लाम्दिक् 9
9
थक्साहाॽ मे़स्ये़
1खे़ब्याङ् यहवे दाङ्बे़ल्ले़ मोसान् मे़त्तु, “फारोओ पेगे़ॽ हे़क्क्याङ् यहवे दाङ्बे़ल्ले़ अक्खे पाःत्तुर पत् मे़त्ते़ॽ, ‘आङ्गाॽ आमनाहाॽ पेःक्मा फाःक्ते़से़ॽ हे़क्क्याङ् मे़बेःक्काङ् खे़ङ्हाॽरे़ आङ्गाॽ माङ्से़वा मे़मे़त्तार॥ 2खे़ने़ॽ खे़ङ्हाॽ पेःक्मा के़म्भाःक्तुसिन् हे़क्क्याङ् आल्लसाङ् के़साक्तु के़गत्तुसिने़भग्र, 3ताम्दाम्बा लाजेॽओ के़वाॽबा खे़ने़ॽ के़धक्साहाॽ, इग्र अन्हाॽ, अदङ्हाॽ, पित्हाॽ नु मे़ल्लुक् मे़ःन्दाहाॽओ आङ्गाॽ आहुक्किन् थासुङ्ॽ, हे़क्क्याङ् खे़प्मो किप्मा के़घुबा मिङ्देॽ पोक्॥ 4कर यहवे दाङ्बे़ल्ले़ इस्राइलबा पित्थक्साहाॽ नु मिस्रबा पित्थक्साहाॽ से़न्दुसिॽ हे़क्क्याङ् इस्राइलिहाॽरे़ खुनिॽ लत्छाआङ् थक्साहाॽ मे़न्छिने़न्॥’”
5यहवे दाङ्बे़ल्ले़ अक्खे पाःत्तुआङ् लत्छा ये़म्धिक् निःन्धो चोगु, “ताःन्दिक्सा कन् लाजेॽओ यहवे दाङ्बे़ल्ले़ कन् याःम्बक्किन् चोगुॽ॥” 6कुदाःन्दिक्मा यहवे दाङ्बे़ल्ले़ खुने़ॽ पाःत्तुबा कुइसिक् चोगु हे़क्क्याङ् मिस्रओबा के़रे़क् थक्साहाॽ मे़स्ये़॥ कर इस्राइलिहाॽरे़ खुन्छिॽ थक्साहाॽ लत्छाधिक्काङ् मे़न्छ्ये़ने़न्॥ 7फारोल्ले़ खे़न् ओमे़प्मारे़ लागि मनाहाॽ पाङ्घुसि, कर इस्राइलिहाॽरे़ खुन्छिॽ थक्सा पित्हाॽ लत्छाआङ् मे़स्ये़बा मे़न्निसुन्॥ हे़क्केसाङ् फारोन् हादिङ्ङे थक्ते़आङ् पत्छे़, हे़क्क्याङ् खुने़ॽ मनाहाॽ पेःक्मा मे़भाःक्तुसिन्॥
याङ्घेःक् नु फक्वा
8खे़ब्याङ् यहवे दाङ्बे़ल्ले़ मोसान् नु हारुने़न् मे़त्तुसि, “मिधुङ्दिङ् मिराःक्कोलाम् हुक्पुत् काङ्गाङ्बा खाप्पुःन् याङ्ने़त्छे़ॽ, हे़क्क्याङ् मोसाःल्ले़ फारोल्ले़ निसुरए कन् खाप्पुःन् ताङ्साङ्बो फुत्लुम् से़सुदेसुर॥ 9खाप्पुःन् खाम्हिःक् कुइसिक् पोङ्ङाङ् मिस्र लाजेॽ के़रे़क् हत्छे़ से़ःॽ हे़क्क्याङ् के़रे़क् मनाहाॽ नु थक्साहाॽरे़ खुन्छिॽ थक्को होॽ लःन्॥ खे़न् होॽहाॽ तुआङ् फक्वाले़ःङ्वा याङ्घेःक् पोङ्ॽ॥”
10कम्भलॽरिक् खे़न् ने़प्माङ्ले़ मिधुङ्दिङ् मिराःक्कोबा खाप्पुःन् याङ्ने़त्छिआङ् फारोल्ले़ कुदगि ये़म्ने़त्छि, हे़क्क्याङ् मोसाःल्ले़ सुरित् केजङ्ङो खे़न् फुत्लुम् से़सुदेसु॥ हे़क्क्याङ् मनाहाॽ नु पित् थक्साहाॽरे़ खुन्छिॽ थक्को होॽ लःन्दे़र याःन्दु॥ होॽइन् तुरे़आङ् फक्वाले़ःङ्वा याङ्घेःक् पोःक्खे़॥ 11कित्चाक् के़जोःक्पाहाॽ याङ्घेःक्किल्ले़ चोगुल्ले़ मोसाःल्ले़ कुबेसाङ् वाॽमा मे़न्छुक्ते़न्, थेआङ्भे़ल्ले़ कित्चाक् के़जोःक्पाहाॽरे़ खुन्छिॽ थक्को नु मिस्र लाजेॽओबा के़रे़क्ले़ खुन्छिॽ थक्को याङ्घेःक् लःन्दे़आङ् पत्छे़॥ 12कर यहवे दाङ्बे़ल्ले़ हाङ्ङिल्ले़ कुनिङ्वान् हादिङ् के़धक्पा चोगु पिरु॥ यहवे दाङ्बे़ल्ले़ पाःत्तुबा कुइसिक् खे़ल्ले़ मोसान् नु हारुने़ल्ले़ खुन्छिॽ पाःन्निन् खे़म्मा मे़दे़न्दे़न्॥
फःन्
13यहवे दाङ्बे़ल्ले़ मोसान् मे़त्तु, “ताःन्दिक् तानाम्सा फारोन् तुमे़आङ् मे़त्ते़ॽ, ‘यहवे दाङ्बा हिब्रुहाॽरे़ खुन्छिॽ निङ्वाॽफुमाङ्ङिल्ले़ पाःत्तुॽ, आङ्गाॽ आमनाहाॽ पेःक्मा फाःक्ते़से़ॽ हे़क्क्याङ् खे़ङ्हाॽ मे़बेःक्काङ् आङ्गाॽ माङ्से़वा मे़मे़त्तार॥ 14मेःन्ने़भग्र कन्छलाम्बा आङ्गाॽ खे़ने़ॽ के़सुहाङ्गे़म्बा नु के़मनाहाॽरक् मेःन्दुक्, कर खे़ने़ॽआङ् खुम्दिङ् पिने़॥ खे़ब्याङ् आङ्गाॽ हे़क्तङ्बा निङ्वाॽफुमाङ् कन् इक्सादिङ् खाम्बेःक्मो वेॽ हाःत्ताङ् होप् फाॽआङ् निङ्वाॽ के़घोसुॽ॥ 15आङ्गाॽ आहुक्किन् फोःक्खुङ्ङाङ् खे़ने़ॽ नु खे़ने़ॽ के़मनाहाॽओ माङ्दुक्मा पाङ्घुङ्बा हे़क्केःल्ले़ खे़निॽ के़रे़क् वरे़ङ्ले़ङ् के़मे़गिबा वये़॥ 16कर आङ्गाॽ आमुक्साम्मिन् ओसेःन्धाङ् चोःक्मारे़ लागि के़रे़क् इक्सादिङ् खाम्बेःक्को आमिङ् तिःत्ल फाॽआङ् आङ्गाॽ कुहिङ्वे़त् ले़त्ने़आङ् के़वाॽ॥ 17कर आल्ल थारिक्साङ् खे़ने़ॽ हादिङ् के़धक्पा के़बोक्खे़आङ् के़वाॽ हे़क्क्याङ् आङ्गाॽ आमनाहाॽ पेःक्मा के़म्भाःक्तुसिन्ॽ॥ 18कल्ले़चोगुल्ले़ ताःन्दिक् आम्भा कन् ये़म्मो मिस्र लाजेन् पोःक्खे़आङ् कत्थो आभे़ल्ले़आङ् मे़न्धाए के़वाॽबा साॽरिक् यम्बा फःन् थार याःन्दुङ्ॽ॥ 19आल्ल मनाहाॽ पाङ्घे़से़ॽआङ् ताम्दाम्बादे़न्नो के़वाॽबा पित्थक्साहाॽ नु के़वाॽवाॽबा के़रे़क् सिगाङ् मे़दारुसिर याःन्दे़से़ॽ, थेआङ्भे़ल्ले़ ताम्दाम्बादे़न्नो के़ले़प्पाआङ् के़वाॽबा नु हिम्मो मे़न्दारुसिन्बा के़रे़क् मनाहाॽ नु थक्साहाॽ फःन्निल्ले़ लःप्सुसि, हे़क्क्याङ् खे़ङ्हाॽ मे़स्सिःॽ॥’”
20यहवे दाङ्बाल्ले़ पाःत्तुबा पाःन्निन् मे़घे़प्सुआङ् हाङ्ङिल्ले़ कुभा कुसुहाङ्युक्पाहाॽ मे़गिसे़॥ खे़ङ्हाॽ के़रे़क्ले़ खुन्छिॽ थक्साहाॽ नु योःग्बा योःग्माहाॽ हिम्मो मे़दारुसिआङ् हिम् मे़मे़त्तुसि॥ 21कर वेॽहाॽरे़ चाहि यहवे दाङ्बे़ल्ले़ पाःत्तुबा साम्दिङ् पाःन्निन् निनि खे़म्घे़म् मे़ल्लाप्तुन् हे़क्क्याङ् खुन्छिॽ पित्थक्साहाॽ नु योःग्बा योःग्माहाॽ ताम्दाम्बादे़न्नो ताप्मे़रा मे़ले़रुसि॥
22खे़ब्याङ् यहवे दाङ्बे़ल्ले़ मोसान् मे़त्तु, “खे़ने़ॽ के़हुक्किन् ताङ्साङ्बो ले़प्माङ् सन्छे़ॽ हे़क्क्याङ् मिस्र लाजेॽओ के़रे़क् साॽरिक् यम्बा फःन् थासुॽ—मना, थक्सा नु खाम्बाङ्ङो के़युङ्बा याःङ्सुङ् के़रे़क् सम्धाङ् यम्बा फःन् सःक्थाःॽ॥” 23खे़ब्याङ् मोसाःल्ले़ कुदक्काःत्तिन् ताङ्साङ्बो ले़प्माङ् सन्छु, हे़क्क्याङ् यहवे दाङ्बाल्ले़ खे़रे़ङ्घुरुङ् लॽरे़आङ् फःन् थ्ये़र याःन्दु, खे़म्ब्याङ् इक्सादिङ् खाम्बेःक्मो साःम्भे ले़क्ते़॥ हे़क्क्याङ् यहवे दाङ्बे़ल्ले़ मिस्रओ आत्ति आत्ति यम्बा फःन् थ्ये़र याःन्दु॥ 24यहवे दाङ्बे़ल्ले़ खइक् खइक् इक्सिङ्ल फःन् थ्ये़र याःन्दु, ताङ्साङ्बो थिक् कुयाओनु वेॽसमा कुयाओ थारिक् साःम्भे ले़क्ते़॥ मिस्र लाजेॽओ अक्तङ्बा फःन्ग तगि आभे़ल्ले़आङ् मे़न्धाए वये़॥ 25मिस्र लाजेॽ के़रे़क् ताप्मे़रा ताम्दाम्बादे़न्नो के़वाॽबा थक्साहाॽ नु मनाहाॽ खक्पे़त् फःन्निल्ले़ लःप्सुसिआङ् सोःन्दुसि॥ ताम्दाम्बादे़न्नोबा याःङ्सुङ् नु सिङ्हाॽ मुरे़क् खारे़क् पोःक्खे़॥ 26इस्राइलिहाॽ मे़युङे़बा गोसेन ते़ङ्गप्पोरक् फःन् मे़धासुन्॥
27फारोल्ले़ मोसान् नु हारुने़न् उःत्तुसिआङ् मे़त्तुसि, “कन्छुमो आङ्गाॽ लायो चोगुङ्॥ यहवे दाङ्बान् कुदोःप्मा चोक्, आङ्गाॽ नु आमनाहाॽरे़ याःम्बक् फेःन्दुम्बे़॥ 28यहवे दाङ्बान् पेलि आभाक्ते़ आबिरे़म्मे़ॽ, थेआङ्भे़ल्ले़ कन् खे़रे़ङ्घुरुङ् के़लॽबा इक्लान् नु फःन्निन् साॽरिक् इःत्ते़॥ आङ्गाॽ खिनिॽ पेःक्मा फाःक्निङ् फाॽआङ् पाःत्तुङ्ॽ, आल्ल खिनिॽ कॽयो युङ्मा मे़बोङ्ने़न्॥”
29मोसाःल्ले़ हाङ्ङिन् मे़त्तु, “ये़क्यक्कोलाम् लाःक्कात् लःन्दिगे़ पेगिगे़नुमे़ःन्ने आङ्गाॽ आहुक्हाॽ फोःक्खुङ्ङाङ् यहवे दाङ्बे़न् पेलि फाक्तुङ्ॽ॥ खे़रे़ङ्घुरुङ् लॽमा नाॽ हे़क्क्याङ् फःन् थामा नाॽ॥ खे़ब्याङ् कन् इक्सादिङ् खाम्बेःक्मान् यहवे दाङ्बे़ल्ले़न्रे़त्छ फाॽआङ् खे़ने़ॽ निङ्वाॽ के़घोसुॽ॥ 30कर आङ्गाॽ कुसिङ् निःत्तुङ्ॽ, खे़ने़ॽ नु खे़ने़ॽ के़सुङ्हाङ्युक्पाहाॽरे़ आल्लसाङ् यहवे दाङ्बे़न् मे़ङ्गित्ते के़गत्तुम्॥”
31(साप्फक्क्रा नु हःक्सिन् फःन्निल्ले़ हिप्तुदेसु, थेआङ्भे़ल्ले़ हःक्सिःल्ले़ कुदाप्मा लःन्दे़ चुरे़आङ् पत्छे़, हे़क्क्याङ् साप्फक्क्राःन् फे़क्ते़आङ् पत्छे़॥ 32कर मासिन् नु हःक्सिन् मे़हिप्तुन्, थेआङ्भे़ल्ले़ खे़न् याङ्सिरक् तुम्॥)
33फारोःन्नु से़न्दे़आङ् मोसान् लाःकात् लःन्दे़बे हे़क्क्याङ् कुहुक्हाॽ फोःक्खुआङ् यहवे दाङ्बे़न् पेलि फाक्तु हे़क्क्याङ् ताङ्साङ्बो खे़रे़ङ्घुरुङ् लॽमा नु फःन् वहित् थामा नाॽरे़॥ 34कर आल्ल फारोल्ले़ वहित्, फःन् थामा नु ताङ्साङ्बे़न् खे़रे़ङ्घुरुङ् लॽमा नाॽरे़बा निसु, खे़ब्याङ्ग खुने़ॽ आल्लसाङ् यरिक् लायो चोगु, हे़क्क्याङ् खुने़ॽ नु कुसुहाङ्युक्पाहाॽरे़ खुन्छिॽ निङ्वान् हादिङ् के़धक्पा मे़जोगु॥ 35कम्भलॽरिक् फारोल्ले़ कुनिङ्वान् हादिङ् के़धक्पा पोःक्खे़, हे़क्क्याङ् यहवे दाङ्बे़ल्ले़ मोसान् मे़त्तुबा हे़क्के खुने़ॽ इस्राइलिहाॽ पेःक्मा मे़भाःक्तुसिन्लो॥
Currently Selected:
लाम्दिक् 9: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
