तोलिङ्सोमु 40
40
फारोल्ले़ कुसे़वारोबाहाॽरे़ खुन्छिॽ से़प्माङ्
1मिसाक् ये़म् एगाङ्, मिस्रबा हाङ्ङिन् थि के़दोम्बा के़बिबा तुम् कुमनान् नु तःक् के़धोःक्पा तुम् कुमनाःल्ले़ मिस्रबा हाङ् खुन्छिॽ आबाङे दाङ्बान् कुनामे़न्छाॽ मे़त्ते़छु॥ 2हे़क्क्याङ् फारोन् कन् ने़प्फु कुसुहाङ्गे़म्बाहाॽ, इग्र थि के़दोम्बा के़बिबा तुम् कुमना हे़क्क्याङ् तःक् के़धोःक्पा तुम् कुमनाःन्नु साॽरिक् कुसिक् पोगे़॥ 3हे़क्क्याङ् खुने़ॽ खे़ङ्हाॽ थक्कम्ब्राङ् के़मे़प्पा थक्पे़बाल्ले़ कुहिम् पुङ्लाहिम्मो साक्तुसि॥ युसुफे़न्नाङ् हाबा खे़ॽयो साक्ते़आङ् यागे़॥ 4थक्कम्ब्राङ् के़मे़प्पा थक्पे़बाल्ले़ खे़ङ् ने़प्फुहाॽ युसुफे़न् हुक्सुप्तुसि, हे़क्क्याङ् खुने़ॽ खे़ङ्हाॽ ओमे़त्तुसि॥
कुभा ये़म् थारिक् खे़ङ्हाॽ साक्पा के़धाबा कम्ब्राङ्ङो वये़सि॥
5थिक्ले़ङ् थिक्से़न्ले़ पुङ्लाहिम्मो साक्पा के़धाबा मिस्रबा हाङ्ङिल्ले़ तुम् कुधि के़दोःम्बे़न् नु तुम् कुदःक् के़धोःक्पे़ल्ले़ आबाङे कुबे के़याक्पा से़प्माङ् माक्ते़त्छु॥
6युसुफे़न् तानाम् खुन्छिओ त्ये़ःल्ले़ खे़ङ्हाॽ खुन्छिॽ नामाक्ते़बा निसुसि॥ 7खे़ल्ले़चोगुल्ले़ खुने़ॽ खे़ङ्हाॽ सेःन्लाप्तुसि, “आइन् थेआङ् खिन्छिॽ नामाक्पाबे?”
8खे़ङ्हाॽरे़ खुने़ॽ मे़त्ते़छु, “आन्छिगे ने़प्माङ्ले़ से़प्माङ् माक्ते़त्छुगे़, कर खे़ल्ले़ कुबे के़हम्बा मना हाःत्ताङ् होप्॥”
युसुफरे़ खे़ङ्हाॽ मे़त्तुसि, “से़प्माङ्ङिल्ले़ कुबेःङ्ग निङ्वाॽफुमाङ्ङिल्ले़ कुहुक्को मे़वाॽने़म्बि? खे़न्छिॽ से़प्माङ्हाॽ आमे़त्ते़छे़ॽ॥” #तोलिङ् ३७:५,९
9खे़ब्याङ् थि के़दोम्बा के़बिबा तुम् मनाःल्ले़ कुसे़प्माङ्ङिन् अक्खेलॽरिक् युसुफे़न् चे़क्तु, “आङ्गाॽ माक्तुङ्बा से़प्माङ्मो आदगाङ् लत्छा चे़ल्ले़क्सेल्ले़ कुबुङ्धिक् युङे़॥ 10चे़ल्ले़क्सेल्ले़ कुबुङ्ङो सुम्सि कुबोराक् पत्छे़॥ खे़ॽयो कुजङ् लिङे़ थाङे़आङ् कुभुङ् फे़क्ते़, हे़क्क्याङ् चे़ल्ले़क्सेल्ले़ कुजाॽ थोःक्ते़आङ् कुबजाहाॽ मराःक् यारिक् तुम्से़॥ 11फारोल्ले़ कुजल्लाङ्ना खोर्यान् आङ्गाॽ आहुक्कोए कत्तुङ्, हे़क्क्याङ् आङ्गाॽ चे़ल्ले़क्सेल्ले़ कुजाॽइन् तुबुङ्ङाङ् चिबुत् चिबुत् पुत्तुङ् हे़क्क्याङ् फारोल्ले़ कुजल्लाङ्ना खोर्याओ केःत्तुङ्, हे़क्क्याङ् खे़न् कुहुक्को युक्खुङ् पिरुङ्॥”
12युसुफरे़ खे़न् मे़त्तु, “कल्ले़ कुबेन् हाबा कन्लो—सुम्सि कुबोराक्हाॽ फाॽइन् सुम्ये़न्लो॥ 13सुम्ये़न् थारिक्ले़ फारोल्ले़ खे़ने़ॽ के़ना चाङ्जाङ् चोगु के़बि, हे़क्क्याङ् याम्मो खे़ने़ॽ के़याःम्बक्किन् के़बिरो, तगि खुने़ॽ तुम् कुधि के़दोम्बा के़बिबा के़वये़बान् हे़क्के याम्मो फारोल्ले़ कुजल्लाङ्ना खोर्यान् खुने़ॽ के़दोःन्दु के़बिरुरो॥ 14कर खे़ने़ॽ के़नुॽ के़दाःल्ले़ आङ्गाॽआङ् इःत्ताङ्ङे़ॽओ॥ आङ्गाॽ आयाःम्बेओ फारोःन्नु ताॽजे़क्खे़आङ् आङ्गाॽ कन् पुङ्लाहिम्मोलाम् लःत्ताङ्ङे़ॽओ॥ 15थेआङ्भे़ल्ले़ आङ्गाॽग से़क्खाःल्ले़ हिब्रुहाॽरे़ खुन्छिॽ लाजेॽलाम् मे़घुःत्ताङ्ङाङ् मे़दाराङ्बारो, हे़क्क्याङ् कॽयोआङ् पुङ्लाहिम्मो थामै के़बोङ्बा याःम्बक् मे़न्जोःक्के वयाङ्॥”
16से़प्माङ्ङिल्ले़ कुबेन् नुबा निसुआङ् तुम् तःक् के़धोःक्पे़ल्ले़आङ् युसुफे़न् चे़क्तु, “आङ्गाॽआङ् अक्तङ्बा से़प्माङ्धिक् माक्तुङ्॥ आध्गेक्को खरे़ःङ् याङ्मा सुम्सि पक्वाहाॽ युङे़॥ 17थोसमा पक्वाओ फारोल्ले़ कुलागि परिक् परिक्पा कुजाहाॽ यागे़, कर आध्गेक् सम्धाङ्बा पक्वाओबा खरे़ःङ्ङिन् पुहाॽरे़ मे़अगुर मे़जर मे़यागे़॥”
18युसुफरे़ मे़त्तु, “कल्ले़ कुबेन् हाबा कन्लो—सुम्सि पक्वाहाॽ सुम्ये़न्लो॥ 19सुम्ये़न् थारिक्ले़ फारोल्ले़ खे़ने़ॽ के़धेगेःक्किन् फुत्चिक् च्ये़प्तुदेसु के़बि, हे़क्क्याङ् सिङ्बुङ्ङो के़भोःन्लो, हे़क्क्याङ् पुहाॽरे़ के़ने़क्सान् मे़अगु मे़जरो॥”
20सुम्सिगेक्पा ये़न्नो फारोल्ले़ कुसावाःन्छिङ्मा साभःङ्जा ये़न् वये़॥ खे़न् ये़न्नो खुने़ॽ कुसुहाङ्गे़म्बाहाॽ के़रे़क् उःत्तुसिआङ् चामा थुङ्मा पिरुसि, हे़क्क्याङ् खे़न् सुहाङ्गे़म्बाहाॽरे़ खुन्छिॽ तगि तुम् थि के़दोम्बा के़बिबा मनान् नु तुम् तःक् के़धोःक्पे़न् ये़प्सुसि॥ 21खुने़ॽ तुम् थि के़दोम्बा के़बिबे़न् आबाङे कुयाःम्बक्को याम्मो फत्छु, हे़क्क्याङ् खे़ल्ले़ फारोन् चल्लाङ्ना खोर्यान् तोःन्दु पिरु॥ 22कर युसुफरे़ खुन्छि से़प्माङ्ङिल्ले़ कुबेन् हन्दु पिरुबा हे़क्केए तुम् तःक् के़धोःक्पे़न् फारोल्ले़ ते़ल्ले़म् फोःन्दु॥
23हे़क्केसाङ् तुम् थि के़दोम्बा के़बिबाल्ले़ युसुफे़न् निङ्वाॽ मे़इःत्तुन्, कर खुने़ॽ निङ्वाॽ सर्मुःन् मुःत्छु॥
Currently Selected:
तोलिङ्सोमु 40: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
