२ तिमोथि 2
2
ख्रिस्तरे़ कुनिङ्वाॽइरे़ खोःप्तुबा थक्सुबा
1हे़क्केःल्ले़ आस्साए, खे़ने़ॽग ख्रिस्त ये़सुओ के़वाॽबा लुङ्गुम्लाम्बा के़धुम्बा पोःक्खे़ॽओ॥ 2यरिक् तोःन्दिहाॽरे़ खुनिॽ तगि के़घे़प्सुबा आबाःन्निन् के़निङ्वाॽइरे़ खोःप्तुसिबा मनाहाॽ हुॽमा के़सुक्पा नसाःन्साबा वेॽ मनाहाॽ हुक्सुप्ते़से़ॽओ॥
3ख्रिस्त ये़सुरे़ से़क्खाएबा कुधक्सुबा कुइसिक् खे़ने़ॽ आनिगे़नु तुक्खे चामाओ चुम् पोःक्खे़ॽओ॥ 4थक्सुबा तुराओ के़याक्पा आत्तिन् थक्सुबान्नाङ् हिम् याःम्बक्को मे़हम्सिङ्ङिन्, कर खे़ल्ले़ग खुने़ॽ कुधक्तुम्बाल्ले़ कुनिङ्वाॽ तामा निङ्वाॽ चोगुॽरो॥ 5हक्चाःत्तो के़लोःक्पे़न् हक्चाःत्तोबा थिम्हाॽ कुइसिक् मे़लोःक्ने़न्ने़ फाॽग्र खे़ल्ले़ थुम्घो मे़घोसुन्लो॥ 6याम्बुधिक्काङ् याःन्गे़मबा मनाःल्ले़ए के़दुम्बा चाःन् काक्नु तगि खुने़ॽए चामा खोमा पोङ्लो॥ 7इङ्गाॽ पाःत्तुङ्बा पाःन्हाॽ नुरिक्काङ् निङ्वाॽ इःत्ते़ॽओ, थेआङ्भे़ल्ले़ दाङ्बाल्ले़ खे़ने़ॽ काक् पाःन्हाॽ कुसिङ् निःप्मा फाॽआङ् इःत्छिङ्साम् के़बिॽरो॥
8सिमे़न्लाम् याम्मो के़हिङ्बा दाउद#२:८ दाउदे़न् इस्राइलिहाॽरे़न् यम्बा हाङ् वये़॥ खुने़ॽ ख्रिस्ते़न्नुःल्ले़ तङ्बे हे़न्छिङ् थिक् (१०००) तगि वये़॥ दाउदरे़ कुमुॽइदाङ्साहाॽओ थिक्पा मसिह (निङ्वाॽफुमाङ्ङिल्ले़ सेःन्दुबा ख्रिस्ते़न्) पोङ्लो, निङ्वाॽफुमाङ्ङिल्ले़ कुमनाहाॽ ताङ्से़ःप्से़ खुने़ॽए पाङ्घुबारो फाॽआङ् माङ्निङ्वाॽपान् के़बाःप्पाहाॽरे़ मे़साप्तुआङ् वये़॥ हाङ्ङिल्ले़ कुमुॽइदाङ्सा ये़सु ख्रिस्ते़न् निङ्वाॽ इःत्ते़ॽओ॥ इङ्गाॽ इङ्भन् चोगुङ्बा सुनाइङ्ङिन् बा कन्नेरो॥ 9बा खे़न् सुनाइङ्ङिन् इङ्गाॽ इङ्भोसुङ्बाल्ले़ चोगुल्ले़ तुक्खे चाआर वाॽआ, हे़क्क्याङ् कुभाङ् के़भेःम्बा कुइसिःक्काङ् इघेःङ्ङो थाआरो॥ कर निङ्वाॽफु पाःन्जाक्किङ्ग आप्फाल्ले़आङ् इघेःङ्ङो मे़धाने़न्लो॥ 10खे़ल्ले़चोगुल्ले़ए निङ्वाॽफुमाङ्ङिल्ले़ सेगुसिबा कुमनाहाॽ ख्रिस्त ये़सुओ से़न्लप् नु मे़न्नुप्मनाबा मिमिदिङ् मे़घोसुर फाॽआङ् काक् तुक्खेहाॽ इङ्गाॽ थम्मा सुक्तुङ्लो॥
11कन् पाःप्मनाबा पाःन्निङ्ग से़क्खाएरो,
आनिॽ खुने़ॽनुए आस्ये़आङ् आवाॽने़ फाॽग्र खुने़ॽनुए आहिङ्लो॥
12आनिॽ चक्मे़ल्लॽए नासि आधःत्तुम्ने़ फाॽग्र आनिॽआङ् खुने़ॽनुए हाङ् आजोगुम्॥
आनिॽ खुने़ॽ आनाॽरुम्ने़ फाॽग्र, खुने़ॽआङ् आनिॽ आनाॽरो॥
13आनिॽ नसाःन्साबा आम्बोङ्ने़न्छाङ् खुने़ॽग नसाःन्साबा चोक्लो॥
थेआङ्भे़ल्ले़ खुने़ॽग आप्फेक् नाॽसिङ्मा मे़सुक्ने़न्लो॥
कुसाङ् के़लबा याःम्बक्
14सेसेहुप्लक्कोबा काक् मनाहाॽ निङ्वाॽफुमाङ्ङिल्ले़ कुनिमाओ हाराॽ खे़ङ्हाॽ पाःन्सुत्लाओ पाःन्धङ् मे़न्जोःक्ने़न्ल फाॽआङ् साम्दिङ् पिरे़से़ॽओ॥ खे़न् पाःन्धङ्ङिल्ले़ नुबा मे़बोङ्ने़न्, कर के़घे़म्बाहाॽरे़ खुनिॽ इम्मोक्लक् पोङ्लो॥ 15निङ्वाॽफुमाङ्ङिल्ले़ कुसिराॽ थाङ्ल फाॽआङ् नुःरिक्काङ् के़सुक्सुक् याःम्बक् चोगे़ॽओ॥ निङ्वाॽफुमाङ्ङिल्ले़ से़क्खाबा पेलिगे़न् कुबाःन्जाक्किन् थो यो मे़न्जोःक्के हुॽरे़से़ॽर सिरिङ्ममा मे़म्बोङ्ङे याःम्बक् के़जोःक्पा पोःक्खे़ॽओ॥ 16कर खे़ने़ॽग कुबुङ्ना कुसम्बा अदङ् पाःन्धङ्ङोलाम् एःक् वये़ॽओ॥ हे़क्तङ्बा पाःन्धङ्ङिल्ले़ नसानिबाहाॽ निङ्वाॽफुमाङ्लाम् माःङ्घा तेॽरुसिरो॥ 17हे़क्तङ्बा पाःन्हाॽग आप्फाल्ले़आङ् मे़न्वेःप्मनाबा याङ्घेःक् कुइसिःक्लो॥ अक्तङ्बा सिक्साम्बाहाॽओग हाइमेनियस नु फिलेतससिरो॥ 18खे़ङ्हाॽरे़ग से़क्खाबा माराम्मिन् ले़रे़त्छुआङ् आनिॽ सिमे़न्लाम् याम्मो हिङ्माङ्ग तगि पोःक्खे़ चुरे़रो लॽरिक् हुॽसुसिआङ् कुभा नसाःन्निबाहाॽरे़ खुनिॽ नसाःन्निन् ले़ङ्सुर वाॽसिरो॥
19कर निङ्वाॽफुमाङ्ङिल्ले़ कुनिसाम्मिल्ले़न् युक्सिङ्गे़न् पाङ्युक्किन् मे़म्मुन्नेए ने़रो, हे़क्क्याङ् अक्खेलॽरिक् साप् लक्सिङ्ङाङ् वाॽरो, “दाङ्बाल्ले़ आप्फेक् कुमनाहाॽ कुसिङ् निःत्तुसिॽरो,” हे़क्क्याङ् “दाङ्बाल्ले़ कुमिङ् के़लोङ्बाहाॽ काक् लायोलाम् माःङ्घाए मे़बोङ्लरो॥”
20यम्बा हिम्मो यरिक् परिक्ले़न् साम्म्याङ् नु युप्पा हे़क्क्याङ् सिङ् नु खाम्मिल्ले़न् चे़त्थ्या नु खप्प्याहाॽ मे़वाॽरो॥ कुभाग इङ्धाङ्बा नु कुभा इङ्धाङ्मेःन्बा याःम्बक्को ओगप् पोङ्लो॥ 21आत्तिल्ले़ फे़न्याःम्बक्किन् ले़रुआङ् सेसे चोःक्सिङ्, खे़ङ्ग इङ्धाङ्बा याःम्बक्को ओगप् पोङ्लो॥ हे़क्केलॽरिक् कुन्दाङ्बाल्ले़ कुयाःम्बक्को आत्तिन् नुबा याःम्बक्कोसाङ् खे़ङ्ग ओगप् पोङ्मा यारिप् पोङ्लो॥
22थाङ्बे़न् मे़न्छियाॽ लॽमालाम् के़दाबा फे़न् निङ्वाॽलाम् एःक् वये़ॽओ॥ हे़क्क्याङ् सेसे निङ्वाॽओलाम् दाङ्बान्नु तुवा के़जोःक्पा मनाहाॽनु साम्योनिमो, नसाःन्नो, मिःम्जिओ हे़क्क्याङ् सनारुङ्ङो वये़ॽओ॥ 23कर कुबुङ्ना कुसम्बा पाःन्धङ्ङिन् नाॽरे़ॽओ, थेआङ्भे़ल्ले़ खे़ल्ले़ग खे़माॽरक् फोःक्खुॽरो॥ 24दाङ्बाल्ले़ के़से़वारोबान् खेमा मे़नुॽने़न्लो॥ खुने़ॽग काक् मे़न्छाम् याप्मिहाॽ लुङ्माॽ के़दुक्पा, हुॽमा के़सुक्पा, हे़क्क्याङ् निङ्वाॽ हाङ्गे़गे़म्सिङ्बा पोङ्मा पोङ्लो॥ 25हे़क्क्याङ् तक्ले़ङ्वाओ के़बोःक्पाहाॽआङ् सिक् नःम्नःम्माङ् खाहुन् पिमा के़सुक्पा पोङ्मा पोङ्, हे़क्केलॽरिक् से़क्खाबा पान् कुसिङ् मे़निःत्तुआङ् निङ्वाॽफुमाङ्ङिल्ले़ खुनिॽ लायोलाम् नुःक्तु तारुसिररो॥ 26हे़क्क्याङ् माफे़न्साम्मिल्ले़ कुनिङ्वाॽ हे़क्के चोःक्मा पाङ्मासि फाॽआङ् इजो युक्तुसिबा पाःन्निन् खुनिॽ निङ्वाॽ से आङ् कुसिङ् मे़निःत्तुआङ् माफे़न्साम्मिल्ले़ कुइजोलाम् पिम्मा मे़सुक्लो॥
Currently Selected:
२ तिमोथि 2: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.