लाम्दिक् 40
40
सेसे साःङ्गाहिम् यारिप् चोःक्मा नु तोःम्मा
1खे़ब्याङ् यहवे दाङ्बे़ल्ले़ मोसान् मे़त्तु, 2“थिक्सिगेक्पा लाओबा थिक्सिगेक्पा ये़न्नो तुम्मादे़न् सेसे साःङ्गाहिम् चोगे़ॽ॥ 3खे़ॽयो माङ्हुप् साप्लुङ् के़याक्पा सन्दोक्किन् युक्खे़ॽआङ् फोःन्दाःल्ले़ खे़न् थेःक्ते़ॽ॥ 4चप्ते़न्निन् सिगाङ् थे़क्ते़ॽआङ् खे़ल्ले़ कुसम्धाङ् के़ने़बा चिगक्वाहाॽ पघे़म् खे़म्दुर ने़स्से़ॽ, हे़क्क्याङ् सेमि युङ्दे़न्निन् सिगाङ् केःत्ते़ॽआङ् खे़प्मो सेमि हाःम्मा छक्कङ्हाॽ तङ्घे़ॽ॥ 5माङ्हुप् साप्लुङ् के़याक्पा सन्दोक्किल्ले़ कुदगाङ् सुक्पा हाःम्मा साम्म्याङ् साङ्ते़रे़ःङ्ङिन् युक्खे़ॽ, हे़क्क्याङ् सेसे साःङ्गाहिम्मोबा लाम्धेःत्तोबा फोःन्दान् फत्छे़ॽ॥
6“तुम्मादे़न् सेसे साःङ्गाहिम्मोबा लाम्धेःत्तिल्ले़ कुदगि मिधिङ्मनादेमनाबा वयागे़न् सिदुङ्जभा ले़त्ति तोःम्मादे़न्निन् युक्खे़ॽ॥ 7खे़न् एगाङ् तुम्मादे़न् साःङ्गाहिम्मो नु ले़त्ति तोःम्मादे़न्निल्ले़ कुलुम्मो छे़ःङ्ग्यान् युक्खे़आङ् खे़ॽयो च्वाःत् केःत्ते़ॽ॥ 8हे़क्क्याङ् लक्खुम्मोबा पाःन्हाॽ कब्रिङ् फाक्ते़ॽ, हे़क्क्याङ् लक्खुम्मो लाःप्मा लाम्धेःत्तोबा फोःन्दान् खिङ्घे़ॽ॥
9“माङ्थोःक्ना पिमासि निःङ्गेःन् याङ्सिङ्ङे़ॽआङ् सेसे साःङ्गाहिम्मिन् नु खे़प्मो के़युङ्बा के़रे़क् पाःन्हाॽ माङ्थोःक्ना चोगे़ॽ खे़ब्याङ् खे़न् नु खे़प्मोबा के़रे़क् सामाहाॽ माङ्से़वा याःम्बक्ले़ लागि सुत्थो चोगे़ॽ, हे़क्क्याङ् खे़न् सेसे पोङ्ॽ॥ 10खे़ब्याङ् मिधिङ्मनादेमनाबा वयागे़न् सिदुङ्जभा ले़त्ति तोःम्मादे़न्नोबा के़रे़क् सामाहाॽआङ् माङ्थोःक्ना चोगे़ॽआङ् खे़न् सेसे चोगे़ॽ, हे़क्क्याङ् खे़न् साॽरिक् सेसेबा पोङ्ॽ॥ 11छे़ःङ्ग्यान् नु खे़ल्ले़ कुलाङ्हाॽ माङ्थोःक्ना पिरे़ॽआङ् सुत्थो चोगे़ॽ॥
12“खे़न् एगाङ् तुम्मादे़न् साःङ्गाहिम्मोबा लाम्धेःप्पो हारुने़न् नु खुने़ॽ कुस्साहाॽ तारे़से़ॽआङ् खे़ङ्हाॽ च्वाःत्तिल्ले़ वारुःप्से़से़ॽ॥ 13हे़क्क्याङ् हारुने़न् सुत्थो चाङ्हाॽ चाक्ते़आङ् खे़न् माङ्थोःक्ना पिरे़ॽ, खे़ब्याङ् खे़ल्ले़ निङ्वाॽफुसाम्बा ताक्फाओ आङ्गाॽ आलागि माङ्से़वा याःम्बक् चोःक्मारे़ लागि सुत्थो चोगे़ॽ॥ 14खे़ल्ले़ कुस्साहाॽ तारे़से़ॽआङ् खे़ङ्हाॽ हक्सुःप्पा लगेःप् चाक्ते़से़ॽ॥ 15खे़ने़ॽ खे़ङ्हाॽरे़ खुन्छिॽ पानुदिङ् पान् माङ्थोःक्ना के़बिरुबा हे़क्केए खे़ङ्हाॽआङ् माङ्थोःक्ना पिरे़से़ॽ, खम्भ्याङ् खे़ङ्हाॽरे़ निङ्वाॽफुसाम्बा ताक्फाओ आङ्गाॽ आलागि माङ्से़वा याःम्बक् मे़जोगुर॥ खे़ङ्हाॽरे़ खुन्छिॽ लागि माङ्थोःक्नाःङ्ग लत्छा सदादिङ् के़वाॽबा निङ्वाॽफुसाम्बा ताक्फा कुइसिक् खे़ङ्हाॽरे़ खुन्छिॽ के़रे़क् थाःक्हाॽरे़ लागि पोङ्ॽ॥” 16खे़ब्याङ् यहवे दाङ्बे़ल्ले़ मोसान् इङ्जाङ् पिरुबा हे़क्केए खुने़ॽ के़रे़क् चोगु॥
17कम्भलॽरिक् निसिगेक्पा तङ्बेओबा थिक्सिगेक्पा लाओबा थिक्सिगेक्पा ये़न्निल्ले़ याःन्दिक् सेसे साःङ्गाहिम्मिन् मे़भोःक्खु॥ 18मोसाःल्ले़ सेसे साःङ्गाहिम्मिन् फोःक्खुआङ् खे़ल्ले़ कुयुक्नाहाॽ युक्खु हे़क्क्याङ् खे़प्मोबा सिङ्भे़ल्ले़क्हाॽ तक्पे़त् ये़प्सुआङ् खे़ङ्हाॽओ कुसाक्मा पे़रे़म्सिङ्हाॽ केःत्तुआङ् खे़प्मोबा सित्लाङ्हाॽ ये़प्सु॥ 19खे़न् एगाङ् यहवे दाङ्बे़ल्ले़ इङ्जाङ् पिरुआङ् वये़बा कुइसिक् खुने़ॽ सेसे साःङ्गाहिम्मिल्ले़ कुसम्धाङ् कुघाप्मे़न् खिङ्घुआङ् कुघाप्मे़ल्ले़ कुसम्धाङ् कुदे़प्मा केःत्तु॥
20हे़क्क्याङ् खुने़ॽ ने़त्छि साप्लुङ्हाॽ तारुआङ् माङ्हुप् सन्दोक्को याक्तु खे़ब्याङ् तक्लाङ्हाॽ माङ्हुप् सन्दोक्को फत्छु, हे़क्क्याङ् कुदे़प्फेन् सन्दोक्किल्ले़ कुसम्धाङ् युक्खु॥ 21खे़ब्याङ् यहवे दाङ्बे़ल्ले़ इङ्जाङ् पिरुआङ् वये़बा कुइसिक् खुने़ॽ माङ्हुप् साप्लुङ् के़याक्पा सन्दोक्किन् सेसे साःङ्गाहिम्मो केःत्तु, हे़क्क्याङ् कुधेःक्मा फोःन्दान् खिङ्घुआङ् माङ्हुप् सन्दोक्किन् थेःक्तु॥
22हे़क्क्याङ् मोसाःल्ले़ तुम्मादे़न् साःङ्गाहिम्मिल्ले़ थो ले़प्माङ् के़बप्पा फोःन्दाःल्ले़ लाःक्कात् पिसाङ् चप्ते़न्निन् युक्खु॥ 23खे़न् एगाङ् यहवे दाङ्बे़ल्ले़ खुने़ॽ इङ्जाङ् पिरुआङ् वये़बा इसिःक् खे़ल्ले़ कुसम्धाङ् यहवे दाङ्बे़ल्ले़ कुदगि मे़दोन्दुबा खरे़ःङ्ङिन् पे़न्छु ने़स्सु॥
24तुम्मादे़न् साःङ्गाहिम्मो खुने़ॽ चप्ते़न्निल्ले़ कुदगाङ् सेसे साःङ्गाहिम् यो ले़प्माङ् सेमि युङ्दे़न्निन् युक्खु॥ 25यहवे दाङ्बे़ल्ले़ खुने़ॽ इङ्जाङ् पिरुआङ् वये़बा कुइसिक् खे़ल्ले़ यहवे दाङ्बे़ल्ले़ कुदगि सेमिहाॽ तङ्घु॥
26मोसाःल्ले़ तुम्मादे़न् साःङ्गाहिम्मोबा फोःन्दाःल्ले़ कुदगाङ् साम्म्याङ् ले़त्ति तोःम्मादे़न्निन् युक्खु॥ 27यहवे दाङ्बे़ल्ले़ खुने़ॽ इङ्जाङ् पिरुआङ् वये़बा कुइसिक् खुने़ॽ खे़प्मो कुनाम्गे़नुॽबा सुक्पा हाःन्दु॥
28हे़क्क्याङ् खुने़ॽ सेसे साःङ्गाहिम्मोबा लाम्धेःप्पो फोःन्दान् फोःन्दु॥ 29खे़ब्याङ् यहवे दाङ्बे़ल्ले़ खुने़ॽ इङ्जाङ् पिरुआङ् वये़बा कुइसिक् तुम्मादे़न् सेसे साःङ्गाहिम्मोबा लाम्धेःप्पो मिधिङ्मनादेमनाबा वयागे़न् सिदुङ्जभा ले़त्ति तोःम्मादे़न्निन् युक्खु हे़क्क्याङ् पोगुगे़न् कुजा सिदुङ्जभान् तोःन्दु॥
30तुम्मादे़न् साःङ्गाहिम्मो नु ले़त्ति तोःम्मादे़न्निल्ले़ कुलुम्मो खुने़ॽ छे़ःङ्ग्यान् युक्खुआङ् वाहप्सिङ्मारे़ लागि च्वाःत् केःत्तु॥ 31मोसा, हारुन नु खुने़ॽ कुस्साहाॽरे़ खे़प्मो खुन्छिॽ हुक् लाङ्हाॽ वामे़हप्तु॥ 32यहवे दाङ्बे़ल्ले़ खुने़ॽ इङ्जाङ् पिरुआङ् वये़बा कुइसिक् खे़ङ्हाॽ तुम्मादे़न् साःङ्गाहिम्मो मे़लासे़ल्ले़ इग्र ले़त्ति तोःम्मादे़न्नो मे़बेःल्ले़ खे़ङ्हाॽरे़ खुन्छिॽ लाङ् हुक्हाॽ वामे़हप्तु॥
33खे़ब्याङ् मोसाःल्ले़ सेसे साःङ्गाहिम् नु ले़त्ति तोःम्मादे़न् के़रे़क् पिसाङ् लक्खुम्मिल्ले़ कुया फोःक्खु, हे़क्क्याङ् लक्खुम्मोबा लाम्धेःत्तोबा फोःन्दान् फोःन्दु॥ कम्भलॽरिक् मोसाःल्ले़ याःम्बक् चोःक्मा सुरुरो॥
यहवे दाङ्बे़ल्ले़ कुमिमिदिङ्
(खानिःत् ९:१५-२३)
34खे़ब्याङ् तुम्मादे़न् साःङ्गाहिम्मिन् खाॽमिःत्तिल्ले़ पन्छु, हे़क्क्याङ् यहवे दाङ्बे़ल्ले़ कुमिमिदिङ्ङिल्ले़ सेसे साःङ्गाहिम्मिन् सधे़क् तिम्से़॥ 35खम्भ्याङ् तुम्मादे़न् साःङ्गाहिम्मो मोसान् लाःप्मा मे़सुक्ते़न्, थेआङ्भे़ल्ले़ खे़न् खाॽमिःत्तिन् खे़प्मो हाबा पत्छे़गरे़, हे़क्क्याङ् यहवे दाङ्बे़ल्ले़ कुमिमिदिङ्ङिल्ले़ सेसे साःङ्गाहिम्मिन् सधे़क् तिम्से़॥
36इस्राइलिहाॽरे़ खुन्छिॽ के़रे़क् लाम्दिःक्हाॽओ, आल्ल खे़न् खाॽमिःत्तिन् सेसे साःङ्गाहिम्मोलाम् थाःङ् पोगे़ल्ले़ खे़ङ्हाॽ तगि मे़धासिङ्॥ 37कर खे़न् खाॽमिःत्तिन् थाःङ् मे़म्बोःक्के आक्खे़न्द्यान् थारिक् खे़न् खे़प्मो पत्छे़ खे़म्म्याक् थारिक् खे़ङ्हाॽ मे़न्धासिङ्ङे़न्॥ 38खे़ल्ले़चोगुल्ले़ के़रे़क् इस्राइलिहाॽरे़ खुन्छिॽ हिम्सयङ् तगि नु खे़ङ्हाॽरे़ खुन्छिॽ के़रे़क् लाम्दिक् खाराक् ले़न्दिक् यहवे दाङ्बे़ल्ले़ कुघाॽमिःत्ते़न् सेसे साःङ्गाहिम्मो पत्छे़, हे़क्क्याङ् से़न्दिक् चैँ खाॽमिःत्तो मि पत्छे़रो॥
Currently Selected:
लाम्दिक् 40: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
