तोलिङ्सोमु 31
31
याकुबे़न् लाबाने़ल्लोलाम् खे़त्छिङ्ॽ
1थिक्ले़ङ् लाबाने़ल्ले़ कुस्साहाॽरे़ अक्खे मे़बाःत्तुर मे़यागे़बा याकुबरे़ खे़प्सु, “आनिॽ पाप्पाॽरे़ कत्तुबा के़रे़क् याकुबरे़ तेॽरु माःन्दु, हे़क्क्याङ् आनिॽ पाप्पाॽरे़ कुयाङ्सा कुन्धेलाम् खे़ल्ले़ कम्याक् यरिक् थगुबारो॥” 2हे़क्क्याङ् लाबाने़ल्ले़ तगि हे़क्के खुने़ॽ नुरिक् मे़मे़त्तुम्बा याकुबरे़ निसु॥
3खे़ब्याङ् यहवे दाङ्बाल्ले़ याकुबे़न् मे़त्तु, “खे़ने़ॽ के़सुधे़बा के़दाक्थे़बाहाॽ नु के़गाॽइहाॽरे़ खुनिॽ लाजेॽओ नुःक्खे़ पेगे़ॽ, हे़क्क्याङ् आङ्गाॽ खे़ने़ॽ नु वाॽआ॥”
4खे़ल्ले़चोगुल्ले़ याकुबरे़ राहेल्ले़न् नु लिआःन् खुने़ॽ कुमे़ल्लुक् मे़ःन्दा मे़वये़बादे़न्नो उःत्तुसि॥ 5हे़क्क्याङ् खे़ल्ले़ मे़त्तुसि, “खिन्छिॽ पाःल्ले़ तगि हे़क्के नुरिक् मे़मे़त्तान्बा आङ्गाॽ निसुङ्ॽ॥ कर आङ्गाॽ आम्बारे़ कुनिङ्वाॽफुमाङ्ङिन् आङ्गाॽनु वाॽ॥ 6आङ्गाॽ थुम्दाङ्ङाङ् आसुक्सुक् खे़न्छिॽ पानुदिङ् पाःल्ले़ कुसे़वा चोगुङ् पिरुङ्बाङ्ग खिन्छिॽ के़निसे़छुआङ्ङे़ के़वाॽसिरो॥ 7हे़क्केसाङ् खिन्छिॽ पाःल्ले़ आङ्गाॽ इङ्ले़क्ताङ्ङाङ् वाॽ, हे़क्क्याङ् आनाम्याक्किन् थिबोङ्ले़ङ् थारिक् ले़क्तु पिराङ्ङाङ् वाॽ॥ करसाङ् निङ्वाॽफुमाङ्ङिल्ले़ खुने़ॽ आहान्ति चोःक्मा मे़बाङ्घुन्॥ 8खुने़ॽ ते़क्क्राबाहाॽ खे़ने़ॽइन् मे़बोङ्ल पाःत्तुल्ले़ मे़ल्लुक् मे़ःन्दाहाॽरे़ ते़क्क्राबाए मे़धाप्तुसि॥ हे़क्क्याङ् फजिघे़ःङ् माक्चिघे़ःङ् के़लॽबाहाॽ खे़ने़ॽइन् मे़बोङ्ल पाःत्तुल्ले़ के़रे़क् मे़ल्लुक् मे़ःन्दाहाॽरे़ फजिघे़ःङ् माक्चिघे़ःङ् के़लॽबाए मे़धाप्तुसि॥ 9अक्खेलॽरिक् निङ्वाॽफुमाङ्ङिल्ले़ खिन्छिॽ पाःल्ले़ कुमे़ल्लुक् कुमे़ःन्दा लुप्हाॽ आङ्गाॽ पिराङ्॥
10“खिन्छिॽ मे़ल्लुक् मे़ःन्दालुप्हाॽ मे़लाम्सिङ्ङे़ल्ले़ थुःम्बाहाॽ नु कुम्बाबा मे़ःन्दाहाॽ ते़क्क्राबा फजिखे़ःङ् माक्चिखे़ःङ् के़लॽबा हे़क्क्याङ् फदाङ्बा माक्ताङ्बा कुम्ब्रिक् के़युङ्बा मे़जोगे़बा आङ्गाॽ से़प्माङ्मो निसुङ्॥ 11खे़न् ये़म्मो निङ्वाॽफुमाङ्ङिल्ले़ कुमाङ्लाइङ्बाल्ले़ से़प्माङ्मो आङ्गाॽ ‘याकुबए’ मे़त्ताङ्॥ हे़क्क्याङ् ‘है, आङ्गाॽ कॽयो वाॽआरो’ मे़त्तुङ्॥ 12हे़क्क्याङ् खुने़ॽ मे़त्ताङ्, ‘मे़ल्लुक् मे़ःन्दालुप्हाॽ के़लिङ्बा थुःम्बाहाॽ नु कुम्बाबा मे़ःन्दाहाॽ नुरिक्काङ् ओमे़त्ते़से़ॽ॥ खे़ङ्हाॽ फजिखे़ःङ् माक्चिखे़ःङ् के़लॽबा नु माक्ताङ्बा फदाङ्बा कुम्ब्रिक् के़युङ्बा मे़बोःक्खे़र आङ्गाॽ चोगुङ्सिङ् थेआङ्भे़ल्ले़ लाबाने़ल्ले़ खे़ने़ॽओ चोगुर याक्पा पाःन्निन् आङ्गाॽ निसुङ्ङाङ् वाॽ॥ 13खे़ने़ॽ निङ्वाॽसोक्ले़ लागि सित्लाङ्ङिन् के़हाक्तुआङ् निःङ्गेॽ के़ले़ःक्तुबा नु माङ्गे़हे़क्सिङ्बा ते़न् बेथेलओ निगे़धाःम्सिङ्बा निङ्वाॽफुमाङ्ङिन् आङ्गाॽएरो॥ आल्ल पोगे़ॽ हे़क्क्याङ् कन् ते़न्नोलाम् खे़ने़ॽ सागे़वाःन्छिङ्बा लाजेॽओ पेगे़ॽ॥’” #तोलिङ् २८:१८-२२
14खे़ब्याङ् राहेल्ले़न् नु लिआःल्ले़ खुने़ॽ मे़त्ते़छु, “आन्छिगे पाःल्ले़ कुहिम्मो आन्छिगे खोमा लक् थे़मा वाॽआङ्बे? 15खुने़ॽ वेॽ लाजेॽबा हे़क्के आन्छिगे मे़मे़त्ते़छिगे़न्नाङ् मे़वाॽने़म्बि? हे़क्क्याङ् आन्छिगे ते़न्धाम् मेःक्खिम् मे़प्मारे़ लागि खे़ने़ॽ के़हुङुबा याङ्ङिन्नाङ् खुने़ॽए फे़त्लाःन्दुदेसुआङ् वाॽ॥ 16आनिॽ पाप्पाॽलाम्बा निङ्वाॽफुमाङ्ङिल्ले़ तेॽरुबा कन् याङ्साकुन्धेःन् आनिॽइन् नु आनिॽ साहाॽरे़न् पोःक्खे़आङ् वाॽ॥ आल्ल निङ्वाॽफुमाङ्ङिल्ले़ खे़ने़ॽ के़मे़त्ते़बा हे़क्केए चोगे़ॽ॥”
17खे़ब्याङ् याकुबे़न् पोगे़आङ् कुस्सा कुएहाॽ नु कुमेःत्हाॽ उमेहाॽ सम्दाङ् युक्खुसि॥ 18हे़क्क्याङ् खे़ल्ले़ के़रे़क् कुमे़ल्लुक् कुमे़ःन्दा कुधक्सा लुप्हाॽ नु खुने़ॽ पद्दन आराम्मो वये़ल्ले़ खुने़ॽ खोसुबा के़रे़क् याङ्साकुन्धेहाॽ याङ्सिङ्॥ खे़ब्याङ् कुम्बा इसहाक्के़ल्ले़ कुलाजेॽ कनाननो थासिङ्ङाङ् पे॥
19खे़न् ये़म्मो लाबाने़न् मे़ल्लुक् मुरिक् नःङ्से़ पेआङ् यागे़॥ हे़क्केःल्ले़ राहेलरे़ग कुम्बारे़ कुहिम्साम्माङ्हाॽ खुःत्तुसिआङ् तेॽरुसि॥ 20खे़न्नुःल्ले़ वेॽ “आङ्गाॽ पेःक्का” फाॽआङ् याकुबे़ल्ले़ अरामि लाबान्ने़न् मे़मे़त्तुन्नाङ् इङ्ले़क्तु॥ 21कम्भलॽरिक् खुने़ॽ कत्तुबा के़रे़क् चिगक्वाहाॽ याङ्सिङ्ङाङ् याकुबे़न् खे़त्छिङ् पे, हे़क्क्याङ् पयम् यम्बा युफ्रेतिस वहःङ्ङिन् काःक्तुदेॽरुआङ् गिलादबा कोःक्मा लाजेॽ ले़प्माङ् थासिङ् पे॥
लाबाने़ल्ले़ याकुबे़न् नाःत्तुॽ
22सुम्यान् के़रे़ल्ले़ याकुबे़न् खे़त्छिङ् पे के़लॽबा पाःन्निन् लाबाने़ल्ले़ खे़प्सु॥ 23हे़क्क्याङ् खुने़ॽ कुम्भुॽ कुन्साॽहाॽ फुक्सुसिआङ् नुसि ये़न् थारिक् याकुबे़न् मे़नाःत्तु मे़देॽरु, हे़क्क्याङ् खे़न् गिलादबा कोःक्मा लाजेॽओ खुने़ॽ मे़सिॽरु॥ 24खे़ब्याङ् से़न्दिक् से़प्माङ्मो अरामि लाबाने़न्नु निङ्वाॽफुमाङ्ङिन् थाःन्छिङ्, हे़क्क्याङ् खुने़ॽ मे़त्तु, “सिङ्सिङ् ये़क्ये़क् लॽरे़ॽ खे़ने़ॽ याकुबे़न् मे़भे़ःक्ते़न्ने़ॽ॥”
25लाबाने़ल्ले़ याकुबे़न् सिॽरुल्ले़ याकुबरे़ गिलादबा कोःक्मा फाङ्जङ्बा लाजेॽओ कुसाःङ्गा हिम्मिन् खिङ्सुआङ् ने़स्से़, लाबाने़ल्ले़आङ् कुम्भुॽ कुन्साॽहाॽनु सोरिक् कुसाःङ्गा हिम्मिन् बाखे़प्मो खिङ्सु॥ 26लाबाने़ल्ले़ याकुबे़न् मे़त्तु, “खे़ने़ॽ आङ्गाॽ इङ्गे़ले़क्ताङ्ङाङ् ते़न्धङ्ङोबा पुङ्लाधाबा हे़क्के आस्साहाॽ के़देॽरुसिआङ् कन् थे के़जोगुबाबे? 27आङ्गाॽ मे़म्मे़त्ते खे़ने़ॽ स्वाःत् सुल्लि के़घे़त्छिङ्ङाङ् थेआङ् आङ्गाॽ इङ्गे़ले़क्ताङ्बा? आङ्गाॽ मुक्ला नु सःप्मा लाःङ्मा हे़क्क्याङ् निङ्वाॽ पद्ये़द्ये़र पाङ्ने़सामे़न्॥ 28आस्साहाॽ हे़क्क्याङ् आम्मे़न्छाॽहाॽनु से़म्मुॽइ चोःक्माआङ् चुप् मे़प्मासि आङ्गाॽ थेआङ् के़म्बाङ्घाङ्ङिन्बा? खे़ने़ॽ कन् ताप्फे़ःम्बा याःम्बक् के़जोगु॥ 29खे़ने़ॽ हान्ति के़बोङ्ल चोःक्मा मुक्साम् आङ्गाॽ कत्तुङ्॥ कर मिःप्मा युसिक् के़म्बारे़ कुनिङ्वाॽफुमाङ्ङिल्ले़ आङ्गाॽ अक्खे मे़त्ताङ्, ‘सिङ्सिङ् ये़क्ये़क् लॽरे़ॽ, खे़ने़ॽ याकुबे़न् मे़भे़ःक्ते़न्ने़ॽ॥’ 30हे़क्क्याङ् आल्ल खे़ने़ॽ के़म्बारे़ कुहिम्मो पेःक्मा साॽरिक् निङ्वाॽ के़जोगुआङ् लाम् के़धासिङ्ङाङ् के़वाॽ, कर थेआङ् आहिम्साम्माङ्हाॽ के़घुःत्तुसिबाबे?”
31याकुबरे़ लाबाने़न् नोगप् पिरु, “खे़ने़ॽ के़स्सा मे़न्छुमाहाॽ आङ्गाॽ साक्के़ल्ले़क्काङ् के़नाप्पा के़देॽआबि फाॽआङ् आङ्गाॽ किसाङ्॥ 32कर खे़ने़ॽ के़हिम्साम्माङ्हाॽ आत्तिन् मनाओ के़घोसुॽ खे़न् कुहिङ्वे़त् मे़दाङ्ने़न्॥ आङ्गाॽओ के़वाॽबा के़जिगक्वाहाॽ आनिॽ काॽइहाॽरे़ खुनिॽ तगि कुसिङ् निःत्ते़आङ् तेॽरे़ओ॥” राहेलरे़ खे़ङ्हाॽ खुःत्तुसिबान् याकुबे़ल्ले़ निमाए मे़न्निए वये़॥
33खे़ब्याङ् लाबाने़न् याकुबरे़ कुसाःङ्गाहिम् सिगाङ् लासे़ हे़क्क्याङ् लिआरे़ कुसाःङ्गा हिम्मो नु ने़प्मजाङ् से़वारोमाहाॽरे़ खुन्छिॽ साःङ्गाहिम् सिगाङ् लासे़, कर खुने़ॽ थेआङ् मे़घोसुन्॥ कुनुप्मो खुने़ॽ राहेलरे़ कुसाःङ्गा हिम्मो लासे़॥ 34कर राहेले़ङ्ग खे़न् हिम्साम्माङ्हाॽ याङ्सिङ्ङाङ् उमेःल्ले़ कक् वेॽमादे़न्नो युक्खुसिआङ् बाखे़ल्ले़ कुजङ्ङो युङे़ज्ये़॥ लाबाःन्ने़ल्ले़ साःङ्गाहिम् सिगाङ् के़रे़क् पिसाङ् कोःत्तु कर हिम्साम्माङ्हाॽ खोमा मे़सुक्तुन्॥
35राहेलरे़ कुम्बा मे़त्तु, “आदाङ्बे, के़याःक् मे़ले़ॽरे़न्ने़ॽओ॥ आङ्गाॽ सिम् वहप्माल्ले़ सुसाङ्ङाङ् वाॽआ खे़ल्ले़चोगुल्ले़ के़दगाङ् आङ्गाॽ ये़प्मा मे़नुरे़न्॥” कम्भलॽरिक् खुने़ॽ कोःप्माग कोःत्तुसि, कर खे़न् हिम्साम्माङ्हाॽ खोमा मे़सुक्तुसिन्॥
36याकुबे़न् थे़क्तुक् कुयाःक्ले़ॽरे़ हे़क्क्याङ् लाबाने़न् फे़ःक्तुआङ् पान् मे़त्तु, “आङ्गाॽ थे़मा याःम्बक् फेःन्दुङ्ङाङ् वयाङ्ङाङ् खे़ने़ॽ अक्खेलॽरिक् के़भत्ताङ्बाबे? 37आल्ल खे़ने़ॽ के़रे़क् आजिगक्वाहाॽ के़साॽरु॥ के़हिम्मोबा के़सामा के़बुमाहाॽ आत्ति वाॽ, के़घोसुबि? खे़ङ्हाॽ खे़ने़ॽ के़मनाहाॽ नु आमनाहाॽरे़ खुनिॽ तगि ने़स्से़ पिरे़से़ॽ॥ खे़ङ्हाॽरे़ आन्छिॽ लुम्मो खासे़न् मे़जोगुर॥
38“कन् निबोङ् तङ्बेआङ्धो आङ्गाॽ खे़ने़ॽनुए वाॽआ॥ कम्भ्यारिक् थारिक्ले़ खे़ने़ॽ के़मे़ल्लुक्हाॽ नु के़मे़ःन्दाहाॽरे़ आभे़ल्ले़आङ् सामे़ल्ले़म्सुसिन्॥ आङ्गाॽ के़धक्सा लुप्पोबा मे़ल्लुक्काङ् मे़न्जाबा॥ 39ताम्भुङ् थक्साहाॽरे़ मे़घाःन्दुसिबाहाॽआङ् आङ्गाॽ खे़ने़ॽओ मे़दारुङ्सिङ्ङिन् खे़ङ्हाॽरे़ कुले़क्वा आङ्गाॽए हुङुङ्॥ से़न्दिक् इग्र ले़न्दिक् आभे़ल्ले़साङ् के़रे़क् के़माबाहाॽरे़ कुमे़न्नाङ् खे़ने़ॽ आङ्गाॽए के़गुःत्ताङ्॥ 40ले़न्दिक्पा हाङ्वा से़ःक्माल्ले़ आङ्गाॽ साॽरिक् तराङ् हे़क्क्याङ् से़न्दिक्पा चुङ्सिःक्माल्ले़ चोगुल्ले़ आङ्गाॽ आमिक्के मे़युसे़न्॥ 41हे़क्केलॽरिक् निबोङ् तङ्बे खाराक् आङ्गाॽ के़याःम्बक् चोगुङ् पिने़आङ् वये़॥ के़स्सा मे़न्छुमा ने़त्छिरे़ लागि थिबोङ्ङाङ् लिसि तङ्बे थारिक् याःम्बक् चोगुङ्, हे़क्क्याङ् तुक्सि तङ्बे थारिक् खे़ने़ॽ के़मे़ःन्दा के़मे़ल्लुक्हाॽ ओमे़त्तुङ्सिङ्॥ हे़क्क्याङ् खे़ने़ॽ आनाम्याक्किन् थिबोङ्ले़ङ् थारिक् के़ले़क्खु॥ 42आङ्गाॽ आम्बारे़ कुनिङ्वाॽफुमाङ् अब्राहाम्मिल्ले़ कुनिङ्वाॽफुमाङ् हे़क्क्याङ् आम्बा इसहाक्के़ल्ले़ ‘मिङ्सो इङ्धाङ् पिरुबा’ कुनिङ्वाॽफुमाङ्ङिन् आङ्गाॽनु होःप्ते़ल्ले़ग खे़ने़ॽ आङ्गाॽ थेधिक्काङ् मेःन्ने कुघाले़म् हुक् के़बाङ्साङ् के़देसाङ्बामे़न्॥ कर निङ्वाॽफुमाङ्ङिल्ले़ आदुक्खेन् नु आङ्गाॽ साक्ते़र चोगुङ्बा आयाःम्बक्किन् निसुआङ् मिःप्मा से़न्दिक् खे़ने़ॽ पान् के़मे़त्ते़बारो॥”
याकुब नु लाबानरे़ चोगे़त्छुबा माङ्हे़क्
43खे़ब्याङ् लाबाने़ल्ले़ याकुबे़न् नोगप् पिरु, “कन् मे़न्छुमाहाॽ आङ्गाॽए आस्सा मे़न्छुमासि॥ हे़क्क्याङ् कङ् हिन्जाॽहाॽ आङ्गाॽए आम्मे़न्छाॽसि, हे़क्क्याङ् के़गत्तुबा थक्सालुप्हाॽ के़रे़क् आङ्गाॽइन्छि॥ हे़क्क्याङ् खे़ने़ॽ कॽयो के़निसुसिबा के़रे़क् पाःन्हाॽ आङ्गाॽइन्छि॥ कर आइन् आङ्गाॽ आस्साहाॽ नु आम्मे़न्छाॽहाॽ आङ्गाॽनु वये़म्मे़ॽ फाॽआङ् थे मे़प्मा सुक्तुङ्सिङ्ङाङ्बे? 44आल्ल खे़ने़ॽ कत्ना फे़रे़ॽ, हे़क्क्याङ् खे़ने़ॽ नु आङ्गाॽ लत्छा माङ्हे़क् थिक् चोःक्सु, हे़क्क्याङ् बाखे़न् आन्छिॽ लुम्मो तोःन्दि तसि पोङ्ल॥”
45खे़ब्याङ् याकुबे़ल्ले़ निङ्वाॽसोक्ले़ लागि लत्छा लुङ्धिक् तारुआङ् सित्लाङ् कुइसिक् तक्पे़त् ये़प्सु॥ 46हे़क्क्याङ् याकुबे़ल्ले़ कुगाॽइहाॽ मे़त्तुसि खिनिॽआङ् लुङ्हाॽ तारे़म्मे़ॽ॥ खे़ङ्हाॽरे़ लुङ्हाॽ मे़दारुआङ् लत्छादे़न्नो मे़लुप्सु हे़क्क्याङ् बाखे़प्मो खे़ङ्हाॽरे़ मे़ज मे़धुङु॥ 47लाबाने़ल्ले़ खे़न् लुङ् मे़लुप्सुबा ते़न्निन्ले़ कुमिङ् यगर-सहदता#३१:४७ यगर-सहदता—कन् मिङ्ङे़ल्ले़ कुबेन् आरामिकओ “लुम्मनाबा लुङ्ङिल्ले़ निङ्वाॽ इःप्मा आबाङ्” पोङ्ॽ॥ युक्खु, हे़क्क्याङ् याकुबे़ल्ले़ खे़न् गले़द#३१:४७ गले़द—कन् मिङ्ङे़ल्ले़ कुबेन् हिब्रुओ “लुम्मनाबा लुङ्ङिल्ले़ निङ्वाॽ इःप्मा आबाङ्” पोङ्ॽ॥ मे़त्तु॥
48लाबाने़ल्ले़ याकुबे़न् मे़त्तु, “आइन् कन् लुङ् लुम्मनाबा ते़न्निन् खे़ने़ॽ नु आङ्गाॽ आलुम्मो पर्माङ्गि हे़क्के ये़प्लो॥” खे़ल्ले़चोगुल्ले़ खे़ल्ले़ कुमिङ् गालिद मिङ् मे़युक्खु॥ 49खे़न् मिस्पाआङ्#३१:४९ मिस्पा—कन् मिङ्ङे़न् हिब्रुओ “ओमे़प्मादे़न्” पोङ्ॽ॥ मे़मे़त्तु, थेआङ्भे़ल्ले़ लाबाने़ल्ले़ पाःत्तु, “आन्छिॽ एॽए आसे़न्दे़छिसाङ् खे़ने़ॽ नु आङ्गाॽ लुम्मो यहवे दाङ्बाल्ले़ आत्छिॽ ने़प्माङ् ओआमे़त्छिर॥” 50लाबाने़ल्ले़ याम्मो पाःत्तु, “खे़ने़ॽ आङ्गाॽ आस्साहाॽ ताप्फे़ःल्लिक् के़मे़त्तुसिने फाग्र हे़क्क्याङ् आस्साहाॽनुःल्ले़ वेॽ एयाङ्मा मेःत् के़दारुसिने फाग्र आन्छिॽ लुम्मो हाःत्ताङ् मे़होःप्साङ् खे़ने़ॽ नु आङ्गाॽ आन्छिॽ लुम्मो निङ्वाॽफुमाङ्ङिन् के़निबा वाॽ फाॽआङ् निङ्वाॽ इत्ते़ॽओ॥”
51लाबाने़ल्ले़ याकुबे़न् याम्मो मे़त्तु, “खे़ने़ॽ नु आङ्गाॽ लुम्मो निङ्वाॽसोक्ले़ लागि लुप्सुङ्बा लुङ्ङिन् हे़क्क्याङ् लुङ्सित्लाङ्ङिन् ओमे़त्ते़ॽ॥ 52निङ्वाॽसोक्ले़ लागि लुम्मनाबा कन् लुङ्ङिन् नु कन् सित्लाङ्ङिन् पर्माङ्गि तोःन्दि पोङ्ल, कन् लुङ् लुम्मनाबा ते़न्निन् काःक्तुङ्ङाङ् नाहाङ्दाङ् आङ्गाॽ खे़ने़ॽओ हान्ति चोःक्से़ मे़भे़न्आन् हे़क्क्याङ् खे़ने़ॽआङ् निङ्वाॽसोक्ले़ लागि कन् लुम्मनाबा लुङ्ङिन् नु सित्लाङ्ङिन् मे़गाःक्ते़न्ने़ॽआङ् आङ्गाॽओ हान्ति चोःक्से़ मे़म्भे़न्ने़ॽ॥ 53अब्राहाम्मिल्ले़ कुनिङ्वाॽफुमाङ् हे़क्क्याङ् नाहोरले़#३१:५३ नाहोर—अब्राहाम्मिन् याकुबरे़ कुन्धे़बा वये़ हे़क्क्याङ् नाहोरे़न् लाबाने़ल्ले़ कुन्धे़बा वये़॥ कुनिङ्वाॽफुमाङ् हे़क्क्याङ् खुन्छिॽ पाहाॽरे़ खुनिॽ निङ्वाॽफुमाङ्ङिल्ले़ आन्छिॽ लुम्मो खासे़न् चोगुर॥”
खे़ल्ले़चोगुल्ले़ कुम्बा इसहाकरे़ मिङ्सो इङ्धाङ् पिरुबा निङ्वाॽफुमाङ्ङिल्ले़ कुमिङ्ङो याकुबे़न् माङ्हे़क्सिङ्॥ 54याकुबे़ल्ले़ खे़न् कोःक्मा फाङ्जङ् थे़गु माङ्वाओ के़ने़बा लाजेॽओ सिदुङ्जभा तोःन्दु, हे़क्क्याङ् कुगाॽइहाॽ कुजा चासे़ उःत्तुसिआङ् मे़ज मे़धुङु॥ खे़न् से़न्दिक् खे़ङ्हाॽ आम्भा खे़प्मोए मे़ने़स्से़॥
55लाबाने़न् तानाम्सा पोगे़आङ् कुस्साहाॽ नु कुम्मे़न्छाॽहाॽ चुप् मे़त्तुसिआङ् हाङ्वागे़न् मुॽइसाम् पिरुसि॥ खे़ब्याङ् खुने़ॽ से़म्मुइ पोःक्खे़आङ् हिम्मो नुःक्खे़ पेरो॥
Currently Selected:
तोलिङ्सोमु 31: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
