ए़स्तर 6
6
हाङ्ङिल्ले़ मोर्दकैन् इङ्धाङ् पिरु
1खे़न् से़न्दिक् हाङ्ङिन् कुमिक्के मे़युसे़न्॥ खुने़ॽ हाङ्युक् चोगुबा ये़म्मोबा हिन्दोक् पाःन्हाॽ साप्ते़आङ् के़बप्पा साप्मुःन्धुम् साप्पन्निन् ताःप्मा पाङ्घुसिआङ् खे़न् हाङ्ङिन् मे़निरु मे़बिरु॥ 2खे़प्मो लाम्धेत् के़गोबा ने़त्छि सुहाङ्युक्पा बिग्थाना नु तेरेसे़ल्ले़ अहासुरस हाङ्ङिन् से़प्मा चे़म्भन् चोगे़सुबा हे़क्क्याङ् मोर्दकैःल्ले़ खे़न् ओसेःन्धाङ् चोगुबा पाःन्निल्ले़ कुयाःम्बेओ साप्ते़आङ् पत्छे़॥
3खे़ब्याङ् हाङ्ङिल्ले़ सेःन्दोसुसि, “कल्ले़ लागि मोर्दकैःल्ले़ आक्तङ्बा मिङ्सो इङ्धाङ् इग्र ताक्फा खोसुआङ् वये़बे?”
खे़प्मो के़वाॽबा हाङ्ङिल्ले़ कुसे़वारोबाहाॽरे़ मे़मे़त्तु, “थे़माआङ् खोसुबा होप्॥”
4हाङ्ङिल्ले़ सेःन्दोसुसि, “खे़न् लक्खुम्मो हात् वाॽबे?” खे़न् ये़म्मो हामाने़न् आल्लो खारक् खुने़ॽ यारिप् चोगुबा सिङ्ङो मोर्दकैन् फोःम्मा फाॽआङ् हाङ्ङिन् पेलि फाक्मारे़ लागि हाङ्हिम् लाकात्पा लक्खुम्मो के़रे़द्ये़आङ् वये़॥
5हाङ्ङिल्ले़ कुसे़वारोबाहाॽरे़ नुगप् मे़बिरु, “हामाने़न् लक्खुम्मो ये़प्कन्लो॥”
हाङ्ङिल्ले़ मे़त्तुसि, “खुने़ॽ कत्ना सिगाङ् फे़त्ते़म्मे़ॽ॥” 6आल्ल हामाने़न् सिगाङ् लासे़, खे़ब्याङ् हाङ्ङिल्ले़ खुने़ॽ सेःन्दोसु, “हाङ्ङिल्ले़ आप्फेक् मिङ्सो इङ्धाङ् पिमा निङ्वाॽ चोगुबा मनान् थे मे़प्मा पोङ्बे?”
हामाने़ल्ले़ कुनिङ्वाॽओ इःत्तु, “आङ्गाॽनुःल्ले़ वेॽ हाङ्ङिल्ले़ हात् मिङ्सो इङ्धाङ् पिमा निङ्वाॽ चोगुआङ् वाॽआङ्बे?”
7कल्ले़चोगुल्ले़ खुने़ॽ हाङ्ङिन् मे़त्तु, “हाङ्ङिल्ले़ आत्तिन् मनान् मिङ्सो इङ्धाङ् पिमा निङ्वाॽ के़जोगुॽ, 8हाङ्ङिल्ले़ आप्फेक् कुजाङ्मा चाङ्ङिन् नु अन्निल्ले़ कुधे़गेःक्पो हाङ्मिक्सेन् मे़भत्छुबा हाङ्ङिल्ले़ कुयुक्मा अन्निन् मे़दारुर॥ 9खे़न् चाङ्ङिन् नु अन्निन् के़रे़क्नुःल्ले़ मिङ्सो इङ्धाङ्साबा हाङ्ङिल्ले़ कुसुहाङ्युक्पाहाॽओबा मनाधिक् हुक्मे़सुप्तुर, हे़क्क्याङ् हाङ्ङिल्ले़ मिङ्सो इङ्धाङ् पिमा निङ्वाॽ चोगुबा मनान् खे़ङ्हाॽरे़ खे़न् चाङ्ङिन् मे़जाक्तुर, हे़क्क्याङ् हाबा खे़न् अन्नो मे़युक्खुआङ् ये़क्यक्कोबा माराम्हाॽओ खे़ङ्हाॽ मे़बेःक्किल्ले़ अक्खे मे़लॽर मे़अःक्लरो, ‘हाङ्ङिल्ले़ मिङ्सो इङ्धाङ् पिमा निङ्वाॽ चोगुबा मनाःल्ले़ कुलागि थे चोःक्मनाआङ् वाॽ, खे़न् ओमे़त्ते़म्मे़ॽओ॥’”
10खे़ब्याङ् हाङ्ङिल्ले़ हामाने़न् मे़त्तु, “हारा चोगे़ॽ॥ चाङ्हाॽ नु अन्निन् तारे़ॽ॥ हाङ्हिम्मो लाःप्मा लाम्धेःप्पो के़ये़प्पा यहुदि मोर्दकैन् खे़ने़ॽ के़बाःत्तुबा हे़क्केए मे़त्ते़ॽ॥ खे़ने़ॽ के़बाःत्तुबा पाःन्हाॽओ आत्तिन्नाङ् मे़याःक्ने़न्ल॥”
11कल्ले़चोगुल्ले़ हामाने़ल्ले़ खे़न् चाङ्ङिन् मोर्दकैन् चाक्तु, हे़क्क्याङ् अन्नो युक्खुआङ् खुने़ॽ ये़क्यक्कोबा माराम्हाॽओ अक्खे लॽरे़र खुने़ॽ अःक्ते़, “हाङ्ङिल्ले़ मिङ्सो इङ्धाङ् पिमा कुसिराॽ के़धाङ्बा मनान् थे मे़प्मा पोङ्ॽ, ओमे़त्ते़म्मे़ॽओ॥” 12खे़न् एगाङ् मोर्दकैन् हाङ्हिम्मोबा यम्बा लाम्धेःप्पो नुःक्खे़द्ये़॥ हामाने़न्ग कुधे़गेःक्किन् ते़प्तुआङ् कुनिङ्वाॽ लोरे़र हाराहारा कुहिम्मो पे॥
13खे़ल्ले़ कुमेत् जेरेसे़न् नु के़रे़क् कुन्जुम् कुन्देःङ्बाहाॽ खुने़ॽओ पोःक्खे़बा के़रे़क् पाःन्हाॽ चे़क्तुसि॥ खुने़ॽ कुसुजासाबाहाॽ नु कुमेःत्तिल्ले़ खुने़ॽ अक्खे मे़मे़त्तु, “मोर्दकैःल्ले़ कुदगि खे़ने़ॽ मे़क्मा के़हेःक्ते़आङ् वाॽ, खे़न् यहुदि सुवाङ्ने़भग्र खुने़ॽ कुदक्ले़ङ्वाओ खे़ने़ॽ थेआङ् चोःक्मा के़न्छुक्तुन्ॽ॥ खे़ने़ॽ से़क्खासाङ् के़मे़क्लो॥”
14खे़ङ्हाॽ हामाने़न्नु पान् मे़बारे़र मे़बत्छे़ल्ले़ हाङ्ङिल्ले़ कुसिङ्गारुबाहाॽ मे़गे़रे़ मे़द्ये़, हे़क्क्याङ् ए़स्तरे़ल्ले़ यारिप् चोगुबा साभःङ्जाओ हारा खुने़ॽ मे़देॽरुआङ् मे़बेरो॥
Currently Selected:
ए़स्तर 6: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.