लाम्दिक् 15
15
मोसाःल्ले़ कुसाम्लो
1खे़ब्याङ् मोसान् नु इस्राइलिहाॽरे़ यहवे दाङ्बे़ल्ले़ कुनारा मे़भोसुर साम्मे़लोरे़रो—
“आङ्गाॽ यहवे दाङ्बे़ल्ले़ कुनारा फोसुङ्ल साम्लोआरो
थेआङ्भे़ल्ले़ खुने़ॽ मिङ्सो थाःङ्सोनु थङ् नाःन्दुआङ् वाॽरो,
खुने़ॽ अन्हाॽ नु अन्गे़युक्पाहाॽ सोरिक् वरःङ्ङो
लाप्फुसु केःत्तुसिआङ् वाॽरो॥
2“यहवे दाङ्बा मुक्साम्दाङ्बे़ल्ले़ आङ्गाॽ नाङ्ङा थेःक्कारो,
खुने़ॽए आङ्गाॽ ताङ्से़ःप्पारो॥
खुने़ॽ आङ्गाॽ आनिङ्वाॽफुमाङ्लो,
आङ्गाॽ खुने़ॽ कुनारा फोसुङ्लो,
खुने़ॽ आङ्गाॽ आम्बारे़ कुनिङ्वाॽफुमाङ्लो
आङ्गाॽ साम्लो साम्मे़त्तुङ्ङाङ् कुनारा फोसुङ्लो॥
3यहवे दाङ्बाङ्ग थङ् के़धक्पारो,
खुने़ॽ कुमिङ्ग यहवे दाङ्बारो॥
4फारोल्ले़ कुधक्सुबाहाॽ नु कुअन्लाधाहाॽ
खुने़ॽ वरःङ्ङो लाप्फुसुसिरो,
फारोल्ले़ के़रे़क्नुःल्ले़ नुबा थोधोक्पा कुसुहाङ्गे़म्बाहाॽ
हे़ःत्ताङ्बा वरःङ्ङो मे़हुमे़रो॥
5कुदिःम्बे केःम्बा वरःङ्ङिल्ले़ खे़ङ्हाॽ हुम्सु देसुसिरो,
हे़क्क्याङ् खे़ङ्हाॽ लुङ् हे़क्के वरःङ्सिगाङ् मे़निबे़ मे़लासे़रो॥
6यहवे दाङ्बाए, खे़ने़ॽ के़जुक्वा हुक्को
किप्मा के़घुबा मुक्साम् यागे़रो,
यहवे दाङ्बाए, खे़ने़ॽ के़जुक्वा हुक्किल्ले़
निङ्मिहाॽ स्याक् स्याक् के़भुॽरुसिरो॥
7“आदाङ्बारे़ के़दक्ले़ङ्वाओ के़बोक्पाहाॽ,
आदाङ्बारे़ थोधोबा के़हाङ्वा के़माङ्वाःल्ले़ खे़ङ्हाॽ यो के़धासुसिरो॥
मि हे़क्के के़दिःप्पा के़सिक् पोःक्मान् ओःन्गे़धाक्तुसिरो,
खे़ल्ले़ खे़ङ्हाॽ याॽलाङ् कुइसिक् खाप्पुथ्यःङ् चोगुसिरो॥
8खे़ने़ॽ के़सक्माःल्ले़ वरःङ्ङिन् के़मुःत्तुरो,
हे़क्क्याङ् च्वाःत्तिन् लुःप्पे़त् लुम्सिङ्लो,
हे़क्क्याङ् खे़न् वइक्लान् लुङ्धाक् हे़क्तङ्बा पोःक्खे़आङ् ये़म्सिङ्लो,
कुदिम्बे केःम्बा च्वाःत्तिन् वरःङ्ङिल्ले़ कुलुम्मो ताक्तुरो॥
9निङ्मिःल्ले़ पाःत्तु, ‘आङ्गाॽ खे़ङ्हाॽ नाःत्तुङ्सिङ्लो,
खे़ङ्हाॽ नाप्तुङ्सिङ्बा सामाहाॽ फःक्खुङ्लो॥
आङ्गाॽ खे़ङ्हाॽ आबाःप्पात् मे़त्तुसिङ्लो
आङ्गाॽ आदाभेन् तरप् फिःक्खुङ्लो,
हे़क्क्याङ् आहुक्किल्ले़ खे़ङ्हाॽ मे़क्खुङ्सिङ्लो॥’
10कर यहवे दाङ्बे, खे़ने़ॽ के़सक्माःल्ले़ के़मुःत्तुरो,
हे़क्क्याङ् मिस्रिहाॽ वरःङ्ङो मे़हुमे़ मे़लासे़रो,
किप्मा पघुगे़घुबा च्वाःत्तो खे़ङ्हाॽ माक्लुम्बा हे़क्के मे़निबे़ मे़लासे़रो॥
11यहवे दाङ्बाए, माङ्हाॽओ खे़ने़ॽ हे़क्तङ्बा हात् वाॽबे?
सेसे साङ्साङ्ङो खे़ने़ॽ हे़क्तङ्बा निङ्वाॽ के़माबा हात् वाॽबे?
हाःत्ले़ खे़ने़ॽ हे़क्के निङ्वाॽरे़ मे़न्धाप्मनाबा नु
मुक्साम्साबा याःम्बक् चोःक्मा सुक्तुबे?
12“खे़ने़ॽ के़जुक्वा हुक्किन् के़सन्छुरो
हे़क्क्याङ् इक्सादिङ् खाम्बेःक्माल्ले़
आनिगे निङ्मिहाॽ लरुदेसुसिरो॥
13माङ्हुप् के़जोगुबा पाःन्नो आदाङ्बा नसाःन्साबा के़जोःक्लो,
हे़क्क्याङ् आदाङ्बारे़ के़से़ःप्तुसिबा के़मनाहाॽ
चक्मे़ल्लॽए लुङ्माॽ के़दुक्तुसिरो,
आदाङ्बारे़ के़मुक्साम्मिल्ले़ खे़ङ्हाॽ
के़सेसे युङ्मादे़न्नो लाम्गे़लोसुसिरो॥
14मे़न्छाम् सुवाङ्हाॽरे़ मे़घे़प्सुआङ् मे़वाॽरो,
हे़क्क्याङ् खे़ङ्हाॽ किमाल्ले़ थे़गक्कक् मे़यङ्लो,
पलिस्त लाजेॽबा मनाहाॽ यङ्मा के़रे़आङ् वाॽरो॥
15एदोमबा लाम्लोबाहाॽ साॽरिक् खुन्छिॽ यङ्मा के़रे़आङ् वाॽरो,
मोआबबा के़धुम्बा मनाहाॽ चिरिम्लिम्ना मे़यङ्ल मे़वाॽरो,
कनानबा यक्युङ्बाहाॽरे़ खुन्छिॽ सक्मा पुॽरे़आङ् वाॽरो॥
16खे़ङ्हाॽ किमा नु यङ्मा के़प्माल्ले़ सुःप्तुसिआङ् वाॽरो॥
यहवे दाङ्बाए! खे़ङ्हाॽरे़ खे़ने़ॽ के़मुक्साम्मिन् मे़निसुरो,
खे़ने़ॽ योःक्लाम् के़से़न्दु के़भे़त्तुसिबा के़मनाहाॽ,
लाङ्मे़घेःक्काङ् नाधाःम्बि मे़बेःक्किल्ले़
निङ्मिहाॽ किमाल्ले़ चिरिम्लिम्ना मे़यङ्ङाङ् मे़म्बाःत्ते मे़ये़प्लो॥
17खे़ने़ॽ खे़ङ्हाॽ के़भे़त्तुसिआङ् के़गोःक्माओ के़युक्खुसिरो,
खे़ने़ॽ आदाङ्बा यहवे दाङ्बे़ल्ले़ खे़न् ते़न्निन्,
के़युङ्मादे़न् चोःक्मारे़ लागि के़सेगुआङ् ने़रो,
खे़न् सेसेदे़न्निन्, आबाङे के़हुक्किल्ले़ के़जोगुआङ् ने़रो॥
18“यहवे दाङ्बाए, खे़ने़ॽ सदादिङ्
आभे़ल्ले़साङ् हाङ् के़बोङ्लो॥”
मिरियमरे़ कुसाम्लो
19इस्राइलिहाॽ वरःङ्ङिल्ले़ कुलुम्मो खाम्बाङ्ङो लाङ्मे़घेगे़आङ् मे़बे॥ कर फारोल्ले़ कुअन्लाधाहाॽ नु कुअन् के़युक्पाहाॽ वरःङ्ङो मे़लासे़ल्ले़, यहवे दाङ्बे़ल्ले़ च्वाःत्तिन् याङ्यो पाङ्घुयुसु हे़क्क्याङ् खे़ङ्हाॽ च्वाःत्तो मे़हुमे़॥ 20हारुने़ल्ले़ कुन्ने़ॽ माङ्निङ्वाॽपान् के़बाःप्मा मिरियम्मिन् हुक्को खित्चिङ् खित्चिङ् के़लॽबा मुक्लाःन् याङ्सिङ् हे़क्क्याङ् के़रे़क् मे़न्छुमाहाॽ मे़लाःक्खे़र खित्चिङ् खित्चिङ् के़लॽबा मुक्लाःन् मे़मुक्खुर, खे़ल्ले़ कुएगाङ् कुएगाङ् मे़धासिङ्॥ 21मिरियम्मिन् अक्खेलॽरिक् साम्लोरे़रो—
“यहवे दाङ्बान् कुनारा फोसे़म्मे़र साम्लोरे़म्मे़ॽओ,
थेआङ्भे़ल्ले़ खुने़ॽ मिमिदिङ्गे़न् थङ् नाःन्दुआङ् वाॽरो,
खुने़ॽ अन्हाॽ अन्गे़युक्पाहाॽनु सोरिक्
वरःङ्ङो लाप्फुसु याक्तुसिरो॥”
साक्खिःक् के़घिःक्पा च्वाःत्
22खे़ब्याङ् मोसाःल्ले़ इस्राइलिहाॽ हे़ःत्ताङ्बा वरःङ्ङोलाम् सुर मे़प्मनाबा मुरे़क् खारे़क् थेआङ् के़होःप्पादे़न् ले़प्माङ् लाम्लोसु तेॽरुसि॥ सुम्यान् थारिक् खे़ङ्हाॽ मुरे़क् खारे़क् थेआङ् के़होःप्पादे़न्निल्ले़ कुलुम्मोलाम् मे़बे हे़क्क्याङ् खे़ङ्हाॽरे़ थुङ्मा च्वाःत् मे़ङ्घोसुन्॥ 23खे़ब्याङ् खे़ङ्हाॽ मारा मे़प्मनाबादे़न्नो मे़गे़रे़ कर खे़प्मोबा च्वाःत्तिन् साक्खिःक् खिःक्ते़आङ् हाःत्ले़आङ् थुङ्मा मे़न्छुक्तुन्॥ खे़ल्ले़चोगुल्ले़ खे़न् ते़न्निन् मारा#१५:२३ “मारा” खे़ल्ले़ कुबेन् साक्खिःक् के़घिःक्पा पोङ्ॽ॥ मिङ् मे़वाःत्तु॥ 24खे़ब्याङ् मनाहाॽ मोसान् ले़प्माङ् मे़हिसिङ्ङाङ् मने़धिक्मा मे़हेःक्ते़, हे़क्क्याङ् खे़ङ्हाॽरे़ अक्खे मे़बाःत्तु, “आल्ल आनिगे थेःन् थुङुम्बे़बाबे?”
25मोसाःल्ले़ यहवे दाङ्बान् कुलुङ्माॽ कुसोःम्मालाम्मे पेलि फाक्तु हे़क्क्याङ् यहवे दाङ्बे़ल्ले़ खुने़ॽ लत्छा सिङ्भे़ल्ले़क् थिक् ओःन्धाक्तु॥ मोसाःल्ले़ खे़न् सिङ्भे़ल्ले़क्किन् च्वाःत्तो लाप्फुसु केःत्तु खे़ब्याङ् च्वाःत्तिन् थुङ्मा के़नुॽबा पोःक्खे़॥
आम्भा खे़न् ते़न्नो यहवे दाङ्बे़ल्ले़ खे़ङ्हाॽरे़ खुन्छिॽ निङ्वाॽ साॽमारे़ लागि कन् थिम्मिन् नु इङ्जाङ्ङिन् पिरुसि॥ 26हे़क्क्याङ् खुने़ॽ पाःत्तु, “यहवे दाङ्बा खिनिॽ आबाङे निङ्वाॽफुमाङ्ङिल्ले़ कुबाःन्निन् ये़क्ये़क्काङ् के़घे़प्सुम्, खुने़ॽ कुनिमो आत्तिन् पाःन्निन् कुदोःप्मा चोक् खे़न् के़जोगुम्, हे़क्क्याङ् खुने़ॽ कुइङ्जाङ्हाॽ निङ्वाॽ के़बिरुम्, खे़ब्याङ् खुने़ॽ कुधिम्हाॽ इःप्मा नाःप्मा के़दे़न्दिने़भग्र, आङ्गाॽ मिस्रिहाॽरे़ खुनिॽ सम्धाङ् तारुङ्बा तुक्मा लाःक्माहाॽ खिनिॽ सम्धाङ् लत्छाआङ् मे़दाःत्तान्, थेआङ्भे़ल्ले़ खिनिॽ के़वेःम्बा आङ्गाॽ यहवे दाङ्बाआरो॥”
27कुदाःन्दिक्मा खे़ङ्हाॽ एलिम्मो मे़गे़रे़, खे़प्मो थिबोङ्ङाङ् ने़त्छि च्वाःत् वाबुन्दाक्हाॽ ने़स्से़ हे़क्क्याङ् नुबोङ् खे़बक्सिङ्ङिल्ले़ कुबुङ्हाॽ युङे़॥ हाबा खे़न् च्वाःत्हाॽरे़ कुबेसाङ् खे़ङ्हाॽरे़ साःङ्गाहिम् मे़घिङ्घुरो॥
Currently Selected:
लाम्दिक् 15: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
