायोल्ले़ खे़ङ्हाॽ पोःक्तुसिरो
हे़क्क्याङ् खुन्छिॽ फे़न्याःम्बक्किन् खे़ङ्हाॽरे़ खुन्छिॽ सिराॽथाङ्लो॥
9आक्तङ्बा मना हे़क्तङ्बाए निङ्वाॽफुसाम्बा मे़बोङ्लो,
खुन्छिॽ ये़प्ले़क्किल्ले़ कुले़क्वा के़रे़क् खुम्दिङ् पिरुङ्सिङ्लो,
हे़क्क्याङ् खे़ङ्हाॽरे़ खुन्छिॽ याःम्बक्किल्ले़ लागि
आङ्गाॽ खे़ङ्हाॽ कुले़क्वाॽ नुःक्तुङ् पिरुङ्सिङ्लो॥
10खे़ङ्हाॽरे़ चामाग मे़ज कर खे़ङ्हाॽ मे़ङ्घाने़न्लो,
खे़ङ्हाॽरे़ याम्बोःप्मा याःम्बक् मे़जोगुॽ, कर मे़म्बोःन्ने़न्लो,
थेआङ्भे़ल्ले़ खे़ङ्हाॽरे़ यहवे दाङ्बे़न् मे़ले़रु मे़देसुआङ् वाॽरो,
हे़क्क्याङ् याम्बोःप्मा याःम्बक्को निङ्वाॽ मे़बिरुआङ् वाॽरो॥
11के़दुम्बा चे़ल्ले़क्सेॽ थि नु कुबोक् चे़ल्ले़क्सेॽ
थिःल्ले़ आमनाहाॽरे़ खुन्छिॽ
सिक्कुम्निङ्वान् ले़क्खु पिरुसिरो॥
12खे़ङ्हाॽरे़ खुन्छिॽ सिङ् नावाइत्लान् सुजा मे़नाःक्तुरो,
हे़क्क्याङ् लत्छा सिङ् तक्काःत्तिल्ले़ खे़ङ्हाॽ नुगप् पिरुसिरो॥
याम्बोःप्मा निङ्वाःल्ले़ चोगुल्ले़ यहवे दाङ्बे़न् मे़नाॽरुआङ् वाॽरो,
हे़क्क्याङ् याम्बोःप्मा याःम्बक् मे़जोगुरो॥
13खे़ङ्हाॽरे़ कोःक्माहाॽरे़ कुसम्हाॽओ वयागे़न् सिदुङ्जभा मे़दोन्दुरो,
हे़क्क्याङ् थे़गु माङ्वाहाॽओबा सुसु के़लॽबा नाम्इःक्खङ्
आबिबिबा यहिबा, हुम्बे़त् के़दाप्पा पिपोर नु
पोरोःक्सिङ्माहाॽरे़ कुसिङ्गाङ् सुक्पा मे़हाःन्दुरो॥
“कल्ले़चोगुल्ले़ खिनिॽ मे़न्छुमासाहाॽरे़ के़त्निमा याःम्बक् मे़जोगुरो,
हे़क्क्याङ् खिनिॽ पाङ्लिमाहाॽरे़ चाराम्मा याःम्बक् मे़जोगुरो॥
14खिनिॽ मे़न्छुमा साहाॽ के़त्निमा चोःक्मा ले़प्माङ् मे़लाःत्छाङ्
आङ्गाॽ खिनिॽ मे़न्छुमा साहाॽ खुम्दिङ् मे़बिआसिङ्ङिन्लो,
हे़क्क्याङ् खिनिॽ पाङ्लिमाहाॽरे़ याम्बोःप्मा याःम्बक्
मे़जोगुल्ले़ आङ्गाॽ खे़ङ्हाॽ खुम्दिङ् मे़बिआसिङ्ङिन्लो॥
थेआङ्भे़ल्ले़ ये़म्बित्छाहाॽ आप्फेक्काङ् याम्बोःप्मा
याःम्बक् चोःक्मा ले़प्माङ् मे़लासे़आङ् मे़वाॽरो,
हे़क्क्याङ् माङ्धाःन्नोबा के़त्निमा से़वारोमाहाॽनु सिदुङ्जभा मे़दोन्दुरो,
खासिङ्निःप्मा ने़हिनिङ्वाॽ मे़ङ्गप्मनाबा मनाहाॽ मे़मे़क्लो॥
15“इस्राइलए, खे़ने़ॽ याम्बोःप्मा याःम्बक् के़जोगुसाङ्
यहुदान् आप्तिक्साबा मे़बोङ्ङिन्लरो॥
गिलगालओ खिनिॽ मे़बेगे़म्मिन्ने़ॽओ
हे़क्क्याङ् बेथ-आवनओआङ् मे़बेगे़म्मिन्ने़ॽओ
‘से़क्खाए यहवे दाङ्बे़न् कुहिवे़त् वाॽबा कुइसिक्’
पाःत्ताम्मे़ॽर माङ्हे़क्काङ् मे़जोगे़म्मिन्ने़ॽओ॥
16पान् मे़ङ्घे़म्मनामा करःङ् पिप्मा कुइसिक्
इस्राइलिहाॽ आधिङ्गानि मे़बोःक्खे़आङ् मे़वाॽरो॥
खे़ब्याङ् आक्खेलॽरिक् यहवे दाङ्बे़ल्ले़ खे़ङ्हाॽ चाराम्मादे़न्नो
मे़ल्लुक्साःत्हाॽ चामे़राम्बा कुइसिक् चाराम्सुसिबे?
17एफ्राइम्मिन् नावाइत्लाहाॽरे़ खुन्छिॽ चुम् पोःक्खे़आङ् वाॽरो,
खे़न् एःक्से़त्छा ले़रे़म्देसे़म्मे़ॽओ॥
18खे़ङ्हाॽरे़ खुन्छिॽ थुङ्मा सेजङ्वान् खत्त्रे़क् माःत्छाङ्
खे़ङ्हाॽ के़त्निमा चोःक्मा याःम्बक्को चक्मे़ल्लॽए मे़बत्लो,
खे़ङ्हाॽरे़ खुन्छिॽ युक्साबाहाॽरे़ सिरिङ्ममा
याःम्बक्हाॽ साॽरिक् खुन्छिॽ सिराॽधाङ्लो॥
19सुरित् केजङ्ङिल्ले़ खे़ङ्हाॽ फे़सु तेॽरुसिरो,
हे़क्क्याङ् खे़ङ्हाॽ खुन्छिॽ सिदुङ्जभाहाॽरे़ चोगुल्ले़ सिरिङ्ममो मे़धारो॥”
© 2009, 2023, Wycliffe Bible Translators, Inc. All rights reserved.