लाम्दिक् 12
12
चोःक्युम्भो खोमा तङ्नाम्
1मिस्र लाजेॽओ यहवे दाङ्बे़ल्ले़ मोसान् नु हारुने़न् अक्खे मे़त्तुसि, 2“कन् लाःन् खिनिॽ लागि तङ्बेःल्ले़ कुहेःक्सिङ्मा ला पोङ्ॽ॥ 3इस्राइलबा के़रे़क् मनाहाॽ अक्खे मे़त्ते़से़ॽ, ‘कन् लाओबा थिबोङ् ये़न्नो इस्राइलबा के़रे़क्ले़ आबाङे आबाङे खिनिॽ हिम्सयङ्ले़ लागि लत्छा मे़ल्लुक्साःत् इग्र मे़ःन्दाज्याःक् थिक् तारे़म्मे़ॽआङ् से़रे़म् च्ये़म्मे़ॽ॥ 4कुभारे़ खुन्छिॽ हिम्सयङ्ङो चबे़ःत्छिक्लक् मना मे़वाॽआङ् मे़ःन्दाज्याःक् थिक् चामा माःम्मा मे़न्छुक्तुन्ने़भग्र खुन्छिॽ के़रे़क् आक्ख्यारिक् के़जाबा मे़वाॽ हे़क्क्याङ् के़रे़क्ले़ आक्खे़न् चामा मे़सुक्तुॽ, खुन्छिॽ मे़निःत्छिङ्ङाङ् हिम्सयङ्ङिल्ले़ कुहिम्बेसाङ्बान्नु खे़न् मे़ःन्दाज्याःक्किन् मे़भःक्खु मे़जसाङ् पोङ्ॽ॥ 5मे़ल्लुक्साःत् इग्र कुम्बाबा मे़ःन्दाज्याःक् थेसाङ् पोङ्ॽ, कर खे़न् तङ्बे थिक् के़गे़प्पा नु याङ्घेःक् मे़म्बप्मनाबा पोङ्मा पोङ्ॽ॥ 6खिनिॽ खे़न् लाओबा थिबोङ्ङाङ् लिसि ये़न् थारिक् कत्ते़म्मे़ॽ, हे़क्क्याङ् इस्राइलि सङ्जुम्भोबा मनाहाॽरे़ युःन्छिक् खे़न् मे़से़रुर॥ 7खे़ब्याङ् आत्तिन् आत्तिन् हिम्मो खे़न् मे़ल्लुक्साःत् इग्र मे़ःन्दाज्याःक् सान् मे़ज, खे़न् हिम्मोबा लाम्धेत् सम्धाङ् नु लाम्धेत् सित्लाङ्हाॽओ खे़न् सामाक्खिॽइन् मुहुःत्तुर॥ 8खे़ङ्हाॽरे़ हाबा खे़न् से़न्दिक् खे़न् सान् मे़ओॽरुआङ् के़भङ्बा सिदाॽ मे़म्भःन्नेबा खरे़ःङ्ङिन्नु मे़जर॥ के़घिःक्पा नुधिःन्नु खे़ङ्हाॽरे़ खे़न् मे़जर॥ 9खे़न् सान् कुमाङ्वा इग्र च्वाःत्तो हाङ्वा मे़लक्ते़म्मिन्ने़ॽआङ् मे़जे़म्मिन्ने़ॽ कर कुधे़गेःक्किन् कुभुम्बा, कुहिदुत् कुधे़गाङ्मानु सोरिक् मिओ ओॽरे़म्मे़ॽआङ् चाम्मे़ॽ॥ 10साःल्ले़ कुलक्हाॽ तानाम् थारिक् कुधेथिक्काङ् मे़नन्छे़म् मे़युक्खे़म्मिन्ने़ॽ, कर कुभा नरे़ने़भग्र मिओ खे़न् ओॽरे़म् तेसे़म्मे़ॽ॥ 11खिनिॽ खे़न् हाराहारा चे़म्मे़ॽ थेआङ्भे़ल्ले़ खिनिॽ लाङ्ङो लाङ्सुःप् चाङ्मा हे़क्क्याङ् हुक्को तक्कात् याङ्सिङ्माआङ् लाम्दिक् चोःक्मारे़ लागि फॽइ युम्माआङ् युङ्मा पोङ्ॽ॥ कन् चोःक्युम्भो#१२:११ हिब्रु पाःन्दाङ्ङोलाम् के़युबा चोःक्युम्भो तङ्नाम्मिन् मे़ल्लुक्साःत्तिन् इग्र मे़ःन्दाज्याःक्किन् सिदुङ्जभा चोःक्माआङ् इस्राइबा तुम्बा साहाॽ से़ःप्मासि के़लॽबा पोङ्ॽ॥ कन् चोःक्युम्भो तङ्नाम्मिङ्ग निङ्वाॽफुमाङ्ङिन् इःप्मनाबा नु खुने़ॽ मिङ्सो इङ्धाङ् पिमनाबारो तङ्नाम्मिन् यहवे दाङ्बे़ल्ले़न्लो॥
12“‘खे़न् से़न्दिक् आङ्गाॽ मिस्र लाजेॽलाम् पोङ्ङाआङ् पेःक्का हे़क्क्याङ् मिस्रओ के़वाॽबा के़रे़क् तुम्बा साहाॽ नु पित् थक्साहाॽरे़ तगि मे़धाप्तुसिबा पित्सात्हाॽ आङ्गाॽ स्ये़रुङ्सिङ्ॽ हे़क्क्याङ् मिस्रबा के़रे़क् माङ्हाॽ खुम्दिङ् पिरुङ्सिङ्ॽ॥ आङ्गाॽ यहवे दाङ्बाआ॥ 13खिनिॽ के़युङिबा हिम्हाॽओ लाम्धेत् सित्लाङ्ङो हुःप्मनाआङ् के़बप्पा खे़न् माक्खिन् मिक्सेःन् पोङ्ॽ॥ खे़न् माक्खिन् आङ्गाॽ निसुङ्ङाङ् आङ्गाॽ खिनिॽ काःक्निङ् थानिङ्ॽ हे़क्क्याङ् आङ्गाॽ मिस्रिहाॽ खुम्दिङ् पिरुङ्सिङ्बा आत्तिन् मिङ्देॽइल्ले़आङ् खिनिॽ के़न्छुसिन्॥
14“‘खे़न् ये़न्नो खिनिॽ लत्छा साम्योबा तङ्नाम् थिक् के़दोसुम्ॽ हे़क्क्याङ् आङ्गाॽ यहवे दाङ्बे़ल्ले़ थे़मा चोगुङ्ङाङ् वये़ खे़न् तङ्नाम्मिल्ले़ खिनिॽ निङ्वाॽसुम् तारु के़बिरिॽ॥ खे़न् तङ्नाम्मिन् सदादिङ्ले़ लागि के़दाबा ये़न्हाॽओ तोसे़म्मे़ॽ॥’”
सिदाॽ मे़म्भःन्नेबा खरे़ःङ् चामा तङ्नाम्
15यहवे दाङ्बे़ल्ले़ पाःत्तु, “नुसि ये़न् थारिक् खिनिॽ सिदाॽ मे़म्भःन्नेबा खरे़ःङ् चे़म्मे़ॽ॥ थिक्सिगेक्पा ये़न्नोए खिनिॽ हिम्मो के़गत्तुम्बा के़रे़क् खरे़ःङ् के़भङ्बा सिदाॽइन् लःत्ते़म् तेसे़म्मे़ॽ थेआङ्भे़ल्ले़ कुभारे़ खे़न् नुसि ये़न् थारिक् खरे़ःङ् के़भङ्बा सिदाॽ याक्मनाबा खरे़ःङ्ङिन् मे़जने़भग्र खे़ङ्हाॽ आङ्गाॽ आमनाहाॽलाम् मे़लःत्तु मे़देसुसिर॥ 16थिक्सिगेक्पा ये़न्नो खिनिॽ लत्छा सेसे चुम्लुङ् चोगे़म्मे़ॽ, नुसि ये़न् के़त्तिल्ले़ वेॽधिक् चोगे़म्मे़ॽ॥ खे़न् ये़न्नो आत्तिन् परिक्पाआङ् याःम्बक् मे़जोगे़म्मिन्ने़ॽ, कुजा थोःक्माआङ्धो वेॽ थे़माआङ् याःम्बक् मे़जोगे़म्मिन्ने़ॽ॥
17“खिनिॽ के़भङ्बा सिदाॽ मे़न्याक्केबा खरे़ःङ् चामा तङ्नाम् तोसे़म्मे़ॽ, थेआङ्भे़ल्ले़ आम्भा कन् ये़न्नो खिनिॽ सुवाङ्हाॽ मिस्र लाजेॽलाम्बा लःत्तुङ् फे़त्तुङ्सिङ्॥ के़दाबा ये़न्नो सदादिङ्ले़ लागि खिनिॽ थाःक्थाःक्को कन् तङ्नाम्मिन् तोमा पोङ्ॽ॥ 18थिक्सिगेक्पा ला थिबोङ्ङाङ् लिसि ये़न् युःन्छिक्काङ्धो निबोङ्ङाङ् निसिगेक्पा ये़न् युःन्छिक् थारिक् खिनिॽ के़भङ्बा सिदाॽ मे़न्याक्मनाबा खरे़ःङ् चे़म्मे़ॽ॥ 19नुसि ये़न् थारिक् खिनिॽ हिम्मो खरे़ःङ् के़भङ्बा सिदाॽ थेआङ् होःप्ल॥ कुभारे़ कन् ये़त्नाम्मो खरे़ःङ् के़भङ्बा सिदाॽ के़याक्पा कुजा मे़जने़भग्र खे़न् वेॽ लाजेॽबा पोङ्साङ्, इग्र आप्फेक् लाजेॽबा पोङ्साङ्, इस्राइलबा सङ्जुम्भोलाम् खे़न् मे़लःत्तु मे़देसुर॥ 20कन् ये़न्हाॽओ खिनिॽ के़भङ्बा सिदाॽ के़याक्पा थे़माआङ् मे़जे़म्मिन्ने़ॽ॥ खिनिॽ आत्ति के़युङिसाङ् के़भङ्बा सिदाॽ मे़न्याक्केबा खरे़ःङ् चे़म्मे़ॽ नुसि ये़न् थारिक् आत्तिन्हाॽरे़आङ् खिनिॽ हिम्मो खरे़ःङ् के़भङ्बा सिदाॽ खोमे़दे़त्ने़न्ल॥”
काःक्माआङ् ले़प्मनाबा तङ्नाम्
21खे़ब्याङ् मोसाःल्ले़ इस्राइलबा के़रे़क् लाम्लोबाहाॽ उःत्तुसिआङ् मे़त्तुसि, “खिनिॽ के़रे़क् हिम्सयङ्ले़ लत्छा लत्छा मे़ल्लुक्साःत् सेगे़म्मे़ॽआङ् से़रे़म्मे़ॽ हे़क्केलॽरिक् खिनिॽ हिम्सयङ्हाॽरे़ काःक्माआङ् ले़प्मनाबा तङ्नाम् तोमा मे़सुक्तुर॥ 22हिसप याःन्निल्ले़ लत्छा चुक्सा कुबोराक् थिक् तारे़म्मे़ॽ, मे़ःन्दसाःत्तिल्ले़ कुमाक्खिॽ याङ्मा खप्प्याओ खे़न् हुम्साम्मे़ॽ हे़क्क्याङ् खिनिॽ हिम्मोबा लाम्धेत् सित्लाङ्हाॽ नु लाम्धेःत्तो थाःङ् माक्खिन् हुःत्ते़म्मे़ॽ॥ तानाम् खाओःत् थारिक् हाःत्ताङ् हिम्मोलाम् लाःक्कात् मे़लःन्ने़न्ल॥ 23थेआङ्भे़ल्ले़ यहवे दाङ्बे़न् मिस्रिहाॽरे़ खुनिॽ से़त्छे़ लाजेॽलाम् पोङ्ङाङ् पेःक्किल्ले़ खे़न् ये़म्मो खुने़ॽ खिनिॽ लाम्धेःप्पोबा सित्लाङ्हाॽओ नु लाम्धेःत्तो थाःङ् माक्खिन् निसुआङ् आसे़त्से़प्पा माङ्लाइङ्बान् खिनिॽ हिम्मिन् काःक्माआङ् खिनिॽ ले़प्मा पाङ्घुॽ॥
24“खिनिॽ नु खिनिॽ मुॽइदाङ्साहाॽरे़ कन् थिम्मिन् सदादिङ्ले़ लागि के़दोसुम्ल पोङ्ॽ॥ 25यहवे दाङ्बे़ल्ले़ खिनिॽ पिमानिङ् फाॽआङ् माङ्हुप् चोगुबा लाजेॽओ के़लासि के़जुरिआङ्साङ् कन् थिम्मिन् खिनिॽ के़इःत्तुम् के़नाःत्तुम्ल पोङ्ॽ॥ 26आल्ल खिनिॽ मुॽइदाङ्साहाॽरे़ कन् तङ्नाम्मिल्ले़ कुबेन् थे़माबे फाॽआङ् सेःन्के़म्दोसिॽ, 27खे़ब्याङ् खे़ङ्हाॽ अक्खे मे़त्ताम्सिम्मे़ॽ, ‘कन् यहवे दाङ्बे़न् मिङ्सो इङ्धाङ् पिमनाआङ् तोःम्मनाबा काःक्माआङ् ले़प्मनाबा वयागे़न् सिदुङ्जभा तङ्नाम्लो थेआङ्भे़ल्ले़ खुने़ॽ मिस्रओ के़ने़बा इस्राइलिहाॽरे़ खुन्छिॽ हिम्हाॽ काःक्तुआङ् पेःल्ले़ खुने़ॽ मिस्रिहाॽ स्ये़रुसि करसाङ् आनिॽ इस्राइलिहाॽ आदाङ्घे़आङ् वये़॥’” खे़ब्याङ् इस्राइलिहाॽ थुङ्बोहजॽ मे़युङ्सिङ्ङाङ् यहवे दाङ्बान् माङ्से़वा मे़मे़त्तु॥ 28हे़क्क्याङ् खे़ङ्हाॽ मे़बेआङ् यहवे दाङ्बे़ल्ले़ मोसान् नु हारुने़न् मे़त्तुसिबा हे़क्के के़रे़क् पाःन्हाॽ मे़जोगुरो॥
तुम्बा साहाॽ मे़स्ये़
29हे़क्क्याङ् से़न्दिक् से़त्लुम्भक्ते़ल्ले़ यहवे दाङ्बे़ल्ले़ मिस्रबा के़रे़क् तुम्बा साहाॽ स्ये़रुसि, हाङ्युक्नाओ लक्खोबा के़बोङ्बा हाङ्साआङ्धो लुम्बाःत्तो मे़साक्तुसिबा पुङ्लाधाबाहाॽरे़ खुन्छिॽ के़रे़क् तुम्बा साहाॽ स्ये़रुसि॥ पित् थक्साहाॽरे़ तगि मे़धाप्तुसिबा पित्सात्हाॽआङ् मे़स्ये़॥ 30खे़न् से़न्दिक् फारोन्, खुने़ॽ कुसुहाङ्गे़म्बाहाॽ नु वेॽ के़रे़क् मिस्रबा मनाहाॽ मे़सोरे़ मे़लःन्दे़॥ मिस्र लाजेॽओ यम्बा इक्लाओ मे़हाबे़ मे़भिःक्ते़ थेआङ्भे़ल्ले़ खे़प्मो तुम्बा सा मे़न्छ्ये़ने़म्बा हिम्मे होःप्ते़॥
31खे़न् से़न्दिक् फारोल्ले़ मोसान् नु हारुने़न् खुन्छिॽ उःत्छे़ पाङ्घुसिआङ् मे़त्तुसि, “खिन्छिॽ नु खिनिॽ इस्राइलिहाॽ लःन्दे़म्मे़ॽआङ् पेगे़म्मे़ॽ॥ आङ्गाॽ आलाजेन् ले़रे़म्मे़ॽआङ् पेगे़म्मे़ॽ हे़क्क्याङ् खिनिॽ के़बाःत्तुम्बा हे़क्के खिनिॽ यहवे दाङ्बे़न् माङ्से़वा मे़त्ते़म्मे़ॽ॥ 32खिनिॽ के़बाःत्तुम्बा हे़क्के खिनिॽ मे़ल्लुक् मे़ःन्दा नु पित्थक्साहाॽ तेॽरे़म्सिम्मे़ॽआङ् पेगे़म्मे़ॽ॥ कर खिनिॽ के़बेगिल्ले़ आङ्गाॽआङ् हाङ्वागे़न् मुॽइसाम् आबिरे़म्मे़ॽ॥”
33मिस्रिहाॽरे़आङ् इस्राइलिहाॽ हारावरा लाजेन् ले़प्माआङ् पेःक्मा मे़याःन्दुसि॥ खे़ङ्हाॽरे़ मे़बाःत्तु, “खिनिॽ के़म्बेगिन्ने़भग्र आनिगे के़रे़क् स्ये़ॽइगे़॥” 34कल्ले़चोगुल्ले़ इस्राइलिहाॽरे़ खुन्छिॽ मे़सॽरु मे़युक्खुबा फेॽरुम्मिन् के़भङ्बा सिदाॽ याक्मानुःल्ले़ तगि मे़भोःक्खु, हे़क्क्याङ् खे़ङ्हाॽरे़ खुन्छिॽ फेॽरुम् सॽमा फुजिक्हाॽ तेःप्फुङ्हाॽओ मे़सुङुआङ् फक्ताङ्ङो मे़युक्खु॥ 35हे़क्क्याङ् इस्राइलिहाॽरे़ मोसाःल्ले़ मे़त्तुसिबा हे़क्के मे़जोगुआङ् वये़, खे़ङ्हाॽरे़ मिस्रिहाॽलाम्बा साम्म्याङ् युप्पा वाःत्ति सामाहाॽ नु तेःप्फुङ्हाॽ मे़नाःक्तुसि॥ 36यहवे दाङ्बे़ल्ले़ मिस्रिहाॽरे़ इस्राइलिहाॽ नुरिक् मे़मे़त्तुसिर चोगु, हे़क्क्याङ् इस्राइलिहाॽरे़ मे़नाःक्तुबा पाःन्हाॽ मिस्रहाॽरे़ के़रे़क् मे़बिरुसिर चोगु॥ कम्भलॽरिक् मिस्रिहाॽरे़ खुन्छिॽ याङ्साकुन्धेहाॽ इस्राइलिहाॽरे़ मे़देॽरुआङ् मे़बेरो॥
इस्राइलिहाॽरे़ मिस्र लाजेन् मे़ले़रु
37इस्राइलिहाॽ रामसेसलाम् लाङ्मे़घेगे़आङ् सुक्कोत मे़बे॥ लाङे़न्छिङ् तुक्सिग ६,००,००० ये़म्बित्छारक् मे़वये़ हे़क्क्याङ् मे़न्छुमा नु हिन्जाॽबित्छाॽआङ् मे़वये़॥ 38खे़न्नुःल्ले़ वेॽ यरिक् इस्राइलि मेःम्बा मनाहाॽ नु यरिक् मे़ल्लुक् मे़ःन्दा हे़क्क्याङ् पित्हाॽआङ् खुन्छिॽनु मे़बे॥ 39मिस्रलाम्बा मे़भे़त्तुआङ् मे़भे़रे़बा मे़सॽरुबा फेॽरुम्मिन् खे़ङ्हाॽरे़ के़भङ्बा सिदाॽ मे़न्याक्केबा खरे़ःङ् मे़ले़ःक्खु थेआङ्भे़ल्ले़ खे़ङ्हाॽरे़ मिस्र लाजेन् खिमो मे़ले़रुआङ् मे़वये़ खे़ब्याङ् तःक् थोःक्मा नु के़भङ्बा सिदाॽ याक्मनाबा खरे़ःङ् ले़ःङ्माआङ् मे़ङ्घोसुन्॥
40इस्राइलिहाॽ मिस्र लाजेॽओ मे़युङे़बा ४३० तङ्बे के़रे़आङ् वये़॥ 41यहवे दाङ्बे़ल्ले़ कुमनाहाॽओबा के़रे़क् सुवाङ्हाॽ ४३० तङ्बे के़रे़ल्ले़ याःन्दिक्के मिस्र लाजेॽलाम् मे़लःन्दे़॥ 42यहवे दाङ्बे़ल्ले़ खे़ङ्हाॽ मिस्रलाम् लःप्मा फे़प्मासिरे़ लागि से़न्दिक् नाम्दाःत्तात् कम्ब्राङ् मे़त्तुसि॥ खे़न् से़न्दिक्किङ्ग सदादिङ्ले़ लागि यहवे दाङ्बाओ तोःम्मनाबा से़न्दिक्लो, हे़क्क्याङ् इस्राइलिहाॽ से़न्दिक् चाङ्जाङ् युङ्माआङ् आभे़ल्ले़साङ् यहवे दाङ्बे़न् मिङ्सो इङ्धाङ् मे़बिरुर पोङ्लो॥
काःक्माआङ् ले़प्मनाबा तङ्नाम् तोमा थिम्हाॽ
43यहवे दाङ्बे़ल्ले़ मोसान् नु हारुने़न् मे़त्तुसि, “काःक्माआङ् ले़प्मनाबा तङ्नाम् तोमा थिम्हाॽ हाबा कन्हाॽरो—
“कुभा वेॽ लाजेॽबा मनाःल्ले़ काःक्माआङ् ले़प्मनाबा तङ्नाम्बा कुजान् मे़जने़न्ल, 44कर खिनिॽ के़दारुम्बा योःक्किन् खिनिॽ हर्दो के़हे़गुम् के़बिरुम्माङ् वाॽने़भग्र खे़ल्ले़ चररो॥ 45नाम्याक् के़दाःक्पाआङ् याःम्बक् के़जोःक्पा नु कुभा ये़न्ले़ लागि याङ्गे़धोःक्पा मनाहाॽरे़ खे़न् मे़न्जने़ल्ल॥
46“आत्तिन् हिम्मो चामा कुजा मे़धोःक्तुआङ् युङ्, खे़न् आम्भा खे़प्मो चामा माःम्मा पोङ्ॽ॥ हिम्मोलाम् खे़न् लाःक्कात् मे़लःत्ताम्मिन्ने़ॽ॥ खे़न् से़प्मनाबा थक्साःल्ले़ कुलुङ्सिन् ए़ङ्मा मे़नुॽने़न्॥ 47के़रे़क् इस्राइलि सङ्जुम्भोहाॽरे़ कन् चोःक्युम्भो तङ्नाम्मिन् तोमाए पोङ्ॽ॥
48“कर हर्दो मे़न्हे़क्के के़वाॽबा आत्तिन् मनाःल्ले़आङ् खे़न् चामा मे़नुॽने़न्॥ खिनिॽलुम्मो के़युङ्बा कुभा वेॽ लाजेॽबा मनाहाॽरे़ काःक्माआङ् ले़प्मनाबा तङ्नाम्मिन् तोमाआङ् यहवे दाङ्बे़न् मिङ्सो इङ्धाङ् पिमा निङ्वाॽ मे़जोगुने़भग्र तगि खिनिॽ खे़ङ्हाॽरे़ खुन्छिॽ हिम्यसङ्ङोबा ये़म्बित्छाहाॽ हर्दो हे़गे़म् पिरे़म्सिम्मे़ॽ॥ खे़न् एगाङ् खे़न् ये़म्बित्छान् आबाङे लाजेॽओ सागे़वाःन्छिङ्बा इस्राइलि लेःत्ते़म्मे़ॽ हे़क्क्याङ् तङ्नाम् तोमा पाङ्घे़म्मे़ॽ॥ 49आबाङे लाजेॽओ सागे़वाःन्छिङ्बा इस्राइलिहाॽ नु खिनिॽलुम्मो के़युङ्बा वेॽ लाजेॽबा मनाहाॽरे़ लत्छा परिक्पा थिम् इःप्मा नाःप्मा पोङ्ॽ॥”
50के़रे़क् इस्राइलिहाॽरे़ इङ्जाङ्ङिन् मे़इःत्तु मे़नाःत्तु हे़क्क्याङ् यहवे दाङ्बे़ल्ले़ मोसान् नु हारुने़न् मे़त्तुसिबा कुइसिक् खे़ङ्हाॽरे़ मे़जोगु॥ 51आम्भा खे़ल्ले़ याःन्दिक् यहवे दाङ्बे़ल्ले़ के़रे़क् इस्राइलि सुवाङ्हाॽ मिस्रलाम्बा लःत्तु फे़त्तुसिरो॥
Currently Selected:
लाम्दिक् 12: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
