लाम्दिक् 38
38
वयागे़न् सिदुङ्जभा ले़त्ति तोःम्मादे़न्
1बजले़लरे़ मिधिङ्मनादेमनाबा वयागे़न् सिदुङ्जभा तोःम्मारे़ लागि बबुल सिङ्ङिल्ले़न् ले़त्ति तोःम्मादे़न् चोगु॥ खे़ल्ले़ हुक्सिक् ङासि कुलाम्ति, हुक्सिक् ङासि कुभे़रे़, कुसुक्पा लिसि के़बप्पा नु हुक्सिक् सुम्सि के़बप्पा कुलिङ्गे़न् चोगे़॥ 2खे़ल्ले़ लिसिए कुसुक्पो खुने़ॽ चम्बे़प्पा कुदाङ्हाॽ चोगु॥ खे़न् कुदाङ्हाॽ नु ले़त्ति तोःम्मादे़न्निन् हाबा खे़न् लत्छा कुआःत् सिङ्ङिल्ले़न् वये़, हे़क्क्याङ् खुने़ॽ खे़न् कासाःल्ले़ सुःप्तु॥ 3खे़ल्ले़ ले़त्ति तोःम्मादे़न्नोबा के़रे़क् सामा पुमाहाॽ, लङ्घत्हाॽ, साङ्मा छे़ःङ्ग्याहाॽ, सा लक्मा सुम्जुलिहाॽ नु मि ने़मा खाम्ले़क्हाॽ—कासाःल्ले़न् चोगु॥ 4ले़त्ति तोःम्मादे़न्निल्ले़ लागि खे़ल्ले़ कुसिगाङ् के़रे़क् पिसाङ् कुगःङ्ग्याःल्ले़ कुसिगाङ् कुयाम्ले़ङ्बा कब्रिङ् कुलुम्मो थारिक्के के़गे़प्पा कासा चिॽलिङ्गे थिक् चोगु॥ 5खे़न् कासा चिॽलिङ्गेल्ले़ लिसि कुसुक्पो तक्लाङ्हाॽरे़ कुलिःङ्मादे़न् फम्मारे़ लागि खे़ल्ले़ लिसि कुन्दुल्लोहाॽ फत्छु॥ 6तक्लाङ्हाॽ बबुल सिङ्ङिल्ले़न् चोगुआङ् खुने़ॽ खे़न् कासाःल्ले़ सुःप्तु॥ 7खे़न् तक्लाङ्हाॽ ले़त्ति तोःम्मादे़न्निल्ले़ कुयाओबा कुन्दुल्लोहाॽओ खे़न् पङ्मारे़ लागि थे़क्तु॥ खे़ल्ले़ खे़न् सिङ्भे़ल्ले़क्हाॽलाम् खे़न् कुहोःन्द्रा के़बप्पा चोगुरो॥
च्वाःत् याङ्मा कासा खप्प्या
(ला ३०:१८)
8खे़ल्ले़ तुम्मादे़न् साःङ्गाहिम्मोबा लाःप्मादे़न्नो माङ्से़वा के़जोःक्मा मे़न्छुमाहाॽरे़ खुन्छिॽ थोॽसिङ्मा से़ले़ङ्घोहाॽलाम् हप्सिङ्मा कासा छे़ङ्ग्या नु खे़ल्ले़ कुलाङ् चोगुरो॥
लक्खुम्
(ला २७:९-१९)
9खे़ब्याङ् खुने़ॽ लक्खुम् चोगु॥ खे़ल्ले़ यो ले़प्माङ्बा लक्किल्ले़ कुलाम्तिःन् किप् थिक् हुक्सिक् ने़स्से़, हे़क्क्याङ् खे़प्मो चुन्जुन् लॽरिक् फमनाबा नैनासुत् चिरिक्किल्ले़न् फोःन्दाहाॽ पत्छे़॥ 10खे़प्मोबा सित्लाङ्हाॽ निबोङ् नु खे़ल्ले़ कुबुङ्हाॽआङ् निबोङ् कासाःल्ले़न् युङे़॥ सित्लाङ्ङोबा खे़ःक्चुरिहाॽ नु खे़ल्ले़ कुउःङ्मा कुनाम्हाॽ युप्पाःल्ले़न् वये़॥ 11थो ले़प्माङ्बा कुलक्किल्ले़ लागिआङ् किप् थिक् हुक्सिक् कुलाम्ति के़बप्पा फोःन्दाहाॽ नु खे़प्मोबा निबोङ् सित्लाङ्हाॽ हे़क्क्याङ् खे़ल्ले़ कुबुङ्हाॽआङ् निबोङ्ङे के़रे़क् कासाःल्ले़न्ने़ युङे़॥ कर सित्लाङ्हाॽरे़ कुउःङ्मा खे़ःक्चुरिहाॽ नु कुनाम्हाॽ युप्पाःल्ले़न् पत्छे़॥
12नाम्धा पिसाङ्ले़ लागि ङाबोङ् हुक्सिक् कुलाम्ति के़बप्पा फोःन्दाहाॽ पत्छे़॥ खे़प्मोबा सित्लाङ्हाॽ थिबोङ् नु कुयुक्नाहाॽ थिबोङ्ङे युङे़, कर सित्लाङ्हाॽओबा खे़ःक्चुरिहाॽ नु कुनाम्हाॽ युप्पाःल्ले़न् पत्छे़॥ 13सेसे साःङ्गाहिम्मे़ल्ले़ कुदगाङ् ले़प्माङ् नाङ्गे़न् ले़प्माङ्बा कुभे़रे़न् ङाबोङ् हुक्सिक् ने़स्से़॥ 14यम्बा लाम्धेःत्तोबा थिक्नाहाङ् ले़प्माङ्बाल्ले़ लागि थिबोङ्ङाङ् ङासि हुक्सिक् कुलाम्ति के़बप्पा फोःन्दाहाॽ पत्छे़॥ खे़प्मोबा सित्लाङ्हाॽ सुम्सि नु कुयुक्नाहाॽआङ् सुम्सिए युङे़॥ 15वेॽ ले़प्माङ्बाल्ले़ लागि अक्तङ्बाए चोगे़॥ लक्खुम्मोबा लाम्धेत् चुप्साङ् नु फे़न्छाङ् ले़प्माङ् थिबोङ्ङाङ् ङासि हुक्सिक् कुलाम्ति के़बप्पा फोःन्दाहाॽ पत्छे़॥ खे़प्मोबा सित्लाङ्हाॽ सुम्सि नु खे़ल्ले़ कुयुक्नाहाॽ सुम्सिए युङे़॥ 16लक्खुम् के़रे़क् पिसाङ् के़रे़क् फोःन्दाहाॽ चुन्जुन् लॽरिक् फमनाबा चिरिक्किल्ले़न् पत्छे़॥ 17सित्लाङ्ङिल्ले़ कुबुङ्हाॽ कासाःल्ले़न् युङे़, कर सित्लाङ्हाॽओबा खे़ःक्चुरिहाॽ नु कुउःङ्मा कुनाम्हाॽग युप्पाःल्ले़न् पत्छे़॥ खे़ल्ले़ कुसम्हाॽ युप्पाःल्ले़ मे़सुःप्तुआङ् पत्छे़॥ लक्खुम्मोबा के़रे़क् सित्लाङ्हाॽरे़ कुउःङ्मा कुनाम्हाॽ युप्पाःल्ले़न् पत्छे़॥
18लक्खुम्मोबा यम्बा लाम्धेःत्तोबा फोःन्दान् फुङ् के़लक्पे़ल्ले़ कुयाःम्बक् के़लाःप्पा हिःक्कङ्कङ्बा, पारान्ला, हे़ःत्ताङ्बा खि नु चुन्जुन् लॽरिक् थाक्मनाबा नैनासुत् चिरिक्लाम् मे़जोगुबा चोगे़॥ खे़ल्ले़ कुलाम्तिःन् निबोङ् हुक्सिक् नु कुलिङ्गे़न्निन् लक्खुम्मोबा फोःन्दाःन्नु कुदङ्बा हुक्सिक् ङासि के़बप्पा चोगे़॥ 19खे़प्मोबा सित्लाङ्हाॽ लिसि नु खे़ल्ले़ कासा कुयुक्नाहाॽ लिसिए युङे़॥ खे़प्मोबा खे़ःक्चुरिहाॽ नु कुउःङ्मा कुनाम्हाॽ युप्पाःल्ले़न् पत्छे़, हे़क्क्याङ् खे़ल्ले़ कुसम्हाॽआङ् युप्पाःल्ले़ मे़सुःप्तुआङ् पत्छे़रो॥ 20सेसे साःङ्गाहिम् नु खे़न् कब्रिङ् पिसाङ्बा लक्खुम्मोबा के़रे़क् कुउःङ्मा लक्चुहाॽ कासाःल्ले़न् युङे़रो॥
सेसे साःङ्गाहिम् चोःक्मा चिगक्वाहाॽ
21माङ्हुप् साप्लुङ् के़याक्पा निङ्वाॽफुमाङ् सन्दोक् के़युङ्बा सेसे साःङ्गाहिम्मिल्ले़ लागि ओगप् के़बोङ्बा चिगक्वा सामाहाॽ मोसाःल्ले़ इङ्जाङ् पिरुसिबा कुइसिक् निङ्वाॽफुसाम्बा हारुनरे़ कुस्सा इतामारलाम् ले़बिहाॽरे़ मे़जोगुआङ् वये़बा पाःन्हाॽरे़ पोधक्किन् हाबा कन्लो॥
22(यहवे दाङ्बे़ल्ले़ मोसान् इङ्जाङ् पिरुबा कुइसिक् यहुदारे़ कुधाःक्कोबा हुरे़ल्ले़ कुम्मे़न्छाॽ, उरिःल्ले़ कुस्सा बजले़लरे़ के़रे़क् पाःन्हाॽ चोगु॥ 23खुने़ॽनु दानरे़ कुधाःक्कोबा अहिसामाक्के़ल्ले़ कुस्सा ओहोलिआबे़न् चोबेगु याःम्बक् चोःक्मा, हे़क्क्याङ् चइःत्हाॽ चोःक्मा नु हिःक्कङ्कङ्बा, पारान्ला, हे़ःत्ताङ्बा खि खे़ब्याङ् चुन्जुम्बा नैनासुत् चिरिक्को फुङ् लक्मा कुहुक्वा के़नुॽबा वये़सि॥) 24सेसेदे़न्नोबा के़रे़क् याःम्बक्हाॽरे़ लागि थाःङ् पङ्मनाबा सिदुङ्जभाओबा के़रे़क् साम्म्याङ्ङिन्, सेसेदे़न्नोबा सेकेलरे़ कुधाङ्मा कुइसिक् २९ तोरा नु ७३० सेकेल वये़॥
25सङ्जुम्भोओ याम्नाःत्निःत् मे़जोगुसिबा मनाहाॽरे़ खुन्छिॽ युप्पान् सेसेदे़न्नोबा सेकेलरे़ कुधाङ्मा कुइसिक् १०० तोरा नु १,७७५ सेकेलबा वये़— 26तङ्बे निबोङ् नु खे़न्नुःल्ले़ यरिक् तङ्बे के़गे़प्पा मनाहाॽ मे़निरुसिआङ् मे़वये़, खे़ङ्हाॽ ६०३, ५५० मनाहाॽ के़रे़क्लाम्बा बेका थिक्थिक् इग्र, सेसेदे़न्नोबा कुधाङ्मे़ल्ले़ कुभ्रे़ःङ् सेकेल वये़॥ 27१०० तोरान् सेसेदे़न् नु फोःन्दाहाॽरे़ कुयुक्नादे़न्हाॽ योःम्मारे़ लागि वये़॥ लत्छा कुयुक्ना थक्मा तोरा थिक् यागे़, के़रे़क् कुयुक्नादे़न्हाॽओ १०० तोरा यागे़॥ 28खे़न् १,७७५ सेकेललाम् खे़ङ्हाॽरे़ सित्लाङ्हाॽरे़ लागि खे़ःक्चुरि मे़जोगु, खे़ल्ले़ कुसम्हाॽ मे़सुःप्तु हे़क्क्याङ् कुउःङ्मा कुनाम्हाॽ मे़जोगु॥
29थाःङ् पङ्मनाबा सिदुङ्जभाओबा कासान् ७० तोरा नु २,४०० सेकेलबा वये़॥ 30हाबा खे़न्लाम्बाए खे़ङ्हाॽरे़ तुम्मादे़न् साःङ्गाहिम्मोबा लाम्धेःत्तिल्ले़ लागि कुयुक्नाहाॽ, कासा ले़त्ति तोःम्मादे़न् हे़क्क्याङ् खे़ल्ले़ लागि कासा चिॽलिङ्गेॽ नु ले़त्ति तोःम्मादे़न्नोबा के़रे़क् सामाहाॽ, 31खे़ब्याङ् के़रे़क् पिसाङ्बा लक्खुम्मोबा कुयुक्नाहाॽ नु लक्खुम्मोबा यम्बा लाम्धेःत्तोबा कुयुक्नाहाॽ, हे़क्क्याङ् सेसे साःङ्गाहिम्मोबा के़रे़क् कुउःङ्मा लक्चुहाॽ नु लक्खुम्मोबा के़रे़क् पिसाङ्बा कुउःङ्मा लक्चुहाॽ मे़जोगुरो॥
Currently Selected:
लाम्दिक् 38: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
