BaRoma 6

In ku yit na anɛn batset na Anet-Isheshek

1Akyɛ fi in da fɛ̀ yit kong ɛ? In da ya yit kashon ni iras anɛn, nɔng Adakunom da ki tonong yit mo itek wu yɛ? 2Ko ni kuro! Na anɛ fi iyit fi in mi kus yit na anɛn yit, da ti in sot yit bafi ira me yɛ? 3Iyin rēn yin fok ngma yit fɛ́ ba kin man ki ra yit abatisma na Anet-Isheshek aYeso, ba mi ki ra yit abatisma sak ni iku wu awɛ? 4Nek anɔng, ba mi ki nɛt yit gung ni iwu na abatisma, in mi sot yit bazining ni iku wu, nek kyɔn tɛ ba kin di donong na Anet-Isheshek ni iku, ayɛt ízɔk Ada Adakunom, anɔng fi iyit da nye yit kusot ayɛt kutset kufas.

5Nek ki in mi sot yit bazining ni iwu ni iku wu, i se gbing-gbing in bi sɛ yit idoro ifaben ni iwu. 6Nek iyit rēn yit fok, ba kin tekak anet azen yit gung ni iwu, nɔng ba bin di fɛt nggɔn anɛn irɔm yit, nɔng da in bi ti in sot yit basam inɛn awo. 7Nek ngma ayɔng fɛ́ a kin man ku, ba man ku bisik nawop inɛn yɔng.

8Yɔkɔnɔng fi in mi ku yit na Anet-Isheshek, in bɛ̀ yit inɔɔk atsak fok, in bi sot yit gung ni iwu. 9Nek in rēn yit fok ye, ba mi donong Anet-Isheshek ni irɛk, a da tɛ a ku kong awo, iku ti i bɛ̀ ice naton wu kong awo. 10Nek iku fɛ́ a ku, a ku kazining pɛɛt nek bafi inɛn ngma kusum, awɛt kutset fɛ́ a se ne, a se ne nek Adakunom.

11Kpaf anɔng, fa yin ace yin tɛ bayɔng fɛ́ ba mi kus na anɛn bá, awɛt ba yet batset na Adakunom nek kusot fɛ́ ba se ne ayɛt Anet-Isheshek aYeso. 12Nek anɔng, i bi won yin inɛn ni i ya igwɔm ayɛt nrɔm yin fi in kus awo, ni inɛn e ki sas yin ni ras yin nggɔn ishim nrɔm yin. 13Da i bi nasap yin nkap nrɔm yin ni iras inɛn awo, ni in sot ares itomong anyas awo, tit ni nasap yin ace yin na Adakunom, tɛ bayɔng fɛ́ ba mi ka ba tirik ni iku sak ni isɛ kutset. Nasap yin nkap nrɔm yin na Adakunom, tɛ ares ntomong ntek. 14Nek inɛn da ti i sot atekari yin awo, nek da i ti se yin na ngamang ntsi awo, tit na ngamang itek Adakunom.

Basam sak nse kusot kutabat

15Akyɛ fi in da fɛ̀ yit ɛ? In da ras yit inɛn nek da in se yit na ngamang ntsi awɛ? Kɛ nek in se yit na ngamang itek Adakunom ɛ? Kaa, awey yo! 16Iyin rēn yin fok ngma ayɔng fi i ku nabak yin ace yin na awop wu, ni foos yin ifɛ̀ wu tɛ basam, i mi sot yin basam, ayɔng fi i ku foos yin e awɛ? Ke ni sot yin basam sak ni inɛn, fi ibɛ́s ni iku, kɛ ni i sot yin basam ni ifoos ifɛ̀ Adakunom, fi ibɛ́s ni kusot kutabat. 17Won ifeng ni i sot ifɛ́ Adakunom, nek ngma fi i tsang yet yin basam inɛn yame, awɛt yɔkɔnɔng i mi sot yin bafi ifoos ifɛ̀ Adakunom na ayɛ yin ngma kusum naton nkyɔrɔk fɛ́ ba mi ki tees yin ina. 18Ba mi ki bisik yin washak ni inɛn, i mi sot yin basam kusot kutabat.

19In tsin cɛɛt ni yin ni irèn fɛ́ banet mi di mɛɛ, nek nggɔn anet awe in yet nfi kurat. Kyɔn ti fi i mi di mɛɛ yin ni nasap yin nkap nrɔm yin ni iras ntomong isam ngbɛk-gbɛk nɛ ntomong iboroso anyas, won yɔkɔnɔng nasap yin ina ni in sot nfi isam kusot kutabat fi ku bɛ́s ni kusot ajɛrɛ. 20Ni izen fi i kin yet yin basam inɛn, kusot kutabat kin bɛ̀ ice azaton yin awo. 21Awɛt akyɛ itek fi i kin di sɛ yin ni nkyɔrɔk nang fi in mi sot ikyɛng nsum ni yin ɛ? Nkum nkyɔrɔk e yɔng, yet iku. 22Awɛt yɔkɔnɔng fɛ́ ba mi ki bisik yin washak ni bɔk inɛn, i mi sot yin basam Adakunom, itek fi i mi sɛ yin, yet kusot ajɛrɛ, fi nkum ko yet kutset vit igang. 23Nek itarang inɛn yet iku, awɛt kunang Adakunom yet kutset vit nkum ayɛt Anet-Isheshek aYeso, aTisa yit.

Currently Selected:

BaRoma 6: IbaasNT

Highlight

Copy